Nu naline Jisas empo noula ka kelo wunini
(Matyu 21.23-27; Mak 11.27-33)
20
Kaire wongke,
Jisas waiye yoplo mi yukuleye uma monre empo tempol ka yoplo miuporo empo God,
nu bikpris empo tempol ka nu uma empo namalene lo nakle nu ilauma noloni plele Jisas.
2 Ka nu nireni wu nanrona,
“Yene yiremi mu,
fina sa yawe yene noula ka kelo fai yangkeye ommo namo?
Ka kelo namo empo yolowi pei?”
3 Ka Jisas yirengkle nu nanrona,
“Ki re ese kalile pone mi wongke mee sa pone ese pireki ki.
4 Empo Jon Baptais baptaisimye nu uma,
ompla namo empo yolo heven wee,
yemei uma empo pikeni?”
5 Nu nuka mi none kore ka nire nanrona,
“La mone mire nanrona,
‘Ompla mee empo yolo heven,’
wu ese yalile mone nanrona,
‘Fikami ka pone fei bilip?’
6 La mone mire nanrona,
‘Ompla mee sa uma empo pikeni,’
sa uma mingklari ese roma nople mone,
empo fika,
nu empo bilip nanrona Jon Baptais wu sa profet.”
7 Nanrona fane nu nireni wu nanrona,
“Mu fei namale ompla namo empo yolowi pei.”
8 Ka Jisas yirengkle nu nanrona,
“Nanrona fane ki re ese fei kirepi pone fina empo yake ki noula ka kelo fai ki ese kangke ommo namo.”
Mi riri empo nu uma fai nuralene nengkle
(Matyu 21.33-46; Mak 12.1-12)
9 Ka Jisas yirengkle uma mingklari mi riri wongke kore nanrona,
“Mana wongke paiyi yoku wain nengklele.
Empo wu yokle wain pekimo,
wu yali nengkle namo paiyi nu uma plai ese nopane ka wu wone sa paiyi ripkikli waiye mokoi wongke.
10 Empo wain namo nale napale,
wu yawane mana wongke fai yangke ommo woneni paiyi nu uma fai nopanene wain nengklele ka yirengkle nu ese nane wu wain nale plai.
Ka nu uma fai nopanene wain nengkle namo samo nufu wu ka nawane wu paiyi kore mewlen nro.
11 Nengkle ripile namo yawane mana wongke kore fai yangke ompla woneni paiyi kore nu.
Mana namo re nu samo nufu wu ka nu minrinane wu ka nawane wu paiyi mewlen nro.
12 Wu yireni wongke kepe paiyi nu ka wu re nu naulnekli wu ka nengke wu palo nengklele piyowa.
13 “Ka ripile empo wain nengkle yire nanrona,
‘Ki ese kangke fika?
Ki ese kireni mela ki koneni ese paiyi.
Auna kinini namo ki fai wolake wu wamo sa nu ese nupu mi wunini.’
14 “Ka nu uma empo nopane wain nengkle namo nulu mela wunini namo ka nu nuka mi nanrona,
‘Mela namo ese yem koii empo nangka woneni ka wu ese yuꞌpu ommo mingklari empo wone nangka kore.
Mone ese mufu wu ri,
sa mone ese muꞌpu ommo mingklari namo.’
15 Nanrona fane nu nengke wu palo wain nengkle piyowa ka nufu wu ri.
“Ka nengkle ripile namo ese yangke ompla fika empo nu uma fai nopanene nengkle namo?
16 Nanrona fane wu ese yolowi ka yuflo nu uma empo nopanene nengkle woneni namo rili,
ka wain nengklele namo wu ese yali nu uma kekeple kepe nopane.”
Empo uma mingklari namo nupu mi namo ka nire nanrona,
“Namo sa fafaile!
Wu yire yangke nanrona sa nenrape.”
17 Jisas kilyulu nu ka yalile nu nanrona,
“Empo fikami ka nu neꞌre mi mee wiye buk empo God yire nanrona,
‘Roma empo nu uma fai neꞌre mow numplewa
ka nire nanrona,
roma mee fafaile
paiyi se nu kepe namale nanrona,
roma namo sa kelo rikepone roma plai
wu fai samo kelyaneye mow’?a
18 Nu uma fopi empo firipanro roma riri namo,
roma namo ese yaulere nu peplere pitpitiri.
Ka uma fopi empo roma firyolo ka yisolo nu namo,
nu ese samo ulu pon ro kei.”
19 Nu uma empo namalene lo ka nu bikpris empo tempol napu rokoi nire fai ese wampane nuna Jisas,
empo fika nu namale nanrona wu yire mi riri namo sa paiyi nu fane.
Ka nu ke numne uma mingklari namo.
Nu uma nane romaula paiyi Sisar
(Matyu 22.15-22; Mak 12.13-17)
20 Nu uma empo namalene lo ka nu bikpris samo nulune Jisas,
ka nirengkle nu uma ese samo ripi nalana mi wunini.
Nu uma empo nupune mi empo Jisas namo,
ke kalnire nanrona nu nire ese samo nupu mi wunini.
Nu samo ripi nalana mi wunini ka nire nanrona,
nu ese nupu mi plai fei uporo empo wu yoploye,
sa nu ese kotim wu paiyi mana fai yopaneye gapman empo none.
21 Nanrona fane nu nalinene wu nanrona,
“Tikse,
mu namale nanrona mi empo yene yoploye,
ka yukuleye nu uma namo sa uporo wamo.
Ka mi empo yene fai yirengkleye nu uma,
yene fai yirengkleye nu uma uporo ka uma fafaile plau.
Ka mi empo yene fai yukuleye nu namo,
sa yene fai yupene mi alwone empo God ro.
22 La yene sa wola rongkele,
mu ese mina romaula paiyi Sisar ese uporo wee onne?”
23 Ka Jisas namale pu ommo empo nu nire kaliflenaline wu namo,
ka wu yirengkle nu nanrona,
24 “Pone pukune ki romaula wongke.
Fela ka noula finani,
wiyeye romaula namo?”
Ka nu nireni wu nanrona,
“Sa Sisarni.”
25 Ka wu yirengkle nu nanrona,
“La empo nanrona,
ompla fika empo Sisarni pone pane Sisar,
ka empo Godni pone pane God.”
26 Nanrona fane nu fei iflenali wu ompla empo wu yirengkleye nu,
nama empo nu uma pinuma mingklari namo.
Ka nu wolnipanri mi empo wu yireye namo ka nu samo mi sa rulu.
Mi empo nu uma isi rili nemei kore ka mi empo uma nemnuꞌpune
(Matyu 22.23-33; Mak 12.18-27)
27 Nu Sadyusi sa nu uma fai nire nanrona nu uma empo rili namo ese fei nemei kore.
Plai empo nu noloni Jisas nire naline wu mi wongke.
28 Ka nu naline wu nanrona,
“Tikse,
Moses empo isi yeꞌre mi wongke munini yire nanrona,
‘La mana wongke yem pin ka fei yuꞌpu kongkom ka wu ri,
ka wone wongke ese as yem pin namo fai yuꞌpu kongkom ese yauleni rani empo isi ri.’
29 Empo isi nu 7pla inompi ranimpi nainene.
Rani empo nu yem pin ka fei yuꞌpu kongkom ka wu ri.
30 Ino wu re yem pin namo.
31 Ka ino wongke yupene wuyane namo wu re yem pin namo,
ka nu nangke nanrona nro paiyi ka nu rili kei.
32 Empo nu rili pekimo se pin namo ke ri.
33 Nu 7pla inomranimpi isi nem pin namo,
nanrona fane empo nu rili ka empo nu pinuma nemei kore,
pin namo sa ese waiye pin finani?”
34 Ka Jisas yirengkle nu nanrona,
“Nu uma alma empo ewelme nuꞌpune pinmana ka nu pinmana painri nuꞌpune uma alma.
35 Ka pinuma empo God wone yulu nu samo uporo wamo nama woneni sa nu ese nemei kore ka kingke nane wu naine plau,
nu uma namo ese fei nemnuꞌpu kore.
36 Empo fika nu ese fei rili kore.
Nu ese naine resuklu ensel empo God.
God wone empo yangke nu nemei matmat fane nu ese naine yukaine nu kongkom woneni.
37 La mi empo niꞌpi yuꞌpoye ilo pitiri namo,
Moses empo yukune mone nanrona nu uma empo rili ese nemei kore,
empo fika,
Moses youw Manawamo nanrona,
‘God empo Abraham,
Aisak ka Jekop.’b
38 God namo,
wu seke God empo nu uma empo riline.
Wu sa God empo nu uma fai naine laip,
empo fika,
nama wunini fai yuluye uma mingklari yukaine nu naine laip.”
39 Nu uma plai empo namalene lo nire nanrona,
“Tikse,
mi empo yene yireye namo sa uporo wamo.”
40 Nu fei wolkelo fane wongke empo nu fei yaline wu mi plol wongke kore.
Krais wu sa mana fina auna?
(Matyu 22.41–23.7; Mak 12.35-40)
41 Ka Jisas yalile nu nanrona,
“Fikami ka nu fai nire nanrona Krais wu sa king Devit auna?c
42 King Devit wone empo yoplo mi wiye Buk Song yire nanrona:
‘Manawamo empo yireni Manawamo kinini nanrona,
“Yene ese waiye mewmenrulpo kinini,
43 paiyi la ki kangke nu uma fai nangke fafaile yene
ese naine yene rew ruwe.” ’d
44 King Devit fai youw wu nanrona,
‘Manawamo.’
Nanrona fane ese rongkele sa wu ese waiye yukaine auna wunini kore?”
45 Empo uma mingklari naine nupune mi,
Jisas yirengkle nu disaipol woneni nanrona,
46 “Pone konsamo pulupe nu uma empo namalene lo.
Nu fai wolpeni wamo fai niperwane amplapi angkangklen,
ka naraine poinpanrene ka nu wolpeni wamo fai nu uma ese nakle nalole mew empo koii fai nenrune ommo,
ka nu fai naine sia empo neli risi monre empo mow koli,
empo kaire nu nangkene kola wamo sa nu uma ese nulu nu nanrona nu nuna noula wamo.
47 Nu fai nesapu mi angklen sa nu uma ese nire nu uma uporo wamo,
ka ringklene nu fa kalnaniline uma pinuma empo inpi rili nupolene ka kapnolone ompla mokoi nuningkle.
Nu uma nanrona,
God ese kotim nu,
nu ese nungkam eni wamo.”