Buk Aposel namo, ke yapalyolo mi empo wiye Miuporo Luk Yeꞌre. Luk wu sa mana isi yeꞌre Buk Aposel namo. Empo buk namo, mone namale nanrona Holi Spirit empo yuku nu aposel rokoi wola nu aposel noplo mi empo Jisas naraine taunwamo Jerusalem ka painri Judia ka Samaria ka mokoi mingklari empo pike mee (Pulu 1:8).

Buk mee yoplo sios empo Jisas empo yemei Juda ka yemei wamo ka paiyi mokoi mingklari empo pike. Luk samo wola yire ese yuku mone ommo empo Jisas ka laip empo mone pinuma fai mupeneme wu. Ka ompla namo samo yupene mi isi God yuka ka yangke plau nu pinuma empo Israel.

Ompla wamo wongke empo buk Aposel yoploye namo, sa ommo empo Holi Spirit. Namo sa Spirit empo God wone. Isi emen taim empo Pentikos, Holi Spirit yolo nu disaipol empo Jisas ka yali kelo ka ila uporo nu.

Empo buk mee, mone ese mulu mi angklen empo nu aposel noplo nukulene nu pinuma empo noplone miuporo empo Jisas. Mone ese namale nanrona pinuma mingklari ke nupene miuporo namo ka sios mingklari ke nemei ka neli kelo wamo.

Buk Aposel sa yunali mi mingklari empo nu aposel, ka mi mingklari namo sa ommo empo Pita yane Pol isi nangkene. Pita wu sa aposel wokera fai yupeneye Jisas yane naraine mokoi mokoi. Ka empo Pol, isi emen wu fei waiye plau Jisas, wu isi amparpunu yufuye sios empo Jisas ri. Jisas empo youw Pol ka yangke wu yemei yukaine mana fai yungkamye ommo wunini.

Ploli plai empo buk mee, empo Luk yire yoplo ommo empo nemeine Pol, wu fai yire mi mee, “mu” mangke. Uma saveman mingklari wola nire nanrona Luk wone ro isi yane Pol naraine kaire plai. Nanrona fane wu fai yire mi mee “mu” empo naimele.