Buk Aposel
Ommo empo nu aposel empo Jisas Krais nangkene
Jisas pari heven
1
Manawamo Tiofilus,
buk wongke namo empo isi ki keꞌre paiyi yene namo,
sa mi empo ommo mingklari empo emen Jisas yangkeye ka mi empo wu yukuleye nu pinuma wi plele empo God yumane wu pari heven.
Ka naimele sa ki fai keꞌre buk wongke kore.a
2 Emen ka wi resuklu kaire namo God yem wu pali riri.
Se kingke wu yemei alelele nu aposel isi wu yina,
ka kelo empo Holi Spirit yirengkle nu ommo wongkwongkeni nu ese nangkene.
Se sema God yem wu pali riri. b
3 Jisas wu isi yungkam eni wamo ka nu uma nufu wu ri ka wu yemei kore,
ka wu fai yemeiye nu uma alele ka wu fai yoploye mi empo kingdom empo God paiyiye nu uma resuklu 40pla kaire.
Wu yangke ommo mingklari fai ese yukule nu aposel woneni nanrona wu sa nawaiye malma plau.
4 Kaire wongke,
Jisas yakle nu aposel woneni naine nonene,
ka wu yirengkle nu mi kelo nanrona,
“Pone ese paipe taunwamo Jerusalem nro ka poru ompla uporo isi Aina yuka mi yire wu ese yape pone,
yukaine mi isi ki kirepike pone namo.
Jesus Ascends to Heaven (Aposel 1:4-11)
5 Isi empo Jon namo,
wu sa fai baptaisimye nu uma mii siwolenro,
ka kaire sa wi ekleneye fai God ese baptaisim pone Holi Spirit.”
6 Empo nu noloni nane Jisas nemnoku plau,
nu aposel ke naline wu nanrona,
“Manwamo,
naimele yene ese yangke kantri Israel se waiye kelo ka wu ese yem king woneni fai ese yopaneye wone kore wee onne?”c
7 Ka Jisas yirengkle nu nanrona,
“Namo seke ompla poneni la pone ke pire namalepe.
Aina God wu wone nro sa namale taim,
ka wu wone nro sa ese yuluye ommo mingklari namo.
8 Ka empo Holi Spirit yolo pone,
wu ese yangke pone pem kelo ka pone ese paipe resuklu uma empo poplo mi empo ki ommo mingklari isi pone pulu ki kangkeke pouwpai Jerusalem ka mokoi mingklari plai empo nainene distrik Judia ka distrik Samaria ka paiyi mokoi mingklari plai empo pike mee.”
Jisas pari heven
9 Empo Jisas yoplo mi namo pekimo,
rongka God yumane wu pari heven ka nu aposel neli nulune wu empo pariye namo paiyila kupu yolo yuforo kei wu ka nu fei nulu wu kore.
10 Empo nu aposel neli kilnulune nemi riri empo wu pariye namo,
faflai nro mana plainrane empo naile ommo wow noloni neli eklene nu.
11 Ka wuyane nirengkle nu nanrona,
“Pone uma empo distrik Galili,
empo fikami ka pone ke peli pinra paripe nemi?
Naimele pone pulu Jisas,
God wone empo yumane wu pari heven yupone pone pu.
Ka wu ese kingke yolo kore yukaine empo pone pulupe wu pariye heven.”
Matias yem koii empo Judas
12 Nu aposel nupone moul alwola nu fai nouwne Oliv ka nu panro painri kore Jerusalem.
Moul alwola Oliv namo sa yeye eklene Jerusalem,
sa fei amone.
Angklen empo wu sa yukaine kilomita wokera nro.d
13 Empo nu noloni,
nu painri panri koii rola wongke empo yeye mow riri namo,e
koii rola namo sa noneni fai nainene.
Nu uma empo nainene namo sa,
Pita,
Jon,
Jems ka Andru,
Filip ka Tomas,
Bartolomyu ka Matyu,
Jems wongke Alfius auna ka Saimon mana wongke empo uma Selot,f
ka Judas,
Jems wongke auna.
14 Nu fai wolilwine nro ka ningki kaire nu fai nemnoku ka nesapune.
Nu pinmana plai nane Jisas moka Maria ka nu inomranimpi empo Jisas nu re fai nakle nu naine plau.
15 Empo kaire wongke,
Pita yemei yeli iplele empo nu 120-pla pinuma fai bilipne Jisas ka yirengkle nu nanrona,
16-17 “Ai inomranimpi kinini,
isi Holi Spirit yireni Devit yoplo mi plola wiyeye buk empo God ka mi namo yemei alwone.
Ka mi namo sa won samo paiyi Judas.
Wu sa wongke empo mu uma empo Jisas yem wu fai ese yangke ompla woneni.
Ka wu yukule nu uma Jisas ka nu nukaneire wu.”
18 Nu iimuma empo Jisas nane romaula Judas,
fai ese yem koii empo ompla fafaile wone yangkeye namo.
Rongka wu paiyi ka yem pike plola wongke.
Ka empo pike namo,
wu firyolo ila yoku pike ka puna wunini yopli ka mokpuna yane aulpuna wunini okolnolo rilele.
19 Pinuma mingklari empo Jerusalem nupu mi empo ompla namo.
Nanrona fane nu nouw none moile mi pike rola namo sa nanrona “Akeldama.”
Mi nomu empo nu nouwne noula empo pike namo sa nanrona,
“Pike empo oli.”
20 Ka Pita fai yire kore nanrona,
“Mi wiyeye Buk Sam yire nanrona,
‘Koii rola empo wu namo kiki ese yumalo,
ka mana wongke ese fei yuluye koii rola namo.’g
Ka
‘Mana wongke sa ese yem koii wunini ka yangke ompla wunini ka paiyi risi nu uma.’h
21 Nanrona fane ese uporo mu ese mina mana wongke empo nu uma fai name mu maraime mupeneme Manwamo Jisas,
22 empo isi Jon baptaisimye nu uma wi plele kaire empo God yumaneye Jisas yuponeye mone ka pariye heven.
Mana namo ese yeli plau mu ka ese yoplo mi empo Jisas riye ka yemeiye kore.”
23 Nanrona fane nu aposel nina noula empo mana plainrane,
Matias yane Josep nu fai nouwne wu Barsabas ka noula wongke sa nu fai nouwne wu Jastus.
24 Rongka nu nemnoku ka nesapu nanrona,
“Manwamo,
yene namale wolpuna empo nu uma mingklari pu.
Yene nro ese yukule mu mana fina empo yene wolaye
25 ese yem koii empo Judas,
fai ese yangke ompla yukaine aposel.
Empo fika,
Judas empo yupone ompla namo pu ka paiyi mokoi empo wone ese paiyi waiye.”
26 Nanrona fane nu aposel raraku satu,
ka satu firpalo riri raune noula empo Matias.
Nanrona fane nu nem Matias paiyi rere plau nu 11pla aposel.i