Holi Spirit yolo kaire empo Pentikos
2
Kaire empo Pentikosa yolowi ka nu uma empo fai bilipne namo noloni nemnoku naine mow wokera.
2 Ka wampanenro ompla wongke yangke uku kelo wamo yukaine rapu kelo yolo heven imelwa kei mow monre empo nu uma mingklari nemnoku nainene namo.
3 Ka nu nulu ompla yukaine niꞌpi empo peplere nolo ka naine alinine nu uma wokwokera ila riri.
4 Holi Spirit yolo konralo nu ka yangke nu nemei noplole moile mi empo nu isi fei namalene,
empo fika Spirit empo God wone yangke,
fane nu noplole mi namo.
5 Empo taim namo,
nu Juda fai nosinanene God sa nainene taunwamo Jerusalem.
Nu uma namo,
empo noloni kantri wongkwongkeni.
6 Empo uku wamo yemei,
nu uma mingklari empo noloni nemnoku naine koii wokera namo ke nupu nanrona ka nu ke wol wongkeni,
empo fika nu uma wokwokera ke nupu nu uma empo bilipne namo ke noplolene moile mi nuningkle.
7 Empo taim namo nu uma namo ke wol wongkeni wamo nire nanrona,
“Nu uma namo ke noplolene moile mi munini nu uma namo sa nu uma empo Galili fane.
8 Fikami ka mu uma mingklari empo maime mele ke mupu nu noplolene moile mi empo mu wokwokera?
9 Plai empo mu sa nu uma empo kantri Partia,
ka Midia,
ka Elam.
Ka plai empo mu sa nu uma empo distrik Mesopotemia ka plai empo mu sa nu uma empo Judia.
Ka plai empo mu sa nu uma empo provins Kapadosia ka provins Pontus ka Esia.
10 Ka plai empo mu sa nu uma empo distrik Frigia ka Pamfilia.
Ka plai empo mu sa nu uma empo kantri Isip ka mokoi ploli empo distrik Libia naine eklene taun Sairini.
Ka plai empo kantri Rom re naine mele,
11 plai empo mu sa Juda ka nu plai sa mu fai makle mesapume.
Ka plai empo mu sa nu uma empo ailan Krit ka distrik Arebia.
Mu uma mingklari namo mupu nu noplolene moile mi munini ka nu noplo mi empo ommo wamfafai empo God yangkeye.”
12 Nu wol wongkeni wamo ka nu fei namale ompla wongke,
nanrona fane nu nemnali none kore nanrona,
“Ompla empo yemeiye namo,
nomu empo wu sa ke rongkele?”
13 Plai empo nu ke nukailene nu ka nire nanrona,
“Nu uma namo sanro naikolno mii kelo yukaine wain fane nu ke nangke nanrona.”
Pita yoplo mi empo God
14 Nanrona fane Pita yem mi empo nu aposel plai ka wu yemei yeli riri ka yire mi kelo paiyi nu pinuma mingklari ka wu yirengkle nu nanrona,
“Pone uma Juda ka pone uma mingklari empo polopi paipe Jerusalem samo pupu mi kinini sa pone ese sam namale nomu empo ompla empo pone pulupe mee.
15 Naimele an 9 kilok ningkinamnole fane,
ka nu uma mee fei naikolno mii kelo yukaine wain empo pone pirepe namo.
16 Ommo yukaine empo pone pulupe naimele,
sa Profet Joel isi yoplo mi wunini yire nanrona:
17 ‘God yire nanrona,
“Kingke,
taim pike mee yire pekimo,
ki ese kaiku Spirit kinini paiyi nu uma mingklari empo pike.
Nu kongkom pinmana ka kongkom alma poneni,
ese noplo mi kinini yukaine nu profet.
Nu efapu mana poneni,
ki ese kenmaire nama nunini sa nu ese nulu ompla yukaine nu niyolo ruwila
ka nu uma alma poneni ese niyolo ruwila empo ommo.
18 Nu uma ka pinmana fai nangke ompla kinini re,
ki ese kaiku Spirit kinini paiyi nu
ka nu ese noplo miuporo kinini yukaine nu profet.
19 Ki ese kangke ommo wongkwongkeni ese naine nemi riri
ka mirakol wamfafai empo pike ruwe mee,
oli ka niꞌpi ka rulu wamfafai ese nemei.
20 Kaire ese yuforo ka mokoi ese ningki
ka kali ese kaka wamo yukaine oli.
Ommo namo ese nemei se sema kaire wamo empo Manawamo ese yolowi plau kelo ka glori woneni.
21 Nanrona fane nu uma fopi empo fai nouwne noula empo Manawamo,
Nu pinuma namo,
Manawamo ese mewmew nu ka ese yangke nu naine uporo.” ’b
22 “Pone uma empo Israel samo pupu mi mee,
Jisas empo taun Nasaret,
ommo isi wu yangkeye yemei alele ka pone pulu mirakol wamfafai mingklari isi wu yangkeye.
God yangke ommo mingklari nemei mew wunini sa pone ese namale nanrona God wone empo yire ka wu yemei.
Ka mirakol wamfafai isi pone pulu ka namale pu.
23 Nu uma fafaile empo mewmewne pone ka pone pona wu yapa kruse ka wu ri.
God wone isi namale nomu empo ommo namo pu fane wu yawane wu yolo pone.
24 Ka God yangke wu yemei kore ka yupone eni wamo empo wu riye namo,
empo fika kelo empo ri ese fei yukairi wu waiye.
Es onne!
25 Devit isi yoplo mi empo wu nanrona,
‘Ki fai kulu Manawamo fai yeli ki ungklamyen ningki kaire.
Wu fai yeli eklene ki.
Nanrona fane ki fei kum ompla wongke fafaile.
26 Nanrona fane ki woluporo ka mireꞌfa kinini kire mi upor uporo ka ki woluporo wamo.
Ka ki ese kaike wolpun raulo ka koru ommo upor uporo yukaine God ese yake ki.
27 Empo fika yene ese fei mew yimane ki kaike mokoi empo nu fai niꞌline nu uma empo riline.
Ka yene ese fei mew yimane mana yeneni fina empo holi namo nale wunini ese unu ka pliki pike pulale.
28 Yene yuku ki rokoi uporo fai nangke ki kaike laip.
Yene ese waiye eklene ki,
ka yangke ki woluporo wamo.’c
29 “Pone inomranimpi kinini ki kirepi pone,
mi alwone mone maumfle Devit.
Wu ri ka nu niꞌna wu,
ka pike pulale empo wu sa nawaiyeye empo taim naimele.
30 Ka Devit wu sa profet wongke wu empo namale nanrona God isi yuka mi wu mi alwone nanrona God ese yangke wongke empo nu uma oli oikenra empo wone ese yem koii empo wone ka waiye yukaine king.
31 Devit sa namale ompla fika empo God yire yangkeye,
ka wu yire Krais ese yemei kore.
Wu yire nanrona God ese fei yupone wu waiye koii empo uma rili pu,
ka nale wunini ese fei unu ka pliki pike pulale.
32 “God yangke Jisas yemei kore pu,
ka mu pinuma mingklari nama mulu ompla namo.
33 God yangke noula wunini yemei wamo ka yangke wu waiye mewmenrulpo empo wone.
Ka aina God yane wu Holi Spirit yukaine isi wu yuka mi wu.
Ka Jisas yireni Holi Spirit namo fai yangke ompla yukaine empo pone pulupe ka pupupe.
34 Devit fei pari heven ka wu ke yire nanrona,
‘Manawamo ke yireni Manawamo kininid nanrona,
“Yene wai ka yem koii yeneni empo yeye mewmenrulpo kinini
35 ese paiyi plele taim namo ki ese kangke yene ese yumalo nu uma empo nangke fafailene yene.” ’ ”e
36 Ka Pita yirengkle nu kore nanrona,
“Nanrona fane,
pone uma mingklari empo Israel samo namale ompla namo:
Pone pufu Jisas ka pona wu yapa kruse ka wu ri.
Ka God yangke wu waiye yukaine Manawamo ka Krais.”f
37 Nu pinuma mingklari empo mokoi namo nupu mi empo Pita namo ka mi namo samo yem wolpuna nunini ka nu naline Pita yakle nu aposel plai nanrona,
“Inomranimpi!
La mu ese mangke fika?”
38 Ka Pita yirengkle nu nanrona,
“Pone ese samo penmaire wolpuna ka pupone ommo fafaile empo pone fai pangkepe,
ka pem baptais noula empo Jisas Krais sa wu ese yuꞌpole ommo fafaile empo pone pangkepe sa God ese yape pone Holi Spirit.
39 Mi namo sa poneni,
pakle kongkom poneni ka nu uma ese nemei wairu pone.
Ompla namo sa nu uma mingklari yukaine Manawamo God moneni youw nu.”
40 Wu fei yire mi namo nro,
onne,
wu yoplo mi mingklari fai kelyali nu nanrona,
“Pone ese pupone nu pinuma empo fai nangkene ommo fafaile namo,
ommo fafaile namo ese yemei nu.”
41 Nu pinuma mingklari namo empo bilipimne mi empo Pita yireye namo,
sa nu baptaisim nu.
Namba empo nu uma empo bilipne ka nemne baptais namo sa resuklu 3,000 pinuma,
ka namba namo sa wi rere plau nu uma empo isi bilip pu.
Nu uma empo fai bilipne namo naine wolpuna wokera
42 Nu pinuma fai samo bilipne namo wolpeni nire nupu mi empo nu aposel nukulene nu,
ka nu fai mewmewne none kore.
Nu fai nakle nu nemnoku nesapune ka nakle nemnoku nonene yukaine Jisas wone isi yukuleye nu.
43 God yangke nu aposel empo Jisas nangke mirakol wamfafai ese nuku kelo empo God,
ka mirakol namo yangke nu pinuma mingklari nelreꞌfa nengklem nolo kei.
44 Nu uma empo fai bilipne namo nu fai samo nemnokune ka ommo mingklari empo nu nunaline namo,
sa nu fai nempulune plau.
45 Nu fai nenrune pike ka ommo mingklari plai noneni ka nu uma nuꞌpune sa romaula namo nu fai nepinaline nu uma empo ommo onne.
46 Ningki kaire nu fai nemnoku naine tempol ka nu fai nemnoku nonene ommo mow wokwokera ka nu fai woluporo ka ainemne.
47 Nu fai ningki kaire nererine noula empo God,
ka wolpuna empo nu pinuma mingklari samo woluporo nu uma empo bilipne God.
Ka empo kaire wokwokera Manawamo fai yuꞌpu kore nu pinuma plai ka yangke namba empo nu pinuma empo bilipne namo sa ke pari wamoye.