Pita yemplekuru mana empo rew fafaile yemei uporo
3
Kaire wongke,
Pita yane Jon painri panri tempol ka kaire sa yeli yukaine 3 kilok ningkipopli.
Namo sa taim empo nu Juda fai ningki kaire nesapune ningkipopli.
2 Empo kaire namo wuyane naraine painrine,
ka wuyane nulu uma nongkole mana wongke empo rew rili pu namo nolonine.
Isi moka yem wu wi plele empo wu wamoye,
wu won isine rew fafaile fai waiyeye nro.
Ka ningki kaire nu uma plai fai nongkolene wu noloni nirane wu waiye tempol plerama nu fai nouwne “Rama Uporo” fai wu ese yuyali nu uma ese nane wu romaula.
3 Empo wu yulu Pita yane Jon noloni nire fai ese painri panri tempol ka wu yaline wuyane fai ese nane wu romaula plai.
4 Ka Pita yane Jon kilnulu wu paiyi ka Pita yireni wu nanrona,
“Yene yulu kikane!”
5 Ka mana namo yupu mi empo wuyane empo fika wu wola nro yire wuyane ro ese nane wu ommo plai.
6 Ka Pita yireni wu nanrona,
“Ki sa romaula onnele fane ese fei kawe yene.
Ompla empo ki kunake naimele,
ese kawe yene sa noula empo Jisas Krais empo Nasaret,
yene yemei yeli riri ka waraiye.”
7 Pita yuna mewmenrulpo wunini ka mewmew wu yemei.
Wampane nro,
rewnample wunini fai kelole kore ka wu samo rew yunrama ka yeli.
8 Wu yulyulpariye riri ka waraiye.
Ka yupene wuyane panri monre empo tempol ka wu waraiye ka yulyulpariye ka yereriye noula empo God.
9 Empo nu pinuma mingklari nulu wu waraiye ka yereriye noula empo God,
10 ka nu sa namale wu pu wu fai ningki kaire waiye ka yuyaliye uma pinuma romaula plerama empo tempol fai nouwne Rama Uporo,
ka nu wolnipanri ka nemnunali none kore nanrona,
“Ompla fika ro yemplekuru mana namo fane wu uporo?”
Pita yoplongkle nu uma empo wolnipanri namo
11 Empo kaire namo mana namo mew yuna mew empo Pita yane Jon ka yakle nemnoku neli plau tempol ekleri fai nouwne “Ekleri empo Solomon.”
Ka nu uma mingklari,
wolnipanri ompla namo ka nu wampane nempliri noloni koii namo.
12 Empo Pita yulu nu nanrona,
ka wu yirengkle nu,
“Pone Israel,
pone kepe wolnipanri ompla fika?
Fikami ka pone ke kilpulupe kikane?
Pone sanro pire kikane empo muna kelo onro kikane samo maime uporo nama empo God fane kikane memplekuru mana mee ka wu uporo wola yemei waraiye riri wee?
Sam onne!
13 God empo Abraham,
Aisak,
Jekop ka nu flili empo mone fai isi yereriye noula empo mana empo fai yangkeye ompla wunini,a
noula empo wu sa Jisas.
Wu isi pone pane wu paiyi mew empo nu iimuma ka nu nufu wu ri ka emen pone ke fei namale wu.
Ka empo Pailat yire wu ese mew yimane Jisas paiyi,
ka pone ke fei wola uporo Pailat ese mew yimane Jisas paiyi.b
14 Ka pone ke fei samo wolapapape mana holi uporo namo ka pone ke pire nu mewnimane mana empo isi yufu mana riye namo ke yolo moile.
15 Ka pone pufu Jisas wu sa mana nomu wone fai ese saimolo nu pinuma ese naine laip.
Wu yolowi pone ka pone pufu wu ri,
ka God yangke wu yemei kore ka waiye laip.
Kikane isi mulu ompla namo nama munini fane kikane naimele ningki kaire namoplome wu.
16 “Mana Jisas namo,
kikane fai mesapume noula wunini fane noula wunini namo yemplekuru mana mee yukaine empo pone pulupe wu mee.
Empo fika,
kikane fai mesapume noula wunini,
fane wu wone yereri bilip kikaneni.
Ka bilip namo empo yemplekuru mana namo empo pone namalepe wu namo empo yemei kelo ka pone mingklari pulu nama poneni.
17 “Nanrona fane pone inomranimpi,
ki namale pone isi fai rofopefupe Jisas empo fika pone ke fei namale ompla empo pone pangkepe.
Ka nu uma empo fai painri risine pone nu re fei samo namale ompla namo.
18 Ka ompla namo empo yemei fai God ese yuku ommo yukaine isi God wone yirengkleye nu profet mingklari noplo mi empo wu yukaine Krais ese yungkam eni.
19-20 Nanrona fane pone pensona ka mew pimane ommo fafaile yukaine isi pone fai pangkepe ka polopi kore God,
sa wu ese mew yuꞌpole ommo fafaile isi pone fai pangkepe namo,
sa wu ese yape pone moule uporo fai pone ese samo paipe nalaplai ka wu re ese yireni Jisas ese yolowi kore pone.
Jisas wu mana empo God wone yem wu ese waiye yukaine Krais poneni.
21 Wu ese waiye heven paiyila taim empo God yangke ommo mingklari ese nemei keklepe kore.
Ompla namo sa yukaine mi isi God yukaye mone,
isine wu yirengkleye nu holi profet woneni noplone mi namo.
22 Ka Moses yire nanrona,
‘God,
Manawamo poneni ese yina mana wongke poneni ese yangke ompla yukaine profet resuklu ki.
La pone ese as pupu mi empo wu fai yirepiye pone.
23 Mana fina empo fei yupu mi wunini,
mana namo sa nu ese nupone wu waiye moile ka wu ese fei yakle nu oikenra woneni Israel naine plau.’c
24 “Yukaine mi isi profet Samuel ka profet plai empo noloni wairu wu noplone mi empo God,
ka nu re isi noplo mi empo kaire mee plau.
25 Ka pone paipe pu yukaile nu kongkom empo nu profet ka pone re paipe monre empo kontrak empo God isi yangkeye nu flili poneni.
Wu isi yireni Abraham nanrona,
‘Ki ese kumane wongke empo nu oli oikenra yeneni,
ka ki ese blesim nu pinuma mingklari oli oikenra empo pike mee.’d
26 Ka God empo yereryane mana fai ese yangke ompla wunini,
emen sa wu yireni wu yolowi pone Juda fai ese blesim pone ka yangke pone pupone ommo fafaile empo pone fai pangkepe namo.”