Pita yane Jon painri neli nama empo nu kansol
4
Empo Pita yane Jon neli ka noplongklene nu pinuma ka nu pris empo tempol ka kepten empo nu kaploluma empo tempol nakle plai empo nu Sadyusi noloni plele wuyane.
2 Pita yane Jon nukule nu pinuma nanrona,
Jisas ri ka God yangke wu yemei kore ka nu uma fopi empo bilip ka nu rili pu namo wu ese yangke nu re ese nemei kore.
Mi namo nro ke yangke nu uma namo wolpuna neni.
3 Nu nukairi Pita yane Jon empo moule yire yangke ningki,
fane nu nina wuyane naine rum kat empo ningki paiyila moulpeplere kei.
4 Ka pinuma mingklari nupu mi namo ka nu bilip ka namba empo nu mana yemei wamo pari riri resuklu 5,000.a
5 Ningkinama se,
nu uma fai painri risine nu Juda,
ka plai empo nu ilauma ka nu tikse empo lo nemnoku naine Jerusalem.
6 Nu ilauma namo nemnoku naine:
Anas hetpris empo tempol,
ka Kaiafas,
Jon ka Aleksanda ka uma plai empo oli oikenra empo hetpris empo tempol.
7 Nu nire ka nu numane Pita yane Jon noloni neli nama empo nu ka nu naline wuyane nanrona,
“Yenyane ke pem kelo namo pei ka yenyane pouw noula finani ka yenyane ke pemplekuru mana namo?”
8 Holi Spirit konralo Pita ka wu yirengkle nu nanrona,
“Pone uma fai paipi risipe,
ka pone ilauma empo nu pinuma empo Israel,
9 empolme pone pouw kikane molomi ese mirepi pone mi empo ompla uporo kikane mangkeme mana empo rew rili namo.
Ka pone ke paline kikane nanrona,
mana empo rew rili namo ke yemei uporo kore rongkele?
10 Nanrona fane,
pone ilauma ka uma mingklari empo Israel,
pupu mi mee.
Ompla namo empo kikane mangkeme namo sa fei yolowi kelo empo kikane,
onne.
Jisas Krais empo taun Nasaret,
mana empo isi pone pona wu yapa kruse ka wu ri,
God yire ka wu yemei kore.
Noula ka kelo empo mana Jisas Krais namo nro empo yemplekuru mana namo yeli nama empo pone,
rew wunini uporo kore.
11 Jisas,
‘wu wone sa roma namo fai yuna mow yeli kelo,
ka pone uma fai peꞌre mow ke pire nanrona wu roma fafaile fane pone ke purome.
Ka naimele sa wu yemei roma uporo wamo fai kelyaneye mow.’b
12 God fei yuku mone noula empo mana fina wongke ese yangke mu ese samo maime nanrona nanrona plau God.
Onne.
Noula empo Jisas wokera nro sa yuna kelo fai ese yangke mone ese samo maime nanrona nanrona.”
13 Nu ilauma namo empo namale nanrona Pita yane Jon sa uma siwolenro empo moile ka fei painri skul.
Ka nu nulu wuyane ke neli kelo noplo mi ka wuyane fei num,
ka ompla namo ke yangke nu ilauma namo wolnipanri wamo.
Ka nu re namale nanrona isi wuyane fai nane Jisas narainene plau.
14 Nanrona fane nu mi onne,
fai ese nire kore Pita.
Empo fika nu nulu mana namo rew wunini empo uporo namo ke rereye wuyane plau.
15 Nanrona fane nu nirengkle nu plainrikera ese nupole nu ilauma fai nupune kot wamo empo nu Juda ka nu none nro ese naine ka nuka mi plai.
16 Nu naine ka nemnali none kore nanrona,
“Mone ese mangke ompla fika mana plainrane namo?
Nu uma mingklari empo naine Jerusalem sa namale mirakol empo wuyane nangkene namo pu,
ka mi empo wu yopli pouwpai pu.
Ka mone ese fei mire nanrona ompla empo wuyane nangkene namo sa fei alwone.
17 Mone ese fei woluporo mi namo ese yopli pouwpai mokoi mingklari ka uma pinuma mingklari ese nupu.
Nanrona fane mone ese mina mi kelo plai ese makuru wuyane ka wuyane ese num ka ese fei noplo ka nouw noula namo kore fai uma pinuma ese nupu.”
18 Nanrona fane nu nouw Pita yane Jon panri monre kore ka nu nireni wuyane mi kelo nanrona,
“Yenyane ese fei poplo ka pukulepe nu pinuma noula empo Jisas namo kore.
Sa nenrape.”
19 Ka Pita yane Jon nirengkle nu nanrona,
“Pone ese samo wolrufu se,
ro ese uporo nama empo God fai kikane ese mupene mi empo pone wee kikane ese mupene mi empo God?
20 Ka kikane ese fei misarulu.
Kikane ese moplo mi empo ommo mingklari empo kikane mulume ka mupume.”
21 Nanrona fane nu uma fai nupune kot namo,
nina mi kelo plai kore pari wuyane ka nireni wuyane la empo wuyane fei nupu mi nunini sa wuyane ese nem eni wamo.
Nu nire mi namo pekimo se nu nawane wuyane painri.
Nu fei napu rokoi wongke ese kotim wuyane ka nina wuyane kalabus,
empo fika uma pinuma empo nulu ompla fika empo yemeiye namo fane nu ke nereri noula empo God.
22 Empo fika,
mana empo wuyane naline Manawamo yemplekuru wu namo kikla wunini sa rikepone 40pla kikla.
Nu uma fai bilip nesapune
23 Nu mewnimane Pita yane Jon panro moile ka wuyane painri kore nu oikenra empo wonyane.
Ka wuyane nirengkle nu mi empo ommo mingklari nu hetpris nakle nu ilauma nirenine wuyane.
24 Empo nu oikenra wonyaneni nupu mi namo,
nu naine wolpuna wokera nro ka nesapu God.
Nu nesapu nanrona,
“Manawamo,
yene yangke nemi ka pike ka fulu ka ommo mingklari empo nenene nu.
25 Isi yene yangke Holi Spirit yoploye reꞌfa empo maumfle munini Devit,
mana fai yangke ompla yeneni.
Wu yire nanrona,
‘Nu uma fei Juda,
ke wolpun nenine ompla fika?
Ka nu kalnuka mi namo empo fika?
26 Nu king empo pike mee sa kampluno anro pu naine fai nu ese nopu
ka nu ilauma nemnoku ka nuka mi
fai nu ese numalo Manawamo
yane Krais empo wone,
mana empo isi wu yem namo.’c
27 Nanrona fane mi namo yemei alwone.
Herot yane Pontius Pailat nemnoku plau nu uma fei Juda ka nu Israel empo taun namo nuka mi fai ese nangke fafaile Jisas,
mana holi empo fai yangke ommo yeneni,
mana empo isi yene yem wu namo.
28 Empo nu nangke ommo mingklari namo,
yene wone isi namale pu ka yene ke mewyimane nu nemei.
Empo kelo yeneni,
yene wone isi namale pu ommo namo ese nemei.
29 Manawamo,
naimele yene yulu ommo fafaile wongkwongkeni nu nire nu ese nangke.
Ka yene wone ese yangke mu uma fai mangkeme ommo yeneni,
ese moplo mi yeneni ka mu ese fei mum.
30 Ka yene ese yina mew yeneni paiyi nu uma empo nenrinine ka nu ese uporo kore.
Mirakol wamfafai wongkwongkeni yene ese yangkeye noula empo Jisas,
mana holi fai yangke ommo yeneni namo.”
31 Empo nu nesapu pekimo,
mow empo nu nemnoku naine namo ke yalmepowe ka Holi Spirit ke yolo ka konralo nu ka yali nu kelo.
Ka nu sa fei num nu noplo mi empo God.
Nu pinuma empo fai bilipne nepi ommo noneni
32 Nu uma empo fai bilipne Jisas naine wolpuna wokera nro.
Mana wongke fei fai yimileye ommo woneni,
ka yire ommo namo sa wu woneni nro,
onne.
Ommo yukaine disaipol wongke yuna,
wu fai yali nu disaipol plai.
Ka nu disaipol plai nu re fai nangke nanrona.
33 Holi Spirit yali kelo nu aposel ka nu noplo mi empo Manawamo Jisas riye ka yemeiye kore,
ka God blesim pinuma mingklari empo fai bilipne.
34 Nanrona fane nu wongke ese fei ompla onne.
Empo fika,
nu uma empo nuna ommo yukaine pike,
mow,
ka ommo plai kore nu fai painri nenru nu uma nuꞌpune ka nu fai nunali romaula nolonine,
35 ka nu fai naline nu aposel ese nepinali nu pinuma fopi empo ommo onne namo.
36 Mana wongke noula wunini Josep,
wu sa Livai wongke ka mokoi wunini sa ailan Saiprus.
Nu aposel fai nouwne wu Barnabas.
Noula Barnabas namo sa nanrona mana fai yangke ompla uporo ka yire mi uporo fai kelyaliye wolpuna empo nu plai.d
37 Wu yane pike rola wongke paiyi mana wongke yem,
ka wu yem romaula empo pike namo yuna yolowi ka yali nu aposel fai nu ese nopane.