Ananaias yane Safaira
5
Mana wongke noula wunini Ananaias yane puli Safaira nane pike plola wonyaneni paiyi nu uma nem ka wuyane nem romaula.
2 Ka Ananaias yuna romaula plola kore,
ka plola nro wu yali nu aposel.
Puli wunini re namale ompla empo ini yangkeye namo.
3 Ka Pita yireni wu nanrona,
“Ananaias,
empo fikami,
yene ke wolilwi ka Satan yauli mi palo yene ka yisyoli wolpuna yeneni,
fikami ka yene ke raryane Holi Spirit?
Yene yangke nanrona wola yene pekiyina romaula plola empo isi yene yem pike empo yene namo.
4 Isi pike namo yeye mewwola yeneni,
ka naimele nu uma nem pu,
romaula re yeneni.
Empo fikami ka yene ke wol wongkeni?
Yene fei raryane mu uma nro onne,
yene re raryane God.”
5 Empo Ananaias yupu mi namo,
wu firpalo ka ri kei.
Ka nu pinuma mingklari fopi empo nupu mi empo ompla namo nu samo nemnum.
6 Nu kongkom efapu neri monre ka nu amplapi nukalo wu pulo,
ka nongkole wu panro moile ka painri niꞌna.
7 Resuklu 3pla aua paiyi se puli wunini ke yeri monre,
ka wu fei namale ompla fika empo yemeiye wone ini namo.
8 Ka Pita yaline wu nanrona,
“Yene samo yire ki mi alwone,
romaula empo yenyane Ananaias pempe pike empo yenyaneni namo yire wonkon nanrona nro wee?”
Ka Safaira yireni wu nanrona,
“Yei,
romaula wonkon nanrona nro.”
9 Ka Pita yireni wu nanrona,
“Empo fikami ka yene yane yene ini ke puka mi pire pengkali Holi Spirit?
Yulu,
nu uma empo painri niꞌna yene ini namo nanerine plerama nanri,
ka yene re nu ese nongkole yene panro plau.”
10 Ka wampanenro Safaira firpalo ka ri waiye eklene rew empo Pita.
Ka nu kongkom efapu neri monre ka nulu nanrona wu ri pu fane nu nongkole wu panro moile ka niꞌna wu wiye rere ini.
11 Nu uma empo sios ka pinuma mingklari fopi empo nupu mi empo ompla namo ka nu ke nemnum wamo.
Nu aposel nemplekuru nu uma empo nenrinine nemei uporo
12 Nu aposel nangke mirakol wamfafai fai nu pinuma mingklari ese nulu kelo empo God.
Nu fai wolpunwokera ka noloni nemnokune tempol monre koii nu fai nouwne ekleri empo Solomon.
13 Nu pinuma mingklari fai nererine noula empo nu,
ka nu fai numne ka nu fei fai painri nakle nemnokune plau.
14 Ka uma alma ka pinmana mingklari fai bilipne Manawamo namo noloni rere wu ka nangke namba empo nu sa pari wamoye.
15 Nanrona fane nu fai nongkolene nu uma empo nenrinine ka painri nenru nu nile ilkoli ka mat riri.
Nu fai nenru nu nile rokoi piyowa la empo Pita yire paiyi sa malma wunini ese raryuflane plai empo nu,
sa nu ese uporo.
16 Ka nu pinuma mingklari empo noloni taun plai empo taunwamo Jerusalem.
Nu nakle nu uma empo nenrinine ka nu uma empo opola fafaile fai yisyoliye nu namo noloni ka nu uporo kore.
Nu nangke fafaile nu aposel
17 Ka hetpris empo tempol ka nu plai foli woneni,
nu uma empo nu Sadyusi,
nu wolpuna fafaile wamo nu aposel,
empo fika nu pinuma mingklari empo ke painri nu aposel ka nu sa ke onne.
18 Ka nu nukaneire nu aposel ka nenru nu naine rum kat.
19 Ka ningki ensel empo Manawamo yenrume rama empo rum kat namo ka wu yumale nu nolo moile.
Ka wu yirengkle nu nanrona,
20 “Pone paipi peli tempol monre ka pone pirengkle nu pinuma mi mingklari empo ommo empo laip namo.”
21 Ka nu nupene mi wunini,
empo ningkinama nole nu painri tempol ka noplo mi nukule nu pinuma.
Ka hetpris empo tempol ka nu foli woneni fopi fai nakle nangke ompla noloni nemnoku plau.
Ka nu numale nu ilauma empo nu Israel ese nuna mi empo kot wamo.
Ka nu nirengkle nu kaploluma empo tempol painri rum kat ka numale nu aposel noloni kot.
22 Empo nu kaploluma empo tempol noloni,
nu nulu nanrona nu aposel fei naine rum kat.
Nanrona fane nu painri kore ka nirengkle nu nanrona,
23 “Empo mu maimpi plele rum kat mu mulu rama empo nu samo nerile kelole pu ka nu kaploluma empo rum kat sa neline moile nopaline rama namo.
Ka empo mu mire menrume rama,
mu fei mulu mana wongke waiye monre.”
24 Empo nu ilauma empo tempol,
ka mana empo paiye risiye nu kaploluma empo tempol nupu mi namo ka nu kungkumple ka wolpuna mingklari ka naine nulune nro ompla fika ese yemei.
25 Ka mana wongke yeri monre ka yirengkle nu nanrona,
“Pone pupu,
nu uma empo pone penru nu naine rum kat namo,
sa neli tempol ka noplo nukulene nu uma.”
26 Nanrona fane mana empo fai paiyi risiye nu kaploluma empo tempol namo yakle nu kaploluma plai woneni painri numale nu nakle noloni kore.
Nu fei nangke fafaile nu,
empo fika nu ke num nu pinuma empo fai nupelene nu aposel namo ese roma nople nu rili.
27 Nu numale nu aposel neri monre,
ka nirample nu neli ungklamplen empo nu ilauma empo kot,
fai hetpris empo tempol ese yalile nu.
28 Wu yirengkle nu nanrona,
“Mu mi maule pone ese fei poplo pukule nu uma noula empo mana namo,
naimele pone pulu ompla fika empo pone pangkepe!
Pone napoplo pukulepe nu pinuma mi namo ka mi poneni namo sa yopli wamo ka nu pinuma mingklari empo Jerusalem namo namale mi poneni.
Ka pone fai pangko mi palo mu ka pire nanrona,
nu uma mingklari ese nupu nanrona mana namo isi ri mew empo mu.”
29 Pita yakle nu aposel plai nirengkle nu kore nanrona,
“Mu ese samo mupene mi empo God ro,
ka mi empo mana sa mu ese fei mupene!
30 God empo mamimam moneni yangke Jisas isi ri namo yemei kore.
Mana namo pone pona wu yapa ilo.a
31 God yangke wu yemei ka waiye mewmenrulpo wunini ka yane wu namba wamo fai paiyi risiye.
Ka God yem wu ese waiye mana fai yukuye mone rokoi ka yuꞌpu kore mone ka yangke nu Israel ese nensolo wolpuna ka nupole nale fafaile empo none fai nangkene.
Ka wu ese waiye yukaine mana fai yuꞌpoleye ommo fafaile mingklari,
mone fai mangkeme.
32 Holi Spirit re mu mulu,
mu mulu ommo namo fane mu namoplome.
Holi Spirit namo,
God isi yali nu uma empo fai nupu mi empo Manawamo ka nupenene.”
33 Empo nu ilauma empo kot wamo nupu mi namo,
nu wolpuna neni wamo ka nire nuflo nu rili.
34 Ka kansol wongke wu sa yeli.
Wu Farisi wongke,
noula wunini Gamaliel,
wu sa tikse empo lo.
Ka uma mingklari fai nupu mi empo wu ka nererine noula wunini.
Wu yemei yeli ka yirengkle nu ese numale nu aposel panro naine moile lese.
35 Ka wu yirengkle nu nanrona,
“Pone inomranimpi kinini Israel,
pone konsamo pulu ompla fika empo pone pire pangke nu uma namo.
36 Pone ro namale Teudas isi yolowi yukaine mana wamo ka 400pla uma nupene wu.
Ka nu uma nufu wu ri,
ka uma empo nupenene wu namo plelene kenkenra,
ka ommo empo nu fai nangkene mana namo firpalo.
37 Se Judas empo Galili ke yemei taim empo gapman reꞌreye noula empo nu uma ka wu yumale nu uma moneni nupene wu painri nakle gapman nopu.
Ka wu re nu nufu wu ri ka uma empo fai nupenene wu namo plelene kenkenra.
38 Nanrona fane ki kirepi pone,
pone ese fei pangke ompla wongke nu.
Pulupe nro.
La ompla empo nu nangkene namo,
nu nangke ompla empo manani,
sa ompla namo ese firpalo ka fafaile.
39 La empo ompla namo yolowi mew empo God,
sa pone ese fei paukiri rokoi nunini,
sa nenrape!
Pone pangke nanrona sa pone ese namale nanrona pone ke pane God popupe.”
40 Ka nu ilauma empo kot wamo wolpunwokera mi empo Gamaliel.
Nu nouw nu aposel panri monre,
ka nu nuflo nu.
Ka nu mi naule nu ese fei painri ka noplo mi noula empo Jisas kore,
rongka nu mewnimane nu painri.
41 Empo nu aposel nupone koii empo kot wamo nu ainem wamo.
Empo fika God yulu nanrona bilip empo nu samo kelo wamo fane wu mewyimane ommo namo nemei nu pinuma nangke fafaile nu noula empo Jisas.
42 Ningki kaire,
nu fai painrine tempol ka mow wokwokera ka nu fei niye nai nu wona noplo nukulene nu uma ka nirengklene nu miuporo nanrona Jisas wu sa Krais.