Nu nuꞌpu uma 7pla
6
Empo taim namo,
namba empo nu disaipola sa pari mingklari wamo.
Ka nu Juda plai empo namale mi Grik,
nakle nu Juda plai empo namale Hibru mi nakle nopu mi.
Nu nopu mi empo nu pinmana empo inpi rili nupole nu fai noplole mi Grik,
nu uma fai nepine ommo,
fei fai samo naline nu ommo ningki kaire.
2 Nanrona fane nu 12pla aposel numale nu disaipol noloni nemnoku ka nirengkle nu nanrona,
“Ese fei uporo empo mu mire kuma mane nale empo fai moplome mi empo God ka wolyapaye nale empo fai nepine ommo empo fai nonene.
3 Inomranimpi kinini,
pone ese papu uma 7pla empo naine noula uporo ka Holi Spirit konralo nu ka nu sa ila uporo.
Sa mone ese mewmimane ommo namo paiyi nu uma namo,
4 ka mu sa ese samo wolmane mi empo God ka mesapume nro.”
5 Mi namo yangke nu uma mingklari woluporo wamo.
Ka nu nem Stiven,
mana fai samo bilipye ka Holi Spirit re samo konralo wu.
Ka nu nem Filip,
Prokorus,
Nikanor,
Timon,
Parmenas ka Nikolas.
Nikolas,
mokoi wunini sa taun Antiok,
wu fai samo bilipye God empo nu Juda ka wu fei Juda wu fai waiye yukaine mana empo nu Juda.
6 Nu nali nu 7pla uma namo painri nu aposel ese nesapu nu ka mew nauneli nu fai ese nangke ompla namo.
7 Nanrona fane mi empo God yopli pouwpai mokoi mingklari ka namba empo nu disaipol empo taunwamo Jerusalem pari wamo.
Ka nu pris mingklari empo tempol re nupu mi empo God fane nu bilip ka nupene mi empo God.
Nu Juda kotim Stiven
8 God samo blesim Stiven wamo ka yane wu kelo fai yangke mirakol wamfafai wongkwongkeni ka nu uma fai nulune.
9 Nu uma plai empo Sairini,
ka Aleksandria,
Silisia ka Esia nemei ka nane Stiven nopu mi.
Nu uma namo,
sa nu uma empo mow koli wokera empo nu Juda nu fai nouw nanrona,
Mow Koli Empo nu Uma Fei Nungkam Eni, b
10 Ka Holi Spirit yane Stiven ila uporo empo wu yakle nu noplo mi.
Nanrona fane,
nu fei nangklu mi wunini.
11 Nanrona fane nu peki nuka mi ese rarnale nu uma plai nire nanrona,
“Mu mupu Stiven ouwyire Moses yane God.”
Nu nukaneire Stiven
12 Ompla namo yangke nu pinuma,
ka nu tikse empo lo ka nu ilauma,
nu wolpun neni ka nu painri naukiri Stiven ka nukaneire wu ka numane wu nane painri kot wamo empo nu Juda.
13 Nu nuꞌpu uma plai empo fai kalnirene mi namo nire nanrona,
“Mana namo ningki kaire wu fai ouwyireye mokoi holi namo ka lo empo Moses.
14 Mu mupu mana namo yire nanrona Jisas empo taun Nasaret ese yekli tempol ka wu ese yangke mone mupone nale empo ompla empo nu mamimam yukaine empo isi Moses yame mone.”
15 Nu uma wamfafai empo fai nupune kot wamo naine ka kilnulune Stiven,
ka nu nulu nanrona ungklama wunini sa yukaine ensel.