Stiven yoplo mi paiyi nu Kansol
7
Rongka hetpris empo tempol yaline Stiven nanrona,
“Mi empo uma nangko mi palo yene namo sa alwone wee?”
2 Ka Stiven yire kore nanrona,
“Inomranimpi ka nangkapi kinini,
pupu mi kinini.
Empo isi mami moneni Abraham waiyeye Mesopotamia,
God empo yuna kelo wamo yemei wu,
se sema wu ke paiyi waiye taun Haran.
3 Ka God yireni wu nanrona,
‘Yene ese yupole nu oli oikenra ka pike yeneni naime ka paiyi waiye koii wongke ki ese kukuwe yene.’a
4 “Nanrona fane Abraham yupone pike empo Kaldia ka paiyi waiye Haran.
Wu waiye Haran paiyila nangka ri kei,
se sema God yumane wu yolowi waiye pike namo empo pone paipepe mee.
5 Empo taim namo,
God fei yane wu pike rola wongke fai wu ese yuluye pike namo ese waiye yukaine pike woneni.
Sam onne!
God yuka mi wu yire nanrona kingke se wu ese ukayane wu pike rilele ese paiyi mewwola empo Abraham yakle nu uma pinuma oli oikenra woneni.
Empo taim namo,
Abraham wone sa mela onne.
6 Ka God yireni wu nanrona,
‘Nu uma oli oikenra yeneni ese painri naine pike umangkle.
Nanrona fane nu uma empo pike ripile ese nangke nu uma oli oikenra yeneni ese naine yukaine nu uma nale siwolenro fai nangkene ompla nunini ka nu ese nangke fafaile nu paiyi plele 400pla kikla.
7 Ka kingke ki ese kisikoli nu uma empo pike ripile namo sa nu uma oli oikenra yeneni ese noloni naine pike namo fai nu ese nosinane ki ka nereri noula kinini.’b
8 Ka empo taim namo,
God yuka kontrak Abraham fai nu ese naulere papli noneni.
Nanrona fane Abraham puli yem mela manro wokera noula Aisak.
Empo 8pla kaire Aisakni nu naule Aisak papli.
Se sema Aisak ke yemei nangka empo Jekop ka Jekop ke yemei nangka empo 12pla flili empo mone Juda.
9 “Josep namo,
nangka wunini fai wolaye wu wamo nu flili plai nanrona fane nu flili namo ke wolpun fafaile wu ka nu nina wu paiyi nu uma Isip nem wu ka nu nem romaula empo wu,
ka Josep sa paiyi waiye yukaine mana nale siwolenro fai ese yangke ompla empo nu Isip.
Ka God fai rereye wu,
10 ka fai mewmewye wu empo ommo wongkwongkeni fafaile fai nemeine wu.
Wu yane kelo ka ila uporo fai wu ese yangke ommo upupu ese yangke king empo Isip ese wolyane wu wamo.
Nanrona fane king yina Josep waiye risi nu fai yuluye kantri empo Isip ka mow empo king.
11 “Paiyi se,
ponrini wamo yemei kantri Isip ka Kenan.
Ka nu nangkapi empo mone namo ompla empo fai nonene fai reryaliye nu puna namo sam onne fane ponrini wamo yemei nu.
12 Empo Jekop yupu mi nanrona kantri Isip sa yuna ompla empo fai nonene,
fane wu yawale nu flili empo mone namo painri.
Empo nu painrine Isip namo sa empol panro nunini.
13 Empo nu fai painri kore Isip Josep samo yireni ino woneni nanrona wu sa fina.
Ka king re yulu pu nu sa ranimpi ka ino empo Josep.
14 Se,
Josep mi paiyi nangka woneni Jekop yakle nu oikenra woneni ese noloni nane wu nainene Isip.
Namba empo nu oikenra woneni namo sa pari resuklu 75pla pinuma.
15 Jekop yumale nu flili empo mone painri naine kantri Isip paiyi plele empo nu riline.
16 Rongka nu nongkole pulo empo nu painri kore ka niꞌli nu naine taun Sekem.
Pike empo nu kongkom empo Hamor isi Abraham yali nu romaula ka yem.
17 “Ka taim empo God yire yupene kore mi isi wone yukaye Abraham namo,
taim namo sa yolowiye.
Ka nu uma moneni Israel empo naine Isip,
nu nemei uma mingklari wamo.
18 Ka empo taim namo,
mana wongke waiye yukaine king fai yuluye kantri Isip,
ka king namo fei namale Josep.
19 King namo yangke fafaile wamo nu flili moneni Israel.
Ka wu yire mi kelo nu ese ningkipanro kongkom aure empo nu nuꞌpune namo ese rili.
20 “Ka empo taim namo Moses moka yem wu ka Moses namo wu sa mela mana God wolaye wu wamo.c
Ka nu nanwo wu mow monre empo nangka woneni paiyi resuklu kali plainrikera.
21 Se,
nu neire wu nane nolo moile mow empo nangka woneni ka king nona ke yeire wu ka yanwo wu yukaine mela woneni rona.
22 Moses yem ila uporo empo nu Isip ka wu fai yoplo mi kelo ka yangke ommo kelo wongkwongkeni.
23 “Empo Moses 40pla kikla,
wu wolrufu yire paiyi yelwale nu uma oli oikenra woneni Israel.
24 Wu paiyi yulu ka Isip mana wongke yufuye Israel mana wongke,
fane wu paiyi mewmew Israel mana namo ka yane eni kore Isip mana namo ka yufu wu ri kei.
25 Moses wola nanrona uma oikenra woneni ro namale God empo yereryane wu fai ese mewmew nu,
ka nu fei namale.
26 Kaire wongke se,
Moses yolowi ka yulu Israel mana plainre yane nopune ka wu yire miyaule wuyane ka yireni wuyane nanrona,
‘Ai,
yenyane an inrani fane,
fikami ka yenyane ke popupe?’
27 “Ka mana namo samo yufu yoli mana wongke namo,
ka yine Moses paiyi ka yireni Moses nanrona,
‘Fina empo yem yene fai ese yopane mu ka yupuye kot munini?
28 Yene yire yufu ki ri yukaine neingkepli yene yufuye Isip mana namo wee?’d
29 Empo Moses yupu mi namo,
wu yulpalo paiyi waiye Midian yukaine mana empo kantri wongke.
Paiyi se wu yem pin empo mokoi namo ka puli yem mela mana plainrane.
30 “Wu waiye 40pla kikla paiyi pekimo se sa ensel wongke yemei Moses plau niꞌpi empo yupo aliye kiki rola namo.
Koii kiki rola empo niꞌpi yupo ali yeye namo sa yeye mokoi maipon siwolenro empo uma fei fai nainene empo yeye eklene moul alwola Sainai.
31 Empo wu yulu ompla namo ka malma wunini flipalo.
Ka empo wu paiyi eklene fai yire ese kon samo yulu ompla namo,
ka Manawamo yireni wu nanrona,
32 ‘Ki God empo nu flili yeneni.
Ki God empo Abraham,
Aisak ka Jekop.’e
Ka Moses folwo wamo ka wu fei nama yulu ompla namo kore.
33 “Ka Manawamo yireni wu kore nanrona,
‘Yene yingklame sandel yeneni,
koii empo yene yeliye namo sa koii holi.
34 Ki kulu ommo mingklari fafaile empo nu Isip fai nangkene nu uma kinini empo nainene kantri Isip.
Ki kupu nu samo nili ka nouwne noula kinini fane ki kolo fai ese saimolo nu sa nu uma Isip ese fei naukiri nu naine mokoi namo kore.
Naimele ki kirewi yene ese paiye kore kantri Isip.’f
35 “Moses namo,
isi emen nu fei wolpalo wu ka nireni wu nanrona,
‘Fina empo yem yene fai ese yuluye mu ka yupuye kot munini?’
Ka God wone empo yem wu ese yuluye nu ka yupuye kot nunini.
Ensel empo yemei plau niꞌpi empo aliye koii kiki rola namo ka yireni wu nanrona.
36 Wu yumale nu nupone kantri Isip.
Wu yangke mirakol wamfafai mingklari nemeine empo nu nainene Isip ka empo nu naulene Fulu Kaka ka empo nu painrine mokoi maipon siwolenro empo uma fei nainene paiyi plele 40pla kikla.
37 “Moses wu wone namo empo yirengkle nu Israel nanrona,
‘God ese yem pone wongke ese yemei profet yukaine ki.’g
38 Empo nu flili moneni nemnoku nainene mokoi maipon siwolenro empo uma fei nainene namo,
Moses yupole nu ka pari moul alwola Sainai ka ensel wongke yane wu naine ka yane wu mi uporo fai wu ese yali mone.
39 “Ka nu mamimam empo mone namo ke numplewa ka fei nupu mi wunini.
Nu empo wola naule nire fai ese painri kore kantri Isip.
40 Nu nireni Aron nanrona,
‘Yene ese yangke stetyu plai fai nu ese painri risi mu yukaine nu god munini.
Moses,
fina isi yumale mu mupone kantri Isip namo,
ka mu fei namale ompla fika yemeiye wu.’h
41 Empo kaire namo nu nangke stetyu wongke yukaine bulmakau aula.
Nu nangke ofa empo stetyu namo ka nei rai fai ese ainemne ompla empo nu nangkene mew noneni.
42 Fane God yulu nu ka kuma yali nu nosinane ompla rufu kaire,
kali ka ommo plai yukaine mi empo nilene buk empo nu profet nirene nanrona,
‘Pone uma empo Israel!
Pone puꞌpu ommo ka pangke ofa ki
empo pone paipepe mokoi maipon siwolenro empo uma fei nainene,
pone pangke ofa ki kone wee?
43 Pone empo pufona mow sel fai posipanepe god Molek
yane kikla empo god poneni Refan.
Pone pangke stetyu empo god Refan fai pone ese posipanepe wu.
Fane ki ese kupone pone ka kemkangklupu pone
ese paipi paipe kalabus empo kantri Babilon.’i
44 “Nu mamimam moneni isi neꞌre mow sel empo God empo mokoi maipon siwolenro ka nu uma empo fai nainene namo fai nupenene ompla empo God yireye Moses.
Ka nu neꞌre mow namo yukaine malma empo Moses yuluye.
45 Empo Josua fai paiyi risiye nu,
nu nongkolene mow sel namo painrine.
Ka God isi mewmew nu mamimam empo mone ka nu nemnangklupune nu uma empo pike mee.
Ka nu nuna kelo mow sel namo yolowi plele taim empo Devit.
46 God aiyem wamo Devit ka sam saimoye wu.
Fane wu yaline God fai wu ese yeꞌre mow kelo uporo wongke empo God empo Jekop ese waiyeye.
47 Ka Solomon wu sa mana empo yeꞌre mow namo.
48 “Ka God Wamo Riri fei fai waiye mow empo nu uma neꞌrene yukaine mi empo isi profet yoploye.
49 ‘Manawamo yire nanrona,
“Heven sa koii sia king kinini fai kaikeke,
ka pike mee sa koii kinini fai rew kauneke.
Ka yene ese yeꞌre mow rongkele fai ki ese kaike?
Ka mokoi fika ese yemei yukaine mokoi empo ki fai kaikeke?
50 Empo fikami,
ki kone empo kangke ommo namo,
wee onne?” ’ ”j
51 Ka Stiven yirengkle nu kansol nanrona,
“Pone uma fai ila rinra kelolepe.
Pone fai pangko mi empo Holi Spirit pone sa pukaile nu mamimam poneni.
52 Pone pire mamimam poneni isi fei nane eni wamo profet mingklari wee?
Nu an isi nuflonekli nu uma empo fai noplone mi empo Mana Fai Yangke Nale Uporo ese yolowi.
Ka mana namo empo yolowi ka pone pina wu paiyi mew empo nu iimuma ka pufu wu ri.
53 Nu ensel empo God isi nawe lo namo nu flili ka lo namo isi yolo pone,
ka isi pone pum wamo ka fei pupenepe lo namo.”
Nu roma nu Stiven
54 Empo nu nupu mi namo nu wolneni wamo ka nela nangka nela noneni kore.
55 Ka Stiven sa Holi Spirit konralo wu fane wu yinra pari nemi riri ka yulu glori empo God ka wu yulu Jisas yeliye mewmenrulpo empo God.
56 Ka wu yirengkle nu nanrona,
“Pone pinra pari nemi riri.
Ki kulu nemi feingkyane ka Auna Empo Mana sa yeliye mewmenrulpo empo God.”
57 Empo nu nupu mi namo,
nu mew nuforo none ripi ka nangke mi kelo wamo ka nempliri painri wu.
58 Nu nuna wu nengke palo taun moilele ka roma nu wu ri.
Ka empo taim namo uma pinuma empo nangko mi palo wu namo ningko ommo papli noneni ka nenru naine eklene mana wongke noula wunini Sol.