8
Ka Sol re empo waiye taim namo ka yulu nu nufu Stiven riye ka wu woluporo wamo empo nu nangke ompla namo.
Sol yuflo yekli nu pinuma empo sios ka nu nempliri painri
Empo kaire namo ka paiyi kaire plai kore, nu nangke ommo fafaile wamo nu disaipol empo naine taunwamo Jerusalem. Ka nu disaipol mingklari plelene kenkenra ka painri naine distrik Judia ka distrik Samaria. Ka nu aposel ro sa naine Jerusalem.
2 Nu uma plai empo samo bilipne God namo niꞌna Stiven ka nu nili wu wamo.
3 Ka Sol paiyi mow wokwokera empo nu pinuma empo sios ka wu samo yufloyekli nu pinmana ka nu uma ka yikile nu paiyi yenru nu naine kalabus.
Wu yangke ompla namo ese yangke nu pinmana ka nu uma ese fei bilip.
Filip paiye Samaria ka yoplo mi empo Jisas
4 Nu disaipol empo nemropu painri mokoi plai namo,
ke noplone mi empo God paiyiye mokoi empo none painrine namo.
5 Filip palo taun wongke empo waiye distrik Samaria ka wu yoplongkle nu miuporo empo Krais.
6 Empo nu pinuma nupu mi wunini ka nulu mirakol empo wu yangkeye namo,
ka nu samo ripi nalana mi empo wu yoploye.
7 Nu opola fafaile empo naine nu uma plai namo,
nangklom mi fafaile wamo ka nupole nu.
Ka nu uma rew fafaile,
ka fei fai samo naraine namo,
wu yemplekuru nale nunini uporo kore.
8 Nanrona fane nu pinuma mingklari empo taun namo woluporo wamo.
9 Empo taim namo mana wongke noula wunini Saimon,
mana namo fai yuka uka ka yangke marila wu fai waiye taun namo.
Ka wu yangke uma mingklari empo Samaria nampalo wu.
Wu fai yereriye noula woneni kore nanrona wu sa manwamo.
10 Ka nu uma mingklari,
nu uma wamfafai ka nu pinuma nale siwolenro empo moile re,
nu samo ripi nalana wu ka fai nererine noula wunini ka fai nire nanrona,
“Mana namo yuna kelo ka wu sa yukaine God namo nu fai nouwne kelo wunini namo Kelo Wamo.”
11 Nu nupene wu empo fika wu empo yangke nu nampalo kelo wunini namo ningki kaire angklen.
12 Ka empo Filip yoplo miuporo empo kingdom empo God,
ka noula empo Jisas Krais,
nu uma mingklari ke bilip,
ka wu baptaisim nu,
uma alma ka pinmana.
13 Saimon re empo bilip,
fane Filip baptaisim wu.
Ka wu yupene Filip yane painri mokoi mingklari empo Filip paiyiye.
Empo fika wu wolpun mingklari empo wu yulu ommo mingklari uporo ka mirakol empo Filip yangkeye.
14 Empo nu aposel naine Jerusalem nupu mi nanrona nu uma empo distrik Samaria sa bilipim mi empo God,
fane nu nawane Pita yane Jon painri nu.
15 Empo wuyane painri plele Samaria,
wuyane nakle nu uma namo nesapune nanrona Holi Spirit yolo nu.
16 Empo fika Holi Spirit fei yolo wongke empo nu.
Filip baptaisim nu noula empo Manawamo Jisas ro.
17 Nanrona fane Pita yane Jon mew nauneli nu,
ka nu nem Holi Spirit.
18 Saimon yulu nanrona empo wuyane mew nauneli nu,
ka nu nem Holi Spirit.
Nanrona fane wu yire ese yali romaula wuyane,
19 Ka wu yireni wuyane nanrona,
“Yenyane ese pake ki kelo namo empo fika fina empo ki mew kaune wu,
wu ese yem Holi Spirit.”
20 Pita yireni wu nanrona,
“Romaula yeneni ka yene re ese palo hel.
Empo fika yene yire nanrona yene ese yane romaula God ka yem kelo namo.
21 Yene ese fei yangke ompla namo plau mu,
empo fika wolpuna yeneni fei waiye uporo nama empo God.
22 Yene ese yemplemaire wolpuna ka yupone ompla fafaile namo ka yesapu Manawamo.
La empo wu wolpalo yene sa wu ese yuꞌpole wolpuna fafaile empo yeye yene namo.
23 Ki kulu nanrona yene fai nampaloye ommo ka nale empo nampaloye ommo namo ese yisyoliye wolpuna yeneni ka yangke sin yaukiri yene waiye kalabus.”
24 Ka Saimon yireni wuyane nanrona,
“Yenyane pesapu Manawamo ki empo ompla namo yukaine empo yenyane pirepe namo ese fei yemei ki.”
25 Empo Pita yane Jon noplo mi empo Manawamo ka empo wuyane nire painri kore Jerusalem,
wuyane noplongkle miuporo empo God empo mokoi mingklari empo Samaria.
Filip yoplo miuporo empo mana Itiopia
26 Ensel wongke empo Manawamo yireni Filip nanrona,
“Yene yemei ka paiyi rokoi empo yolowi saut empo Jerusalem ka palo taun Gasa.”
Rokoi namo yeye mokoi maipon siwolenro ka nu uma fei nainene.
27 Nanrona fane Filip paiyi.
Empo wu paiyi,
wu wane mana wongke empo Itiopia.
Mana namo fai yuna ompla yukaine manwamo fai samo yopaneye ommo mingklari upor uporo empo Kwin empo Itiopia,a
noula wunini Kandasi.
Mana namo isi paiyi yesapuye Jerusalem.
28 Ka empo wu waiye karis ka yire paiyi kore mokoi woneni,
wu waiye karis woneni ka yulu buk empo profet Aisaia.b
29 Ka Holi Spirit yireni Filip nanrona,
“Yene paiyi yeli eklene karis namo.”
30 Filip yempliri paiyi karis namo ka wu yupu mana namo yoplo mi wiye buk empo profet Aisaia.
Ka Filip yaline wu nanrona,
“Yene ro yem mi nomu empo yene yuluye namo wee onne?”
31 Ka mana namo yireni wu nanrona,
“Ki ese namale mi nomu namo rongkele?
La empo mana wongke yuku ki sa ese uporo.”
Nanrona fane wu youw Filip pari ka yane wu naine karis namo.
32 Mana namo yulu mi plola empo profet Aisaia yire nanrona,
“Nu numane wu paiyi yukaine sipsip fai nu ese nufu wu ri,
ka wu yeli mireꞌfa kungkuno yukaile nu sipsip empo neline fai nu uma ese naulere para nunini,
ka wu fei yire mi wongke.
33 Nu ownire wu ka minrinane wu ka nu kotim wu.
Ka empo nu kotim wu,
nu fei samo nupene rokoi empo lo.
Ka wu ri,
Nanrona fane wu fei yuꞌpu kongkom naine ese nu uma noplo mi empo wu.
Onne!
Nu nufu wu ri kei,
yupone pike mee.”c
34 Ka mana namo yaline Filip nanrona,
“Yene samo yire ki,
profet namo yoplo wu wone wee mana wongke?”
35 Nanrona fane Filip yemei ka yukune wu nanrona,
mi empo profet Aisaia namo,
sa yire Jisas.
Ka wu yireni wu mi plai kore miuporo empo Jisas sa yukaine mi empo wone yuluye namo.
36-37 Empo wuyane nempliri painrine rokoi,
wuyane noloni plele nupi ilim wongke ka mana namo yireni Filip nanrona,
“Yulu nupi naime,
eseme yene ese baptaisim ki?”d
38 Ka wu yangke hos fai nikilene karis namo neli ka wuyane Filip panro neli nupi ka Filip baptaisim wu.
39 Empo wuyane nupone nupi ka yane panri pike riri,
mana namo woluporo wamo.
Ka Holi Spirit wampane nro yolo ka yem Filip yupone mana namo.
Ka wu fei yulu Filip kore,
ka wu aiyem wamo ka wu waiye karis yempliri paiyi.
40 Filip yulu nanrona wu paiyi waiye taun Asdot,
nanrona fane wu paiyi mokoi mingklari ka yoplongkle miuporo empo Jisas wola wu paiyi plele taun Sisaria.