Miuporo empo Luk yeꞌre namo ese samo yuku mone mulu Jisas nanrona wu sa mana empo yuꞌpu kore nu Israel ringklene mone. Empo Jisas yangke ompla woneni, wu yirengkle nu pinuma nanrona, Holi Spirit samo yereryane wu ese yoplo mi empo God paiyi nu uma fai nangke nale fafaile ka uma empo ommo onne (Pulu 4.18). Mi alwone empo buk mee sa nanrona, Luk yoplo mi mingklari empo Jisas samo wolyaule nu pinuma empo nem eni wongkwongkeni ka wu saimolo nu.

Ommo empo Jisas yangkeye, sa yangke nu uma woneni ainem wu wamo. Empo Maria yem wu, nu pinuma ainem wamo (Pulu 1.42-48 ka 2.10), ka pekini empo buk mee empo Jisas pariye heven nu samo ainem wamo (Pulu 24.52).

Mi plai niye buk mee, Luk wonekere nro yoplo mi empo ommo mingklari empo laip empo Jisas ka mi mee fei niye buk plai. Luk wonekere nro yoplo mi empo ommo mingklari empo Jisas yemeiye pike mee. Luk wonekere nro yoplo mi riri empo Jisas yoplo mi empo Samaria wongke yemplekuru mana empo nu uma fafaile nufu nisnoli wu wiye rokoi. Ka mi riri wongke sa yoplo mi empo auna yuponeye nangka ka paiyi mokoi amone ka mi empo romaula wunini samo pekimo ka mi riri plai kore empo Jisas. Luk wonekere nro yoplo mi empo mana fai yemye romaula noula wunini Sakias.

Ommo plai empo Luk yoplo mi mingklari nu namo, sa nale fai samo nesapune ka ommo empo Holi Spirit ka nale empo God fai yangkeye fai yuponeye ommo fafaile empo nu uma fai nangkene. Luk yuna mi mingklari empo ommo nu pinmana fai nangkene.

Mi empo Luk fei pekimo buk mee, onne. Empo fika wu mana empo isi yeꞌre mi niye buk mu fai mouwme Aposel. Buk mee yoplo mi empo ommo isi nu Aposel nangkene empo Jisas pari heven.