Miuporo
Luk
Yeꞌre
Luk yeꞌre miuporo paiyi Tiofilus
1
Manwamo Tiofilus,
isi uma mingklari nengkali nire fai ese neꞌre mi empo ommo mingklari isi God yangke nemeine mu.
2 Nu neꞌre mi empo nu uma isi nane Jisas naraine ka nu nulu ommo nama noneni,
ka naimele nu naine yukaile nu uma fai nemne mi empo God,
ka fai niremine mu.
3 Ki kone empo samo kapu mi empo ommo namo pu,
nanrona fane ese uporo empo ki keꞌre mi naimele paiyi yene manawamo Tiofilus.a
4 Yene yulu sa yene ese samo namale nanrona,
mi empo isi nu nukuwene yene namo,
sa won alwone.
Ensel yireni Sekaraia nanrona Elisabet ese yem mela manro, noula wunini Jon
5 Isi Herot waiye king empo distrik Judia,
pris wongke re waiye noula wunini Sekaraia.
Wu sa pris empo grup wongke nu fai nouwne Abiya.
Puli wunini sa uma oikenra empo Aron,
noula wunini Elisabet.b
6 Wuyane fai naine uporo nama empo God,
ka fai samo nupenene lo ka nale uporo empo Manawamo yireye,
ka wuyane fei fai nangke ommo fafaile nama empo God.
7 Ka wuyane sa kongkom onnele,
empo fika,
Elisabet empo kalyeli nalenro,
wuyane an almari pu.
8 Kaire wongke,
Sekaraia yakle nu pris oikenra painri nangke ompla empo nu pris fai nangkene,
ka Sekaraia re yangke ompla namo nama empo God.c
9 Rongka nu raraku satu ese napu pris fina sa ese pari tempol empo Manawamo,
ka yesane holi sanda.
Nu nangke nanrona wola nu nouw noula empo Sekaraia.
Rongka Sekaraia pari monre ka yesane holi sanda pari God.
10 Empo Sekaraia yangke ommo fai yesaneye holi sanda,
nu pinuma mingklari sa parilaye monre empo tempol moilelpo ka nesapune.
11 Rongka ensel wongke empo Manawamo yemei Sekaraia ka yeli rere alta menrulpo koii fai nesanene holi sanda.
12 Sekaraia yulu ensel namo ka wu wol malmaran ka yum.
13 Ka ensel yireni wu nanrona,
“Sekaraia,
yene fai yumye.
God empo yupu mi yeneni pu.
Yene puli Elisabet ese yem mela manro.
Sa yene ese youw noula wunini Jon.
14 Sa yene ese aiyem wamo.
Ka pinuma mingklari ese nulu mela namo,
ka nu ese ainem mela namo empo moka yemye wu.
15 Empo fika,
wu ese yem noula wamo nama empo Manawamo.
Wu ese fei yaikolwo wain,
ka mii kelo plai.
Empo wu waiye moka puna,
Holi Spirit ese konralo wu.
16 Wu ese yangke pinuma mingklari empo Israel ese nensona ka painri kore Manawamo,
God noneni.
17 Wu ese yem kelo empo Manawamo yukaine Elaija ka ese paiyi risi Manawamo.
Wu ese yangke nu nangkapi nensolo wolpuna ka ese wola nale kongkom noneni.
Ka wu ese yensolo wolpuna fafaile empo nu uma fai nangkomene mi,
sa nu ese nem ikaklo uporo yukaine nu uma fai naine uporo nama empo God.
Ka wu ese kampluno nu uma sa nu ese naine noru Manawamo ese yolowi.”
18 Rongka Sekaraia yireni ensel nanrona,
“Ki ese namale mi yeneni rongkele,
ese ro alwone wee?
Kikane an almari pu.”
19 Ka ensel kepe yireni wu kore nanrona,
“Ki Gabriel,
ki fai keli eklene ke God.
Wu wone empo yawane ki kuna miuporo yeneni kolo kirewi yene.
20 Naimele yene yupu.
Yene fei bilipim mi empo ki,
nanrona fane yene ese mireꞌfa kungku ka yene ese fei yoplole mi,
paiyi la ommo mingklari namo nemei se.
Mi kinini namo sa ese alwone kaire empo God wone yina.”
21 Nu pinuma empo naine norune Sekaraia namo,
nu kepe wolpuna mingklari ompla fika wongke ro yemei wu tempol monre fane wu kepe ro ripkikliye mee.
22 Empo wu yolo moile wu fei yoplole mi plai paiyi nu.
Nanrona fane nu namale pu,
wu ro yulu ompla wongkeni nama woneni tempol empo God.
Wu mireꞌfa kungku fane wu yoplo yukuleye nu mew nro.
23 Empo Sekaraia yangke ompla empo nu pris fai nangkene namo pekimo,
rongka wu fai paiyi kore mow woneni.
24 Paiyi se,
Sekaraia puli Elisabet kepe rengki mela.
Ka wu waiye monre nro 5pla kali.
Elisabet yire nanrona,
25 “Manawamo empo wolpalo ki.
Isi ki fei kem mela ka naimele wu yangke ompla mele ki ese yuꞌpole nale empo ki fai flemuluke nama empo nu pinuma.”
Ensel yireni Maria ese yem mela Jisas
26 Namba 6 kali empo Elisabet rengki mela,
God yawane ensel Gabriel paiyi taun wongke empo distrik Galili,
noula Nasaret.
The Birth of Jesus Foretold (Luk 1:26-38)
27 Wu paiyi pin mangklama wongke empo fei yane mana nile,
noula wunini Maria pin empo nu nauleni fai ese yem mana wongke,
oikenra empo King Devit,
noula wunini Josep.
28 Wola ensel Gabriel paiyi plele Maria ka yire nanrona,
“Kaire uporo yene fina empo yem ompla uporo empo Manawamo.
Manawamo waiye yene,
ka yangke uporo yene.”
29 Maria yupu mi namo ka wu wola mingklari,
ka wola rufuye nro,
“Mi mee sa rongkele?”
30 Ka ensel yireni wu nanrona,
“Maria yene fai yumye.
God wola yapaye yene.
31 Yupu!
Yene ese rengki mela ka yem mela manro.
Ka yene ese youw noula wunini Jisas.
32 Wu ese yem noula wamo.
Ka nu pinuma ese nouw wu Auna empo God Waiye Riri.
Ka God ese yina wu waiye king yukaine wone maumfle Devit.
33 Wu ese waiye king empo nu oikenra empo Jekop nanrona nanrona.
Ka kingdom empo wu ese fei pekimo.”
34 Ka Maria fai yaline ensel kore nanrona,
“Ompla empo yene yireye namo sa ese yemei rongkele?
Ki an fei kem mana wongke.”
35 Ka ensel yireni wu kore nanrona,
“Holi Spirit ese yolo yene,
ka kelo empo God empo Riri ese yufona yene.
Nanrona fane mela empo yene ese yem namo,
wu ese waiye holi.
Sa uma ese nouw wu God Auna.
36 Yupu.
Yene araufle Elisabet an almari pu,
naimele wu re mela plau ka wu ese yem mela manro.
Isi uma nire wu ese fei yem mela.
Naimele wu sa mela plau,
ka 6pla kali wunini paiyi pu.
37 Ompla fika empo God yire yangke,
ese fei raraine wu ese yangke.”
38 Ka Maria kepe yireni ensel kore nanrona,
“Yupu!
Ki an pin siwole fai kangke ommo empo Manawamo.
Wone yire yangke ommo fika ki yukaine mi empo yene yireye,
sa ki mi onne.”
Rongka ensel yupone wu ka paiyi kei.
Maria paiyi yulu Elisabet
39 Empo kaire namo,
Maria yemei ka wampane paiyi taun wongke empo yeye moul alwola empo distrik Judia.
40 Wu paiyi plele mow empo Sekaraia ka pari monre ka yire nanrona kaire uporo Elisabet.
41 Elisabet yupu mi empo Maria yireye kaire uporo,
ka mela empo waiye wu puna kaikalyeri ka ralam.
Ka Holi Spirit konralo Elisabet,
42 ka wu yangke mi wamo ka yire,
“God empo blesim yene rikepone nu pinmana plai.
Mela empo yapa puna yeneni namo wu re God empo blesim wu pu.
43 Ki sa fina la Manawamo kinini moka ke yolowi waꞌne ki?
44 Empo ki kupu mi empo yene yireye kaire uporo,
mela empo yapa ki puna kaikalyeri ka aiyem.
45 God empo blesim yene empo bilipim Manawamo yukaine mi isi wu yirewiye yene ese yemei alwone.”
Rai empo Maria
46 Maria yire nanrona:
“Wolpuna kinini samo yereri noula empo Manawamo.
47 Ka ruwilmalma kinini aiyem God,
wu Mana empo Yem Ki Kore.
48 Empo fika wu yulu ki pin siwole nro fai kangke ompla wunini,
wu yulu ki ka wolpalo ki.
Naimele ka paiyi nu pinuma mingklari ese nire God isi blesim ki.
49 Empo fika Mana yuna Kelo Wamo fai yangke ompla wamo ki,
ka noula wunini ese waiye holi.
50 God fai wolpalo nu pinuma fai numne wone.
Wu ese yangke nanrona nu uma empoleme ka kongkom ese kingke nemei.
51 Isi wu yangke ommo wamwamo.
Nu uma fai wola nanrona nu sa uporo wamo ka nererine noula noneni,
wu yawane nu painri nonkerila.
Wu fai yemyangklupuye nu uma fai nire none nro sa rikepone uma plai.
52 Ka wu yangke nu king ka nu uma empo fai painri risine nu pinuma,
nupone sia king nonengkle
ka yereryaliye noula empo nu uma nale siwole.
53 Wu fai yali ommo upupu mingklari uma empo ponriline,
ka nu samo rengki.
Ka nu uma empo ommo mingklari sa wu fai yawale nu kalpainri.
54-55 Ka wu saimolo nu uma fai nangke ommo woneni,
sa nu Israel.
Ka wu na wola rufuye mi isi wone yukayali mone maumflapi,
ka empo Abraham yakle kongkom woneni,
fane wu ese wolpalo nu ka kongkom anfife nuningkle ese kingke nemei nanrona nanrona.”d
56 Maria yane Elisabet naine kali plainrikera pekimo se,
Maria fai paiyi kore mokoi woneni.
Elisabet yem mela Jon
57 Kali empo Elisabet yem mela,
wola wu yem mela manro.
58 Pinuma empo mokoi woneni ka nu oikenra empo wone nupu mi isi Manawamo wolpaloye wu wamo,
ka nu nane wu ainem plau.
59 Rongka nu naine 8pla kaire se,
nu noloni ka nangke kola empo none fai naulene papli empo kongkom manro.
Nu nire nina mela noula yukaine noula empo nangka Sekaraia.
60 Ka mela moka kepe yire,
“Nenrape!
Mone ese mouw noula wunini Jon.”
61 Ka nu nireni wu,
“Mana wongke empo pone oikenra noula namo sa onne.” e
62 Ka nu noplo nukune wu mew nro ka naline mela nangka yire fai wu ese yina mela noula fina.
63 Wu mew yukule nu nem ompla fai reꞌrene nane wu sa wu ese yeꞌre.
Wu yeꞌre yire nanrona,
“Noula wunini Jon.”
Ka nu wolnipanri.
64 Wampane nro Sekaraia fai yoplo mi kore,
ka yereri noula empo God.
65 Nu pinuma mingklari empo mokoi noneni nemnum.
Mi empo ompla namo yopli powpai plele mokoi mokoi mingklari empo nenene moul alwola empo distrik Judia.
66 Uma pinuma mingklari nupu mi namo,
ka nu wolpuna mingklari ka nire nanrona,
“Mela namo ese yemei yukaine mana fina?”
Empo fikanu namale pu,
kelo empo Manawamo waiye wu.
Sekaraia yoplo mi profet
67 Wola Holi Spirit konralo Sekaraia,
Jon nangka ka wu yoplo mi profet nanrona:
68 “Mone mereri noula empo Manawamo God empo Israel.
Empo fika wu isi yolo saimolo pinuma woneni ka yuꞌpu nu kore.
69 Manawamo yame mone mana wongke kelo nu oikenra empo king Devit,
mana fai yangke ompla empo Godni.
Mana namo ese yuꞌpu mone kore empo nale fafaile mone fai mangkeme,
70 yukaine mi isi wu yirengkleye
mireꞌfa empo nu holi profet woneni.
71 Ka wu yuka mi yire wu ese yuꞌpu kore mone mew empo nu iimuma
ka nu uma fai wolpuna fafailene mone.
72 Wu wolpalo mone fai ese yuku nu flili empo mone
ka wu na wolrufuye holi kontrak isi wone yukaye.
73 God isi yuka mi mami moneni Abraham.
Ka naimele wu yangke mone yukaine mi isi wone yireye.
74 Wu yire ese yuꞌpu kore mone mew empo nu iimuma,
sa mone ese mangke ommo wunini ka mone ese fei mum.
75 Nanrona fane empo mone maime laip,
ningki kaire mone ese maraime nale uporo ka maime holi nama empo God.
76 Ka yene,
mela aula kinini,
nu ese nouw yene profet empo God Waiye Riri,
empo fika yene ese paiyi risi Manawamo,
ka yemplekuru rokoi wunini.
77-78 Yene ese yukule nu pinuma woneni sa nu ese namale,
wu wolpalo nu wamo,
God yire ese yuꞌpole nale fafaile empo nu fai nangkene ka ese yuꞌpu nu kore.
Ka wu ese yawane ali wongke empo heven yukaine kaire fai yeriye ningkinamnole ese yolo mone,
79 sa ese ali yane uma empo naine mokoi ningki ka rili sa nu samo num,
ka ese yukule mone rokoi empo wolpuna raulo.”
80 Ka Holi Spirit konralo wu ka yane wu kelo.
Wola wu paiyi waiye koii maipon siwole nro empo uma fei fai nainene,
paiyi wola wu yemei yolowi alele nama empo nu Israel.