Maria yem Jisas
(Matyu 1.18-25)
2
Empo kikla namo Sisar Ogastus yina lo wongke fai nu ese nuꞌpu noula empo nu pinuma empo pike.
2 Empo isi gapman fei nuꞌpu noula empo nu pinuma,
naimele Kwirinius waiye gavana empo provins Siria,a
nu nuꞌpu noula empo nu uma.
3 Nanrona fane nu pinuma fai painri kore mokoi noneni,
sa gapman ese yuꞌpu nu noula.
4 Josep sa oikenra empo King Devit.
Nanrona fane wu yupone taun Nasaret empo distrik Galili,
ka wu paiyi pari taun Betlehem,
taun empo king Devit,
yeye distrik Judia.
5 Josep yumane puli Maria empo nu nauleni wu wone,
yane painri panri sa gapman ese yem noula empo wonyane.
Ka empo taim namo Maria sa mela plau.
6 Empo wuyane naine Betlehem,
ka Maria yengkali yire ese yem mela.
7 Namo sa empanro Maria yem mela manro wokera woneni.
Ka wu yukalo mela amplapi ka yana wiye bokis fai naile ompla empo bulmakau fai nonene,
empo fika mow anro empo imelwa pinuma pu.
Nu ensel nuna mi nolo nirengkle nu uma fai nopaline sipsip
8 Empo koii namo uma plai fai nopaline sipsipb fai panro naine piyowa empo taun,
ka nopaline sipsip noneni ningki.
9 Ka ensel empo Manawamo kalyemei nu,
ka Manawamo yangke ali wamo woneni yemei mairane nu,
ka nu nemnum wamo.
10 Ka ensel yirengkle nu nanrona,
“Pone fai pumpe.
Pupu!
Ki kape miuporo pone,
miuporo naimele fai ese yangke pinuma mingklari empo pike ainem wamo.
11 Ewele ningki mee taun empo king Devit,
pin wongke yem mela.
Mela namo ese yuꞌpu pone kore.
Wu sa Krais,c
ka wu Manawamo.
12 Pone ese pulu ka namale wu nanrona.
Mela wongke empo nu nukalo wu amplapi ka nana wiye bokis fai naile ompla empo bulmakau fai none.”
13 Ensel yoplo pekimo,
rongka wampane nro ensel mingklari ami empo heven nolo neli plau ensel namo.
Ka nu nereri noula empo God ka nire nanrona:
14 “Mereri noula empo God Waiye Riri.
Ka empo pike nu pinuma empo God fai wola yaliye nu namo,
nu ese naine wolraulo.”
Nu uma fai nopaline sipsip painri nulu Jisas
15 Nu ensel nupole uma fai nopaline sipsip ka panri kore heven.
Rongka nu uma fai nopaline sipsip nemnire none kore nanrona,
“Souw,
mampli taun Betlehem sa mone ese mulu ompla empo yemeiye namo,
empo Manawamo yirengkleye nu ensel niremine mone.”
16 Rongka nu wampane panri nulu ka Maria yane Josep nanaine,
ka mela aula sa nana wiyeye bokis fai naile ompla empo bulmakau fai none.
17 Nu nulu mela pekimo,
rongka nu mi nufu nu pinuma ompla empo ensel nirengklene nu mi empo mela namo.
18 Nu pinuma nupu mi empo nu uma fai nopaline sipsip noplone,
ka nu wolnipanri.
19 Maria yina mi namo waiye wolpuna woneni,
ka waiye wolrufuye nro.
20 Ka uma empo fai nopaline sipsip fai panro painri kore koii empo none fai nopaline sipsip ka nosinane God.
Ka nu nereri noula empo God empo ompla mingklari none nupune ka nulune.
Ompla namo yemei yukaine mi isi ensel yirengkleye.
Moka nangka nina mela noula Jisas
21 Empo 7pla kaire pekimo se,
nu naule mela papli,
ka nina noula wunini Jisas.
Noula isi Maria fei rengki mela,
ka ensel isi yireni wu.
Simion ka Ana nulu Jisas tempol monre empo God
22 Kaire empo Josep yane Maria naine namkile kore nama empo Godd yolowi pu,
yukaine lo empo Moses yireye,
rongka wuyane neire mela ka panri taunwamo Jerusaleme nane wu paiyi Manawamo.
23 Wuyane nire fai nupene mi wiye lo empo Manawamo yire nanrona,
“Nu kongkom manro ila mana empo mokapi nuꞌpune,
nu fai nane paiyi Manawamo.”
24 Wuyane nuna plau rora plainrane fai nangke ofa,
yukaine lo empo Manawamo yireye,
“Rora ufu plainrane onne,
sa rora miloko aula plainrane.”f
25 Empo taim namo mana wongke empo waiye Jerusalem,
noula wunini Simion.
Wu mana fai yangke nale uporo ka wu fai yosiyaneye God.
Wu ese waiye yoruye kaire empo God isi yauleni fai ese saimolo wolpuna empo nu Israel.
Ka Holi Spirit empo God konralo wu.
26 Holi Spirit isi yireni wu pu,
wu ese fei faflai ri.
Onnele.
Wu ese waiye ka yulu Krais,
Manawamo isi yuka mi ese yane nu Israel.
27 Rongka Holi Spirit yereryane wu ka wu paiyi pari tempol empo God.
Ka Josep yane Maria neire mela Jisas painri fai nangke kola empo none Israel yukaine lo empo Manawamo yireye.
28 Wola Simion yeire mela ka yalana wiye mew woneni.
Ka yereri noula empo God nanrona:
29 “Manawamo,
ki mana siwole yeneni,
naimele yene ese mew yimane ki kaiki,
ka wolpuna kinini ese waiye uporo,
yukaine isi yene yireye.
30 Empo fika,
ki kone empo nama kulu ompla namo pu,
empo isi yene yire ese yuꞌpu mu kore.
31 Yene isi saimolo ompla namo nama empo nu pinuma mingklari.
32 Wu ese yane ali paiyi nu uma fei Juda,
sa nu ese namale God.
Ka wu ese yangke nu pinuma yeneni Israel ese nem noula wamo.”
33 Jisas moka nangka nupu mi empo Simion yireye Jisas,
ka wuyane wolnipanri.
34 Rongka Simion yane nu blesing,
ka yireni Maria,
Jisas moka nanrona,
“Yupu!
God empo yem mela mee,
ese yangke nu Israel mingklari ese firipanro,
ka ese yangke mingklari nemei kore.
Wu ese waiye yukaine mak wongke,
sa uma mingklari ese nire mi fafaile pari wu.
35 Nanrona fane wolpuna empo uma mingklari empo peki nenene namo ese nemei alele.
Ka eni wongke ese yemei yukaine bainat ese yoku yene wola.”
36 Profet pin wongke,
noula wunini Ana.
Nangka Fanuel oikenra empo Aser.
Wu sa almari pu.
Isi wu yem mana wongke ka yane naine 7pla kikla.
37 Rongka ini wunini ri,
ka wu kalwaiye.
Naimele wu sa 84 kikla.
Ana fei fai yuponeye tempol.
Wu fai kalwaiye punale ka yesapuye nro,
ka wu fai yangkeye ompla empo God ningki kaire.
38 Empo Simion yoploye namo,
Ana re yolowi eklene Jisas ka yire uporo God.
Ka wu yoplongkle mi empo mela namo paiyi nu pinuma mingklari empo naine norune God ese yuꞌpu kore nu pinuma empo Jerusalem.
Josep yane Maria panro painri kore Nasaret
39 Wuyane nangke ompla yukaine lo empo Manawamo yireye pekimo,
rongka wuyane fai panro painri kore Nasaret,g
taun noneni empo yeye distrik Galili.
40 Mela yemei wamo ka kelo.
Ila empo wu samo namale ommo mingklari.
Ka wolpalo empo God waiye wu.
Mela efapu Jisas pari tempel
41 Empo kikla fai nine,
Jisas mokanangka fai painri panri Jerusalem nulu Kola Wamo Fai Wola Rufune God Isi Yangke Nu Israel Naine Uporo,
nu nouw Pasowa.h
42 Jisas sa 12pla kikla pu,
rongka wu yakle moka nangka nupene nale empo kola wamo fai nonene namo ka painri panri Jerusalem.
43 Kaire empo kola wamo namo pekimo,
rongka nu fai painri kore mokoi noneni.
Ka mela Jisas sa yeye Jerusalem.
Moka yane nangka fei namale wu empo yeye.
44 Wuyane wola nanrona wu ro yakle nu uma plai painri pu.
Nanrona fane wuyane naraine paiyi ningki popli kei.
Se wuyane fai napu wu kore iplele empo nu oikenra ka nu foluma empo none.
45 Wuyane napu napu,
ka fei nane wu.
Nanrona fane wuyane fai painri panri kore Jerusalem napu wu.
46 Wuyane naraine napu wu kaire plainrikera paiyi se,
wuyane nulu wu waiye tempol empo God.
Wu fongkpalo waiye iplele empo uma fai namalene lo.
Wu waiye ripi yalanaye mi empo nu noplone,
ka yalileye nu mi plai.
47 Nu uma nupu mi empo wu,
nu wola nipanri ila uporo empo wu ka mi empo wu yire kore nu.
48 Josep yane Maria nulu wu ka wola mingklari.
Ka moka yireni wu nanrona,
“Auna,
yene fai yangke nale nanrona kikane?
Wolpuna empo kikane yene aina sa eni wamo fane kikane maraime mapu yene.”
49 Ka wu yireni wuyane kore nanrona,
“Fikami ka yenyane ke paraipe papupe ki?
Yenyane sa fei namale,
ki ese kaike mow empo Aina kinini?”
50 Ka wuyane fei namale mi nomu empo wu yireniye wuyane.