Jisas yemei kore
(Matyu 28.1-8; Luk 24.1-12; Jon 20.1-10)
16
Empo kaire empo Sabat namo pekimo,
Maria empo Makdala yane Salome ka Jems moka Maria namo painri ka nuꞌpu sanda ka ommo plai empo wolum uporo namo ese painri ka naisi nale empo Jisas.
2 Moulpeplere empo Sande ningkinama nole empo kaire fei samo yeri kelo namo,
nu painri pike pulale empo Jisas.
3 Ka nu nemnali none kore nanrona,
“Fina sa ese mewmew mu ese yine roma empo yeli plerama empo roma pulale namo,
sa mu ese mampli monre?”
4 Ka empo nu ninra pali riri empo pulale namo,
nu nulu nanrona uma plai isi nine roma wamo namo pu empo isi yeli yaklewau reꞌfa empo pulale namo.
5 Ka empo nu panri monre empo pulale namo,
nu nulu mana efapu wongke rana ommo papli wouw angklen ka waiye mew menrulpo repo empo koii nu isi nina Jisas wiyeye namo.
Ka empo nu pinmana namo nulu wu,
nu num ka nale nunini ke folwo wamo.
6 Ka mana namo yirengkle nu nanrona,
“Pone faa pumpe.
Ki namale nanrona pone wona papupe mana namo nu isi nona wu yapa kruse noula wunini Jisas empo taun Nasaret namo.
Pone pulu,
nu isi nina wu wiye naimele.
Ka wu yemei kore pu!
Wu fei wiye naimele.
7 Pone paipi ka pireni Pita yakle nu disaipol plai nanrona,
‘Jisas ese paiyi risi pone ka yoru pone distrik Galili.
Pone ese pulu wu mokoi namo,
yukaine isi wu yirepi pone.’ ”
8 Nanrona fane nu pinmana namo mireꞌfa kungkuno nempliri nolo moile empo pike pulale namo.
Nu fei noploni mana wee pin wongke empo ompla namo empo fika,
nu samo num ka folwori plau.
[Pipa oiya plai empo Baibel empo ves 9-20 sa onne.
Nu saveman wola nire nanrona,
Mak wone fei yeꞌre mi namo kingke se mana wongke ke yeꞌre.]
Maria empo taun Makdala yulu Jisasa
(Matyu 28.9-10; Jon 20.11-18)
9 Jisas yemei Sande ningkinama nole kurelplau.
Ka wu samo yemei alele Maria empo taun Makdala pin namo sa pin risi yulu wu.
Ka wu sa pin empo isi 7pla opola fafaile nisnoli wu ka Jisas isi yuꞌpole nu.
10 Empo nu uma isi naine ka nane Jisas naraine namo ke naine wolnaule ka niline wu,
Maria yolowi plele nu ka yirengkle nu nanrona Jisas sa yemei kore pu ka wu yolowi plele ki ka ki kulu wu nama ki koneni.
11 Ka nu nangklumo mi wunini empo Jisas yemei kore namo ka wu yulu wu nama wu woneni.
Jisas yemei mana plainrane painrine rokoi
12 Ka empo Maria yoplo mi namo pekimo,
rongka mana plainrane nupone mokoi namo ka nupene rokoi nire painri mokoi wongke.
Ka empo wuyane painrine rokoi,
Jisas yemplemaire ungklama woneni ka yolowi wane wuyane rokoi.
13 Nanrona fane wuyane re painri ka nirengkle nu uma wonyaneni.
Ka nu re ke wola nanrona wuyane re kalnanili nu.
Jisas yali ommo nu 11pla disaipol woneni
(Matyu 28.16-20; Luk 24.36-49; Jon 20.19-23)
14 Se,
wu fai yemei kore nu 11pla disaipol woneni empo nu naine nonene.
Wu yenrele nu empo wewelane ka wolpuna empo nu samo kelo fane fei bilipim mi empo nu uma isi nulu wu yemei kore pu namo ka empo noplongkle nu namo.
15 Se sema wu yirengkle nu nanrona,
“Pone ese paipi mokoi mokoi empo pike mee ka poplo mi alele Miuporo fai uma mingklari ese nupu.
16 Mana fina empo bilip ka yem baptais,
sa God ese yem kore wu ka wu ese waiye plau God nanrona nanrona.
La empo mana fei bilip,
sa God ese kotim wu ka ese kingke yane eni wamo wu.
17 Nu uma empo bilipne namo ese nem kelo fai nangke mirakol ka re nu ese nuꞌpole nu opola fafaile empo noula kinini.
Ka nu ese noplo moile mi empo nu uma plaingkle nu fei isi namale.
18 La empo nu nunali poisin umele mew noneni,
poisin empo umele namo ese fei yangke nu rili.
La empo nu naikono poisin namo,
poisin namo ese fei yangke nu rili.
Empo nu mew naune nu uma empo nenrine namo,
nu ese nemei uporo kore.”
God yem Jisas pali heven
19 Empo Manawamo Jisas yoplongkle nu pekimo wola God yem wu pali heven.
Ka God yina wu waiye mew menrulpo wunini.
20 Wola nu disaipol empo Jisas namo ke painri mokoi mokoi ka noplo mi alele empo miuporo empo God.
Ka Manawamo wone sa isi waiye eklene nu ka yali kelo nu ese nangke mirakol fai ese yuku nanrona mi empo nu sa won alwone.