Jisas yemei kore
(Matyu 28.1-8; Mak 16.1-8; Jon 20.1-8)
24
Sande ningkinama nole kurelplau,
nu pinmana nuꞌpu sanda ka wel empo isi none saimolo anro naine namo,
nunali painri koii empo nu nina Jisas wiyeye.
2 Ka nu nulu roma wamo empo isi nu neine naklewau plerama empo roma pulale namo nu uma plai nine paiyi waiye piyowa.
3 Ka empo nu panri rompulale,
nu nulu nanrona puꞌlo empo Manawamo Jisas re fei wiyeye.
4 Empo nu neli kungkumplene ka fei namale ommo fika ese nu wolrufu,
wampane nro mana plainre naile ommo wow yukaine nemi empo rariye noloni ka neli eklene nu.
5 Nu pinmana,
num wamo ka ungklama panro kei pike.
Ka mana plainrane namo nirengkle nu nanrona,
“Empo fikami,
ka pone papu mana waiye laip koii empo nu uma isi rili?
6 Wu fei waiye mee,
wu yemei pu.
Pone ro wolrufu mi empo isi wu yirepiye pone empo wu wone yape pone paipepe distrik Galili.
7 Wu isi yirepi pone nanrona,
‘Auna empo Mana,
nu ese nane wu paiyi mew empo nu uma empo nangke nale fafaile,
ka nu ese noꞌna wu kruse ka wu ese ri.
Ka kaire plainrikera sa wu ese yemei kore.’ ”
8 Nanrona fane nu pinmana,
wolrufu kore mi empo Jisas.
9 Empo nu nupone roma pulale ka painri kore monre,
nu noplongkle nu 11pla disaipol ka nu uma plai mi empo ommo mingklari none nulu ka nupune.
10 Maria empo taun Makdala,
ka Joana ka Maria wongke Jems moka ka nu plai kore empo nakle nu noloni namo noplongkle nu aposel mi namo.
11 Ka uma mingklari namo,
fei bilipim mi empo nu pinmana namo.
Empo fika,
nu nire nanrona mi empo nu pinmana namo sanro alwone wee.
12 Wola Pita yemei ka yempliri paiyi ronsa roma pulale empo Jisas wiyeye namo.
Wu kulpalo ka yinra pari rom pulale ka yulu ommo amplapi nro nainene.
Ka wu yemei paiyi kore wolaye ompla namo ke yemei rongkele.
Mana plainrane nulu Jisas rokoi paiyi Emeus
13 Empo kaire namo,
plainre empo nu disaipol namo nupene rokoi empo paiyi mokoi wongke nouw Emeus.
La yene waiye Jerusalem ka yire paiyi Emeus sa yukaine 11pla kilomita.a
14 Empo wuyane painrine rokoi,
wuyane noplone mi empo ommo mingklari empo nemeine.
15 Ka empo wuyane noplolene mi,
Jisas wone yemei wuyane ka yakle nu naraine plau painrine rokoi.
16 Ka God yangke wuyane fei namale wu.
17 Ka wu yaline wuyane nanrona,
“Yenyane ke poplope ompla fika empo yenyane paraipe rokoi?”
Ka empo wu yaline wuyane mi namo,
wuyane neli ka ungklama empo wuyane nangke nire nili rona.
18 Ka wongke empo wuyane noula wunini Kliopas ke yaline wu nanrona,
“Uma mingklari noloni naine Jerusalem ka yene wokera nro sa fei namale ommo fika empo nemeine kaire namo wee?”
19 Ka Jisas yaline wuyane kore nanrona,
“Ommo fika?”
Ka wuyane nireni wu nanrona,
“Mi empo Jisas empo taun Nasaret.
Wu sa profet wongke,
ka wu sa kelo ka yoplo mi kelo empo nama empo God ka nu uma mingklari.
20 Nu bikpris empo tempol ka nu uma fa painri risi mone,
nuka mi ka nane wu paiyi nu uma ka nona wu yapa kruse ka wu ri.
21 Empo isi mu bilip nanrona wu mana God wone yem wu fa ese yuꞌpu kore nu Israel.
Naimele sa onne.
Ka seke ommo namo nro,
wu ri ka naimele kaire plainrikerab wu waiye pike pulale.
22 Ka ompla wongke re,
pinmana plai empo mu nangke mu wolnipanri.
Empoleme ningkinam nole,
nu painri koii empo Jisas puꞌlo wiyeye.
23 Ka nu fei nulu puꞌlo wunini wiye koii namo.
Nu niremi mu nanrona nu nulu ensel,
ka ensel nirengkle nu nanrona Jisas yemei kore pu ka wu waiye laip.
24 Ka nu uma plai empo mu,
nu re painri koii namo ka noloni niremi mu nanrona nu nulu koii namo yukaine mi empo pinmana niremi mu.
Ka empo wu wone,
sa nu fei nulu wu.”
25 Ka Jisas yireni wuyane nanrona,
“Yenyane ikaklo onnele.
Wolpuna yenyaneni fei wampane bilipim mi empo nu profet empo God isi noplone.
26 Yenyane fei namale nanrona Kraisc empo isi yolowi ese yungkam eni namo,
ka kingke God ese yane wu glori?”
27 Wu yoplo mi nomu mingklari empo Moses ka nu profet nilene buk empo God,
nirene mi empo wu wone nro.
28 Empo nu noloni eklene mokoi empo wuyane nire painrine namo,
Jisas ke kal as yupene rokoi namo paiyi.
29 Ka wuyane mi naule wu ka nireni wu nanrona,
“Yene ese yame mu maime,
empo fika,
moule ningkipopli pu fane ese ningki yene.”
Nanrona fane Jisas paiyi pari monre yane wuyane naine.
30 Empo Jisas yane wuyane naine fa ese no ompla,
wu yem bret wongke ka wu yesapu ka yekli bret ka yane wuyane.
31 Jisas yangke nanrona wola God yangke wuyane nama pepeli wu ka wu kalpekini ka wuyane fei nulu wu.
32 Ka wuyane noplo wonyane kore nanrona,
“Empo monkawe molomime rokoi,
wu yame monkawe moplo mi ka wu yeingkoyane mi nomu monkawe nanrona buk empo God yoploye ka mi namo yereryane wolpuna empo monkawe.”
33 Wuyane wampane nemei ka painri kore Jerusalem.
Empo wuyane painri plele Jerusalem,
wuyane nulu nu 11pla disaipol fai samo nupene mi empo Jisas ka nu plai empo fai nakle naraine plau nu nemnoku nainene.
34 Ka nu nireni wuyane nanrona,
“Won alwone!
Manawamo yemei kore pu ka Saimon Pita waꞌne wu.”
35 Ka mana plainre noplongkle nu mi empo ommo mingklari nemei wuyane rokoi ka wuyane noplo mi empo wu yekliye bret ka God yangke wuyane nama pepeli wu.
Jisas yemei alele nu disaipol
(Matyu 28.16-20; Mak 16.14-18; Jon 20.19-23)
36 Empo wuyane naine noplone mi namo,
Jisas wone kalyemei iplele nu ka yakle naine ka wu yirengkle nu nanrona,
“Pone paipe wolraulo.”
37 Nu wolmalmaran ka num wamo.
Nu ke nire nanrona nu ro nulu opola wongke.
38 Ka wu yirengkle nu nanrona,
“Fikami ka pone wolmalmaran?
Fikami ka pone wolmingklari ka fei bilip?
39 Pone pulu mew ka rew kinini.
An ki kone fane!
Pone polopi ka puna ki ka pone ese namale nanrona ki kone fane.
Ki sa koya ka rinra plau seke yukaine opola.”
40 Empo wu yoplongkle mi namo pekimo,
wu yuku mew ka rew woneni.
41 Nu nulu wu ka nu wolmingklari ka woluporo wamo,
ka nu fei bilipim ompla namo ese yemei.
Ka wu yirengkle nu nanrona,
“Pone penru ommo plai naine sa ki ko se?”
42 Nanrona fane nu nane wu firela plola wongke empo nu nampo anro,
43 wu wo,
ka nu naine nulune wu.
44 Ka wu yirengkle nu nanrona,
“Ommo namo ki isi kirepi pone empo ki kape pone maime.
Ommo yukaine isi nu neꞌre noplo ki niyene lo empo Moses ka buk empo nu profet,
ka empo Buk Song ese nemei alwone.”
45 Wola wu yangke nu namale mi nomu wiye buk empo God.
46 Ka wu yirengkle nu nanrona,
“Buk empo God yire nanrona:
Krais ese yungkam eni ka ri ka kaire plainrikera wu ese yemei kore.
47 Ka noula empo wu nro nu ese noplongkle nu oikenra wongkwongkeni sa nu ese nensolo ka nupole ommo fafaile nu fa nangkene ka God ese yupone ommo fafaile namo.
Ompla namo ese yemei Jerusalem se,
sa paiyi mokoi plai.
48 Pone ese paipi ka poplongkle ommo namo empo pone pulupe.
49 Ekleneye ki ese kape pone ompla resuklu Aina kinini yireye wu ese yape pone.
Ka pone ese paipe Jerusalem ro paiyi la God yape pone kelo se.”
Jisas pari kore heven
50 Ka wu yumale nu nupone Jerusalem ka painri koii wongke yeye eklene mokoi Betani,
ka wu yereri mew plainre ka blesim nu.
51 Empo wu blesim nu se,
wu yupole nu ka God yem wu pari heven.
52 Ka nu fuful nokle ka nosinane wu,
ka nu ainem wamo ka painri kore Jerusalem.
53 Ka nu fa nainene tempol nro nererine noula empo God.