Pol yensona wolpuna
9
Empo taim namo Sol fai yirengkleye nu disaipol empo Manawamo nanrona wu ese yuflo nu rili.
Wu yangke nanrona fai nu ese num ka nu ese fei bilip.
Ka wu paiyi hetpris empo tempol.
Conversion of Saul (Aposel 9:1-19)
2 Ka wu yaline wu ese yeꞌre pipa rola wongke paiyi nu mow koli empo taun Damaskus.
Pipa rola namo fai ese yuku nu nanrona la Sol yulu nu pinuma nupene Rokoia empo Jisas sa wu ese yuꞌpu nu yakle painri taunwamo Jerusalem ka wu ese yenru nu kalabus.
3 Nanrona fane wu paiyi,
ka empo wu paiyi plele eklene taun Damaskus,
wampane nro ali wongke yolo heven ka ali mamane wu.
4 Wu firpalo waiye pike ka wu yupu mi empo mana wongke yoploye wu.
Mana namo yireni wu nanrona,
“Sol,
Sol!
Fikami ka yene ke yangke fafaile ki?”
5 Ka Sol ke yaline wu nanrona,
“Manawamo,
yene fina?”
Ka mana namo fai yireni wu kore nanrona,
“Ki Jisas,
ki mana namo yene fai yangke fafaileye ki.
6 Yene ese fei yangke ommo namo kore naime yene yemei ka paiyi taun namo,
ka mana wongke ese yirewi yene ompla fika yene ese yangke.”
7 Nu uma empo nane Sol painrine namo neli ka nulu ompla namo ka nu mireꞌfa yuꞌpole,
empo fika nu nupu mana yoploye mi ka nu fei nulu mana wongke.
8 Sol yemei kore koii empo wone firpalo waiye namo.
Ka empo wu nama feingkyane fai wu ese yulu,
ka nama wunini empo yuforo pu fane wu fei yulu ompla wongke.
Nanrona fane nu nuna wu ka painri panri taun Damaskus.
9 Kaire plainrikera nama empo Sol yuforo fane fei yulu,
ka wu fei wo ompla rola wongke ka mii re wu fei yaikowo.
10 Empo taun Damaskus,
disaipol wongke noula wunini Ananaias fai waiyeye.
Ka wu wiyolwane Manawamo,
ka Manawamo youw wu nanrona,
“Ananaias.”
Ka Ananaias yimpone mi empo Manawamo ka yireni wu nanrona,
“Manawamo,
yene yire ommo fika wee?”
11 Ka Manawamo yireni wu nanrona,
“Yene ese paiyi mow empo Judas waiye rokoi nu fai nouwne Rokoi Ruꞌfu,
ka yene ese yalile nu mana wongke empo taun Tarsus.
Mana namo noula wunini Sol naimele wu ro waiye yesapuye.b
12 Sol wiyolwane nanrona mana wongke noula wunini Ananaias empo yolowi ka mew plainre raune wu fai wu ese yulu kore.”
13 Ananaias yimpone mi empo wu ka yire nanrona,
“Manawamo,
ki kupu mi mingklari empo mana namo ka ommo fafaile wongkwongkeni wu fai yangkeye nu uma yeneni empo nainene Jerusalem.
14 Ka wu empo yolowi taun Damaskus,
empo fika nu bikpris empo tempol nane kelo wu fai wu ese yuꞌpu nu uma fai nosinanene yene ka nesapune noula empo yene sa wu ese yenru nu kalabus.”
15 Ka Manawamo yireni Ananaias nanrona,
“Yene paiyi!
Mana namo ki kem wu pu fai wu ese yungkam noula empo ki ese paiyi nu uma fei Juda,
ka nu king nunini,
ka ringklene nu Israel.
16 Ki ese kukune wu nanrona wu ese yungkam eni wamo noula empo ki.”
17 Nanrona fane Ananaias paiyi ka pari mow empo Judas ka wu mew plainrane raune Sol,
ka yireni wu nanrona,
“Mela Sol,
Manawamo yire ki koloki.
Wu Jisas,
mana isi yemeiye yene empo yene yolowiye rokoi namo.
Wu yire ki koloki fai ki ese kangke yene yulu kore ka Holi Spirit ese konralo yene.”
18 Wampane ro ommo yukaine firela klinro waiye nama empo Sol,
firyolo ka wu fai yulu kore.
Wola Sol yemei ka nu baptaisim wu.
19 Ka wu wo ompla,
ka kelo wunini fai yolowi kore wu.
Sol yoplo miuporo Damaskus
Ka ningki plai kore wu yakle nu disaipol empo taun Damaskus nainene.
20 Ka wu wampane paiyi mow koli mingklari empo nu Juda ka wu yoplongkle mi empo Manawamo nanrona,
“Jisas wu sa God Auna.”
21 Uma mingklari fopi empo nupu mi empo Sol,
wol wongkeni.
Ka nu nire nanrona,
“Mana namo fai waiye Jerusalem ka wu fai yufloyekliye nu uma fai nosinanene ka nesapune noula empo Jisas.
Mana namo empo yolowi fai yukalo nu sen ka yuꞌpu nu painri nu hetpris empo tempol yukaile nu kalabus.”
22 Ka Sol yemei plau kelo empo Manawamo yoplo mi ka wu yukule nu uma nanrona Jisas wu sa Krais.
Ka nu Juda empo taun Damaskus nupu,
ka nu fei nire mi wongke uporo ese yumalo wu.
23 Kaire mingklari paiyi,
ka nu Juda nemnoku fai nu ese napu rokoi rongkele sa nu ese nufu Sol ri.
24 Ka Sol yupu mi empo ompla fika nu nire ese nangke wu.
Empo ningki ka kaire nu uma empo nire nufu wu ri namo kon samo nopane rama empo taun namo.
25 Ka nu uma fai nupenene wu namo,
nem wu ningki ka nu nana wu palo nekela wamo wongke,
ka nu risinane wu palo pulale wamo wongke empo yeye puku fai mamane taun namo.
Sol waiye Jerusalem
26 Empo wu paiyi plele Jerusalem ka wu yire paiyi yupele nu disaipol plai,
ka nu fei bilipim wu sa disaipol wongke fane nu ke num wu.
27 Ka Barnabas yumane wu yane painri nu aposel.
Ka wu yoplo yukule nu mi empo Sol nanrona,
“Sol yulu Manawamo ka Manawamo yoploni wu empo wu paiyiye taun Damaskus.
Ka empo Sol waiyeye taun namo,
wu fei yum empo wu yoploye mi noula empo Jisas.”
28 Nanrona fane Sol yakle nu aposel naine Jerusalem ka yakle nu naraine.
Ka wu yoplongkle mi noula empo Manawamo,
ka wu fei yum.
29 Wu fai yakle nu Juda plai fai noplo mi Grik naine ka noplo mi ka wu fai yakle nu nopu mi.
Nanrona fane nu nire nufu wu ri.
30 Empo nu uma oikenra nupu mi namo fane nu numane wu nane panro taun Sisaria ka nu nawane wu paiyi taun Tarsus.
31 Ka nu uma fai bilipne Jisas empo provins Judia ka distrik Galili ka distrik Samaria fai woluporo empo fika eni fai yemeiye nu namo fei yolowi kore nu.
Holi Spirit wone empo mewmew nu ka yali nu kelo,
nanrona fane namba nunini pari wamo,
ka nu fai numne Manawamo nro.
Pita yemplekuru Ainias
32 Pita waraiye pouwpaiyi mokoi mingklari,
ka kaire wongke wu paiyi nu uma empo God naine taun Lida.
33 Empo mokoi namo wu yulu mana wongke noula wunini Ainias.
Rew wunini empo rili ka fai wiyeye koii ro resuklu 8pla kikla.
34 Pita yireni wu nanrona,
“Ainias!
Naimele noula empo Jisas Krais ese yangke yene uporo kore.
Yene yemei ka yample mat yeneni.”
Ka wampane ro Ainias yemei.
35 Uma pinuma mingklari fai naine taun Lida nakle nu uma plai naine pike rola Saron nulu wu ka nu nenmaire wolpuna ka nu nupene mi empo Manawamo.
Pita yangke Tabita yemei kore
36 Disaipol pin wongke waiye taun Jopa noula wunini Tabita (La empo mu menmaire paiyi mi Grik,
sa noula wunini namo ese nouw Dorkas).
Pin namo fai yangke nale uporo ningki kaire,
ka wu fai mewmewye nu uma empo ommo onne.
37 Ka empo taim namo wu yenri ka wu ri ka nu noipleni wu mii ka nu nina wu wiye rum wongke empo yeye mow riri namo.
38 Taun Lida namo sa yeye eklene taun Jopa.
Nanrona fane,
empo nu disaipol nupu nanrona Pita waiye taun Lida,
nu nawane mana plainrane painri wu.
Ka wuyane nireni wu nanrona,
“Yene ese as wampane yolowi mu se!”
39 Pita yemei ka yane wuyane painri,
ka empo nu painri plele taun Jopa,
nu numane wu panri riri rum empo yeye mow namo.
Nu pinmana empo inpi rili nupole nu namo,
neli mamane Pita ka niline.
Ka nu nukune wu,
ommo papli empo Dorkas yangkeye isi wu waiye laip.
40 Pita yawale pinuma mingklari panro moile,
ka wu yekli fufula ka wu yesapu.
Wu yenmaire paiyi pin empo ri namo ka wu yireni wu nanrona,
“Tabita,
yene yemei.”
Ka wu nama feingkyane ka yulu Pita ka wu yemei waiye riri.
41 Ka Pita yuna mew wunini ka yereri wu fai wu ese yemei ka yeli riri.
Nanrona fane wu youw nu uma empo God ka nu pinmana empo inpi rili pu namo noloni neli.
Ka wu yukule nu fai nu ese nulu nanrona Tabita waiye laip.
42 Mi namo yopli pouwpaiyi,
ka uma mingklari empo taun Jopa nupu ka nu mingklari bilipne Manawamo.
43 Pita as waiye taun Jopa.
Wu yane Saimon naine mow wunini.
Saimon,
wu mana fai yangke ompla fai ese samo yemplekuruye kau papli ka fai yenru nainene sa nu uma ese nuꞌpu ka nangke ommo.