Ensel empo yemei Konilius ka yane mi empo wu
10
Mana wongke noula wunini Konilius waiye taunwamo Sisaria,
ka wu sa kepten empo grup wongke empo nu iimuma nu fai nouw nanrona “Nu Ami Empo Itali.”
2 Wu yakle pin kongkom woneni ka nu uma fai nane wu naine mow woneni namo,
nu uma namo fai samo bilipne God ka numne wu.
Wu mana fai samo wolpaloye nu uma empo ommo samo onne ka wu fai kal yaliye nu,
ka wu fai ningki kaire yesapuye God.
3 Kaire wongke,
yukaine 3 kilok ningkipopli God ke yenmaire nama wunini ka wu yulu ensel wongke empo God yolowi alele wu ka yireni wu nanrona,
“Konilius!”
4 Konilius samo yum wamo ka kilyulu wu,
ka yaline wu nanrona,
“Manawamo,
fika wee?”
Ka ensel ke yireni wu nanrona,
“Yene fai yesapuye,
ka yene fai yaliye ommo nu uma empo ommo onne yukaine ofa.
God yulu ommo yene fai yepiye nu uma empo ommo onne ka yene fai yangkeye nale namo nanrona fane wu fai wolaye yene.
5 Eseme yene ese yirengkle nu uma plai painri taun Jopa ka numane mana wongke noula wunini Saimon Pita ka nane noloni.
6 Mana namo waiye mow empo Saimon wongke,
mana empo fai yangke ompla empo kau papli.
Ka Saimon namo mow wunini fai waiye fulu piyowa.”
7 Empo ensel yoploni wu pekimo ka paiyi,
Konilius youw mana plainrane empo nu uma fai nangke ompla mow woneni ka ami wongke.
Ami namo,
wu mana fai samo bilipye God ka ningki kaire wu fai yane Konilius naine ka yangke ommo mingklari wunini.
8 Konilius yoplongkle nu mi empo ommo mingklari yukaine empo ensel yireniye wu namo,
se wu yawale nu painri taun Jopa.
9 Nu naraine paiyi ningki ka nu nile rokoi.
Ningkinamnole ka nu nemei painri paiyi resuklu,
kaire yolowi yeli iplele nu noloni plele eklene taun namo.
Ka Pita pari waiye mow riri yire ese yesapu.
10 Wu samo ponrini wamo ka wu wola yire ese wo ompla,
ka ompla nu naneinampolene.
Ka Manawamo yenmaire nama wunini.
11 Wu yulu nemi feingkyane ka ommo yukaine amplapi wamo wongke,
ompla wongke ke yuna 4pla piyowa wunini ka yimane wu yolo pike.
12 Amplapi wamo namo sa yuna ommo kulu mingklari,
ommo rewmew plau fai naraine riri ka ommo fai puna nikilene pike ka rora re.
13 Ka wu yupu mi mongkoma wongke yireni wu nanrona,
“Pita!
Yene yemei,
yuflo ommo namo ka yene wo.”
14 Ka Pita yire nanrona,
“Ese onne,
Manawamo.
Ki isi fei ko ommo kulu namo.
Lo munini yire nanrona ommo namo fei namkile.”
15 Ka mi mongkoma wongke yireni wu kore nanrona,
“Yene fai youw ommo God yangke namkile pu,
nanrona ommo namo fei namkile.”
16 Ommo namo yemei plainrikera,
ka wampane ro amplapi wamo namo pari kore nemi riri.
17 Empo Pita yulu ompla namo pekimo,
ka wu waiye wolrufuye nomu empo ompla wone yuluye namo.
Ka nu uma empo Konilius yawale nu painri namo,
napu ka nalile mow empo Saimon waiye pei,
ka nu noloni neli plerama.
18 Nu nouw ka nalile nanrona,
“Saimon,
noula wongke wunini Pita,
waiye namo wee onne?”
19 Empo Pita waiye ka wolrufuye ommo yukaine empo wone yuluye namo,
Holi Spirit yireni wu nanrona,
“Saimon!
Mana plainrikera sa napune yene.
20 Yene yemei ka palo ruwe.
Yene fai yumye sa nenrape.
Yene ese yakle nu paipi,
nu uma namo empo ki kawale nu noloni.”
21 Nanrona fane Pita palo ka yirengkle nu mana plainrikera nanrona,
“Ki mana empo pone papupe.
Pone polopi pire pangke ompla fika?”
22 Ka nu nireni wu nanrona,
“Konilius,
kepten empo ami yawale mu molomi.
Wu mana uporo wokera nama empo God ka wu mana fai yumye God.
Wu mana nu Juda fai nererine noula wunini.
Ensel wongke empo God yireni wu youw yene ese paiyi mow wunini ka wu ese yupu mi yeneni.”
23 Ka Pita youw mana namo panri mow namo ka ningki nu nane wu niye.
Moulpeplere wu yemei yakle nu painri ka nu Kristen pinuma plai empo taun Jopa re nakle nu painri.
Pita paiyi mow empo Konilius
24 Kaire wongke kore sa nu painri plele taun Sisaria.
Konilius waiye yoru nu ka wu yumale nu oli oikenra ka nu foluma woneni noloni nemnoku.
25 Empo Pita paiyi plele mow empo Konilius,
Konilius yekli fufula ka waiye eklene rew empo Pita ka yosiyane wu.
26 Ka Pita mew yuna mew wunini ka yireni wu nanrona,
“Yene yemei!
Ki re ki mana siwolenro.”
27 Wuyane noplo mi puru ka yane panri monre ka Pita yulu uma pinuma mingklari wamo sa nemnoku nanaine.
28 Wu yirengkle nu nanrona,
“Pone pupu ka pone isi namale pu nanrona lo empo mu Juda yire nanrona mu Juda ese fei maimpi ka mulu nu uma fei Juda,
ka memei foli nunini.
Ka God yire ki nanrona ki ese fei kouw mana wongke nanrona fafaile wee fei namkile nama empo God.
29 Empo ki kem mi nanrona,
pone pire ki ese koloki,
ki fei kangko mi.
Fane naimele ki ese kalile pone,
fikami ka pone ke pouw ki?”
30 Konilius yireni wu nanrona,
“4pla kaire paiyi pu ki kaike mow kinini ka ki kesapuke taim nanrona,
yukaine 3 kilok ningkipopli.
Wampane ro mana wongke rana amplapi ompla ali wamo yolowi ka yeli ungklama kinini,
31 ka wu yireni ki nanrona,
‘Konilius,
God empo yupu yene yesapuye ka wu wolrufuye ommo yene fai yaliye nu uma empo ommo onne.
32 Yene yawale nu uma painri Jopa ka numane Saimon noula wongke Pita.
Wu foli wongke empo waiye mow empo Saimon mana fai yangke ommo papli kulu wongkwongkeni mingklari,
wu waiye fulu piyowa.’
33 Nanrona fane ki mi paiyi yene wampane ro,
ka uporo wamo yene yolowi.
Empo mu molomi maime nama empo God mele,
mu mire ese mupu mi mingklari yukaine empo Manawamo yirewi yene ese yiremi mu.”
Pita yoplo mi mow empo Konilius
34 Ka Pita yemei yoplo mi wunini ka yire mi alwone nanrona,
“Naimele ki samo kulu nanrona God fei fai wolyane nu uma plai ka wolyuma nu uma plai,
sa onne!
35 Empo nu uma mingklari wu fai wolyaliye nu pinuma naine ruwelpo empo wu ka nangke nale upor uporo ro.
36 Pone namale mi empo God yali paiyi nu uma empo Israel,
yire mi uporo empo Jisas Krais wu sa Manawamo empo mone uma mingklari.
Ka wu empo mewmew mone ese molomi eklene God yukaine nu foluma woneni,
ka wu ese fei wolpun neni mone kore.
37 Pone namale ompla fika isi emen yemei provins Galili,
se sa ke paiyi mokoi mingklari empo nu uma Juda.
Empo Jon Baptais yoplo mi nu uma ese nem baptais,
Pekimo se ompla namo ke yemei
38 Pone namale God yina Jisas empo taun Nasaret ka wu yane wu,
Holi Spirit ka kelo.
Ka ommo nanrona wu paiyi mokoi mingklari yangke nale uporo ka yemplekuru nu uma mingklari empo Satan isi yisyoliye nu,
empo fika God empo waiye plau wu.
39 “Mu mulu ommo mingklari empo wu yangkeye pike empo nu Juda,
ka taunwamo Jerusalem,
fane mu ke moplome.
Nu nona wu yapa ilo riri ka nufu wu ri.
40 Wu waiye pike pulale kaire plainrikera ka God yangke wu yemei kore.
Ka God yangke wu yemei alele fai mu ese mulu wu.
41 Uma pinuma mingklari fei nulu wu,
wu yemei mu uma empo God wone yuꞌpu nro.
Mu uma empo God wone yuꞌpu mu ese moplo mi wunini.
Empo wu yemei kore,
mu mane wu mo ompla ka maikomo.
42 Wu yali mi kelo mu ese mirengkle nu uma mingklari mi empo God.
Ka mire mi alwone nu uma empo mi namo nanrona,
wu mana namo God isi yem wu ese waiye yukaine mana fai yupuye kot empo nu uma isi rili ka nu uma empo naine laip.
43 Profet mingklari noplone mi wunini nanrona nu uma fai bilipne wu,
ka noula empo Jisas God ese yuꞌpoleye ommo fafaile wongkwongkeni nu fai nangkene.”
Nu uma plai nem Holi Spirit
44 Empo Pita yeli ka yoplongkleye nu,
Holi Spirit yolo nu uma mingklari empo naine ka nupune mi namo.
45 Nu uma empo Juda fai bilipne namo empo nane Pita noloni plau,
nu wol mingklari empo nu nulu nanrona God ke yali Holi Spirit yolo nu uma fei Juda.
46 Nu wol mingklari empo fika nu ke nupu nu noplolene moile mi wongkwongkeni namo,
ka ke nererine noula empo God.
47 Ka Pita yire nanrona,
“Mana wongke ese fei mi yaule nu uma mee fai mu ese baptaisim nu mii.
Empo fika nu empo nem Holi Spirit pu,
yukaine mu re isi mem.”
48 Nanrona fane wu yire mi kelo nu uma namo ese nem baptais noula empo Jisas Krais.
Ka Konilius yakle nu oikenra ka nu foli woneni naline Pita ese yakle nu naine kaire plai se.