Pita yoplo mi empo sios empo Jerusalem ompla wu fai yangkeye
11
Nu aposel ka nu uma fai bilipne empo provins Judia,
ke nupu mi empo nu uma fei Juda namo nu re nupu mi empo God ka nu bilip.
2 Nanrona fane empo Pita pari taunwamo Jerusalem,
ka nu disaipol fai neli kelone nale empo naulene papli nane nopu mi.
3 Ka nu nireni wu nanrona,
“Yene empo paiyi mow empo nu uma fei naulere papli nunini ka yene yakle nu po.”
4 Nanrona fane Pita samo yirengkle nu,
ommo mingklari empo nemei wu.
5 “Ki empo kaike kesapuke taun Jopa ka empo taim namo yukaine ki kiye ruwila.
Empo taim namo ki kulu ommo yukaine amplapi wamo wongke,
waiye nemi riri ka nu risinane wu yolo koii empo ki kaike namo.
Ka amplapi wamo namo ompla wongke yuna 4pla piyowa wunini.
6 Ki samo nama kinra palo kulu amplapi wamo namo ka ki kulu amplapi wamo namo sa yuna ommo kulu mingklari,
ommo rewmew plau fai naraine riri ka ommo fai puna nikilene pike ka rora re.
7 Ka ki kupu mana wongke yireni ki nanrona,
‘Pita!
Yene yemei,
ka yufu ommo namo ka yene wo.’
8 “Ka ki kireni wu nanrona,
‘Ese samo onne!
Manawamo,
ki isi fei ko ommo empo fei namkile nama yeneni namo.’
9 “Ka mana empo yoplo mi yolo heven yire ki kore nanrona,
‘Yene fai youw ommo empo God yangke namkile pu nanrona ommo fei namkile.’
10 Ommo namo yemei ki plainrikera ka amplapi namo nu nengke pari kore heven.
11 “Empo taim namo Konilius yawale nu uma plainrikera empo noloni taun Sisaria ka nu noloni plele mow empo ki fai kaikeke namo.
12 Holi Spirit yire ki nanrona ki ese fei kum ki ese kakle nu uma namo maimpi.
Nu 6pla uma empo bilipne namo,
nupene ki kakle maimpi mampli monre mow empo Konilius.
13 Ka wu yoplo mu mi empo wu yulu ensel wongke yemeiye wu monre mow woneni ka yireni wu nanrona,
‘Yene ese yawale nu uma painri taun Jopa ka nulu Saimon noula wongke wunini Pita ka nireni wu ese yolowi yene.
14 Wu ese yirepi pone mi plai.
Mi namo nro sa God ese waiye uporo plau uma mingklari empo fai naine mow yeneni namo.’
15 “Empo ki kemei ka kirengkle nu mi namo,
Holi Spirit yolo nu yukaine isi emen yolo mone namo.
16 Ka empo taim namo,
ki wolrufu mi isi Manawamo yireye.
Wu yire nanrona,
‘Jon sa baptaisim pone mii siwolenro,
ka ki ese baptaisim pone Holi Spirit.’
17 Nanrona fane God yali nu Holi Spirit yukaine wu isi yame mone empo mone bilipim Manawamo Jisas Krais.
Nanrona fane ki sa fina ese mi kaule ompla namo empo God yangkeye?”
18 Empo nu nupu mi namo fane nu fei nane Pita nopu mi kore.
Nu nereri noula empo God ka nire nanrona,
“Nanrona fane mu namale nanrona God yali nu uma fei Juda rokoi fai nupone ommo fafaile none fai nangkene ka nu ese nupene mi wunini.
Ka wu yali nu laip fai waiye uporo nanrona nanrona.”
Sios waiye taun Antiok
19 Empo nu nangke fafaile wamo nu uma fai bilipne Jisas ka nufu Stiven ri,
nu uma fai bilipne Jisas namo nemropu painri kenkenra.
Plai painri naine distrik Fonisia,
ka plai painri naine taun Antiok ka plai painri naine ailan Saiprus ka nu noplo miuporo empo God paiyi nu uma Juda ro.
20 Ka nu uma plai empo ailan Saiprus ka taun Sairini fai bilipne painri taun Antiok ka noplo mi empo Manawamo Jisas paiyi nu uma Grik plau.
21 Manawamo yali kelo nu ka uma mingklari ke bilip ka nenmaire noloni Manawamo.
22 Uma pinuma mingklari empo sios naine Jerusalem nupu mi empo ommo namo fane nu nawane Barnabas paiyi taun Antiok.
23 Empo wu paiyi pari plele taun Antiok,
ka wu yulu nanrona God empo mewmew nu ka samo yemplekuru nu ka wu woluporo ompla namo ka wu yali nu mi plai fai yangke nu neli kelo ka wolpuna nunini samo nupene Manawamo nro.
24 Barnabas wu sa mana uporo,
ka Holi Spirit konralo wu ka wu samo bilipim Jisas ka wu yangke nu pinuma mingklari nenmaire ka bilipim God.
25 Se Barnabas paiyi taun Tarsus yire wu ese paiyi yapu Sol.
26 Empo wu wane wu ka wu yumane wu yane panro kore taun Antiok.
Nanrona fane Barnabas yane Sol painri nu pinuma empo mokoi namo ka nukule nu mi empo God paiyi resuklu kikla wokera.
Nu nem noula Kristen namo,
sa emen yemei nu disaipol empo Antiok.
27 Empo taim namo nu profet plai nupone Jerusalem ka nolo Antiok.
28 Wongke empo nu profet namo,
noula wunini Agabus,
Holi Spirit yereryane wu ka wu yoplo mi empo mokoi mingklari empo taunwamo Rom fai yopaliye namo,
ommo empo nu pinuma fai nonene namo ese pekimo ka nu ese ponrili wamo.
(Ommo namo yemei nu empo Klodius isi waiye yukaine king fai paiyi risiye gapman empo Rom.)
29 Nanrona fane nu Kristen wokwokera empo Antiok nuka mi nire nu ese nina romaula paiyi nu Kristen plai naine Judia.
Nanrona fane nu Kristen nali romaula resuklu nu ese nali.
30 Ommo mingklari empo nu nemnoku namo,
nu nane Barnabas yane Sol nungkam painri nu uma fai painri risine nu pinuma namo.