Pita yupone mow kalabus
12
Empo taim namo,
King Herota yemei ka yunali nu uma plai empo sios ka wu yangke fafaile wamo nu.
2 Wu yali nu mi kelo ese nuna Jems,
Jon rani ka nu nem bainat naule ikaklo wunini ka wu ri.
3 Empo King Herot yulu nanrona ommo wu yangke namo ke yangke nu Juda woluporo wamo,
fane wu yire ka nu painri nuna Pita plau.
Wu yangke ompla namo taim empo Kaire Wamo Empo Bret Empo Yis Onne.
4 Empo nu nuna Pita,
nu painri ka nina wu pari kalabus.
Ka empo wu waiye kalabus namo,
4pla grup ami ka 4pla uma fai naine grup namo fai nopanene wu.
Herot yire Pita ese waiye kalabus paiyi plele Kaire Wamo Empo Bret Empo Yis Onne namo pekimo se sa Herot ese yem wu yolowi nama empo uma mingklari ka wu ese yupu kot wunini.
5 Nanrona fane Pita waiye kalabus ro ka nu ami fai nopanene wu.
Empo taim namo re,
nu uma empo sios ke nesapu kelo empo God ese mewmew wu.
6 Ka empo ningki namo paiyi moulpeplere sa Herot ese yumane Pita ese paiyi kot woneni namo.
Pita namo nu nuka wu sen plainrane ka ami plainrane neli nopanene wu ka wu wiye iplele ami plainrane.
Ka ami plainrane kore sa naine plerama ka samo nopane mow kalabus namo.
7 Wampane ro,
ensel empo Manawamo yemei ka aliyane monre empo mow kalabus namo.
Ka ensel yufu Pita nengki fai wu ese yemei.
Ka ensel yireni wu nanrona,
“Yene wampane yemei.”
Empo taim namo,
sen plainrane empo nu nuka mew empo Pita namo nu none kal feingklo ka firipanro naine.
8 Ka ensel yireni wu kore nanrona,
“Yene yiperi let yeneni ka yana sandel yeneni.”
Ka Pita yangke ommo yukaine empo ensel yireni wu namo ka ensel fai yireni wu kore nanrona,
“Yene yana ommo papli yeneni namo ka yene yupene ki.”
9 Pita yupene ensel namo palo moile yupone mow kalabus.
Ka wu wone sa fei namale ompla fika empo ensel yangkeye namo.
Wu yire nanrona wu sanro wiyolo ruwila fane.
10 Wuyane nupone ami plainrane naine risi namo ka wuyane painri ka nupone nu ami plai kore empo naine wairu nu isi wuyane nupone nu namo.
Wuyane painri plele rama wamo empo taunwamo namo.
Rama wamo namo,
nu neri ain ro.
Rama wamo namo,
wu wone kal wolpari ka wuyane panro moile.
Wuyane naraine panro rokoi wokera ka wampane ensel namo ke kal pekini wu.
11 Empo taim namo Pita namale ompla fika empo yemeiye namo ka wu yire nanrona,
“Naimele ki namale nanrona ompla namo sa alwone.
Manawamo yireni ensel wunini yolo ka mewmew ki kelo empo Herot ka ommo yukaine nu Juda empo nire ese nangke yemei ki.”
12 Wu namale ompla namo fane wu samo paiyi mow empo Maria.
Maria namo,
wu moka empo Jon noula wongke nu fai nouwne wu sa Mak.
Empo mow empo Maria namo,
uma mingklari wamo painri nemnoku naine ka nesapune.
13 Pita yeli rarakuye rama moilele ka pin fai yangke ommo mow namo noula wunini Roda,
yolo yire ese sam yulu fina ke yeli rarakuye rama namo.
14 Empo wu yupu mi mongkoma empo Pita yeli moile mow plerama namo,
ka wu aiyem wamo ka fei yenrume rama,
wu yempliri pari kore monre ese yirengkle nu uma mingklari empo naine monre namo nanrona,
“Pita yeliye moile mow plerama!”
15 Nu uma naine monre namo nireni wu nanrona,
“Yene sanro ila wawile wee?”
Ka wu kelo ka yirengkle nu,
“Onne.
Won alwone wu nawaiye.”
Nanrona fane nu nireni wu nanrona,
“Namo sanro ensel wunini fane.”
16 Pita yeli ka rarakuye rama.
Se nu nenrume rama ka empo nu nulu wu,
malma nunini flipalo kei.
17 Wu mew kauka nu fai nu ese misarulu ka wu yoplongkle nu empo Manawamo yangke fika wu ka yem wu yolo moile empo mow kalabus.
Ka wu yirengkle nu kore nanrona,
“Pone ese pireni Jemsb yakle nu inomranimpi empo bilipne mi naimele.”
Wu yoplongkle nu pekimo se wu palo moile ka paiyi mokoi wongke.
18 Ningknamnole,
nu ami namo naine nemnulu none ka noplo mi mingklari ka nemnali none kore nanrona,
“La Pita sa paiyi pei?”
19 Herot yire mi kelo nu ami ese painri mowmow ka napu Pita.
Ka nu fei nulu wu.
Nanrona fane Herot yuꞌpu nu ami namo painri kot.
Ka wu yire mi kelo nu ese nuflo nu rili.
Herot ri
Se Herot yupone distrik Judia ka palo waiye taun Sisaria.
20 Herot ke wolpun neni wamo nu umapinuma empo taun Tair ka Saidon.
Nanrona fane nu nemnoku mingklari wamo ka painri nulu wu.
Emen,
nu painri nulu Blastus mana fai paiyi risi ka yopaneye ommo mingklari mow empo King Herot ka nauli mipalo wu fai wu ese wolpalo nu ka ese mewmew nu.
Se nu painri ka nulu Herot fai wu ese wolpalo nu.
Empo fika nu fai nem ompla yolowiye pike empo Herot fai yopaneye namo.
21 Nanrona fane King Herot isi yire kaire wongke ka taim namo empo yemei naimele fane wu rana ommo empo nu king ka wu paiyi waiye sia king woneni ka yoplo mi wamo ka nu pinuma empo noloni nemnoku ese nupu.
22 Nu nemkaiwalo ka nire nanrona,
“Namo seke mana yoploye,
an god wongke yoploye fane.”
23 Nanrona fane wampane ro ensel empo God yufu wu firpalo ka malila naulnuma mokpuna ka aulpuna wunini paiyi wola wu ri kei.
Empo fika,
King Herot wu fei yangke ompla wongke ese yereri noula empo God.