Nu nireni Barnabas yane Sol painri
13
Profet plai ka tikse plai fai naine sios empo taun Antiok.
Nu profet nakle nu tikse namo,
sa Barnabas ka Simion noula wongke wunini Mana Kina.
Ka Lusius empo Sairini ka Sol ka Manain.
(Manain namo,
sa mana wuyane Herot fai samo nemnopalene wonyane empo isi wonyane mela aukom).
2 Kaire wongke nu neinangklu ompla fai none ka nu naine nosinanene Manawamo.
Ka empo taim namo Holi Spirit yirengkle nu nanrona,
“Pone ese pireni Barnabas yane Sol ese painri nangke ompla empo ki kireni wuyane ese nangke.”
3 Empo nu neinangklu ompla fai none ka naine nesapune namo pekimo se,
nu Kristen mew naune Barnabas yane Sol ka nireni wuyane painri nangke ompla empo Manawamo.
Barnabas yane Sol noplo Mi empo God ailan Saiprus.
4 Mana plainrane namo,
Holi Spirit yangke wuyane nemei painri kei ka panro taun Selusia ka wuyane nem sip painri ailan Saiprus.
5 Empo wuyane painri plele taun Salamis,
wuyane nemei ka painri mow koli empo nu Juda ka noplo mi empo God.
Jon Mak empo yane wuyane painri fai ese mewmew plau wuyane.
6 Nu painri mokoi mingklari empo ailan namo ka nu painri wola painri plele taun Pafos.
Ka empo mokoi namo,
nu nane Juda mana wongke noula wunini Bar-Jisas.
Mana namo,
wu sa profet fafaile fai kalyaniliye nu uma ka mana fafaile fai yuka uka.
7 Ningki kaire wu fai yane mana fai paiyi risiye gapman noula wunini Segius Paulus naine plau.
Mana Segius Paulus namo,
wu mana yuna ila uporo wamo.
Ka empo taim namo wu mi paiyi Barnabas yane Sol ese noloni nulu wu.
Empo fika wu wola yire ese samo yupu mi empo God.
8 Ka mana Bar-Jisas namo fei woluporo Barnabas yane Sol ese noplo mi empo God paiyi Sergius Paulus ese yupu ka ese bilip.
Bar-Jisas noula wongke wunini Elimas ka noula Elimas namo,
nomu wunini sa nanrona,
“Mana fai yuka uka.”
9 Ka wampane ro,
Sol noula wongke wunini namo sa Pol,
Holi Spirit konralo wu ka wu kilyulu Elimas ka yireni wu nanrona,
10 “Yene mela empo Satan,
ka yene fai waiye wolpuneni nale uporo.
Yene yuna rokoi fafaile mingklari fai kalyaniliye ka kapyukaye uma ila empo mi plai.
Yene fai yem mi uporo empo God ka yenmaire nu nemei yukaine mi fafaile.
Yene ese yupone ompla fafaile empo yene fai yangkeye namo wee onne?
11 Eseme mew empo Manawamo ese yangke fafaile yene.
Yene nama ese wowo ese as yeye ka yene ese fei yulu kaire.”
Ka empo Pol yire mi namo,
wampane ro ompla yukaine kupu kurela yolowi ka yufona Elimas nama ka wu fei yulu koii ese waraiye.
Nanrona fane wu wawile rokoi ka poiyupaiyu yapu rokoi ese nu uma nuna wu mew nane wu painri.
12 Empo Sergius Paulus yulu ompla namo,
wu bilip.
Ka wu re wol wongkeni mi empo Manawamo.
Barnabas yane Pol naine taun Antiok empo provins Pisidia
13 Pol yakle nu uma fai nane wu naraine namo nupone taun Pafos,
ka nu nem sip painri taun Perga,
waiye distrik Pamfilia.
Empo nu noloni plele taun Perga,
Jon Mak yupole nu ka paiyi kore taunwamo Jerusalem.
14 Nu nupone taun Perga ka nu painri taun Antiok waiye distrik Pisidia.
Ka empo mokoi namo,
kaire empo Sabat yolowi ka nu panri naine mow koli empo nu Juda.
15 Empo nu nulu mi empo lo ka mi empo profet namo pekimo,
nu uma fai painri risine mow koli namo nalile nu nanrona,
“Pone uma,
la pone puna mi wongke uporo ese pirengkle nu uma mingklari empo naine mee ese neli kelo,
sa pone poplo.”
16 Nanrona fane Pol yemei yeli ka wu yereri mew ka yirengkle nu nanrona,
“Pone uma mingklari empo Israel ka pone uma fei Juda fai pumpe God samo pupu mi kinini mee.
17 God empo Israel yuꞌpu nu flili empo mone ka yangke ommo uporo uporo mingklari nu.
Wu samo yopali nu ka nu nuꞌpu kongkom ka nu nemei mingklari wamo empo nu naine kantri Isip.
God namo ro,
kelo wunini samo wamo.
Ka kelo namo ro,
wu yumale nu Israel naraine nupone kantri Isip.
18 Empo nu naine mokoi maipon siwolenro namo,
nu isi nangke ommo mingklari fafaile yukaine nu fei woluporo wu.
Ka wu fei kuma yali nu ka yangke fafaile nu.
Wu yopali nu paiyi resuklu 40pla kikla.
19 Wu paiyi risi nu Israel ka yangke nu nopu kelo wamo ka numalo nu uma empo 7pla pike plola empo Kenan.
Ka God yali pike plola namo paiyi nu uma woneni Israel ka pike namo waiye yukaine pike nunini.
20 Ommo mingklari empo God yangkeye nu empo nu naine kantri Isip yolowi plele empo nu nem pike plola mee sa yukaine 450pla kikla.
“Se God ke yali nu Israel nu ilauma ese painri risi nu paiyi plele taim empo profet Samuel.
21 Fei pape ka nu uma namo nali nire nu ese nem king wongke ese yopali nu.
Nanrona fane God yali nu king Sol.
Wu sa Kis auna.
Wu sa yemei uma oli empo Benjamin.
Wu waiye king empo Israel resuklu 40pla kikla.
22 Se,
God yupone king Sol ka ke yangke Devit yemei yukaine king empo Israel.
Wu isi yoplo mi empo Devit nanrona,
‘Ki kem Devit Jesi auna.
Mana namo,
wola kinini waiye wu nro.
Wu ese yangke ommo mingklari yukaine empo ki kireke namo wu ese yangke.’
23 “God isi yire nanrona wu ese yame mone mana wongke ese mewmew ka yuꞌpu kore mone.
Mana namo ese yemei uma oli empo King Devit.
Ka mana namo empo wu yireye namo sa Jisas.
24 Isi emen empo Jisas fei yemei,
Jon yirengkle uma mingklari empo Israel nanrona nu ese nenmaire ka nupone ommo fafaile none fai nangkene ka nem baptais.
25 Empo Jon yangke ompla namo yire pekimo,
wu yalile nu nanrona,
‘Ka pone pire ki sa fina?
Ki seke mana empo pone porupe namo.
Pone pupu!
Mana ese yolowi wairu ki namo,
ki fei mana uporo ese kingklame sandel wunini.’a
26 “Pone uma kinini,
pone kongkom empo Abraham ka pone uma fei Juda fai bilipimpe God,
pone samo pupu!
Miuporo namo empo mana ese yem mone kore namo,
nu nem noloni mone nro.
27 Nu uma empo Jerusalem ka nu ilauma fai painri risine nu namo,
fei namale Jisas wu mana fai yupole ommo fafaile empo mone Israel.
Ka empo nu kotim wu ka nufu wu ri,
ompla namo yemei alwone yukaine mi isi nu profet noplone.
Mi namo nu fai nulune ka noplone kaire empo Sabat.
28 Ka nomu uporo empo nu kotim wu namo sa onne,
nu kalnumane Jisas paiyi Pailat ka nire mi kelo wu ese kotim wu ka yufu wu ri.
29 “Wola nu nangke ommo mingklari Jisas yukaine mi isi nu profet noplone ka neꞌrene namo,
nu nemane Jisas empo nu nona wu yapaye ilo kruse namo ka painri niꞌna wu waiye roma pulale.
30 Ka God ke yangke wu yemei kore.
31 Ka wu yakle nu naine kaire mingklari ka nu nupone distrik Galili ka wu yakle painri plau Jerusalem,
nu nulu wu.
Nanrona fane nu noplongkle uma mingklari empo Juda ommo yukaine isi none nulune.
32 “Mu mirepi pone miuporo empo God.
Ommo namo sa God isi yuka mi nu flili empo mone.
33 Ka naimele mone kongkom nunini empo mulu ompla namo yemei alele wamo mone empo God yangke Jisas yemei kore.
Mi wiye Buk Song sapta 2 yire nanrona,
‘Yene sa auna kinini.
Naimele ki kaike yukaine aina yeneni.’b
34 God yangke Jisas yemei kore ka nale wunini ese fei waiye pike pulale ka pliki.
Ommo namo yemei pu,
wu isi yire mi namo nanrona,
‘Ki isi kukami alwone yene nanrona ki ese blesim yene ka samo kemplekuru yene.’ c
35 Ka mi plola wongke empo wiye Buk Song namo yire nanrona,
‘Yene ese fei yupone Mana Uporo yeneni namo waiye pike pulale ka pliki.’d
36 “Empo Devit waiye pike yakle nu uma oli empo wu,
wu isi yangke ommo yupene wolpuna empo God isi yireye wu ese yangke.
Ka empo Devit ri nu niꞌna wu pike pulale plau nu flili woneni,
ka nale wunini pliki.
37 Ka mana empo God yangke wu yemei kore namo,
papli wunini fei pliki.
38 “Nanrona fane pone uma kinini,
ki kire pone ese namale ompla namo.
Ompla empo Jisas yangkeye namo,
empo nu nufu wu ri,
wu yuꞌpole ommo mingklari fafaile nu uma fai nangkene namo.
Ka empo pone ki koplo mee.
39 Jisas wokera nro fai yuꞌpoleye ommo fafaile empo nu uma fai nangkene namo ka God fai yire nanrona nu uma uporo.
Ka lo empo Moses ese fei yuꞌpole ommo fafaile empo nu uma fai nangkene namo.
Sa onne.
40 Nanrona fane pone ese sam saimope ompla empo profet nirene namo ese fei yolowi pone.
Nu profet isi nire God yire nanrona,
41 ‘Pone pulu,
pone uma empo owyire,
fei samo namale ka pum mi,
ka pone uma fei namale mi nomu mee.
Nanrona fane pone uma ese rili.
Naimele,
ki ese kangke ommo plai
sa pone ese pulu ka nu uma plai ese nirepi pone
ka pone ese fei bilip.’ ”e
42 Empo Pol yoplongkle nu pekimo se wuyane Barnabas nire nupone mow lotu ka painri,
ka nu uma plai wola nire ese samo nupu mi empo Pol yoploye namo,
nanrona fane nu uma namo naline wuyane ese noloni kore ka noplo mi empo Manawamo namo empo Sabat wongke kore
43 Empo nu nupone mow koli ka panro moile ka plelene painri,
nu Juda ka nu uma fei Juda fai nakle nu Juda nemnoku nosine namo,
ke nupene Pol yane Barnabas ka wuyane noplongkle nu mi fai kelyali nu ese neli kelo ka nu ese fei wolnuma God fai wolyaliye nu.
44 Empo Sabat wongke kore yolowi,
uma mingklari empo taunwamo namo nangke lese mow nro nire noloni nemnoku ese nupu mi empo Manawamo.
45 Empo nu uma fai painri risine nu Juda namo nulu uma mingklari wamo noloni nemnoku naine fane nu nampalo ka nu ownire ka nangklu mi empo Pol ka uma mingklari ese fei nupu.
46 Ka Pol yane Barnabas fei num mi nunini.
Wuyane nirengkle nu nanrona,
“Mi alwone sa nanrona mu ese as moplo mi empo God paiyi pone Juda se.
Ka pone empo kuma pane mi namo ka pone pire nanrona,
pone sa fei uporo ese pem laip waiye nanrona nanrona.
Nanrona fane mu ese maimpi ka moplo mi namo paiyi nu uma fei Juda.
47 Empo fika,
Manawamo empo yame mu mi kelo ka wu yire nanrona,
‘Ki kangke pone ese paipe yukaine ali ese alil paiyi nu uma fei Juda
ka pone ese poplongkle mi paiyi nu umapinuma sa God ese yuꞌpu kore nu.
Ka nu ese nupene Jisas wokera ro ka mi namo ese paiyi mokoi mingklari empo pike mee.’ ”f
48 Empo nu uma fei Juda namo nupu mi namo fane nu woluporo wamo ka nereri noula empo Manawamo.
Ka nu pinuma mingklari isi God wone yuꞌpu laip nunini ese naine nanrona mokoi namo,
nu pinuma namo fai bilipne.
49 Mi empo Manawamo namo yopli pouwpaiyi mokoi mingklari empo distrik namo.
50 Ka nu uma fai painri risine nu Juda namo nire mi plai ese nangke fafaile wolpuna empo nu pinmana empo nu uma fei Juda fai numne God.
Nu pinmana nuna noula ka nu ilauma empo nu uma pinuma empo taun namo,
nu nengke nu uma plai nangke fafaile wamo Pol yane Barnabas ka nawale wuyane nupone distrik namo.
51 Nanrona fane Pol yane Barnabas nelefu pike fum empo yangkalo rew empo wonyane.
Wuyane nangke nanrona ese yuku nu nanrona eni namo seke wuyaneni,
namo sa eni nu umangkle empo fei fai nupu mi empo Manawamo.
Ka wuyane painri taun Aikoniam.
52 Ka Holi Spirit konralo nu uma empo nupu mi empo Manawamo ka bilipne namo nu ke woluporo wamo.