Barnabas yane Sol noplo mi Aikoniam
14
Empo Pol yane Barnabas naine Aikoniam wuyane nangke nale yukaine isi wuyane nangkene Antiok.
Wuyane fai painri panri monre empo mow koli empo nu Juda,
ka noplo mi.
Wuyane samo noplo mi uporo ka nu uma mingklari wamo empo Grik ka Juda namo ke bilip.
2 Ka nu Juda plai empo fei fai bilipne mi namo,
ke nangke fafaile wolpuna empo nu pinuma fei Juda namo ese fei nupu mi wuyaneni ka nu samo wolpuneni nu pinuma empo fai bilipne.
3 Nanrona fane Pol yane Barnabas as naine ningki kaire mingklari koii namo,
ka wuyane fei num ompla wongke.
Wuyane nuna kelo mi empo Manawamo ka noplone mi empo Manawamo fai wolyaliye nu.
Wu wone yali kelo resuklu wuyane ka wuyane nangke mirakol wamfafai wongkwongkeni.
Ka mirakol namo fai yuku nanrona mi empo Manawamo namo sa won alwone.
4 Uma pinuma mingklari empo taunwamo namo pepeli rep plainre.
Repo wongke sa nu naine plau nu Juda ka repo wongke sa nu naine plau nu Aposel.
5 Nanrona fane nu uma fai painri risine nu Juda ka nu uma fei Juda namo,
nakle none plai peki nuka mi pu ese nangke fafaile Pol yane Barnabas.
Nu nire nuꞌpu roma ka nopline Pol yane Barnabas ka nufu wuyane rili.
6 Ka Pol yane Barnabas peki nupu mi empo nu uma noplone wonyane ka wuyane nulipanro painri taun plainre empo distrik Likonia.
Ka mokoi plai empo naine mairane taun plainre namo.
7 Ka empo mokoi namo,
wuyane nangke ompla fai noplo mi empo God.
Pol yane Barnabas naine taun Listra ka Derbe
8 Empo taun Listra namo sa mana wongke rew wunini fafaile fai waiyeye.
Mana namo,
isi moka yem wu rew fafaile wi plele empo wu wamoye.
Wu fai waiyeye ro ka fei fai waraiye.
9 Wu waiye ka ripi samo yalana mi empo Pol.
Pol ke kilyulu mana empo rew fafaile namo ka wu namale nanrona mana namo empo bilip fane wu ese yemei uporo.
10 Ka Pol youw wu ka yire nanrona,
“Yene yemei ka yeli rew plainre yeneni!”
Ka empo kaire namo nro,
mana empo rew fafaile namo ke firyemei yeli ka waraiye rew woneni.
11 Empo uma pinuma mingklari nemnoku naine namo ke nulu ompla empo Pol yangkeye namo ka nu nouw mi faki Likonia mi ka nire mi nanrona,
“Nu god empo nolo mone yukaine nu uma!”
12 Barnabas sa nu nane wu noula Sus ka Pol sa nu nane wu noula Hermes.a
Empo fika,
wu mana fai paiyi risiye mi.
13 Mow koli empo god Sus namo sa waiye eklene puku empo mamane taun namo.
Nanrona fane ila mana empo mow koli empo god Sus namo,
paiyi yuꞌpu bulmakau enela plai ka yem ommo rowa plai empo nu nufla plau ommo ula wongkwongkeni ka ilo para mamane.
Wu yem ommo namo ka bulmakau yunali paiyi kore rama wamo empo taunwamo namo fai wu ese yakle uma pinuma mingklari ese nangke ofa empo Pol yane Barnabas.
14 Ka empo Pol yane Barnabas nupu mi empo ompla namo empo nu uma nire ese nangke namo,
ka wuyane ke fei wolnane ka wuyane ke naklelpanre amplapib empo wonyane ka nempliri faflai painri uma pinuma mingklari empo nemnoku naine namo ka wuyane ke nangke mi kelo wamo ka nire mi nanrona,
15 “Inomranimpi,
fikami ka pone kampluno ommo namo?
Ki kane sa mannale fane yukaine pone.
Ki kane sa mungkam miuporo empo God empo laip,
molomi ese mirepi pone sa pone ese pupole ommo fafaile namo fei fai nangkene.
Ka pone ese posipane God waiye nanrona nanrona.
God namo nro empo isi yangke nemi riri ka pike ka fulu ka ommo mingklari empo nenene namo.
16 Isi wu yupole uma pinuma mingklari nangke ommo yukaine none nire nangkene.
17 Ka,
wu fei pekiyina wone,
onne.
God namo ke yuku nanrona wu wolyane mone wamo.
Wu yangke riple yolo nemi ka ilo mingklari ke nalelane taim noneni.
Ka wu yape ommo mingklari fai none ka yangke pone ese paipe plau woluporo.”
18 Wuyane noplo mi namo,
ka uma pinuma mingklari namo empo samo wolanapane nire ese nangke ofa paiyi wuyane.
Ka wuyane kepe nengkali nire mi naule nu uma ese fei nangke ofa paiyi wuyane.
19 Nu Juda plai empo noloni taun Antiok ka taun Aikoniam namo ke noplo mi fai yereryali wolpuna empo nu pinuma.
Ka nu nem roma nopline Pol ka numane wu palo moile empo taunwamo.
Empo nu nangke ompla namo,
nu ke nire wu ro ri pu fane nu nengke wu palo moile.
20 Ka empo nu Kristen noloni nemnoku mamane wu,
wu yemei ka paiyi pari kore monre empo taunwamo.
Ningkinamnole,
Pol yane Barnabas nupone taun namo ka painri taun Derbe.
Pol yane Barnabas painri kore taun Antiok empo yeye provins Siria.
21 Wuyane noplo miuporo taun Derbe ka mi empo wuyane noplone namo ke yangke uma mingklari bilip.
Se sema wuyane fai painri kore taun Listra,
Aikoniam ka Antiok.c
22 Wuyane noplo mi plai paiyi nu Kristen empo taun namo ese kelyali nu ese neli kelone bilip noneni.
Wuyane nirengkle nu nanrona,
“Mone ese mungkam eni mingklari empo mone mampli kingdom empo God.”
23 Pol yane Barnabas nuꞌpu nu uma fai ese painri risi sios empo mokoi wokwokera.
Wuyane nemnoku plau nu fai nesapu ka wuyane nirengkle nu ese fei no ommo ka wuyane nenru nu painri mew wola empo Manawamo fina empo nu fai bilipne namo.
24 Wuyane fa naraine mokoi mingklari empo distrik Pisidia ka wuyane painri plele provins Pamfilia.
25 Ka wuyane noplo mi empo Manawamo taun Perga pekimo,
ka wuyane panro taun Atalia.
26 Wuyane nupone taun Atalia ka nem sip painri kore taun Antiok koii empo isi nu Kristen nemnoku ka nesapu ka nina wuyane paiyi mew empo God ese wolpalo wuyane fai ese nangke ompla namo.
Ka wuyane nangke ompla namo pekimo ka wuyane painri kore.
27 Empo wuyane noloni,
wuyane nouw uma pinuma mingklari empo sios noloni nemnoku.
Ka wuyane ke noplongkle nu mi empo ommo mingklari empo God yangkeye fai mewmew wuyane ka wu yenrume rama empo nu pinuma fei Juda ese bilipim God.
28 Ka wuyane asa nakle nu uma fai bilipne naine mokoi namo.