Nu Kansol nemnoku taunwamo Jerusalem
15
Uma plai empo nemei distrik Judia ka nolo taun Antiok fa noplo nukulene nu Kristen ka nirengkle nu nanrona,
“Pone ese paule papli ponenia yukaine lo empo Moses yireye.
La pone fei pangke,
sa pone ese fei paipe nanrona nanrona.”
2 Mi namo yangke Pol yane Barnabas wolpun neni ka wuyane nakle nu nopu mi.
Nanrona fane nu nem Pol yane Barnabas ese nakle nu disaipol plai namo painri ese painri Jerusalem ese nulu nu aposel ka nu ilauma mi empo nu nopune mi namo.
3 Nu uma empo sios empo mokoi namo mewmew nu ka nawale nu painri.
Empo nu naraine painri iplele empo mokoi mingkalri empo distrik Fonisia ka distrik Samaria,
nu noplongkle nu disaipol empo distrik plainre namo ka noplo mi empo nu uma fei Juda nu empo bilipim Jisas pu.
Ka nu Kristen nupu mi namo ka nu woluporo wamo.
4 Ka empo nu painri plele Jerusalem,
nu pinuma empo sios nakle nu aposel ka nu ilauma re woluporo wamo ka saimolo nu.
Ka nu nirengkle nu mi empo ommo mingklari God isi yali kelo nu ka nu nangkene.
5 Ka nu Farisi plai empo fai bilipne namo,
ke nemei ka nire nanrona,
“Nu uma fei Juda namo,
ese samo nupene lo empo Moses ka naulere papli noneni yukaine lo yireye.”
6 Nu aposel ka nu ilauma namo nemnoku fai nuka mi empo nu uma fei Juda fai bilipne Jisas,
ka nu fei naulere papli noneni.
7 Nu noplo mi mingklari namo pekimo se,
sa Pita ke yemei yeli ka yirengkle nu nanrona,
“Inomranimpi kinini,
pone namale nanrona God isi yem ki fai koplo miuporo wunini paiyi nu uma fei Juda ese nupu ka bilipim wu.
8 God namale wolpuna empo nu pinuma mingklari.
Nanrona fane wu yuku mu nanrona wu wolpalo nu.
Mu namale nanrona wu yali Holi Spirit paiyi nu yukaine isi wu yame mone.
9 Nanrona fane wu fei yangke nale wongkeni mone ka nale wongkeni nu.
Nu bilip ka wu yuꞌpole ommo fafaile isi nu nangkene ka wolpuna empo nu naine namkile nama wunini.
10 Nanrona fane empo fikami ka pone ke pire pengkali God?
Pone ke napaunelipe ommo eni pariye nu Kristen kaula.
Yukaine mampi moneni empo isi ka mone re ese fei mungkam eni namo.
11 Mone fa bilipme nanrona Jisas fai wolpalo mone ka yuꞌpu kore mone.
Nanrona fane nu uma fei Juda re,
nu empo bilipim Jisas fane wu yuꞌpu kore nu.”
12 Pinuma mingklari samo misarulu ka ripi nalana Pol yane Barnabas noplone mirakol wamfafai empo God yali kelo wuyane ka wuyane nangkene empo nu uma fei Juda ka nu nulune.
13 Empo wuyane noplo pekimo,
se Jems ke yirengkle nu uma mingklari namo nanrona,
“Inomranimpi kinini,
pone pupu mi kinini.
14 Saimon yiremi mu nanrona God empo isi emen yangke ommo taim empo Abraham.
Ka wu samo wolyale nu uma plai empo fei Juda ka wu yangke nu naine yukaine nu uma woneni.
15 Mi mingklari empo nu profet namo sa yolowi mi wokera nro yukaine nu neꞌre wiye yire nanrona,
16 ‘Ki Manawamo,
kingke ki ese koloki kore
ese kangke nu oli oikenra empo Devit namo ese nupene nale uporo.
Nu sa yukaine mow wongke oya empo pikalpalo ka pikpikare pu.
Ki ese koloki kore ka samo keꞌre mow namo
ka ese yeli uporo kore.
17 Uma mingklari plai empo pike mee ese napu ki,
nu uma mingklari plai fei Juda
ki kuꞌpu nu pu ese naine yukaine nu uma kinini,
ese napu ki.
Manawamo yire nanrona ka wu yangke ommo namo nemei.’b
18 Ka ommo namo nu uma isine namale pu.
19 “Nanrona fane ki wola nanrona,
mone ese fei male eni nu uma fei Juda empo bilip ka nupene God.
20 Nanrona fane mone samo meꞌre piparola paiyi nu ka mirengkle nu ese fei no ommo fai none ofaimne yukaine god giaman empo none fai nosinanene.
Ka ila fafaile empo fai nangke nale pamuk,
ka no ompla koya empo ommo kulu nu fai nukalone mongkoma nunini.
Ka nu ese fei no ompla koya empo oli plaunre nenene.
21 Empo isine nu fai nangke ommo namo empo fika nu uma plai empo nainene taunwamo wokwokera namo nuꞌpu ila uporo empo lo empo Moses.
Empo isine ka yolowi plele mee,
nu fai ritimne lo empo Moses mow koli empo Juda empo kaire empo Sabat.”
Nu kansol neꞌre piparola paiyi nu uma empo fei Juda fai bilipne.
22 Nanrona fane nu aposel ka nu uma wamfafai empo sios ka nu uma mingklari empo sios nuka mi ese nuꞌpu nu uma plai empo none namo ka nawale nu painri nane Pol yane Barnabas ese painri taun Antiok.
Nu nem Sailas yane Judas.
Judas namo,
nu fai nouwne noula wongke wunini sa Barsabas.
Mana plainrane namo fai painri risine nu Kristen fopi fai bilipimne God.
23 Nu nane piparola namo wuyane nuna painri.
Ka mi empo wiye piparola ke yire nanrona,
Mu aposel ka mu uma wamfafai sa inomranimpi poneni mu mire kaire uporo pone.
Mu meꞌre piparola namo pone uma fei Juda fai bilippe God fai paipe taun Antiok ka provins Siria ka Silisia.
24 Mu mupu nanrona plai empo mu ro peki painri pone ka kalnanili ka nisnoli pone wolpuna mi nunini.
Nu uma namo,
mu fei mirengkle nu ka mawale nu painri pone ka nangke ommo namo.
25 Nanrona fane mu muka mi ka muꞌpu uma plai ka mawale nu painri nakle folo uporo plainre munini Pol yane Barnabas ese noloni pone
26 Nu uma namo fai neli kelo wamo noula empo Manawamo Jisas Krais ka nu fei num empo ri ka eni fai yemeiye nu.
27 Nanrona fane mu mem Judas yane Sailas painri nane Pol yane Barnabas noplo mi reꞌfa yukaine mi empo wiyeye piparola namo.
28 Empo fika,
Holi Spirit yame mu ese fei mape eni wamo pone pungkam.
Rokoi mee nro sa pone ese pupene:
29 pone ese fei po ommo nu fai nenrune ka nangke ofa empo nu god giaman,
ka pone ese fei po ompla kulu empo nu fai neirelmulune mongkoma nunini ka oli fai yeyeye koya nunini namo pone fai popepe.
Pone ese fei pangke nale pamuk.
Saimope pone empo ompla fafaile.
30 Nu neꞌre piparola pekimo ka nale nu 4pla uma namo ka nirengkle nu nuna painri ka panro taun Antiok.
Nu nouw uma mingklari empo sios noloni nemnoku ka nu nane piparola namo paiyi nu.
31 Nu uma empo taun Antiok namo nulu piparola namo ka nu woluporo wamo.
Namo empo fikami mi namo sa uporo wamo empo yereri wolpuna nunini.
32 Judas yane Sailas namo wuyane sa profet ka wuyane fai noplo mi uporo mingklari fai yereriye wolpuna empo nu inomranimpi ka mewmewye nu fai neli kelo.
33-34 Judas yane Sailas nakle naine paiyila empo nu nire ese painri kore nulu nu uma empo isi nawale nu noloni namo.
Se sema nu nupole nu painri woluporo. c
35 Pol yane Barnabas fei faflai nupone taun Antiok empo fika wuyane nakle nu mingklari namo noplo nukulene ka noplo mi empo Manawamo.
Pol yane Barnabas nopu mi fane wuyane fei nemnoku
36 Wuyane asa naine paiyi ka Pol ke yireni Barnabas nanrona,
“Monkawe moplo mukule nu uma mi empo Manawamo taun mingklari pu.
Monkawe ese maimpi kore taun mingklari namo ka mulu nu ro naine rongkele.”
37 Barnabas yire ese yem Jon Mak ese yane wuyane painri.
38 Isi nu fai nakle nangke ompla plau paiyila Jon Mak yupone wuyane naine nangke ompla provins Pamfilia.
Nanrona fane Pol yire wuyane ese fei nem wu paiyi plau wuyane kore.
39 Wuyane nopu mi wamole empo ompla namo.
Nanrona fane wuyane fei nemnoku nangke ompla kore.
Barnabas yem Jon Mak yane painri ka wuyane nulpanri sip ka painri ailan Saiprus.
40 Ka Pol yumane Sailas yane painri ka nu uma empo sios mew nauneli wuyane ka naline Manawamo ese samo yuluye wuyane ka nu mewnimane wuyane painri.
41 Pol yane Sailas painri provins Siria ka provins Silisia ka Pol yangke ompla ese mewmew nu sios ese neli kelone ompla empo Manawamo.