Timoti yane Pol ka Sailas painri
16
Pol yolowi plele taun Derbe se sema wu paiyi taun Listra.
Empo taun namo,
disaipol wongke fai waiyeye noula wunini Timoti.
Timoti wu sa mela empo pin wongke empo Juda wu fai bilipye Jisas.
Ka Timoti nangka wu sa Grik mana.
2 Nu uma fai bilipne mi empo God naine taun Listra ka Aikoniam namo fai samo nererine noula empo Timoti.
3 Pol yire Timoti ese yane wuyane painri.
Nanrona fane Pol yaule paplia wunini sa nu Juda ese fei noko mi wu.
Wu yangke ompla namo empo fika,
nu Juda mingklari empo naine mokoi namo,
sa namale nanrona Timoti nangka namo wu sa Grik.
Nanrona fane,
empo Timoti mela aula pitiri,
nu fei naule papli wunini yukaine lo empo God isi yali nu Juda fai nupenene.
4 Nu ke naraine taun pitirpitiri namo ka ke nirengklene nu Kristen.
Nu nirengkle nu ese nupene mi yukaine nu aposel ka nu ilauma empo taunwamo Jerusalem isi nukane namo.
5 Nanrona fane uma mingklari empo sios ke neli kelone bilip ka nupenene mi empo Manawamo.
Ka empo kaire wokwokera nu uma plai kore ke bilip ka noloni nemnoku plau nu.
Empo God yenmaire nama empo Pol ka wu wiyolwane mana wongke empo provins Masedonia.
6 Holi Spirit wone empo yaukiri rokoi nunini fai nu ese fei painri ka noplongkle mi empo God empo provins Esia.
Nanrona fane Pol yakle nu uma empo nane wu painrine namo ke naraine mokoi pitpitiri mingklari empo naine distrik Frigia ka Galesia.
7 Empo nu painri plele iplele pike plola empo distrik Misia ka nu ke wola nire ese painri provins Bitinia,
ka Spirit empo Jisas yaule rokoi nunini fai nu ese fei painri mokoi namo.
8 Nanrona fane nu nupone distrik Misia ka nu panro kei taun Troas.
9 Ka ningki empo kaire namo,
Pol ke wiyolwane mana wongke empo provins Masedonia yeli ka yuyaliye wu ka yire nanrona,
“Yene ese yaule fulu namo ka yolowi provins Masedonia ka mewmew mu.”
10 Empo Pol wiyolwane ruwila namo pekimo ka mub wolilwi mi yukaine God wone yuꞌpu mu ese moplo mi wunini paiyi nu uma namo.
Nanrona fane mu wampane memei ka maimpi provins Masedonia.
Empo taun Filipai, Lidia yenmaire wolpuna ka bilip.
11 Mu maimpi plele taun Troas ka mu mampli sip ka maimpi kei ailan Samotres ka empo kaire wongke mu maimpi taun Neapolis.
12 Mu mupone mokoi namo ka maimpi taun Filipai ka maime kaire plai ka ningki plai.
Taun namo sa taunwamo empo provins Masedonia ka nu fai nupenene lo mingklari empo gapman empo Rom.
13 Ka kaire empo Sabat yolowi ka mu mamplo puku moilele empo taunwamo namo empo fika mu mire ese mapu koii wongke empo nu uma fai nesapune eklene nupi fai mu ese makle nu mesapu.
Ka empo mokoi namo mu mulu pinmana plai ke nemnoku naine ka mu makle nu moplole mi.
14 Pin wongke empo waiye ka yupu mi munini namo,
noula wunini Lidia.
Wu pin fai yangke amplapi kaka ka uma mingklari wamo fai nire nuꞌpune.
Pin namo,
wu waiye Filipai ka mokoi wunini sa taun Taiataira ka wu pin fai bilipye God.
Ka Manawamo yenrume wolpuna wunini fai wu ese yupu ka namale mi yukaine empo Pol yoplongkleye nu.
15 Empo Lidia yakle nu uma woneni fai nane wu naine namo nem baptais pekimo,
se sema wu yiremi mu nanrona,
“La pone namale nanrona ki empo bilipim Manawamo,
nanrona fane pone ese polopi ka pake ki maime mow kinini.”
Wu yeli kelo mi woneni,
nanrona fane mu wolilwi mi wunini ka mu mane wu maimpi mow wunini.
Pol yane Sailas naine kalabus
16 Empo kaire wongke,
mu maimpi koii fai nesapune ka pin mangklama wongke siwolenro fai yangke ompla empo mana wongke yolowi ka wane mu.
Pin mangklama fai yangke ompla namo opola fafaile fai yapaye wu.
Ka wu fai yirengkleye nu uma ommo ese kingke nemei.
Empo wu fai yangke nanrona,
nu uma fai nane wu romaula wamo ka romaula namo fai paiyiye nu uma empo wu fai yangkeye ommo namo fai nemne.
The Conversion of the Jailer (Aposel 16:16-40)
17 Pin namo yupene Pol yame mu maimpi.
Ka empo wu yupene mu namo,
wu ke yirengkleye nu uma mingklari namo nanrona,
“Nu uma namo fai nangke ompla empo Manawamo God Riri ka nu ke noplone mi empo rokoi empo pone,
God yire ese yuꞌpu kore pone.”
18 Wu yangke nanrona ro kaire mingklari wamo ka ommo namo ke yangke Pol wolpun neni fane wu yenmaire paiyi pin namo ka yireni opola fafaile namo nanrona,
“Naimele ki kirewi yene noula empo Jisas,
yene yimane wu.”
Ka wampane ro,
opola fafaile namo yupone pin namo.
19 Empo nu uma fai nopanene pin namo ke nulu nanrona rokoi empo nu fai nemne romaula namo pekimo,
fane nu nukaneire Pol yane Sailas ka nengke wuyane painri nina wuyane naine maket sa nu ese kotim wuyane nu ilauma empo lo.
20 Nu numane Pol yane Sailas painri nina wuyane nama empo nu mesistret ka kotim wuyane nanrona,
“Mana plainrane namo sa nu Judani empo name mu eni.
Ka wuyane nangke ommo fei uporo nu umapinuma empo mone empo taun mee.
21 Ka Pol yane Sailas fai nukune nu pinuma ommo plai fafaile kola empo mu uma empo Rom ka mu fai mimangklume nale namo.”
22 Uma mingklari empo nemnoku nanaine namo,
ke nemnoku plau nu ka nangko mi palo wuyane ka nenre wuyane.
Nu mesistret nire mi kelo iimuma ka nu neingklole amplapi ommo wuyaneni ka nu nufu wuyane kaplola.
23 Empo nu samo nufu wuyane pekimo,
nu painri nina wuyane kalabus.
Ka nu nire mi kelo mana fai yopaneye mow kalabus namo wu ese samo yopane wuyane.
24 Mana empo fai yopaneye mow kalabus namo ke yupu mi kelo namo ka wu paiyi yina wuyane naine koii rola wongke empo yeye mow kalabus monrelpo namo.
Wu yireni wuyane ninalpainri rew wuyaneni painri palang pulale ka wu samo yuka rew wuyaneni sa wuyane ese fei nulipanro nupone mow kalabus.
25 Empo ripapli,
Pol yane Sailas naine nesapune God ka wuyane neile rai empo lotu.
Nu uma plai empo naine monre empo kalabus namo ke naine nupune wuyane ro.
26 Ka wampane ro,
klai wamo wongke yemei ka yenyu mow kalabus namo.
Empo taim namo,
rama mingklari empo mow kalabus namo kalwolpanri ka uma kalabus mingklari empo nu sen nukalo naine kalabus namo,
sen ke kalfeingklole ka firipanro naine.
27 Empo mana fai yopaneye mow kalabus namo yemei ka yulu nanrona rama mingklari empo mow kalabus namo kalwolpanri,
fane wu yire yem bainat woneni ka yoku wone kore.
Empo fika,
wu ke yire nanrona uma mingklari empo naine mow kalabus namo ro nemropu nupone mow kalabus pu.
28 Ka Pol youw wu ka yireni wu nanrona,
“Yene fai bainat yoku yene sa nenrape,
nu kalabus fei nemropu mu namaime fane.”
29 Mana fai yopaneye mow kalabus namo ke youw nu uma nuna lam noloni wu.
Ka wu yemei yempliri wampane ro pari firpalo waiye eklene Pol yane Sailas ka folwoye.
30 Ka wu yumane wuyane nolo moile ka wu yaline wuyane nanrona,
“Manawamo plainre,
ki ese kangke ompla fika sa God ese yem ki kore?”
31 Ka wuyane nireni wu nanrona,
“Yene ese bilipim Manawamo Jisas sa God ese yem yene kore.
Yukaine nu uma fai naine mow yeneni re,
ese bilipim Manawamo Jisas sa God ese yuꞌpu nu kore.”
32 Ka wuyane noploni wu mi plai empo Manawamo ka uma mingklari empo naine mow wunini namo re nupune.
33 Ka empo ripapli namo,
mana fai yopaneye mow kalabus namo ke yumane wuyane painri ka wu mii yaklele muꞌku empo nene papli wuyaneni empo isi nu nufu wuyane namo.
Ka wampane ro wu yakle nu pin kongkom woneni nem baptais.
34 Ka wu yumane Pol yane Sailas panri mow woneni ka wu yale ommo wuyane no.
Wu aiyem wamo empo fika,
wu yakle pin kongkom woneni empo bilipim God.
35 Ningknamnole,
mesistret nina mi kelo paiyi mana fai yopaneye mow kalabus namo fai wu ese mew yimane Pol yane Sailas painri.
36 Ka mana fai yopaneye mow kalabus namo,
yireni Pol nanrona,
“Nu mesistret nire ki ese mew kimane yenyane paipi.
Nanrona fane yenyane ese paipi plau wolpuna uporo.”
37 Ka Pol yireni kaplolmana namo nanrona,
“Kikane fei mangke ompla wongke fafaile ka nu ke samo nufu kikane nama empo nu pinuma.
Ka nu fei nupu kot kikaneni.
Kikane sa uma Rom mana.
Nu isi nina kikane kalabus pu ka naimele nu nire mew nimane kikane ese peki maimpi wee?
Sa ese onne fane!
Pone paipi ka pirengkle nu none ese noloni numane kikane mamplo moile.”
38 Nu kaploluma nem mi empo Pol yane Sailas painri nirengkle nu mesistret ka empo nu mesistret nupu mi nanrona Pol yane Sailas sa uma Rom mana ka nu num.
39 Nu mesistret namo painri ese nane wuyane nemplekuru mi ka numane wuyane panro moile ka naline wuyane ese nupone taun namo.
40 Empo Pol yane Sailas nolo moile empo mow kalabus namo,
wuyane samo painri mow empo Lidia.
Empo mokoi namo,
wuyane ke nulu nu Kristen plai ka wuyane kelnali nu mi plai se sema wuyane painri.