Pol yane Sailas naine taun Tesalonaika
17
Empo Pol yakle wone furempi painri plele taun Amfipolis se sa nu nupone taun namo ka painri plele taun Apolonia.
Nu nupone taun namo ka painri plele taun Tesalonaika.
Empo koii namo,
mow koli wongke empo nu Juda fai yeliye.
2 Wu fai yangkeye yukaine kaire wokera empo wik mingklari,
wu paiyi mow koli namo ka empo Sabat plainrikera wu ritimye ka yoplo mi empo wiye buk empo God paiyi nu.
3 Wu samo yirengkle nu mi empo God ka yukule nu Krais ese yungkam eni ka ri ka wu ese yemei kore.
Ka wu yirengkle nu nanrona,
“Jisas namo,
empo ki koploke pone namo,
sa Krais ka wu yangke ommo namo nemei pu.”
4 Plai empo nu Juda nupu mi namo ka nu bilip ka nu uma mingklari empo Grik fai numne God nupene wuyane ka nu pinmana mingklari empo nuna noula wamo re nane wuyane naine plau wolwokera.
5 Ka plai empo nu Juda namo wolpuna neni wamo empo fika nu nulu uma mingklari wamo ke nupene Pol yane Sailas.
Nanrona fane nu painri nouw nu plai empo fai nangke ompla fafaile noloni as mingklari ka kalnaraine koii empo uma fai nemnokune namo ka naraine nopune taun namo.
Nu Juda nakle nu uma plai namo nempliri painri mow empo Jeson ka napu Pol yane Sailas fa nu ese nuna wuyane ka nem wuyane panro nu uma mingklari empo nopune taun namo sa nu ese kotim wuyane.
6 Ka nu fei nulu wuyane,
nanrona fane nu nuna Jeson ka plai empo nu uma fai bilipne namo ka nengke nu painri nu uma wamfafai fai nopanene taun namo ka nu nouw ka nire nanrona,
“Nu uma fai nangke ompla fafaile mokoi mingklari empo pike ka naimele nu noloni ka neli mee.
7 Ka Jeson ke youw nu painri nane wu naine mow woneni.
Nu uma namo fei fai nupu mi empo Sisa.
Nu fei fai nupu mi wunini ka fai nire nanrona king wongke nunini sa ro waiye.
King namo,
noula wunini sa Jisas.”
8 Empo uma mingklari nakle nu uma wamfafai empo taun namo nupu mi namo ka nu wolneni wamo ka nangke mi kelo wamo.
9 Nanrona fane nu uma wamfafai nireni Jeson yakle nu uma plai fai bilipne namo ese nina romaula empo kot ka ese painri naine norune nu ese nouw nu noloni kore kot.
Pol yane Sailas painri naine taun Beria
10 Kaire mee paiyi ka ningki,
nu Kristen nireni Pol yane Sailas ese painri taun Beria.
Empo wuyane painri plele koii namo,
wuyane painri panri mow koli monre.
11 Nanrona fane,
nu Juda naine taun Beria namo nale empo nu fei yukaine nu Juda empo taun Tesalonaika.
Nu uma empo naine mow koli empo taun Beria nupu mi empo God ka samo ripi nalana ka woluporo nire nupu.
Ka ningki kaire nu fai nonromene buk empo God ka samo ritimne mi empo Pol yoploye namo sa ro alwone wee onne.
12 Juda mingklari empo bilip ka uma mingklari empo Grik re bilip ka pinmana mingklari empo Grik nuna noula wamo namo re bilip.
13 Empo nu Juda naine taunwamo Tesalonaika nupu nanrona Pol yoplo mi empo God paiyi taun Beria,
nu painri plele mokoi namo ka kalnirene mi ka nangke ommo mingklari fafaile ese nangke nu uma empo taun namo ese fei nupu mi empo wuyane.
14 Wampane nro nu Kristen nireni Pol palo fulmaipon ka Sailas yane Timoti sa naine taun Beria.
15 Nu uma empo numane Pol nane painri namo,
nu painri nupone wu waiye taun Atens ka nu painri kore plau mi kelo empo Pol painri nireni Sailas yane Timoti sa wuyane ese wampane painri nupene wu.
Pol paiyi waiye taun Atens
16 Empo Pol waiye taun Atens ka yoruye Sailas yane Timoti namo,
wolpuna wunini fei uporo empo wu yulu taun namo sa stetyu mingklari malma empo nu god giaman nainene.
17 Nanrona fane wu paiyi mow koli empo nu Juda ka yemyoku nu Juda ka nu Grik fai numne God namo ka yakle nuka mi.
Empo kairkumplina,
wu fai paiyiye koii empo nu uma fai nemnokune namo ka fopi empo wu wale nu koii namo wu fai yali mi empo God paiyiye nu.
18 Uma saveman plai empo uma Epikurian ka Stoika nane wu nopune mi ka nu naline nanrona,
“Mana namo empo kalyireye mi namo,
yire yoplo ompla fika?”
Ka plai empo nu ke nire nanrona,
“Wu yoplo mi empo nu god empo koii pike wongke.”
Nu nangke mi namo nanrona empo fika,
Pol nayoploye miuporo empo Jisas ka yoplo mi empo nu uma ese rili ka nemei kore ka naine laip.b
19 Ka nu numane wu nane painri panri kansol koii alwola Areopagus,
koii empo nu uma fai nemnokune ka fai nunane mi.
Ka nu uma namo naline wu nanrona,
“Mu mire ese mupu mi keklepe rongkele empo yene waraiye yoploye nu namo.
20 Yene yuna mi plai keklepe wongkeni yolowi ripi munini ka mu mire ese samo mupu nomu empo mi namo.”
21 Nu uma empo taun Atens ka nu uma empo mokoi plai noloni ka naine taun Atens namo,
fei nangke ommo plai,
nu naine noplone ka samo ripi nalanane mi keklepe.
22 Wola,
Pol yemei ka yeli iplele empo nu kansol koii alwola empo Areopagus ka yirengkle nu nanrona,
“Pone uma alma empo taun Atens,
ki kulu nanrona,
ompla rongkele empo pone pangkepe namo,
ke yuku nanrona pone uma fai lotupe.
23 Empo ki karaike ki kulu ommo empo pone fai lotupe namo,
ki kulu alta wongke pone pangke ka peꞌre mi rola nanrona,
‘Ompla namo empo God mone fei namale wu.’
Nanrona fane God namo pone fei namale namo,
ki ese kirepi pone.
24 “God namo yangke pike,
nemi,
ka yangke ommo pitpitiri empo naine nu namo,
wu sa Manawamo empo heven ka pike.
Wu fei fa waiye monre empo tempol empo nu uma fai nangkene mew noneni.
25 Ka nu uma fei nale ompla wongke empo none fai nangkene mew noneni ese saimolo wu.
Empo fika,
wu fei wola yire ompla wongke,
wu wone yali kelo nu uma fai naine laip ka wu fai yali ungklawiin ka ommo plai mingklari plau.
26 Isi,
oya,
God yangke mana wokera nro ka empo mami wokera nro.
God yangke nu uma empo mokoi mingklari,
fa nu ese naine mokoi mingklari empo pike namo.
Nu pinuma namo God wone yina kaire nunini ese nainene.
God wone yina pike plola uma mingklari ese nainene.
27 God yangke ompla namo fai nu uma ese napu wu.
Alwone wu fei waiye amone mone wokwokera.
28 “Laip empo mone sa waiye mew wola wunini ka mone maime laip.
Ka wu yame kelo mone ka mone maraime mokoi mee.
Yukaine pone saveman plai empo neꞌre mi plai nire nanrona,
‘Mone kongkom wunini.’
29 Ka mone re kongkom empo God ka mone re fei wola mire nanrona God wu sa yukaine gol,
silva,
roma ka ommo plai kore.
Ommo namo sa mone mangke mew ka ila empo mone nro.
30 “Nu pinuma fei nem ila uporo,
ka God fei wampane yire kotim nu,
ka naimele wu yire mi kelo nu ese nensona wolpuna ka nupone nale fafaile none fai nangkene.
31 Empo fika,
wu wone yina kaire wongke woneni pu God wone ese yupu kot empo uma mingklari empo pike.
Kot empo nu namo sa mana namo wu wone yina mana wongke pu wu ese yem koii wunini ka ese samo yupu kot empo nu plau nale uporo.
Wu yangke ommo namo nemei alele wamo nu uma empo bilipne empo wu ri ka God yereryane wu kore.”
32 Empo nu nupu mi empo nu uma riline ka nemei kore namo,
plai empo nu ke ownire mi wunini.
Ka plai empo nu ke nireni wu nanrona,
“Mu mire yene ese yoplo kore mi namo.”
33 Nanrona fane Pol yupole nu ka paiyi.
34 Uma plai ro nupu mi empo Pol ka bilip ka nupene wu.
Wongke empo nu uma empo nupene wu namo noula wunini Dionisius.
Wu sa wongke empo nu kansol fai nemnokune koii alwola empo Areopagus.
Ka pin wongke noula wunini Damaris namo re yakle nu.
Ka uma plai re bilip.