Pol yupone taun Atens ka paiyi taun Korin
18
Kingke se,
Pol yupone taun Atens ka paiyi taun Korin.
2 Empo mokoi namo,
wu wane Juda wongke noula wunini Akwila.
Mana Akwila namo,
mokoi wunini sa provins Pontus.
Empo isi,
wuyane puli woneni Prisila fai nainene kantri Itali ka seke isi wuyane nupone ka noloni naine taun Korin.
Wuyane empo noloni mokoi mee empo fika,
king empo Rom noula wunini Klodius yire mi kelo nu Juda empo naine Rom ese painri kore mokoi plai.
Se Pol paiyi yulu wuyane.
3 Wuyane samo namale fai nangke mow sel yukaine Pol.
Nanrona fane Pol yane wuyane naine ka nu nemnoku nangke mow sel.
4 Sabat mingklari,
Pol fai paiyi mow koli empo nu Juda ka wu fai yakle nu Juda ka nu Grik naine plau ka noplo mi empo God.
Pol yangke ompla wamo fai yirengkleye nu uma namo ese samo bilipim Jisas.
5 Sailas yane Timoti nupone provins Masedonia ka noloni plele nire nulu Pol.
Ka empo wuyane nulu Pol,
wu yeli ompla wokera nro yirengkleye nu Juda nanrona Jisas wu sa Krais.
6 Ka nu Juda ke numplewa mi empo Pol ka nu ownire wu.
Nanrona fane Pol yuflorai fum empo nenene amplapi woneni.
Wu yangke nanrona ese yukule nu nanrona nale empo nu nangkene namo,
God fei woluporo.
Ka wu yirengkle nu nanrona,
“La empo ommo fafaile kingke ese yemei pone,
namo sa eni poneni seke kinini.
Naimele ki ese kupole pone ka kaiki nu uma fei Juda.”
7 Ka Pol yupone mow koli namo ka wu paiyi yane Titius Jastus naine.
Mow empo mana namo sa waiye eklene mow koli empo nu Juda namo.
Wu sa wongke empo nu uma fei Juda,
ka wu sa mana fai yosiyaneye God.
8 Mana fai paiyi risiye mow koli empo nu Juda namo,
noula wunini Krispus.
Wu yakle nu uma mingklari fai nane wu naine mow wunini namo ke bilipim Manawamo.
Ka nu uma mingklari empo taun Korin nupu mi empo Pol ke bilip ka nem baptais.
9 Empo ningki wongke,
Pol yulu ompla wongke yukaine wu wiyolo ruwila.
Empo wu wiyolo ruwila namo,
Manawamo yireni wu nanrona,
“Yene fai yum sa nenrape.
Yene ese yoplo mi paiyi ka yene ese fei misarulu.
10 Empo fika,
ki ese kawe yene maime ka mana wongke ese fei yangku yene ka yufu yene.
Uma mingklari empo naine taun namo sa ki kem nu pu ese naine uma kinini.”
11 Nanrona fane Pol waiye mokoi namo resuklu kikla wokera ka 6pla kali kore yukule nu mi empo God.
12 Empo Galio waiye yukaine gavana empo provins Akaia,
nu Juda namo nemnoku ka nuna Pol ka numane wu paiyi kot.
13 Ka nu nire nanrona,
“Mana namo fai kalyaniliye nu uma empo nu fei fai nupenene lo empo mone Juda.
Nu fai nupene nale wongkeni empo nu fai nosinanene God.”
14 Empo Pol yire ese yoplo mi wunini,
Galio yirengkle nu Juda nanrona,
“La empo pone Juda pire kotim mana fai wewelaye ka fai yangke ompla fafaile wamo,
sa uporo ki ese kupu kot poneni.
15 Ka pone ke polopi ka paline mi nomu empo nu noplone ka nu noula ka ompla plai empo lo poneni.
Pone ese pempoku ka pemplekuru mi poneni.
Ki ese fei kupu kot empo ommo namo.”
16 Nanrona fane Galio yawale nu panro moile.
17 Nu panro moile ka nukaneire manwamo fai paiyi risiye mow koli noula wunini Sostenes.
Ka nu samo nufu wu wamo moilele mow empo fai kotne.
Ka ompla namo fei yangke Galio yangke ompla wongke.
Apolos paiyi yane Akwila ka Prisila naine plau.
18 Pol as waiye kaire mingklari Korin.
Se sema wu yupole nu Kristen empo taun Korin ka paiyi waiye taun Senkria ese yem sip paiyi distrik Siria.
Ka empo wu waiye Senkria,
nu naule ila para wunini.
Empo fika,
emen wu isi yuka mi wongke paiyi God.
Ka nu naule ila para wunini ese yuku nanrona ompla empo wu yuka mi namo sa pekimo pu.
Ka wu pali sip wongke ka paiyi distrik Siria.
Prisila yane Akwila re nane wu painri.
19 Nu painri plele taun Efesus ka empo mokoi namo,
Pol ke yupone wuyane ka wu wonekere nro paiyi mow koli ka yemyoku plau nu Juda ka nu niflipanro noplo mi.
20 Nu naline wu ese asa yakle nu naine lese ka wu yire nanrona,
onne.
21 Nanrona fane empo wu yire paiyi,
wu yuka mi nu nanrona,
“Ki ese koloki kore empo God wone yire ki ese koloki.”
Ka wu yupone taun Efesus ka pali sip kore ka wu paiyi.
22 Empo nu painri plele taun Sisaria,
wu paiyi pari taunwamo Jerusalem ka wu miyu nu Kristen se sa wu palo kore taun Antiok.
23 Wu as waiye taun Antiok se sa wu ke yupone mokoi namo ka paiyi mokoi pitirpitiri empo provins Galesia ka provins Frigia ese mewmew nu Kristen ese yangke bilip nunini waiye kelo.
Apolos yoplo mi Efesus
24 Empo Pol paiyi taun Jerusalem ka Antiok,
Juda wongke noula wunini Apolos empo yolowi waiye taun Efesus.
Ka mokoi wunini,
sa Aleksandria empo kantri Isip.
Wu mana wokera kon samo namale mi empo niyene Buk empo God.
Ka empo wu fai yoploye,
nu uma fai samo nire nupu mi wunini.
25 Apolos namo,
isi yem mi empo Manawamo ka wu fai aiyem wamo empo wone fai yoploye mi paiyiye uma mingklari empo ommo isi Jisas yangkeye.
Ka empo wu fai yirengkleye nu mi empo Jisas,
wu fai samo yirengkle nu mi alwone.
Ka wu mana isi namale baptais empo Jon Baptais ro.
26 Wu yangke ompla empo mow koli empo nu Juda ka fei fai yumye empo taim wu yoploye mi.
Ka empo Akwila yane Prisila ke nupu mi wunini,
wuyane nouw wu paiyi mow wuyaneni ka wuyane samo nemplekuru wu mi empo rokoi empo God.
27 Empo Apolos yire paiyi provins Akaia,
nu Kristen empo taun Efesus kelnane wu ese paiyi.
Ka nu neꞌre pipa rola ese yirengkle nu Kristen empo mokoi namo ese wolnane wu.
Ka empo Apolos paiyi plele provins Akaia,
wu samo mewmew nu uma namo.
God isi wolpalo nu ka nu bilipim Jisas.
28 Wu yopu mi kelo yakle nu Juda empo nama empo uma mingklari.
Wu yangke nanrona empo fika,
wu yire ese yuku nu uma nanrona ommo empo nu Juda nangkene namo,
sa fei samo yupene mi empo God.
Ka wu yirengkle nu mi wiye Buk empo God ese yukule nu nanrona,
Jisas wu sa Krais,
mana empo God wone yem ese yuꞌpu kore nu pinuma woneni.