Pol waiye taun Efesus
19
Empo Apolos waiye taun Korin,
Pol sa waraiye rokoi pitiri empo moule po wola wu wi plele taun Efesus.
Ka empo mokoi namo wu wale nu disaipol plai naine.
2 Ka wu ke yalile nu nanrona,
“Empo pone bilippe namo,
pone ro pem Holi Spirit,
wee onne?”
Ka nu nireni wu nanrona,
“Onne fane!
Mu fei namale Holi Spirit.”
3 Nanrona fane Pol fa yalile nu kore nanrona,
“La baptais rongkele sa pone pem?”
Ka nu nireni wu nanrona,
“Mu mem baptais empo Jon.”
4 Ka Pol yirengkle nu nanrona,
“Jon baptaisim nu uma ka nu nenmaire nupone ommo fafaile none fai nangkene.
Ka wu yirengkle nu ese samo bilipim mana ese yolowi wairu wu namo,
sa Jisas.”
5 Empo nu nupu mi namo wola nu baptais noula empo Manawamo Jisas.
6 Empo Pol mew rauneli nu,
Holi Spirit yolo nu ka nu ke noplole moile mi wongkwongkeni nu none fei namalene.
Ka nu noplo mi yukaine profet.
7 Ka namba empo nu uma namo sa yukaine 12pla uma.
8 Pol paiyi pari mow koli empo nu Juda namo ka wu yire mi kelo empo wu yoploye mi empo kingdom empo God.
Ka wu yoplo mi mingklari nu empo mi namo resuklu kali plainrikera.
9 Ka plai empo nu uma namo sa ikak kelo fane nu fei bilip.
Nanrona fane nama empo nu pinuma nu numplewa ka nu ownire Rokoi empo Manawamo.a
Nanrona fane Pol yupole nu ka wu yumale nu Kristen ro yakle nu painri,
ka wu yakle nemnoku nuka mi kaire woker wokera mow skul monre empo manawamo wongke noula wunini,
Tiranus.
10 Nu nangke nanrona nro paiyi resuklu kikla plainre.
Nanrona fane nu Juda ka nu Grik mingklari fai naine mokoi mingklari empo provins Esia ke nem mi empo Manawamo.
Nu kongkom mana empo Skeva nire nemnangklupu opola fafaile
11 God kelyane Pol yangke mirakol wamfafai nu uma empo isi fei nulu.
12 Nanrona fane nu uma nuꞌpu hangkesip ka amplapi ploli empo isi naisi Pol namo nuna painri nauneli nu uma empo nenrine namo,
ka nu fai uporo kore.
Ka opola fafaile fai napalene nu uma namo re nupole nu.
13-14 Bikpris empo mow koli wongke noula wunini Skeva ka wu sa kongkom 7pla mana.
Ka nu kongkom mana namo fai painri mowmow ka nangke ompla fai nemnangklupune opola fafaile fai napalene nu uma.
Empo nu fai painri nangke ompla namo,
nu fai nouwne noula empo Jisas.
Ka nu fai nire nanrona,
“Ki kemane pone noula empo Jisas,
Pol mana fai yoploye mi wunini.”b
15 Empo kaire wongke,
opola fafaile wongke yirengkle nu nanrona,
“Jisas namo,
ki namale wu ka Pol re ki namale wu.
Ka pone sa fopi?”
16 Ka mana empo opola fafaile fai konraloye wu namo ke yemei ka yufloyekli nu fafaile wamo ka nalpapli nunini olila kei.
Ka wu yaulere amplapi ommo nunini ka nu nempliri nale aupenro panro moile.
17 Empo nu Juda ka nu Grik naine taun Efesus ke nupu mi empo ompla namo,
nu ke samo num wamo.
Nanrona fane nu nereri noula empo Manawamo Jisas.
18 Uma mingklari fai bilipne namo noloni alele ka nu nire mi alele ommo fafaile yukaine none nangkene.
19 Nu uma fai nuka uka ka nangke marila namo nungkam buk ka ommo plai re noloni ka nemnoku.
Ka uma mingklari empo naine namo ke nulu nu nampolene ommo mingklari niꞌpi.
Nu nulu nanrona romaula empo buk mingklari ka ommo namo sa resuklu fifti tausen romaula silva.c
20 Ka mi empo Manawamo yemei kelo wamo ka yopli paiyi mokoi mokoi.
21 Empo ommo namo pekimo se Holi Spirit yereryane Pol fane wu yire wu ese paiyi taunwamo Jerusalem.
Empo wu yire paiyi Jerusalem,
wu ese paiyi provins Masedonia ka provins Akaia se kingke wu ese paiyi kei Jerusalem.
Ka wu yirengkle nu nanrona,
“Empo ki kaiki kaike Jerusalem,
sa taunwamo Rom re ki ese kaiki.”
22 Wu yireni mana plainrane fai mewmewne wu empo ommo namo,
painri risi wu provins Masedonia.
Mana plainrane namo noula wuyaneni sa,
Timoti yane Erastus.
Ka wu wone sa as waiye provins Esia.
Nu uma empo taun Efesus ke wolpun neni
23 Empo taim namo,
ommo fafaile wamo yemei taun Efesus.
Nu uma fei woluporo Rokoi empo Manawamo namo ke nangke eni ka nangke yemei wamo.
24 Mana wongke noula wunini Demitrius namo fai yuꞌpu silva ka yangke ommo wongkwongkeni.
Bisnis wunini sa fai yangke stetyu empo god pin wongke noula wunini Artemis.
Wu yali ompla namo paiyi nu uma mingklari ese nangke ommo namo ka nem romaula wamo empo ompla namo nu fai nangkene.
25 Wu yemyoku nu uma fai nemnoku nangkene ompla namo ka nu uma plai kore fai nangke ompla yukaine nu fai nangkene namo ka wu yirengkle nu nanrona,
“Pone uma,
pone namale nanrona ompla mone fai mangkeme namo fai yame mone romaula wamo.
26 Ka pone namale mana Pol namo,
wu empo yumale nu uma mingklari empo taun Efesus ka wu kapyukalo nu ila,
empo mi plai nanrona pone pulu ka pupu pu.
Wu yirengkle nu nanrona god empo nu uma nangke mew namo,
seke god wone.
Ka ommo empo wu yangkeye fai yengkeye nu ka yauli mi paloye nu uma namo,
seke yeye taun Efesus ro,
ommo namo sa ekleneye yangke lese yumalo mokoi mingklari empo provins Esia.
27 Nanrona fane ompla namo ese yangke ompla munini namo,
sa noula uporo wunini ese pekini.
Ka ompla wongke re,
tempol empo god pin Artemis namo ese waiye yukaine mow wongke aupenro ka nu uma ese fei nosinane wu ka ese fei bilipim wu.
Empo isi yolowi plele naimele,
nu uma empo provins Esia ka uma mingklari empo pike fai nosinanene ka samo bilipne wu.”
28 Empo nu nupu mi namo ka wolpuna nunini neni wamo ka nu nangke mi kelo ka nire nanrona,
“Artemis wu sa god pin uporo empo mone uma empo Efesus.”
29 Nanrona fane nu uma mingklari empo taun namo nouw ka pongke mi kelo ka nangke mi uku wamo.
Ka nu nempliri painri koii uma fai nemnokune namo ka nukairi Gaius yane Aristarkus.
Aristarkus yane Gaius namo,
wuyane mana isi nane Pol naraine provins Masedonia ka noloni.
30 Pol yire ese paiyi yulu nu uma empo nuna folmana plainre woneni namo ka wu ese yoplongkle nu.
Ka nu Kristen ke mi naule wu.
31 Nu foli plai empo Pol namo naine yukaine nu ofisa empo provins Esia.
Nu nire mi kelo paiyi wu ka mi naule wu ese fei paiyi ka yulu nu empo nuna Aristarkus yane Gaius.
32 Empo fika,
uma mingklari empo nemnoku naine koii namo fei namale nomu empo none nainene koii namo.
Nanrona fane nu wolpun neni wamo ka none plai ke nangke mi kelo ka nire mi wongke ka nu plai ke nire mi kelo wongkeni.
33 Nu Juda nine Aleksanda paiyi yeli nu pinuma ungklamyen,
ka uma plai nulu wu ka nu nire wu sa nomu empo ommo fafaile.
Ka empo Aleksander yire yoplo mi paiyi nu pinuma sa wu mew kauka fai nu ese misarulu.
34 Ka empo nu nulu nanrona wu sa Juda wongke,
nu nemnoku nangke mi ka nire nanrona,
“Artemis wu sa god pin uporo wamo empo mone Efesus.”
Ka nu naine nangkene mi won yeye nanrona resuklu aua plainre.
35 Ka kuskus empo nu kansol empo taun namo yangke nu uma mingklari misarulu ka wu yirengkle nu nanrona,
“Pone uma empo taun Efesus ese samo pupu mi mee.
Uma pinuma mingklari empo mokoi mingklari namo,
namale nanrona mone uma fai samo mopaneme tempol empo god pin Artemis.
Ka ringklene mone fai samo mopaneme roma wunini namo isi firyolo nemi.
36 Mi mee sa won alwone ka mana wongke ese fei yire nanrona ki kalkanilike.
Nanrona fane pone samo misarulu ka fai wewelape.
37 Pone ke puna mana plainre namo polopi mee,
ka wuyane seke pekinuꞌpu ommo empo tempol ka seke nire mi wongke fafaile god pin Artemis.
38 “La empo Demitrius ka nu foli woneni nire kotim mana wongke,
nu kot ka nu uma fai nupu kot namo nanaine.
Nu nire noplo mi fika empo nu nire.
39 La empo ommo plai kore pone pire poplo,
sa ommo namo ese paiyi kot se sa nu uma ese samo nuka mi se.
40 Nanrona fane mu mum nu ese kotim mu empo ompla fika mu mangke.
Mu mum ese fei mem eni empo ompla namo.
Empo fika,
ompla namo nomu uporo wunini sa onne.”
41 Empo wu yoplo mi namo pekimo,
wu yirengkle nu uma mingklari nanrona pone plelene paipi kei.