Pol paiyi provins Masedonia ka Grik
20
Empo nu uma fai wolpun nenine ka nangke mi mingklari namo plelene painri pekimo se,
Pol youw nu Kristen ka yali nu mi fai kelyali nu ese yangke nu nuna kelone bilip noneni.
Se sema wu mew yalole nu ka wu yupole nu ka paiyi ese paiyi provins Masedonia.
2 Wu paiyi mokoi mingklari empo provins Masedonia ka wu yirengkle nu mi mingklari ese kelyali nu ese neli kelo.
Wu yangke nanrona nro paiyila wu paiyi plele kantri Grik.
3 Ka wu yakle nu naine Grik resuklu kali plainrikera.
Se sema wu wola yire ese yupole nu ka yem sip ese paiyi provins Siria.
Ka wu yem mi nanrona nu Juda empo naine provins Siria namo,
ke nuka mi nire nufu wu ri.
Wu yire paiyi Siria,
fane wu yem rokoi wongke ese paiyi.
Nanrona fane wu wola yire ese paiyi kore provins Masedonia.a
4 Empo Pol yire paiyi kore provins Masedonia namo,
nu uma nanrona empo nane wu painri:
Pirus auna noula wunini Sopater empo taun Beria,
ka Aristarkus yane Sekundus empo taun Tesalonaika,
ka Gaius empo taun Derbe,
ka Timoti,
ka mana plainrane Tikikus yane Trofimus empo provins Esia.
5 Nu uma namo painri naine noru mu taun Troas.
6 Taim Kaire Empo Bret Empo Yis Onne namo pekimo,
se mu muponeb taun Filipai ka mampli sip ka maimpi.
Kaire 5pla se,
mu maimpi plele taun Troas ka mu male nu uma plai munini namo ka mu maime taun namo resuklu 7pla kaire.
Yutikus ri taun Troas ka Pol yangke wu yemei kore
7 Empo Sande,
mu Kristen maimpi memmoku ka mo ompla ka Pol yali nu mi empo God.
Empo fika,
wu wola yire ese yupole nu kaire wongke.
Nanrona fane wu yoplongkleye nu paiyi paiyila moul ripapli kei.
8 Koii empo Pol waiye ka yoploye namo,
sa waiye rum empo yeye riri.
Empo koii namo nu nolu lam mingklari wamo napa alinine.
9 Mela efapu wongke noula wunini Yutikus namo,
sa waiye riri empo windo wongke.
Ka Pol yoplo mi ewlangklen,
fane Yutikus nama yolo yire wiye nama.
Paiyi se wu samo wiye eniralo,
ka wu firan yolo mow angklen rirpola yufu pike ruwe.
Ka empo nu uma panro ka nereri wu,
nu nulu nanrona wu ri pu.
10 Pol palo mela efapu namo empo firane namo,
ka wu firpalo raune wu ka yukairi wu ka yirengkle nu uma mingklari namo nanrona,
“Pone fai pumpe,
wu seke ri,
wu nawaiye laip.”
11 Ka wu pari riri kore empo rum riri namo ka yekli bret yepiyali nu ka nu no.
Empo wu yoplo mi paiyi moulpepeli ka wu yupole nu ka paiyi.
12 Uma pinuma mingklari namo,
ke nulu nanrona mela efapu namo waiye laip ka nu ainem wamo ka numane wu nane painri moile.
Pol yakle nu uma wamfafai empo Efesus nemplekuru mi se wu paiyi
13 Mu mem sip ka maimpi maime taun Asos morume Pol.
Wu wone empo yakle mu muka mi.
Ka Pol yupene rokoi yolowi wairu mu ka yolowi wane mu maime taun Asos.
14 Empo wu wane mu taun Asos namo,
mu mane wu mampli sip ka maimpi plele taun Mitilini.
15 Empo kaire wongke,
mu mupone taun Mitilini ka maimpi plele ailan Kios.
Ka empo kaire wongke,
mu mupone ailan Kios ka maimpi ailan Samos.
Ka kaire wongke kore se,
mu maimpi plele taun Miletus.
16 Pol yire mu ese fei maimpi taun Efesus,
empo fika,
wu fei yire waiye ripkikliye provins Esia.
Wu yire wampane paiyi taunwamo Jerusalem ese yulu kaire empo Pentikos.
Pol yire paiyi wu mewyalolo ka miyu nu ilauma empo sios empo Efesus
17 Mu maime taun Miletus ka Pol mi paiyi nu uma fai painri risine nu Kristen empo taun Efesus ese noloni nulu wu.
18 Nu uma fai painri risi namo,
noloni nemnoku ka Pol yirengkle nu nanrona,
“Pone won namale pu empo ommo isi ki kangkeke emen ki kolokike provins Esia ka ommo isi ki kangkeke empo ningki kaire ki fai kape pone maime.
19 Pone namale pu,
nu Juda nuka mi nire nangke fafaile ki.
Ka ompla namo yake ki eni wamo.
Ka ki fai samo kumalo noula kinini ka ki fai kili namkulu plau empo ki kangke ompla empo Manawamo.
20 Pone namale nanrona ki fei kum koplo mi empo ommo mingklari fai saimolo pone.
Nanrona fane ki fai kukuleke pone moile alele ka empo mow wokwokera poneni re ki fai kaikike.
21 Ki isi kali mi kelo nu Juda ka Grik fai nu ese nenmaire wolpuna painri God ka nupone ommo fafaile none fai nangkene namo,
ka bilipim Manawamo Jisas.
22 “Ka naimele Holi Spirit ke yire ki ese kaiki taunwamo Jerusalem.
Ki fei namale ompla fika ese yemei ki empo mokoi namo.
23 Ki namale ompla wokera nro.
Empo mokoi mingklari ki karaike,
Holi Spirit fai yireye ki nanrona kalabus ka eni ese yolowi ki.
24 Ka laip kinini namo,
ki ese kaike laip wee ki ese ri,
laip kinini seke ompla wamo.
Ompla empo Manawamo Jisas yake ki namo,
sa ki ese kupene rokoi namo sa ompla wamo,
fane ki ese kaiki ka kangke ompla namo pekimo se.
Ompla namo,
sa ki samo koplo miuporo empo God fai wolyaneye nu uma.
25 “Naimele ki namale nanrona,
pone uma isi ki karaike ka koploke mi empo kingdom empo God ka pone empo pupupe namo,
ese fei pulu ki kore.
26 Nanrona fane naimele ki kire mi alele ka alwone pone mingklari.
La empo pone wongke fei pari kingdom empo God,
namo seke eni kinini.
27 Empo fika,
ki fei pekikuma mi wongke ka kum kire koplo mi empo ommo mingklari yukaine God wone empo yireye.
28 “Pone ese sam saimope pone kore ka pone uma empo Holi Spirit yangke pone paipi risipe nu namo,
pone ese peli yukaine nu uma fai nopanene sios empo God.
Empo fika,
empo auna wunini ri,
oli wu woneni empo yem mone uma mingklari.
29 Ki namale nanrona,
empo ki kupole pone,
ampala fafaile ese yolowi iplele pone ka yangke fafaile wamo sipsip mingklari.
30 Pone plai ese nemei ka kalka mi empo God ka kalnaniline nu Kristen ese nupele nu.
31 Nanrona fane pone ese sam saimope pone kore.
Pone namale nanrona,
kikla plainrikera ki fei mi pepeli ki wona mi kalike pone.
Ki fai kili ningki ka kaire ka koploke pone mi namo.
32 “Nanrona fane naimele ki kina pone paiyi mew empo God.
Wu wone ese yopali pone.
Mi wongke nanrona God wolyale pone,
mi namo ese saimolo pone ese peli kelo ka wu ese yape ommo mingklari upor uporo yukaine empo God fai yaliye nu uma isi wone yuꞌpu nu ese naine yukaine uma woneni.
33 Ki fei nampalo ommo yukaine silva ka gol ka amplapi ommo empo uma plai.
Sa onne!
34 Pone namale nanrona mew kinini fai kangke ompla ka kapu ommo fai saimolo ki kone ka nu uma empo ki fai kakle maimeme.
35 Ommo mingklari empo ki fai kangkeke namo,
sa yuku pone nanrona,
mone samo mangke ompla ese saimolo nu uma empo fei kelo namo.
Yukaine mi isi Jisas wone yireye namo,
‘Yene ese aiyem wamo empo yene yali ommo nu uma plai,
ka nale namo rikepone nale yeneni empo yuꞌpuye ommo nu uma nawe yene.’ ”