Pol paiyi taunwamo Jerusalem
21
Empo mu mupole nu,
mu maimpi mampli sip ka maimpi kei ailan Kos.
Ka empo moulpepeli,
mu maimpi plele ailan Rodes ka maimpi kei taun Patara.
2 Empo mokoi namo,
mu mulu sip wongke yire ese paiyi distrik Fonisia.
Nanrona fane mu mampli sip namo ka maimpi.
3 Mu maimpi ka mu mulu ailan Saiprus yeye ka mu rikepone maimpi repo wunini empo mew aiyalpopo ka maimpi provins Siria.
Mu maimpi plele taun Tair,
empo fika sip yire yirample ommo plai mokoi namo.
4 Mu male nu Kristen plai empo mokoi namo ka makle nu maime resuklu 7pla kaire.
Holi Spirit yangke nu Kristen namo nireni Pol ese fei paiyi Jerusalem.
5 Ka namo sa kaire munini ese maimpi,
nanrona fane mu mupole nu ka maimpi.
Nu Kristen namo nakle nu pinmana ka kongkom noneni name mu maimpi nirample mu fulu maipon.
Empo mu maimpi plele fulu maipon,
mu mingklari mekli fufula ka mesapu.
6 Empo mu mew malole mew nunini pekimo se,
mu maimpi mampli sip ka nu painri kore mow noneni.
7 Mu mupone taun Tair ka mu maimpi plele taun Tolemes.
Empo mu maime mokoi namo,
mu mulu nu Kristen plai ka mu mew malole mew nunini.
Ka mu makle nu maime resuklu kaire wokera.
8 Empo kaire wongke,
mu mupole nu ka maimpi plele taun Sisaria.
Empo mokoi namo,
mu maimpi mow empo Filip ka mane wu maime mokoi namo.
Wu mana fai yoploye miuporo empo God paiyiye nu uma pinuma.
Ka wu sa wongke empo nu 7pla uma fai mewmewne nu aposel.a
9 Wu sa 4pla kongkom pin mangklama fei nuꞌpu uma.
Ka nu kongkom pinmana namo,
fai nangke ompla yukaine nu profet fai noplone mi empo God.
10 Mu maime mokoi namo kaire as mingklari ka profet wongke noula wunini Agabus yupone distrik Judia ka yolowi plele taun Sisaria.
11 Empo wu yolowi plele mu,
wu yem let empo Pol ka wu yiperi rew ka mew woneni ka yiremi mu nanrona,
“Holi Spirit yire nanrona,
‘Empo nale namo nu Juda empo naine Jerusalem ese nuna wu ka nuka nangka empo let namo ka nane wu paiyi mew empo nu uma fei Juda.’ ”
12 Empo mu mupu mi namo,
mu makle nu uma plai empo taun namo ke mi maule Pol ese fei paiyi taunwamo Jerusalem.
13 Ka Pol fai yiremi mu nanrona,
“Fikami ka pone ke pilipe ka pangke nanrona ki ka pangke wolpuna kinini eni wamo?
Ki fei kum empo nu nire nuka mew rew kinini.
Ki fei kum empo nu nire nufu ki ri taun Jerusalem.
Empo fika ki kungkam noula empo Manawamo Jisas.”
14 Ka empo mu mulu nanrona wu ke kelo wamo yire ese paiyi,
nanrona fane mu mew mimane wu paiyi.
Ka mu mire nanrona,
“Ommo fika Manawamo yire yangke,
sa yangke kei.”
15 Se sema mu memei kampluno ommo munini ka maimpi mampli Jerusalem.
16 Nu Kristen plai empo taun Sisaria re mu makle maimpi.
Nu numale mu maimpi kei mow empo Nason fai mu ese mane wu maime.
Mokoi empo Nason namo sa empo ailan Saiprus.
Wu wone sa isi disaipol wongke empo Jisas.
Pol paiyi plele taunwamo Jerusalem
17 Empo mu maimpi plele Jerusalem,
nu Kristen ainem wamo empo nu nulu mu.
18 Empo kaire wongke,
Pol yumale mu maimpi mire mulu Jems.
Ka nu uma empo painri risine sios re empo noloni ka nemnoku naine.
19 Pol mew yalole mew nunini pekimo se wu yirengkle nu mi mingklari empo ommo isi God yangke paiyiye nu uma empo fei Juda empo wu yoploye mi empo God.
20 Empo nu nupu mi namo,
nu nereri noula empo God.
Se sema nu nireni Pol nanrona,
“Mela,
yene yulu,
tausen mingklari empo nu pinuma empo Juda ke bilip ka neli kelo nupene lo empo Moses.
21 Nu uma plai isi nirengkle nu nanrona yene isi yukule nu Juda empo naine iplele nu uma fei Juda.
Ka yene fai yekliyumaye ka kumayane lo empo Moses ka yene fai yireye nu Juda ese fei naulere papli empo kongkom noneni ka nu ese fei nupene ommo empo mamimam munini.
22 La mu sa ese rongkele?
Mu namale nanrona nu ese nem mi nanrona yene empo yolowi ka waiye mee.
23 “Nanrona fane yene ese yangke ompla yukaine empo mu mirewi yene.
Nu uma 4pla empo isi nukami God naine plau mu naimele.
24 Yene ese yuꞌpu nu uma 4pla namo sa yene ese yakle nu pupene rokoi ese pangke pone namkile nama empo God.
Ka yene ese yali romaula empo nu uma namo fai nu ese naku ila para noneni.
Empo namo nro,
nu uma mingklari ese namale nanrona mi mingklari nu fai nupune namo,
fei alwone.
Ka nu re ese nulu nanrona yene fai yupeneye lo namo.
25 “Ka nu uma fei Juda fai bilipne namo,
mu meꞌre piparola paiyi nu ka mirengkle nu ese fei no ommo kulu nu fai nangkene ofa empo god none fai nosinanene namo.
Ka nu ese fei naikolno oli ka no koya empo ommo kulu empo nu fai nukalone mongkoma nunini.
Ka nu re ese fei nangke nale pamuk.”
26 Empo kaire wongke,
Pol paiyi yumale nu uma 4pla namo ka nu nupene rokoi nu Juda fai nupenene ka nangke nu none nemei namkile nama empo God.
Se sema Pol paiyi tempol fai yirengkle nu empo kaire rongkele sa wu yakle nu uma 4pla namo ese nemplekuru ompla noneni ka nangke ofa noneni.
Nu nukaneire Pol
27 Empo 7pla kaire empo nu nire fai nangke ompla namo yire pekimo,
nu Juda fai naine provins Esia ke nulu Pol yeli monre empo tempol.
Ka nu kalnanili pinuma mingklari ka nu painri nukairi Pol.
28 Nu nangke mi kelo wamo ka nire nanrona,
“Pone uma empo Israel,
pone polopi ka mewmew plau mu.
Mana mee fai waraiye mokoi mingklari ka yukuleye uma mingklari ka fai owyireye mone ka lo empo mone ka mokoi moneni re wu fai owyireye.
Ka wu re empo yumale nu Grik neri tempol monre empo koli ka yangke fafaile koii holi namo.”
29 Nu nulu Trofimus empo isi yane wu naraine taun namo,
fane nu nire nanrona Pol ro yumane wu yane painri tempol.
Trofimus namo,
mokoi wunini sa taun Efesus.
Nu iimuma empo taunwamo Rom numane Pol
30 Mi namo yopli pouwpaiyi plele nu pinuma mingklari empo mokoi mingklari empo taunwamo Jerusalem ka nu wol wongkeni ka nempliri ninani ka nemnoku.
Nu painri tempol ka nukairi Pol ka nengke wu yolo moile.
Empo nu nengke wu yolo moile,
wampane ro nu nerile rama empo tempol.
31 Empo nu nemnoku nire nufu Pol ese nufu wu ri namo,
mi ke paiyi plele mana fai paiyi risiye nu ami empo taunwamo Rom.
Wu yupu nanrona,
mokoi mingklari empo Jerusalem sa wolpuna neni wamo.
32 Wu wampane yemei ka yumale nu ofisa ka ami plai ka nu nempliri panro nu uma mingklari namo.
Empo nu uma fai wewelane namo nulu mana fai paiyi risiye nu ami yakle nu iimuma wunini namo,
nu fei nufu Pol kore.
33 Mana fai paiyi risiye nu ami namo yolowi ka yuna Pol ka wu yire mi kelo nu iimuma ese nuka sen plainrane wu.
Se sema,
mana fai paiyi risiye nu ami namo,
ke yalile nu uma mingklari namo noula empo Pol ka ompla fika fafaile empo wu yangkeye.
34 Nu uma empo naine koii namo,
nu sa mingklari wamo.
Nanrona fane empo wu yalile mi namo,
nu nemkaiwalo ka nu plai nire mi wongke ka nu plai nire mi wongke.
Ka mana namo fai paiyi risiye nu ami namo fei samo yem mi nomu empo nu wolpun nenine namo.
Nanrona fane wu yire mi kelo nu iimuma ese numane Pol nane painri koii empo nu ami fai nainene.
35 Empo Pol paiyi ka yire paiyi pari leta empo mow namo nu uma wolpun neni nengkali nire nufu wu.
Nanrona fane nu iimuma nongkole wu painri.
36 Uma pinuma mingklari ke nupenene wu yakle nu iimuma ka nu nangke mi nire nanrona,
“Pufu wu ri.”
Pol yoplongkleye nu pinuma mingklari wamo.
37 Empo nu iimuma numane Pol ka nire painri panri koii nunini ka wu yaline mana fai paiyi risiye nu ami namo nanrona,
“Ki kire ese kire mi wongke yene.”
Ka mana fai paiyi risiye nu ami ke yireni wu nanrona,
“Yene namale mi Grik wee?
38 Yene Isip wongke wee?
Ki wola nanrona yene isi yakle gapman popupe ka yene isi yuꞌpu 4,000 uma nuna bainat ka pone paraipe mokoi maipon aupenro.”
39 Ka Pol yireni wu nanrona,
“Ki seke mana namo.
Ki sa wongke empo nu Juda ka mokoi kinini sa taun Tarsus waiye provins Silisia.
Taun kinini namo sa yuna noula wamo.
Yene as yire sa ki ese koplongkle nu uma mee se.”
40 Mana fai paiyi risiye nu ami namo yireni Pol fane wu yeli leta empo mow namo ka wu mew kauka nu uma mingklari namo ese misarulu.
Ka empo nu misarulu wu yoplongkle nu.
Empo wu yoploye namo,
wu sa yoploye Hibru mi.