22
“Pone inomranimpi ka aina empo Juda,
pone pupu mi kinini.”
2 Ka empo nu nupu Pol yoploye nu Hibru mi nu samo misarulu naine ka nupu mi wunini.
Wu yirengkle nu nanrona,
3 “Ki sa Juda.
Ama yem ki taun Tarsus yeye Provins Silisia.
Ka ki kemei wamo ka skul taunwamo Jerusalem.
Ka Gamaliel samo yukune ki lo mingklari empo nu mamimam moneni.
Ka ki amparpunu wamo kire kupene mi empo God yukaine empo pone re pangkepe mee.
4 Ki isi kangke fafaile wamo nu uma mingklari empo fai bilipne nupene Rokoi namo.
Ki isi kukalkeire pinuma mingklari ka ki kenru nu naine kalabus ka nu plai rili pu.
5 Hetpris empo tempol yakle ila uma empo nu kansol ese samo nirengkle pone empo ommo namo.
Ka nu fai nake ki piparola sa ki fai kungkam kaikike nu uma plai munini empo naine taun Damaskus.
Ki kaiki ese kumale nu uma empo taun Damaskus ka kakle nu molomi yukaile nu kalabus sa nu ese nangke fafaile nu taunwamo Jerusalem.
Nu ese nangke nanrona nu empo fika,
nu uma namo fai nupenene rokoi empo fai bilipne Jisas.
Pol yire wu namale Manwamo fane wu yemei Kristen
6 “Ka empo taim namo,
kaire samo yeli iplele ka ki kaiki plele eklene taun Damaskus.
Ka ompla yukaine nemi rari alil yolo heven ka yolo mamane ki.
7 Ki firane kalo kaike pike ka ki kupu mi mongkoma wongke yolo ki ka yire ki nanrona,
‘Sol!
Sol!
Fikami ka yene ke yangke fafaile ki?’
8 “Ka ki kaline wu nanrona,
‘Manawamo,
yene fina?’
“Ka mana namo yire ki nanrona,
‘Ki Jisas empo taun Nasaret.
Ki mana yene fai yangke fafaileye ki namo.’
9 Nu uma empo ki kakle maimpi namo,
sa nulu nemi empo rariye namo ke ali,
ka nu fei nupu mi empo mana yoploye ki namo.
10 “Ki kaline wu nanrona,
‘Manawamo,
la ki ese kangke fika?’
“Ka Manawamo fai yire ki kore nanrona,
‘Yene yemei ka paiyi taun Damaskus.
Ka empo mokoi namo,
nu ese nirewi yene ompla fika ki kire yene ese yangke.’
11 “Nemi empo rariye namo,
sa ali kelo wamo ka yangke nama kinini wowo.
Nanrona fane nu uma empo ki kakle maimpime namo,
ke nuna mew kinini ka numane ki kaiki taun Damaskus.
12 “Mana wongke noula wunini Ananaias empo yolowi yulu ki.
Mana namo,
wu mana fai waiye mewola empo God,
ka wu fai samo yupeneye lo.
Ka Juda mingklari empo naine mokoi namo ke namale ka samo noplone nale uporo wunini.
13 Wu yolowi yeli eklene ki ka yire ki nanrona,
‘Mela kinini Sol,
nama yeneni ese feingkyane ka yene ese yulu kore.’
Ka empo taim namo nro,
nama kinini fai feingkyane ka ki kulu wu.
14 “Ka wu yire ki nanrona,
‘God empo nu mamimam moneni namo yina yene ese namale ommo empo wu fai wolaye.
God yangke yene ese namale Mana Uporo namo ka God yangke yene samo yupu wu yoploye yene mi reꞌfa wu woneni.
15 Yene ese waiye yukaine mana fai yoplo mi wunini paiyiye nu uma mingklari empo ompla fika yene isi yupu ka yulu.
16 Ka naimele yene yoru ompla fika?
Yene yemei ka paiyi yem baptais,
empo yene youw noula empo God sa wu ese yaklele wolpun yeneni ka yuꞌpole ommo fafaile empo yene isi yangkeye.’
God isi yawane Pol paiye yoplo mi nu uma plai
17 “Empo ki kaiki taunwamo Jerusalem,
ka ki kaiki kaike kesapuke tempol monre,
ki kulu ompla yukaine ki kiyoloke.
18 Ka ki kulu Manawamo yire ki nanrona,
‘Eseme,
yene ese yupone taunwamo Jerusalem.
Nu uma namo ese fei nupu mi kinini empo yene yoploye.’
19 “Ka ki kireni wu nanrona,
‘Manawamo,
nu uma namo samo namale nanrona ki mana fai kaikike mow koli mingklari ka ki fai kufloke nu uma fai bilipne yene ka kuꞌpu nu kaiki kenru nu naine kalabus.
20 Ka empo nu nufu mana fai yungkamye mi yeneni namo noula wunini sa Stiven,
ki re empo kaike ka ki samo kopaneke ampapli ommo nunini ka ki kirengkle nu nufu wu ri.’
21 “Ka Manawamo yire ki kore nanrona,
‘Yene paiyi,
ki ese kawane yene paiyi amone ka paiyi nu uma fei Juda.’ ”
Pol wu sa uma Rom mana.
22 Nu uma pinuma mingklari namo naine ka nupu mi empo Pol paiyila empo wu yire mi namo,
ka nu pongke mi ka nire nanrona,
“Pufu wu ri rape,
mana namo seke mana uporo la ese waiye pike mee.”
23 Empo nu nangkene mi ka ningko siot ommo noneni ka nangke fum pari yuforo kei.
24 Ka empo nu nangke namo,
mana fai paiyi risiye nu iimuma namo ke yire mi kelo nu iimuma ese nem Pol paiyi koii empo nu ami fai nainene.
Ka wu yirengkle nu ese nufu Pol wip ka naline wu nomu empo nu uma pinuma nangke mi mingklari namo.
25 Empo nu nuka rew ka mew wunini fai nu ese nufu wu namo,
Pol yulu mana fai yopaneye grup wongke empo nu iimuma namo ke nayeliye fane wu yaline wu nanrona,
“La lo yire pone ese pufu mana empo Rom empo pone fei pupu kot wunini ka fei sam namale ompla fika empo isi wu yangkeye?”a
26 Ka mana fai paiyi risiye grup wongke empo nu iimuma namo ke yupu mi namo,
wu ke paiyi yireni mana fai paiyi risiye ami mingklari namo ka yireni wu nanrona,
“Mana namo,
sa uma Rom mana.
La naimele yene ese yangke ompla fika wu?”
27 Ka mana fai paiyi risiye ami mingklari namo yolowi Pol ka yaline wu nanrona,
“Yene samo yire ki mi alwone,
yene sa uma Rom mana wee onne?”
Ka Pol yireni wu kore nanrona,
“Yei.”
28 Ka mana fai paiyi risiye ami mingklari namo fai yireni Pol kore nanrona,
“Ki isi kina romaula wamo ese ki kaike yukaine mana empo Rom.”
Ka Pol yireni wu kore nanrona,
“Ki fei kina romaula,
empo ama yem ki,
ki kaike yukaine uma Rom mana.”
29 Nu iimuma nire naline wu mi namo ke peplel painri.
Ka mana fai paiyi risiye ami mingklari namo,
wu re samo yum wamo.
Empo fika,
wu namale nanrona wu empo yangke ompla fafaile empo yirengkle nu sen nuka mana empo Rom.
Pol paiyi yeli nama empo nu kansol
30 Empo kaire wongke,
mana fai paiyi risiye nu ami namo ke yapu mi nomu empo nu Juda nire kotim Pol.
Nanrona fane wu mew yimane Pol palo moile empo mow kalabus ka yumale nu bikpris ka uma fai nupune kot empo nu Juda namo noloni nemnoku.
Se sema wu yumane Pol yolowi ka yeli ungklamayen empo nu.