Mi riri empo nu uma fafaile fai nopanene nengklele wain
(Matyu 21.33-46; Luk 20.9-19)
12
Ka Jisas yemei yirengkle nu mi riri plai kore.
Wu yirengkle nu nanrona,
“Empo kaire wongke,
mana wongke yura wain nengkle ka wu yile roma ka yemplekuru pulale wongke empo roma wamo fai nuꞌpu wain kulu empo nu fai rew nunralone.
Wu yaulere ommo ka yungkle puku mamane nengkle namo.
Ka wu yeꞌre mow rinrangklen wongke yeli nengkle namo fai nu uma ese naine ka nama nopane nengkle.
Se sema wu yina nengkle namo paiyi nu uma plai ese nopane ka nangke bisnis ka nane romaula paiyi kore wone.
Ka wu wone namo,
sa paiyi yeye mokoi amone wongke ka kali kikla paiye kei.
2 Empo wain namo napale nale ka wain namo sa peisepu lese nangklu.
Nanrona fane wu yawane mana wongke fai yangke ommo woneni paiyi nu uma empo nopanene wain nengkle namo ese yem plola empo manawamo woneni.
3 Ka nu uma empo nopanene wain nengkle namo samo nufu wu fafaile wamo ka nawane wu kalpaiyi kore mewlenro.
4 Nanrona fane nengkle ripile namo,
yawane mana wongke kore fai yangke ommo woneni namo paiyi kore nu uma empo wain nengkle namo.
Mana namo nali ikaklo wunini ka nangke nale fafaile mingklari wu fai nangke wu flemulu wamo.
5 Ka wu yawane mana wongke fai yangke ommo woneni namo paiyi kore.
Ka wu re nu nufu wu ri.
Nanrona fane wu yawale nu uma mingklari plai fai nangke ommo woneni namo painri nu.
Ka nu samo nuflo nekli nu fafaile wamo ka nuflo plai empo nu rili kei.”
6 “Nengkle ripile namo,
nu uma empo fai nangke ommo wunini namo wongke fei waiye.
Ka auna wokera wu woneni nro sa nawaiye.
Mela mana namo,
wu fai wolayane wu wamo.
Se sema wu yawane auna woneni ke paiyi.
Ka aina yire nanrona,
‘Nu uma namo ese nulu mela kinini ka ese nupu mi wunini.’ ”
7 “Ka nu uma empo fai nangke nengkle namo nuka mi nanrona,
‘Mana namo ese yuꞌpu ommo mingklari empo nangka woneni.
Mone ese samo mufu wu ri ka mu mone ese maime nengkle ripile.’
8 Nanrona fane nu nukaneire wu ka nufu wu ri kei ka ningkapalo puꞌlo wunini palo nengkle piyowa.”
9 “Nengkle ripile ese yangke ompla fika?
Wu ese yolowi ka yuflo nu uma empo isi nopanene nengkle namo rili nengkle namo.
Ka wu ese yane nengkle namo paiyi nu uma plai ese nopane.
10 Anro pone fei pem alele nomu empo mi rola namo wiye buk empo God namo wee?
Mi mee sa yire nanrona,
‘Roma namo,
nu kamda nulu ka wola nanrona roma fafaile.
Nanrona fane nu nurome.
Ka naimele roma namo sa rinra wone fai yeli yukaine ilo rinra fai kelyane mow yeli kelo wamo.
11 Manawamo wone isi yangke ompla namo,
ka mone namale nanrona ompla namo sa wongkeni wamo nama moneni.’ ”
12 Nu bikpris namo ka nu tikse empo lo ka nu ila uma plai empo nu Juda namo namale nanrona mi riri namo empo Jisas yoploye nu uma fafaile fai nopanene nengkle namo,
sam paiyi nu.
Nanrona fane nu napu rokoi fai nukaneire wu.
Ka nu sa numa empo fika nu namale nanrona pinuma mingklari fopi fai wolnane mi empo Jisas namo,
sa namale nomu empo mi riri namo pu empo Jisas yangkeye.
Nanrona fane nu nupone koii namo ka painri.
Mi empo fai nina takis paiyi Sisar
(Matyu 22.15-22; Luk 20.20-26)
13 Se sema nu bikpris nakle nu tikse empo lo ka nu ila uma plai empo nu Juda namo,
ke nawale plai empo nu Farisi nakle nu uma plai empo Herot namo painri Jisas.
Nu painri fai ifle nali la empo Jisas yire mi wongke wee yangke ompla wongke koroyane sa nu ese kotim wu.
14 Nu noloni plele Jisas ka nu naline wu nanrona,
“Tikse,
mu namale nanrona yene mana fai yire mi alwone nro ka yene fei fai kalyireye nu uma.
Yene fai yire mi alwone nro nu ilauma ka nu pinuma siwole plau ka yukule nu pinuma nale empo God.
Ka yene wola rongkele,
ese uporo empo mu ese mina takis paiyi gapman empo Sisar wee onne?
Mu ese mina romaula namo paiyi wu wee onne?”
15 Ka Jisas namale nale empo nu fai kalnirene pu,
fane wu yimpone mi empo nu nanrona,
“Fikami ka pone ke pengkali ki nanrona?
Pone pem romaula wongke puna polopi pake ki ka ki kulu.”
16 Nu nem romaula wongke nuna noloni nane wu ka wu yalile nu nanrona,
“Pone pire ki,
naimele sa malma ka noula finani sa wiye romaula naimele?”
Ka nu nimpone mi wunini nanrona,
“Noula ka malma empo Empera Sisarni.”
17 Ka Jisas yimpone mi empo nu nanrona,
“Nanrona fane pone ese pane ommo fika empo Sisar paiyi Sisar wone ka ommo fika empo God sa paiyi God wone.”
Nu nupu mi wunini namo ka nu wolnipanri wamo.
Mi empo mana ri ka yemei kore
(Matyu 22.23-33; Luk 20.27-40)
18 Plai empo nu Sadyusi noloni Jisas.
Nu Sadyusi namo,
nu uma fai nire nanrona nu uma empo rili namo ese fei nemei kore.
Nanrona fane nu noloni Jisas ka naline wu nanrona,
19 “Tikse,
Moses isi yeꞌre lo wongke moneni yire nanrona,
la mana wongke yem pin ka pin fei yuꞌpu kongkom ka wu ri ka puli wonkere nro waiye se,
ino yupene wone namo ke yem pin plola namo fai ese yuꞌpu kongkom.
Ka empo wuyane nuꞌpu kongkom,
nu kongkom namo ese nem koii empo mana empo ri pu namo.
20 Empo isi kaire wongke nu 7pla inomranimpi oli oikenra nainene.
Rani isi yem pin wongke ka pin fei yuꞌpu kongkom ese nem koii woneni.
Paiyi se rani namo ri.
21 Nanrona fane ino empo yupene wu namo ke yem pin plola namo.
Ka wu re puli fei yuꞌpu kongkom ka wu ri.
Se,
ino yupene wu namo re yem pin plola wunini namo ka wu re puli fei yuꞌpu kongkom ka wu ri.
22 Nu nangke nanrona nro resuklu 7pla inomranimpi namo nem pin wokera,
ka nu inomranimpi namo kongkom onne ka nu rili pu.
Se sema,
nu 7pla inomranimpi isi nem pin namo re rili.
23 Nu 7pla inomranimpi isi nempulu nem pin wokeranro namo.
Ka empo God yangke nu uma empo rili pu namo ese naine laip,
pin namo ese waiye yukaine pin finani.”
24 Ka Jisas yimpone mi empo nu nanrona,
“Pone fei konsamo namale kelo empo God ka mi nile buk empo God plau.
Nanrona fane pone wona paraipe wawilipe rokoi empo mi fafaile nananrona.
25 Empo uma rili pu namo ese nemei kore,
nu uma ese fei nuꞌpu pinmana ka nu pinmana re ese fei nuꞌpu uma.
Nu mingklari ese naine yukaile nu ensel empo heven.”
26 “Naimele pone poplo ri ka yemei kore empo nu pinuma.
Ka pone pulu mi wiye buk empo Moses namo pu wee onne?
Wu yeꞌre mi namo isi yulu niꞌpi waiye aliye ilo pitiri wongke.
Ka empo taim namo,
God isi yireni Moses nanrona,
‘Ki God empo Abraham ka Aisak ka Jekop.’
Ka mana plainrikera namo isi rili pu,
ka naimele Baibel yire nanrona nu naine laip.
27 Wu seke God empo nu uma rili,
wu sa God empo nu uma naine laip.
Nanrona fane mi empo pone sa fei resuklu.”
Nambawan lo empo God
(Matyu 22.34-40; Luk 20.25-28)
28 Tikse wongke empo lo isi waiye namo ka yupuye nu Sadyusi nane Jisas nopu mi empo mi namo.
Ka wu yupu Jisas yingkapaiyi mi wongke samo uporo nu.
Nanrona fane wu yaline Jisas nanrona,
“Lo rongkele sa samo rikepone lo mingklari plai namo?”
29 Ka Jisas yimpone mi wunini nanrona,
“Lo wokera nro samo rikepone lo plai.
Lo namo yire nanrona,
‘Pone uma empo Israel namo ese samo pupu lo namo.
Manawamo,
God empo mone namo,
wu wokera nro sa Manawamo moneni.
30 Yene samo wolayane God,
Manawamo yeneni empo wola yeneni ka spirit yeneni,
ka wolpuna yeneni ka kelo yeneni rilele.’
31 Ka lo wongke empo yupene lo namo sa yire nanrona,
‘Yene samo wolayane nu uma plai yukaine yene fai samo wolayane yene kore.’
Lo plai ese fei rikepone lo plainrane namo.”
32 Nanrona fane tikse empo lo yireni Jisas kore nanrona,
“Tikse,
mi yene yire namo sa won alwone.
Manawamo wokera nro nawaiye ka wu wone sa God.
God wongke fei waiye onne.
33 Mone ese samo wolmane wu empo puna moneni ka wola moneni,
ka kelo moneni rilele.
Ka mone ese samo wolamale nu uma plai yukaine mone fai samo wolamane mone kore.
Lo plainrane namo sa wamo ka painri risi lo empo fai nangke ofa paiyi God.”
34 Empo mana namo samo yimpone mi empo Jisas ka Jisas namale pu nanrona wu yuna ila uporo ka Jisas yireni wu nanrona,
“Yene fei waiye amone kingdom empo God.”
Ka empo taim namo ka paiyi,
uma mingklari namo num ka fei naline wu mi wongke kore.
Fina sa Krais
(Matyu 22.41-46; Luk 20.41-44)
35 Jisas yukule nu uma mi tempol monre ka wu yirengkle nu nanrona,
“Fikami ka nu tikse empo lo namo fai nire nanrona Krais sa oli empo Devit?
36 Holi Spirit yereryane wolpuna empo Devit ka wu wolrufu mi namo ka yireni wone kore nanrona,
‘Manawamo yireni Manawamo kinini nanrona,
“Yene waiye mew menrulpo kinini
paiyi resuklu empo ki ese kangke nu uma empo nangke fafaile yene ese naine yene rew ruwe.” ’ ”
37 “Devit youw Krais nanrona Manawamo woneni.
Nanrona fane fikami ka Krais yemei oli oikenra empo Devit?”
Pinuma mingklari naine ka nu ainem empo nu nupu mi empo Jisas.
Nu uma empo namale lo nangke nale fafaile wamo
(Matyu 23.1-36; Luk 11.37-54; 20.45-47)
38 Jisas yukuleye nu paiyi ka wu yirengkle nu nanrona,
“Pone samo pulu nu tikse empo lo.
Nu fai naile ommo papli angklen ka mew panrole none empo nu fai naraine nama empo nu pinuma ka empo taim nu fai painrine koii empo fai nemnokune.
Nu fai samo wola nanrona,
nu uma ese samo nulu nu ka nakle nalole mew.
39 Ka empo monre empo mow koli namo,
nu fai samo wola nire naine sia empo fai neli risi.
Ka empo kaire fai nangkene kola wamo re,
nu fai samo wola nire nu pinuma mingklari ese nulu nu nanrona nu uma fai nuna noula wamo ka nu ese nali nu sia empo fai neli risi.
40 Nu fai kalnaniline nu pinmana empo inpi noneni rili pu namo nengkene ka kapalone mow ka peki nupu ommo mingklari wongkwongkeni nunini.
Nu fai nesapu ewlangklen fai nu pinuma ese nulu nu ka nire nanrona nu sa won uporo.
Nanrona fane nu uma nanrona,
ese ompla fika fafaile God ese yali nu,
ese samo rikepone ese yali nu pinuma plai namo.”
Pin empo ini ri namo yane ofa God
41 Jisas waiye eklene bokis empo romaula empo tempol ka yuluye nu uma empo noloni nenrune romaula panrone bokis namo.
Nu uma empo nunali romaula wamfafai namo noloni ka naile romaula wamfafai panro bokis namo.
The Widow’s offering (Mak 12:41-44)
42 Ka pin wongke ini wunini ri pu ka wu waiye yaimal pin,
yolowi ka yingkapalo romaula pitiri plainrane resuklu wan toia palo bokis namo.
43 Ka Jisas youw nu disaipol woneni noloni wu ka wu yirengkle nu nanrona,
“Ki kire mi alwone pone.
Pin mee empo ini wunini isi ri yupone wu ka wu waiye yaimali namo,
yina romaula samo wamo wone rikepone romaula mingklari empo pinuma mingklari naile panrone bokis empo romaula empo tempol namo.
44 Empo fika nu pinuma nunali romaula mingklari wamfafai namo,
naile romaula noneni plola nro panro bokis empo romaula namo.
Ka pin namo,
sa yaimal pin,
ka romaula empo wu yanpalo namo,
sa won konanrona nro.
Ka wu fei yina romaula plola waiye wone ese yuꞌpu ommo fai wo wee ommo woneni.
Samo onne!”