Jisas yukule nu aposel rokoi fai nesapune
(Matyu 6.9-15; 7.7-11)
11
Kaire wongke Jisas paiyi waiye yesapuye koii wongke,
ka empo wu yesapu pekimo,
se disaipol wongke yireni wu nanrona,
“Manawamo,
yene yukule mu rokoi fai mu ese mesapu yukaine Jon Baptais wu fai yukuleye nu disaipol woneni.”
2 Ka Jisas yirengkle nu nanrona,
“Empo pone pesapupe,
pone ese pire nanrona:
‘Aina,
yame mu kelo fai mereri noula yeneni ese yeye holi.
Kingdom yeneni yolowi.
3 Ka yame mu ommo fai mome resuklu mu ningki kaire.
4 Ka yene ese yupole nale fafaile,
empo fika,
mu fai mupole nale fafaile empo nu uma plai isi fai nangkene mu.
Ka yene ese fei yinayane ommo fafaile nemplekare mu.’ ”
5 Ka wu yirengkle nu kore nanrona,
“La mana wongke poneni namale mana wongke,
sa wu ese paiyi mana namo ningki wamo ka yaline wu nanrona,
‘Konmana kinini,
yene yake ki bret plol plainrikera se.
6 Empo fika,
folmana kinini empo yolowi amone ka wi plele ki,
ka ki sa ommo onnele fane ki fei kane wu wo.’
7 “Ka konmana empo wiye monre namo yireni wu nanrona,
‘Yene paiyi,
mu meꞌrile rama pu ka ki kakle kongkom mile nama pu.
Ki ese fei kemei ka kawe yene ompla wongke.’ ”
8 Ka Jisas yirengkle nu nanrona,
“Ki kire mi alwone pone,
mana ripile empo mow namo ese fei yemei ka yane wone konmana ompla wongke fai yuku nanrona wu sa konmana woneni.
Es onne!
Wu ese yemei ka yane wu ompla,
empo fika wone konmana empo waiye yuyaliye wu fane wu ese yane wu ompla rufu empo wu wolaye.
9 “Nanrona fane ki kire mi alwone pone,
yali sa yene ese yem ompla rufu yene yaliye;
yapu sa yene ese yulu;
raraku rama sa rama ese wolpari.
10 Empo fika mana fina empo yali ese yem;
mana empo yapu wu ese waꞌne;
ka mana empo raraku rama,
rama ese wolpari.
11 “La empo pone wongke,
auna wunini yaline nangka firela,
la nangka ese yane wu umele wee?
12 Ka empo auna yaline wu rora amu,
la wu ese yane auna elmane wee?
13 Pone fai pangke ommo wongkwongkeni fafaile,
ka pone samo namale wamo fai pali ommo upupu paiyi kongkom poneni.
Nanrona fane pone ese namale nanrona Aina poneni waiye heven ese yali Holi Spirit paiyi nu uma empo fai nalinene wu!”
Jisas ka Belsebul
(Matyu 12.22-30; Mak 3.20-27)
14 Jisas yuꞌpole opola fafaile wongke empo konraloye mana wongke ka yangke wu mireꞌfa kungku.
Empo opola fafaile yupone mana empo mireꞌfa kungku namo,
wu yoplole mi ka uma mingklari nulunpapli.
15 Ka nu plai nire nanrona,
“Mana namo fai yuꞌpoleye opola fafaile kelo empo Belsebul.
Belsebul sa rouwmoka empo opola fafaile.”
16 Nu uma plai nengkali nire naline Jisas fai wu ese yangke mirakol wongke yolo heven sa nu ese namale nanrona God empo yem wu ese yangke ompla namo.
17 Jisas sa namale ommo empo nu wolane fane wu yirengkle nu nanrona,
“Nu uma empo kingdom wokera,
nu ese ninan nai ka nopu none kore nanrona fane kingdom namo ese fei yeye kelo.
Ka nu uma empo naine mow oikenra nu re ese naine ka nopu none kore,
ka nu ese fei nemnoku naine plau,
nu ese ninan nai none kerila.
18 Nanrona fane,
la empo Satan yuꞌpu nu uma woneni fai nemnoplene none kore,
kingdom wunini ese yeye kelo rongkele?
Ki kire mi mee empo fika pone pire nanrona ki fai kuꞌpoleke nu opola fafaile kelo empo Belsebul.
19 La empo rokoi namo nro,
ki fai kuꞌpoleke opola fafaile la rokoi rongkele sa nu uma fai nupelene pone nuꞌpolene opola fafaile?
Nanrona fane,
nu uma empo fai nupelene pone ese mi nufu mi empo pone.
20 La,
empo ki kuꞌpole opola fafaile kelo empo God,
kingdom empo God sa yolowi pone pu.
21 “La empo mana kelo wongke yuna ommo kelo fai samo yopaneye mow woneni,
ommo mingklari wunini ese samo naine.
22 La empo mana kelo wamo wongke yolowi,
wu ese yufu yangku wu,
ka wu ese yuꞌpu ommo kelo wunini fai yopuye ka yire ommo namo ese saimolo wu wone waiye kelo,
ka yepi ommo mingklari empo mana namo ese paiyi nu uma plai.
23 “Mana empo fei waiye plau ki sa wu fai yangke fafaile ki.
Ka mana empo fei yemyokuye uma plau ki sa wu fai yumale uma poinpainrine wolpuna fafaile.”
Opola fafaile yolowi kore
(Matyu 12.43-45)
24 Ka Jisas yire kore nanrona,
“Empo opola fafaile yupone mana wongke,
wu ese paiyi koii kam ka yapu koii wongke fai wu ese samo wai.
Wu yapu paiyi la wu fei waꞌne koii wongke sa wu ese yire wone kore nanrona,
‘Ki ese kaiki kore mow namo ki isi kuponeke.’
25 Empo wu yolowi kore,
wu ese yulu nanrona mow namo empo nu nupapaki ommo ka neplene ulawa ka nangke wu uporo pu.
26 Fane wu fai paiyi yumale 7pla opola fafaile samo fafaile rikepone wone ese noloni panri naine mow namo.
Naime sa pone ese namale nanrona mana namo isi wu fafaile,
naimele wu samo paiyi fafaile wamo.”
27 Empo Jisas yoploye mi namo,
pin wongke empo waiye plau nu pinuma mingklari wamo namo kepe yangke mi ka yire nanrona,
“Pin empo isi yem yene ka yawe yene roro namo ese woluporo,
empo fika God ese blesim wu.”
28 Ka Jisas yireni wu nanrona,
“Mone ese mire nanrona,
nu uma empo nupu mi empo God ka fai nupenene sa nu ese woluporo.”
Ompla empo profet Jona yangkeye namo sa waiye fai yukuye nu
(Matyu 12.39-42)
29 Empo kaire namo uma mingklari sa nolonine nangke namba empo nu uma empo nainene namo pari wamo ka Jisas yirengkle nu nanrona,
“Nu uma empoleme sa nu uma fai nangke nale fafaile wamo.
Nu naline fai nire ese nulu mirakol ese yukule kelo empo God.
Fane ki ese fei kangke mirakol wongke sa nu ese nulu.
Samo onnele!
Ompla wongke nro nu ese nulu,
sa ompla yukaine profet Jonaa empo isi yangkeye.
30 Ompla empo God yangke paiyiye profet Jona isi,
wu yangke nu uma empo taun Ninive sa namale kelo wunini.
Nanrona fane,
Auna empo Mana wu re ese waiye yukaine ompla empo God ese yukule nu pinuma empoleme.
31 Kwin empo Nemi kuma ese yemei yeli kaire empo God yupuye kot empo uma mingklari,
ka kwin namo ese yoplo mi alele uma mingklari empo kaire namo.
Pin namo fai waiyeye piyowa empo pike isi yolowi yupu Solomon fai yupu mi empo ilauporo wunini.
Ka mana empo rikepone Solomon sa yeli mee.
32 Nu uma empo taun Ninive ese naine kaire empo God yupuye kot empo uma mingklari,
ka nu ese naine fai ese mi nufu mi empo uma empo kaire namo.
Empo fika nu uma empo taun Ninive nupu mi empo profet Jona ka nu bilipim ka nupole ommo fafaile empo none fai nangkene.
Ka mana empo rikepone profet Jona sa waiye plau pone mee.
Ali empo nale empo mana
(Matyu 6.22-23)
33 “Mana wongke fei fai yesane lam ka yeine pekiyeliye ka wu fei fai yufonralo yeliye pike mangkam.
Wu fai yona lam yapaye koii alele sa ali ese aliyane mokoi.
Ka empo uma neri monre sa ese samo nulu koii.
34 Nama yeneni sa lam yeneni.
Empo nama yeneni uporo,
nale papli yeneni re ese ali.
La empo nama yeneni fafaile,
nale papli yeneni re ese kurela.
35 Nanrona fane yene ese konsamo yulu ali empo yeye yene namo se,
sa ro ali wee kurela?
36 Nanrona fane,
nalpapli yeneni ali ka repo yeneni fei kurela,
nalpapli yeneni ese samo ali ka ese ali yukaine lam empo aliye yene.”
6pla ompla fafaile ese nemei
(Matyu 23.1-36; Mak 12.38-40; Luk 20.45-47)
37 Empo Jisas yoplo mi namo pekimo,
se Farisi wongke yaline wu fai yane painri no ompla mow wunini.
Nanrona fane Jisas yane wu painri mow empo Farisi namo fai wu ese paiyi wai ka wo ompla.
38 Ka Farisi namo yulu nanrona Jisas ke fei yupene lo empo nu Farisi,
wu fei yaklele mew se wo ompla,
fane wu wolyangklupanri.
39 Ka Manawamo yireni wu nanrona,
“Pone Farisi pone fai samo paklelepe plet ka kap poneni kuma nro,
ka wolpuna poneni sa fai nampaloye ommo ka pangke nale fafaile mingklari.
40 Pone uma ikaklo onnele!
Empo fika God empo yangke nalepapli namo,
wu yangke moilele nro wee monrele plau?
41 Nanrona fane pone ese puꞌpu ommo empo naine plet wola ka pale nu uma empo ommo onnele sa ommo mingklari poneni ese namkile.
42 “Pone Farisi,
pone poo,
empo fika pone fai puꞌpupe ommo pitpitiri empo nengklele poneni,
ka pepi 10pla kura ka kura wokera sa pone fai pane paiyi God.
Ka pone fei fai samo wolpalepe nu uma ka wolpanepe God.
Ese uporo pone empo paraipe pupenepe nale namo ka pone ese fei pupone lo plai.
43 “Pone Farisi,
pone poo,
empo fika pone fai wolpapape fai ese paipe sia empo neli risi monre empo mow koli ka pone fai wolpalepe nu uma empo nire mi uporo pone ka mew nalolene pone empo koii fai uma niflipanro ka maketne.
44 “Pone poo,
pone ese pukaine pike pulale empo fai niꞌline uma empo riline ka kiki yumalo fane uma fai narai poinpanrene riri ka fei namale koii namo empo niꞌline uma.
Ka nu ese fei namkile nama empo God.”
45 Wongke empo nu uma samo namale lo empo nu Juda yireni Jisas nanrona,
“Tikse,
empo yene yoploye mi namo,
yene yangke wolpuna munini rerene plau kei.”
46 Ka Jisas yireni wu nanrona,
“Ka pone uma empo samo namalepe lo pone poo,
empo fika pone fai penru ommo eni pari nu uma ka pisipolipe nu.
Ka pone fei fai mewmewpe plau.
47 “Pone poo,
empo fika pone fai pompope pulale empo nu fai niꞌline nu profet.
Nu alma flili poneni empo isi nuꞌflo nu riline.
48 Nanrona fane pone fai mi pufupe yukaine ompla empo nu alma flili poneni isi fai nangkene sa ompla uporo.
Nu fai nuꞌflo nu profet riline ka pone fai pompolope pulale nunini.
49 Nanrona fane ilauporo empo God ka wu yire nanrona,
‘Ki ese kali nu uma namo profet ka aposel.
Plai empo nu,
sa nu ese nuꞌflo nu rili ka plai nu ese nangke fafaile wamo nu.’
50 Empo God yangke pike naimele ka yolowi plele empoleme,
nu uma fai nuꞌflo nu profet riline.
Eni empo nu uma fai nuꞌflo nu profet riline namo,
ese yolowi nu uma empoleme.
51 Nu ese nungkam eni wamo empo nu uma fai nuꞌflo nu profet riline,
empo isi nu naiku oli empo Abel yolowi plele empo nu naiku oli empo Sekaraia.b
Nu nufu Sekaraia ri iplele empo alta ka mow empo God.
Mi alwone,
ki kirepi pone,
nu uma empo kaire mee ese nungkam eni empo ommo namo.
52 “Pone uma empo namalepe lo pone poo,
empo fika pone pekipina ki empo rama empo koii fai nemne ila uporo.
Pone fei fai paplipe monre,
la empo nu uma nire panri monre sa pone fai paukiripe nu.”