Nale fafaile empo nu Farisi namo, pone poo
(Matyu 10.26-33)
12
Empo nu pinuma okoni rilele nemnoku,
nanrona fane nu nemnangkalo ka rew nunralo none kore.
Ka Jisas yemei ka yirengkle nu disaipol woneni nanrona,
“Pone sam saimo pone kore yisa empo nu Farisi.
Yis empo nu Farisi sa nale fai kal noplone mi uporo ka nale nunini sa fai nangke ommo fafaile.
2 Ommo mingklari empo nu nuforo ka nukalo naine namo ese nemei alele.
3 Nanrona fane mi fika empo pone poplope ningki,
sa kaire nu uma ese nupu.
Ka mi empo pone poplo aflole monre,
sa nu uma ese neli mow riplala riri ka mi nufu paiyi pinuma.”
Nu uma ese num God wokera nro
(Matyu 10.28-31)
4 Ka wu yirengkle nu kore nanrona,
“Ki kire mi alwone pone foli kinini nanrona,
pone fai pumpe nu uma empo fai nuꞌflo nale nro riline,
empo fika kingke nu ese fei nangke ompla wongke kore.
5 Ki ese kuku pone mana ese pone samo pumpe wu.
Pone ese samo pum God ro wu fai yuflo uma riline ka wu kelo fai yingkirpanroye uma panrone hel.
Mi alwone!
Ki kirepi pone,
pone ese samo pumpe wu.
6 Pone namale nanrona 5pla rora aure nu fai nenrune maket,
uma fai nuꞌpune romaula 2 toea nro.
Ka God fei fai wolyumaye wongke nunini.
7 Ka ilapara empo nene ila poneni namo sa God namale pu.
Nanrona fane pone fai pumpe,
pone sa pumalo rora aure mingklari.
Mone fai mum empo mone mire nanrona mone ese mupene Jisas
(Matyu 10.32-33; 12.23; 10.19-20)
8 “Ki kirepi pone,
mana empo yoplongkle nu pinuma nanrona wu waiye plau ki,
mana namo Auna empo Mana wu re ese yirengkle nu ensel empo God noula wunini.
9 Ka mana empo yirengkle nu pinuma nanrona wu sa fei foli mana kinini,
mana namo ki re ese kirengkle nu ensel empo God ki fei namale wu.
10 Ka uma empo fai ouwnirene Auna empo Mana,
sa God ese yuꞌpole ompla fafaile namo.
Ka uma empo fai ouwnirene Holi Spirit,
sa God ese fei yuꞌpole ompla fafaile namo.
11 “Empo nu numale pone paipi peli ungklamplen empo nu uma wamfafai empo mow koli ka nu uma wamfafai empo gapman ka nu uma wamfafai plai kore empo nuna noula wamo,
pone ese fei pum ka papu mi poneni ese pirengkle nu.
12 Empo fika Holi Spirit wone nro ese yukule pone mi fika pone ese poplo.”
Mi riri empo mana yuna ompla mingklari
13 Ka mana wongke empo yakle nu uma pinuma mingklari painrine namo yireni Jisas nanrona,
“Tikse,
yene yireni rani kinini sa wu ese yepi ommo empo aina konkaneni plol plainre.
Plola wongke wunini ka plola wongke kinini.”
14 Ka Jisas yireni wu kore nanrona,
“Ai!
Fina yire ki ese kaike yukaine mana fai kepi ke ompla yenyaneni?”
15 Ka wu yirengkle nu pinuma mingklari nanrona,
“Pone poo!
Pone fai nampalope ka puꞌpu ommo mingklari.
Pone puꞌpu ommo mingklari ka ommo namo ese fei yangke pone paipe uporo.”
16 Ka Jisas yirengkle nu mi riri wongke nanrona,
“Mana wongke empo yunali ommo ka romaula mingklari,
pike wunini namo sa ommo nemei uporo wamo.
17 Ka mana namo yire wone kore nanrona,
‘Ki ese kangke fika?
Ki koii rola onne fai ese kenru ommo namo ese nainene.’
18 “Ka wu yire nanrona,
‘Ki ese kangke nanrona,
ki ese keklire mow ki kone fai kenru ke ommo ka ki ese kerele mow wamfafai.
Ka ese resuklu ki ese kenru ommo uporo ringklene ommo empo fai nonene.
19 Ka ki ese kire kone kore nanrona,
“Ki kuna ommo uporo mingklari naine kikla mingklari.
Ki ese samo kaike koke ka kaikolkoke ka aikem ke kone kore.” ’
20 “Ka God yireni wu nanrona,
‘Yene mana fai wawiliye!
Eseme ningki yene ese ri ka ommo empo yene fai yunaliye ka yangke yene waiye uporo namo fina ese yuꞌpu?’
21 “Ommo namo ese nemei nu uma fai nunaline ommo mingklari fai ese nangke none samo naine uporo,
ka fei fai nali ommo ringklene none wolpuna plau paiyi God.”
Pone fa pumpe
(Matyu 6.25-33)
22 Ka Jisas yirengkle nu disaipol woneni nanrona,
“Nanrona fane ki kirepi pone,
pone fai wolpaulepe ommo fika pone ese po ka paipe laip,
ka ommo fika pone ese paile nale papli poneni.
23 Laip namo seke yukaine ommo empo fai none,
ka nale seke yukaine ommo papli empo fai nailene.
24 Pone pulu rora kotkot,
nu fei fai nokle ommo ka nuꞌpune ommo empo nengkle,
ka mow fai nenrune ommo empo fai none namo sa onne.
God fai yali nu ompla fai none.
Ka pone pinuma God fai wolayapaye pone wamo,
sa fei yukaine nu rora.
25 La empo pone wongke waiye ka wolyauleye ommo mingklari,
ommo namo ese fei nangke wu as waiye laipye kaire plai kore.
Ese onne!
26 La empo pone fei pangke ompla pitiri namo empo fikami ka pone kepe wolpaulepe ommo mingklari?
27 “Pone pulu alfa ula fai nerine nu fei fai nangke ompla wamo ka nu fei fai nalkune ommo papli noneni.
Ka ki kire mi alwone pone nanrona,
isi King Solomon fai yaile ommo papli uporo woneni,
ka kalab uporo empo alfa ula nu sa numalo amplapi ommo empo King Solomon.
28 Kiplela empole nerine mee ka ningkinama nu ese naulere ka ningkirpanro niꞌpi.
God fai yuluye kiplela pitpitiri namo ka saimoloye nu ommo papli empo nu nailene.
Ka pone uma empo punali bilip pitiri namo,
pone namale nanrona God fai samo yopaliye pone empo ommo papli pone pailepe.
29 Ka pone fai wolape ompla fika empo pone pire po ka ompla fika empo pone pire paikolpo.
Pone fai paipe ka wolape.
30 Nu pinuma mingklari empo pike mee sa fai wolane napune ommo namo.
Ka Aina poneni sa namale pu ommo namo,
pone ese pem ommo namo.
31 Nanrona fane pone pina God waiye yukaine king empo laip poneni.
Sa wu ese yape pone ommo namo.
Rokoi fai nemnokune ommo
(Matyu 6.19-21)
32 “Pone sipsip mokplainre,
pone fai pumpe,
empo fika Aina poneni yire pu wu woluporo ka wu yape pone kingdom woneni.
33 Pone penru ommo mingklari poneni sa nu uma ese nuꞌpu ka romaula empo pone puꞌpupe ommo namo sa pone ese pali nu uma empo ommo onne.
Pone ese puꞌpu ompoi empo romaula ese fei pepeli ka pone ese pempoku ommo upupu poneni empo naine heven,
ese fei pekini.
Ommo uporo empo pone pempokupe heven,
mana wongke ese fei pekiyem ka kurula ese fei naulere ommo namo.
34 Mokoi empo ommo uporo poneni naine namo,
sa wolapuna poneni re ese waiye mokoi namo.
Pone sa poo
(Matyu 24.42-44)
35 “Pone samo paile ommo papli plolam resuklu pone ese pangke ommo,
ka pesane lam ali naine ka pone ese samo paipe ka porupe nro.
36 Pone paipe porupe yukaine uma fai naine norune manawamo noneni,
ese yolowi kore empo wu paiyi kola wamo empo mana yem pin.
Ka empo wu yolowi mew raraku rama nu ese wampane nro nenrume rama wu.
37 Sa ese uporo wamo empo nu uma fai nangkene ommo naine norune manawamo noneni ese yolowi ka yulu nanrona nu nanai norune wu.
Ki kire mi alwone pone,
wu ese raile ommo papli empo nu uma fai nampolene ommo ka wu wone ese yirengkle nu ese naine tebol ka wu ese yale ompla nu no.c
38 La manawamo empo nu uma namo yolowi ningki wee empo rora ninalene ka wu yulu nanrona nu nanai norune wu,
sa ese uporo nu uma namo.
39 “Ka pone samo namale mi mee:
la empo mow ripile namale nanrona mana fai peki yuꞌpuye ommo wunini ese yolowi,
sa wu ese waiye yilpeleye nro fane mana namo ese fei yekli mow wunini.
40 Pone re sam paipe yilpelepe nro,
empo fika Auna empo Mana wu re ese yolowi empo pone fei wolape,
sa wu ese yolowi.”
Mi riri empo mana fai yangke ompla empo mana wongke
(Matyu 24.45-51)
41 Ka Pita yaline Jisas nanrona,
“Manwamo,
yene yire mi riri namo mu nro wee ringklene uma mingkla?”
42 Ka Manwamo yireni wu nanrona,
“Mana fai yuluye nu uma empo fai nangke ommo empo manawamo noneni,
ka wu fai yupene mi empo wu ka namale fai yangke ommo uporo,
manawamo woneni ese youw wu paiyi fai samo yepiyali ommo fai nu ese no.
43 Sa ese uporo wamo mana namo,
manawamo woneni yolowi ka yulu wu yangke ompla wunini uporo wamo.
44 Ki kire mi alwone pone nanrona mana namo manawamo wunini ese yireni wu paiyi risi ommo mingklari wunini.
45 La mana fai yangke ompla empo manawamo yire wone kore nanrona,
‘Mana wamo kinini ese paiyi ripkikli yeye ka wu ese fei wampane yolowi,’
nanrona fane wu waiye woye ka yaikolwoye ka folwoye ka yufloyekliye nu uma fai nane wu nangkene ompla namo.
46 Manawamo empo mana fai yangkeye ompla wunini ese yolowi,
ka wu ese fei namale nanrona wu ese yolowi.
Manawamo ese yaule wu ploplainre ka wu ese yina wu waiye plau nu uma fei fai bilipne.
47 “Mana fai yangke ommo empo manawamo namaleye ommo empo manawamo woneni fai yireniye,
la wu fei samo yangke ommo resuklu wolpuna wunini,
mana namo nu ese samo nufu wu.
48 Ka mana fai yangke ommo fei namale ommo fika yukaine manawamo woneni wolaye ka yangke ommo fafaile,
mana namo,
nu ese fei samo nufu wu.
Nu uma empo nuꞌpu ila uporo empo manawamo,
manawamo wone ese yirengkle nu mi kelo konsam nulune ommo mingklari empo wone.
La mana fina,
manawamo yane wu ila uporo mingklari,
mana namo nu ese nunali wu mi mingklari.
Jisas yolowi yangke nu pinuma ese fei nemnoku nai, nu ese ninan nai
(Matyu 10.34-36)
49 “Ki kolo fai ese kesane niꞌpi pike mele,
la empo niꞌpi isi yuꞌpo pu sa ese uporo.
50 Eni wongke yukaine baptaisd ki ese kem,
fane wola kinini fei uporo paiyi la eni namo pekini se.
51 Pone pire nanrona ki koloki pike mee fai ese kangke nu uma empo nemnoplene none kore ese pekini wee?
Ese onne!
Ki kire mi alwone pone,
ki koloki ese kauli nu pinuma ninanai none kerila.
52 Eseme ka paiyi uma 5pla fai nemnoku naine mow wokera ese ninannai none kerila.
Plainrikera ese naine none kerila ka plainrane ese naine none kerila.
Ka uma namo ese wolpun neni none kore.
53 Nu ese ninanai none kerila nanrona fane nangka ese wolpun neni auna ka auna wu re ese wolpun neni nangka.
Moka wu re ese wolpun neni nona ka nona wu re ese wolpun neni moka,
ka won ese nanrona nro moka ese wolpun neni walifle,
ka walifle wu re ese wolpun neni moka.”
Nu namale taim
(Matyu 16.2-3)
54 Ka Jisas yirengkle nu pinuma mingklari wamo nanrona,
“Empo pone fai pulu kupu yeri yuka kaire paloye,
ka wampane nro pone fai pire nanrona,
‘Riple ese yilo,’
ka riple yilo.
55 Ka empo pone pulu rapu pliriye sa moule yufu ese yolowi,
pone fai pire nanrona,
‘Mokoi ese woli,’
ka mokoi wolila.
56 Pone uma fai kalpirepe ka pone fei namale ommo empo pone poplope.
Ka pone samo namale ommo empo pike ka nemi.
Empo fika ka pone fei namale ommo empo nemeine taim naimele?
Yene yane mana empo kotim yene, yane poplo mi
(Matyu 5.25-26)
57 “Empo fika ka pone fei samo pulu rokoi uporo sa pone ese pupene?
58 Empo nanrona yene yane mana wongke empo yire kotim yene yane paipi kot,
ka empo yenyane paipipe rokoi,
yene as yangke yukaine yene folmana wunini kore.
La onnele,
wu ese yumane yene paiyi mana fai yupuye kot sa wu ese yawane yene paiyi nu kaplol uma ka nu ese nina yene pari kalabus.
59 Ki kirewi yene,
yene ese waiye kalabus paiyi la yene yali romaula yukaine empo nu nirewine yene namo se.”