Mana fei bilip wu ese ri
13
Empo kaire namo nu uma plai noloni naine ka nireni Jisas mi empo nu uma plai empo Galili naine ka nangke ofa pari God ka Pailat yuflo nu rili ka oli nunini fai okolpanrone riri empo ofa noneni.
2 Ka Jisas yalile nu nanrona,
“Pone wola rongkele nu uma empo riline namo,
nu nangke nale fafaile wamo fei yukaine nu uma empo Galili,
rokoi namo nro fane nu rili wee?
3 Ese onne!
Ki kire mi alwone pone.
La pone uma mingklari fei penmaire wolpuna ka pupone ommo fafaile empo pone fai pangkepe namo,
pone uma mingklari re ese rili yukaine nu.
4 Ka nu uma 18pla empo rili mow angklen empo Saloam yeliye Jerusalem pikali yuflo nu.
Ka pone pire nanrona ompla fafaile empo nu nangkene,
sa wamo fei yukaine uma mingklari naine Jerusalem wee?
5 Ki kire mi alwone pone nanrona,
ese onne.
La pone fei penmaire wolpuna ka pupone ommo fafaile empo pone fai pangkepe,
pone uma mingklari re ese rili nanrona.”
6 Ka wu yirengkle nu mi riri wongke nanrona,
“Mana wongke empo yoku ilo fik wongke yeli wain nengkle woneni,
ka wu paiyi yire ese yangklu nale wunini,
ka wu fei yulu ilo fik namo fei napale nale plai.
7 Nanrona fane wu yireni mana fai yopaneye wain nengkle nanrona,
‘Kikla plainrikera ki koloki ilo fik mee fai kire kangklu nale wunini,
ka ilo fik mee wongke fei yapa nale.
Nanrona fane yene yoko nro.
Ese fafaile empo ilo namo kalyeli ka yupapaki keem empo pike.’
8 “Ka mana fai yopaneye nengklele yireni nengkle ripile nanrona,
‘Manawamo,
ilo fik mee ese yeli kikla wongke kore se.
Ki ese kompo pike mamane nomu wunini ka kenru kau pon.
9 La kikla wongke kore wu yapale nale sa wu ese yeliye,
la onnele sa yene yoko wu pikali.’ ”
Jisas yemplekuru pin wongke kuma wunini kula kaire empo Sabat
10 Sabat wongke,
Jisas paiyi yoplo yukule nu uma monre mow koli empo nu Juda.
11 Ka pin wongke empo yakle nu uma naine namo,
opola fafaile fai yangkanaye wu.
Opola fafaile namo fai yangke wu yenriye resuklu 18pla kikla.
Wu fai waraiye kuma fingkiye nro ka wu fei fai samo yeliye.
12 Empo Jisas yulu wu,
wu youw wu yolowi ka yireni wu nanrona,
“Pin wo,
ki kuꞌpole pu eni empo yene fai yungkamye namo.”
13 Ka Jisas mew raune wu ka wampane nro kuma empo pin namo fai samo uporo kore ka wu samo yeli ka yereri noula empo God.
14 Ka mana fai paiyi risiye mow koli namo,
wu samo wolpun neni wamo ompla empo Jisas yangkeye empo kaire Sabat.
Ka wu yirengkle nu pinuma mingklari namo nanrona,
“6pla kaire moneni fai mangkeme ompla,
nanrona fane pone polopi ka wu ese yemplekuru pone pemei uporo kaire empo ompla namo.
Pone ese fei polopi wu yemplekuru pone pemei uporo kaire empo Sabat.”
15 Ka Manwamo fai yireni wu kore nanrona,
“Pone uma fai iflenilipe!
Mi poneni sa fei yukaine nale poneni.
Pone uma mingklari fai peingkolepe kapa empo bulmakau ka donki empo neli mow noneni ka pumale pakle paipi fai nu ese naikolno mii empo kaire empo Sabat.
16 Ka pin mee wu sa oli oikenra empo Abraham ka Satan isi yukalo wu waiye resuklu 18pla kikla fane ki ese fei kaule kapa wu empo ompla namo empo kaire Sabat?”
17 Empo wu yire mi namo,
uma fai wolpun nenine wu namo,
nu flemulu ka refale.
Ka pinuma mingklari woluporo wamo empo ommo uporo mingklari wamo wu yangkeye.
Mi riri empo yis ka ilo mastet nelale
(Matyu 13.31-32; Mak 4.30-32)
18 Ka Jisas yalile nanrona,
“Kingdom empo God wu sa yukaine ompla fika?
Mi riri rongkele sa ki ese kire?
19 Kingdom empo God wu sa yukaine ilo mastet nelale,
mana wongke yem ka yoku yeli nengklele woneni.
Ilo mastet nelale namo yeri wamo ka rora noloni ka neꞌre koli naine ili wunini.”
20 Ka Jisas fai yalile kore nanrona,
“Ka ki ese kire mi riri empo kingdom empo God rongkele?
21 Kingdom empo God wu sa yukaine yis,
pin wongke yuna ka yenmaire plau plawa ka plawa ese yeri wamo.”
Rama pitiri
(Matyu 7.13-14; 7.21-23)
22 Jisas paiyi rokoi empo taun wamo Jerusalem.
Wu paiyi taun mingklari ka nu mokoi pitpitiri ka yoplo yukuleye nu pinuma.
Wu yangke nanrona nro paiyiye rokoi ka paiyi plele Jerusalem.
23 Ka mana wongke yaline wu nanrona,
“Manwamo,
nu uma plai nro ese samo naine nanrona nanrona wee?”
Ka Jisas yirengkle nu nanrona,
24 “Pone as peli kelo ka pupenepe mi empo God sa pone ese papli rama pitiri.
Ki kire mi alwone pone nanrona,
uma mingklari nire panri rama pitiri namo,
ka nu ese fei panri monre.
25 Empo mow ripile yemei ka reꞌri rama namo,
pone ese peli moile ka parakupe rama pili ka pire nanrona,
‘Manwamo,
yene yenrume rama munini se.’
“Ka wu ese yirepi pone nanrona,
‘Ki kungkuno pone ka mokoi poneni.’
26 “Ka pone ese pireni wu nanrona,
‘Mu isi mawe yene mome ka maikomome ka yene isi yeli yukuleye mu empo rokoi munini.’
27 “Ka wu ese yirepi pone kore nanrona,
‘Ki kungkuno pone,
ka mokoi poneni.
Pone pimane ki,
pone uma fai pangke ommo fafaile.’
28 “Pone ese pulu Abraham ka Aisak ka Jekop ka profet mingklari ese naine kingdom empo God.
Ka pone sa ese pelipe moile pili ka nela pangkurupe nela poneni.
29 Nu uma ese noloni kairpaloye,
kairyeriye,
ka empo not ka saut ka ese nem koii fai naine monre empo kola wamo waiye kingdom empo God.
30 Nu uma plai empo fai naine wairu sa nu ese naine risi ka nu uma plai empo fai naine risi sa nu ese naine wairu.”
Jisas wolyaule Jerusalem
(Matyu 23.37-39)
31 Empo kaire namo,
nu Farisi plai noloni Jisas ka nireni wu nanrona,
“Yene ese yupone mokoi mee ka paiyi koii wongke,
empo fika Herot yire yufu yene ri.”
32 Ka Jisas yirengkle nu nanrona,
“Pone paipi ka pireni ampala namo nanrona,
‘Ki ese kuꞌpole opola fafaile ka kangke nu uma empo nenrinine ese nemei uporo eseme ka ningkinama ka ningki wongke,
ki ese kangke ompla kinini pekimo mokoi mee.’
33 Ki ese samo kangke ompla eseme ka ningkinama ka ningki wongke,
empo fika nu profet nu fei fai nuꞌflo nu riline mokoi wongke,
nu fai nuꞌflo nu riline Jerusalem nro.
34 “Jerusalem!
Jerusalem!
Yene fai yufloye nu profet riline ka yene fai roma yopleye ka yufloye nu uma empo God fai yawale nu nolonine yene.
Ningki kaire ki kina mew kinini fai kaukirike kongkom yeneni nemnoku naine yukaine rora moka fai klera yuforoye aure woneni.
Ka pone fei fai samo wola pire pupenepe ki!
35 Pulu!
Naimele mow poneni ese kalyeye.
Ki kire mi alwone pone,
pone ese fei pulu ki paiyi la pone ese pire nanrona,
‘God yangke uporo mana yolowi noula empo Manwamo.’ ”a