Mi riri empo mana yoku ompla aure nengkle
(Matyu 13.1-9; Luk 8.4-8)
4
Jisas yangke ommo woneni kore yukuleye nu pinuma piyowa empo fun wamo Galili.
Ka uma pinuma mingklari wamo noloni nemnoku mamane wu.
Nanrona fane wu yulpari waiye bota wongke yapa eklene fun maipon ka nu pinuma sa naine maipon.
2 Ka empo Jisas yukuleye nu,
wu yoplo mi riri mingklari empo mi woneni.
Ka wu yirengkle nu nanrona,
3 “Pone pupu!
Mana wongke paiyi yuflane wit nelale nengklele woneni.
4 Empo wu yuflane wit nelale nengklele woneni,
ka wit nelale plai sa firipanro naine rokoi ka rora noloni ka no pekimo kei.
5 Ka wit nelale namo plai sa firipanro koii roma mingklari wamo ka pike sa pitirinro.
Nanrona fane wit nelale namo wampane nemei.
6 Ka wit wela namo,
kinrela nunini fei samo panro pike ruwe.
Fane empo kaire yeli riri ka yekli wit namo ka wit namo rouwlini.
7 Ka wit nelale namo plai sa firipanro nainene koii empo kapa rin mingklari.
Ka kapa rin namo neri wamole ka nuforo wit namo fane wit fei nemei uporo ka fei napale nale.
8 Ka wit nelale namo plai sa firipanro pike uporo fane samo nemei wamfafai ka napale nelale mingklari.
Plai napale nale 30pla ka plai napale nale 60pla ka plai sa napale nale 100pla.”
9 Ka Jisas yoplongkle nu kore nanrona,
“Mana empo ripi plau sa ese yupu mi mee,
ka ese namale nomu empo mi riri namo.”
Nale empo Jisas fai yoploye mi riri
10 Empo nu uma pinuma mingklari namo nupone koii namo ka painri pekimo se,
nu 12pla disaipol fai nupene Jisas nakle nu uma plai sa nane Jisas naine plau,
nu naline wu ese yirengkle nomu empo mi riri mingklari namo.
11 Ka Jisas yimpone mi nunini nanrona,
“God yangke mi empo pekiyeye kingdom woneni namo sa empo yemei alele pone pu.
Ka uma plai fopi empo naine moile kingdom empo God,
nu ese nupu mi namo yukaine mi riri nro.
12 Nanrona fane
‘nu ese nulu ommo mingklari ki kangkeke,
ka nu ese fei samo resuklu namale ompla wongke.
Ka nu ese nupu mi mingklari kinini,
ka nu ese fei samo namale mi nomu.
Nanrona fane ki fai koplo mi riri nro fai nu ese fei nupone nale fafaile nunini namo,
ka God re ese fei yupole nale fafaile nunini.’ ”
Nomu empo mi riri empo mana yuflane wit nelale nengkle
(Matyu 13.18-23; Luk 8.11-15)
13 Ka Jisas yalile nu nanrona,
“Anro pone fei namale nomu empo mi riri namo wee?
Nanrona fane pone ese namale nomu empo mi riri mingklari rongkele?
14 Mana namo isi yuflane wit nelale namo,
sa yukaine wu yoku mi empo God.
15 Wit nelale empo firipanro rokoi namo,
sa yukaine nu uma fopi fai nem mi namo,
ka wampane nro Satan fai yolowi ka yisyoli mi isi God yoku waiye wolpuna nunini.
16 Ka nu pinuma plai namo sa yukaine wit nelale empo firipanro naine pike empo roma mingklari.
Nu fai nupu mi empo God ka wampane nem ka samo ainem.
17 Ka nu sa kinrela onne.
Nu fai asa neli paiyi ka rouwlini.
Empo uma nire numalo mi empo God nu nane eni nu pinuma namo ka nangke fafaile nu,
fane bilip nunini fai wampane firipanro.”
18 “Ka pinuma plai sa yukaine wit nelale empo firipanro iplele koii empo kapa rin.
Nu uma namo fai nupu mi empo God,
19 ka nu fai wolrufune ommo mingklari empo pike namo nu fai kalnanili none kore,
fai nire nuꞌpu romaula mingklari ka naine wamole,
ka re nu fai nampalone ommo wongkwongkeni.
Ommo namo fai yuforo mi empo God ka fei fai napale nale.
20 Nu pinuma plai sa yukaine wit nelale empo firipanro pike uporo.
Nu nupu mi empo God,
ka nem ka nuna ka napale nale.
Plai sa napale nale 30pla,
plai sa napale nale 60pla ka plai sa napale nale 100pla.”
Nu fei fai nem baket ka nufona lam
21 Ka Jisas yirengkle nu nanrona,
“Anro nu uma fai nem lam nuna noloni namo nu fai ninapouwe waiye pike mangkam wee aipela angklomoile?
Onne.
Nu fai neine yeli aipela riri.
22 Ompla fika empo peki yeye namo,
ese yeye alele.
Ompla fika empo samo peki yeye namo ese kingke samo yemei alele wamo.
23 Pone empo ripi uporo,
samo pupu mi mee ka namale nomu empo mi riri mee.”
24 Ka wu yirengkle nu kore nanrona,
“Pone samo ripi palana mi kinini.
Empo pone pupu mi mee,
pone samo puna kelo wolpuna poneni.
Kelo rongkele empo pone namale mi kinini namo,
wamo wee pitiri,
God ese yape kore pone ka ese yaunpalo plai kore.
25 Empo fika,
la empo mana wongke yunali ila uporo plai pu,
sa God ese yane wu ila uporo plai kore.
La empo mana fei yuna ila uporo,
sa God ese yuꞌpole ila uporo pitiri empo yeye wu namo.”
Mi riri empo ommo wela neli
26 Jisas yoplo kore nanrona,
“Kingdom empo God sa yukaine mana wongke empo yuflane ommo nelale pike.
27 Empo ningki mana namo fai wiye nama,
ka kaire wu fai paiyi yangke ommo woneni.
Ka ommo nelale namo neli ka wamo rongkele,
sa mana namo fei namale.
28 Pike wone fai yangke ommo nelale namo neli.
Emen sa,
wela fai neli,
se yenru para,
ka runola riri sa nale napale.
29 Ka empo wit nale rokerile se,
mana namo ese yem aimon woneni paiyi ka yaulere wit.
Empo fika,
kaire empo ommo nengkle sa resuklu pu mana ese yuꞌpu ka wo.”
Mi riri empo ilo mastet nelale
(Matyu 13.31-32; Luk 13.18-19)
30 Ka Jisas yoplo kore nanrona,
“Mone ese mire nanrona kingdom empo God sa yukaine ompla fika?
Mone ese mire mi riri wunini rongkele?
31 Kingdom empo God namo sa yukaine nelale wongke nu nouw ‘mastet’.
Wu sa ompla pitiri.
Nu fai noku wu palo pike,
32 ka wu yemei pari wamo ka rikepone ommo plai neli nengklele.
Wu sa ili wamo ka ese resuklu rora ese noloni ka naine ka nerele mow noneni ili empo yeye yawom.”
Jisas yoplo mi riri nro
(Matyu 13.34-35)
33 Empo Jisas yoplongkle nu pinuma namo,
wu yali nu mi riri mingklari paiyi resuklu wolpuna nu noneni empo ilwi ese nupu.
34 Ningki kaire wu fai yaliye nu mi,
wu fai yoplo mi riri nro.
Ka empo nu disaipol woneni nro nane wu naine,
sa wu fai yoplo mi nomu empo mi riri mingklari nu.
Jisas yire ka rapu yiwli
(Matyu 8.23-27; Luk 8.22-25)
35 Ningkipopli nama kurela empo kaire namo,
Jisas yirengkle nu disaipol woneni nanrona,
“Mone ese maule fun maimpi mampli repo.”
Jesus Calms the Storm (Mak 4:35-41)
36 Jisas sa nawaiyeye bot ka nu nupole nu pinuma nemnoku naine ka nu painri nulipanri bot ka nu nem wu nane painri.
Ka nu bot plai re nakle nu painri plau.
37 Ka rapu kelo wamo yemei ka yereryane fulu ka fulu oko pouwpalo imeli bot namo ka bot sa yire eniralo.
38 Ka Jisas sa wiye pilo wongke riri empo bot namo.
Ka nu disaipol woneni nouw wu yemei ka nu nireni wu nanrona,
“Tikse,
yene fei wolyaule mone wee?
Eklene bot moneni ese eniralo ka mone ese maikomo mii ka ri.”
39 Ka Jisas yemei ka yenre rapu ka yireni fulu wamo namo nanrona,
“Peisepu ka aflo wiye!”
Ka rapu yiwli ka fulu pekimo kei.
40 Ka wu yalile nu disaipol nanrona,
“Empo fikami ka pone ke pum?
Pone fai paipe plau ki ka pone fei wampane bilip wee?”
41 Nu sam num wamo ka noplo none kore nanrona,
“Mana namo wu sa fina,
ka rapu yane nupi nupu mi wunini?”