Mi riri empo mana yokle ommo nengklele
(Matyu 13.2-23; Mak 4.1-20)
8
Kingke ommo namo pekimo,
Jisas waraiye powpai taun ka mokoi yoploleye miuporo empo kingdom empo God,
ka nu 12pla uma fai nupenene wu nane naraine.
2 Ka pinmana plai fai nupene wu.
Nu pinmana namo,
isi Jisas yuꞌpoleye opola fafaile ka yemplekuruye nale empo nenrinine.
Wongke empo nu pinmana namo sa Maria nu fai nouwne wu Makdala pin.
Wu pin empo isi Jisas yuꞌpoleye 7pla opola fafaile empo nenene wu.
3 Ka Joana yane Susana ka uma pinmana mingklari plai re,
nupene Jisas.
Joana sa Kusa puli,
Kusa sa ilamana fai yuluye mow empo Herot.
Nu pinmana namo nu fai naline romaula ka ommo plai empo none fai mewmewne Jisas yakle nu disaipol woneni.
Jisas yire mi riri empo mana yingkipanroye wit nelale nengklele
(Matyu 13.1-9; Mak 4.1-9)
4 Ka pinuma mingklari wamo sa nolonine Jisas empo taun wokwokera.
Nu noloni niflipanro naine ka wu yirengkle nu mi riri nanrona,
5 “Mana wongke paiyi yokle ommo nengklele woneni ka yuflane ommo nelale.
Wu yuflane ommo nelale namo,
ka plai sa firipanro rokoi ka uma rew nunralo ka rora no pekimo.
6 Ka nelale plai empo firipanro pike empo roma plau,
nu neri,
ka rowlini,
pike namo sa mii onne.
7 Ka nelale plai empo firipanro iplele empo kapa rin plau.
Nu empo nemei nemwalinolo plau kapa rin fane kapa rin ke yuforo ka nu rowlini.
8 Ka nelale plai empo firipanro pike uporo,
sa neri uporo wamo ka napale nale mingklari wamo resuklu 100pla.”
Jisas na yoploye ompla namo,
ka pongkyale nu yire nanrona,
“Mana empo ripi plau,
sa ese samo yupu mi mee.”
9 Nu disaipol woneni naline wu nomu empo mi riri wone yirengkleye nu namo.
10 Ka wu yirengkle nu nanrona,
“God empo yukule pone pu ese namale ommo upor uporo empo pekinene kingdom empo God.
Ka,
ki kirengkle nu plai mi riri,a
empo fika,
‘Nu nulune,
ka nu ese fei nulu ompla wongke.
Nu nupu mi,
ka nu ese fei namale mi nomu.’b
Nomu empo mi riri empo mana yuflaneye wit nelale
(Matyu 13.18-23; Mak 4.13-20)
11 “Mi riri empo ki kirepi pone namo,
nomu wunini sa nanrona:
Ompla nelale namo,
wu sa mi empo God.
12 Nelale empo firipanro rokoi namo sa yukaine nu uma empo nupu mi empo God,
ka Opola fai yolowi ka yuꞌpole mi empo God empo yeye wolpuna nunini sa nu ese fei bilipim God,
ka God ese yuꞌpu nu kore.
13 Ka nelale empo firipanro pike empo roma plau,
sa nu uma empo nupune mi empo God ka wolpenine mi namo ka nemne.
Ka kinre nunini sa onnele,
bilip nunini yeye paiyi plele ompla empo yire yengkali yemei nu,
sa nu fai nupone bilip empo none.
14 Ka nelale empo firipanro pike empo kapa rin plau sa yukaine nu uma fai nupu mi empo God,
ka nu wolrufune ommo empo pike,
yukaine romaula ka ommo plai empo none wolane fai ese saimoyali none naine uporo,
ommo namo nangke bilip nunini fafaile.
Nanrona fane nu ese fei napa nale ka puno.
15 Ka,
nelale empo firipanro pike uporo sa yukaine nu pinuma empo naine wol wokera ka uporo.
Nu fai nupu mi empo God ka nuna kelo mi namo.
Empo ommo wongkwongkeni yire yemplekare nu,
nu fai neli kelone bilip ka napale nale.
Lam fai neine yeli aipela riri
16 “Uma fei fai nesane lam ka mangkam nufonralone,
ka nu fei fai nesane ka ninapowe yeliye aipela ruwe.
Sa onne!
Nu fai neine yeliye koii alele sa nu pinuma fopi empo neri monre ese nulu.
17 Ommo empo pone fei namale kingke pone ese namale,
ka ommo empo pekinene ka ommo empo nuforo naine namo sa ese kingke nemei alele.
18 Nanrona fane pone ese sam saimope empo pone pupupe mi,
yukaine mana empo namale mi plai pu,
mana namo God ese yane wu plai kore.
La mana ikaklo onne,
mana namo God ese yupapaki ikaklo wunini yukaine wu yire wone sa ikaklo plau.”
Jisas moka yakle Jisas inompi
(Matyu 12.46-50; Mak 3.31-35)
19 Jisas moka yakle Jisas inompi noloni nulu Jisas.
Nu noloni ka nu fei painri eklene Jisas,
empo fika,
nu uma mingklari wamo empo naukiri wu pu.
20 Ka uma plai nireni Jisas nanrona,
“Yene moka yakle yene inompi naneline moile nire nulu yene.”
21 Ka Jisas yirengkle nu nanrona,
“Ki ama ka ki inompiranimpi,
sa nu uma empo fai nupune mi empo God ka nupenene.”
Jisas yire ka rapu empo yemei wamo nupi namo kepe pekimo kei
(Matyu 8.23-27; Mak 4.36-41)
22 Kaire wongke Jisas yirengkle nu disaipol woneni nanrona,
“Mone maule fun maimampli repo.”
Nanrona fane nu nulipanri bot wongke ka painri.
23 Empo nu painrine Jisas wiye nama.
Empo wu wiye nama,
rapu pliri wamo ka fun yopu wamo flilene panri panro imelwa bot ka bot yire eniralo.
24 Nu disaipol nolone Jisas ka nireni wu nanrona,
“Manwamo,
Manwamo,
mone ese rili!”
Rongka wu yemei ka miyufona rapu yane nupi wamo empo nopune namo.
Ka nupi yane rapu yiwli ka nupi fai wile uporo kore.
25 Ka wu yalile nu nanrona,
“Bilip poneni sa waiye pei?”
Nu disaipol nemnum ka firineri ka nemnalile none kore nanrona,
“Empo wu yangke ommo namo,
mana naimele wu sa fina?
Wu yire mi kelo ka rapu re yane nupi kepe nupu mi wunini.”
Jisas yuꞌpole opola fafaile empo napalene mana wongke
(Matyu 8.28-34; Mak 5.1-20)
26 Nu painri repo empo fun wamo painri plele pike plola empo nu Gerasa.
Pike plola namo sa yeye repo empo fun Galili.
27 Jisas yupone bot ka paiyi pari pike,
ka mana wongke empo taun namo yolowi plele wu.
Opola fafaile fai nisinoline wu.
Empo isi wi plele mee mana namo fei fai yiperiye amplapi mamaneye wone.
Ka fei fai wiye waiye mow wongke.
Wu fai wiye waiye roma pulale,
koii empo fai niꞌline pinuma empo riline.
28 Mana namo yulu Jisas,
ka yangke mi ka firpalo eklene rew empo Jisas.
Ka yangklom mi kelo wamo yireni Jisas nanrona,
“Fikami ka yene yolowi plele ki,
Jisas,
yene Auna empo God Riri!
Ki kili wolkaule yene fai yake ki eni ka yangke ki nalpapli rerene.”
29 Wu yangklom nanrona,
empo fika,
Jisas empo yire mi kelo pu fai opola fafaile ese yupone mana namo.
Ningki ka kaire wokerwokera nro opola fafaile fai yisyoli wu fafaile wamo,
ka uma fai nuka wu sen rew ka mew ka samo naine nopanene wu.
Ka wu fai yekliyampleye sen namo ka opola fafaile yumaneye wu paiyi mokoi empo uma fei fai nainene.
30 Ka Jisas yaline wu nanrona,
“Yene noula fina?”
Ka wu yireni Jisas nanrona,
“Ki noula Ami.”
Empo fika nu opola fafaile mingklari isi ninalpoinrene wu.
31 Nu opola fafaile namo kepe nemnili wolnaule Jisas,
ese fei yawale nu painri panro pulale empo palo renro.
32 Empo mokoi namo,
poli mewlen mingklari wamo fai nonene ommo ka neline moul alwola.
Nanrona fane nu opola fafaile namo nemnili wolnaule Jisas empo Jisas yirengkle nu painri ninalpoinre poli namo,
ka wu yirengkle nu painri.
33 Ka nu opola fafaile namo nupone mana namo,
ka painri ninalpoinre poli namo ka poli nempliri painri panro moul alwola repo ka firipanro kei fun wamo,
ka nu naikolno mii ka rili kei.
34 Nu uma empo fai nopaline poli mewlen namo kepe nulu ompla namo nemei,
ka nu nemropu painri ka mi nufu ompla namo powpai taun ka mokoi empo naine mamanene.
35 Ka uma pinuma mingklari painri fai ese nulu ompla namo.
Nu noloni Jisas,
ka nulu mana empo opola fafaile nupone wu namo kepe yiperi amplapi ka yem ila uporo ka waiye eklene rew empo Jisas.
Nu pinuma nulu ompla namo ka nu num.
36 Nu pinuma empo isi nulu ompla namo noplongkle nu uma plai namo,
empo rongkele ka Jisas yemyangklupu opola fafaile ka mana namo yemei uporo kore.
37 Ka kingke nu pinuma empo taun Gerasa namo kepe naline Jisas empo wu ese as yupole nu ka paiyi,
empo fika nu nemnum wamo.
Nanrona fane Jisas paiyi pali bot ka paiyi kore.
38 Mana empo opola fafaile nuponene wu namo wili wolyaule Jisas fai wu ese yane painri,
ka Jisas yawane wu paiyi.
Ka wu yireni wu nanrona,
39 “Yene paiyi kore mokoi yeneni ka yoplongkle nu ommo wamo empo God yangkeye yene.”
Nanrona fane mana namo paiyi ka yoplongkle nu pinuma mingklari empo taun ommo fika wamo empo Jisas yangkeye wone.
Mela pin empo ri ka pin wongke empo yenriye
(Matyu 9.18-26; Mak 5.21-43)
40 Jisas paiyi kore fun repo namo,
ka uma pinuma mingklari ainem wu,
empo fika nu empo naine norune wu.
41 Ka mana wongke noula wunini Jairus empo yolowi ka firpalo Jisas rewyen ka wili wolyaule wamo Jisas fai ese yane wu painri mow woneni.
Jairus wu sa mana wongke empo nu uma fai nulune mow koli empo nu Juda mokoi namo.
42 Wu paiyi Jisas empo fika mela pin woneni wokera nro,
yire yangke ri kikla wunini sa 12pla.
Jisas paiyi mow empo Jairus,
ka uma pinuma mingklari wamo nupene wu nangke lese naukiri ungklawiin empo wu.
43 Pin wongke empo yakle nu painrine namo.
Wu fai yupraiye oli ningki kaire yeye nanrona paiyi plele 12pla kikla,
ka mana wongke fei yangke ompla namo yupone wu.c
44 Pin namo yolowi kumalpo empo Jisas ka mew yoku wu amplapi piyowa ka wampane nro oli wunini namo pekimo kei.
45 Ka Jisas ke yalile nu nanrona,
“Fina ke mew yoku ki?”
Ka nu mingklari nire,
“Mu onne.
Mu onne.”
Ka Pita kepe yireni wu nanrona,
“Manwamo,
uma pinuma mingklari nemnangkalo fane naraine nipanrinolo yene.”
46 Ka Jisas ke yirengkle nu nanrona,
“Mana wongke empo mew yoku ki,
ki namale nanrona kelo plai kinini nupone ki.”
47 Ka pin namo namale nanrona wu ese fei peki paiyi,
nanrona fane nale wunini folwo ka wu yolowi firpalo rew empo Jisas.
Pin namo mi yufu pinuma mingklari,
nomu empo wu mew yoku Jisas namo wola wu wampane uporo kore.
48 Ka Jisas ke yireni wu nanrona,
“Nona,
bilip yeneni namo empo yangke yene yemei uporo.
Yene paiyi plau woluporo.”
49 Jisas nawaiye yoploleye nu ka mana wongke empo yolowi mow empo Jairus ilamana empo mow koli,
ka yireni wu nanrona,
“Yene nona ri pu,
ka yene fai yangke tikse namo ese nalrangkowa.”
50 Ka,
Jisas kepe yupu mi namo ka wu yireni Jairus nanrona,
“Yene fai yumye,
bilip ro,
sa yene nona ese yemei uporo kore.”
51 Empo Jisas yolowi plele mow empo Jairus,
ka wu mi yaule nu pinuma ese fei nane wu panri monre.
Wu kon yireni Pita,
Jon,
Jems,
ka mokanangka empo mela nane wu panri monre.
52 Ka pinuma mingklari nemniline ka mew nuflone none wolpoku,
empo fika nu wolnaule wamo pin aula empo ri namo.
Ka Jisas yirengkle nu nanrona,
“Pone fai pilipe,
wu seke ri,
wu an nawiyeye fane.”
53 Nu samo nupo Jisas wamo empo fika nu empo namale nanrona wu empo ri pu.
54 Ka Jisas yuna mew empo mela pin ka yireni wu nanrona,
“Eiki mela,
yene yemei!”
55 Ka malma wunini yolowi kore ka wu wampane yemei wai.
Ka Jisas yirengkle nu nane ompla plai wu wo.
56 Ka mokanangka empo mela wolnipanri,
ka wu yali mi kelo wuyane,
wuyane ese fei noplongkle nu pinuma empo ompla namo.