Jisas yemplekuru mana empo fai yangkeye ommo empo kepten empo ami
(Matyu 8.5-13)
7
Jisas yoplongkle nu disaipol ka nu uma plai re nupu mi wunini pekimo,
rongka wu paiyi taun Kaperneam.
2 Kepten wongke empo 100 iimuma waiye,
ka wu yuna mana wongke empo fai yangkeye ommo woneni.
Wu fai yereri noula empo mana fai yangkeye ommo woneni wamo,
naime mana namo yenri ka yire yangke ri.
3 Kepten yupu mi empo Jisas yolowiye,
nanrona fane wu yawale nu ilamana empo nu Juda,
painri naline Jisas yolowi fai ese yemplekuru mana fai yangke ommo woneni.
4 Nu painri plele Jisas,
ka noplo mi yukaine nire nilinangkle wu nanrona,
“Kepten namo uporo ka yene as mewmew wu,
5 empo fika,
wu fai wolyane mone pinuma empo Juda ka yeꞌre mow koli munini.”
6 Nanrona fane Jisas yakle painri.
Wu paiyi eklene monre ka kepten yawale nu foli plai woneni painri nireni Jisas nanrona,
“Manawamo,
yene ke yolowi kei.
Ki seke mana uporo la yene yolowi yeri mow kinini.
7 Nanrona fane ki wola nanrona,
ki seke mana uporo,
ki nro ese kaiki yene.
Nanrona fane yene yire nro sa mana empo fai yangke ommo kinini ese uporo kore.
8 Ki re fai kaike mew wola empo mana risiye ki.
Ka ki re,
nu ami fai naine mew wola empo ki.
Ki kireni ami wongke nanrona,
‘Yene paiyi,’
ka wu paiyi.
Ki kireni wongke nanrona,
‘Yene yolowi,’
ka wu yolowi.
Ki kireni mana fai yangkeye ommo kinini namo nanrona,
‘Yene yangke ompla namo,’
ka wu yangke.”
9 Jisas yupu mi namo ka wu wolnipanri,
nanrona fane wu yensona yulu nu pinuma mingklari empo nupenene wone ka wu yirengkle nu nanrona,
“Ki kirepi pone,
ki fei kulu mana wongke empo Israel bilip wunini sa wamo nanrona.”
10 Kingke,
nu uma empo kepten yawale nu painri nireni Jisas namo noloni kore monre ka nulu mana fai yangkeye ommo empo kepten uporo kore pu.
Jisas yemplekuru mela efapu empo taun Nain yemei kore
11 Kingke se Jisas paiyi taun Nain,
ka nu disaipol woneni ka nu pinuma mingklari nane wu painri.
12 Wu paiyi eklene taun plerama,a
ka nu uma nongkole puꞌlo empo mana wongke empo ri nolo moile.
Mela namo wu sa mela wokera nro mokani.
Nangka wunini re isi ri pu ka moka nro sa waiye.
Ka pinuma mingklari wamo empo taun nane pin namo painri.
13 Manawamo yulu pin namo,
ka wu wolyaule ka yireni wu nanrona,
“Yene fai wiliye.”
14 Ka Jisas paiyi mew yaune ilkoli ka nu uma empo nongkolene ilkoli namo neli.
Ka Jisas yire nanrona,
“Mela efapu,
ki kirewi yene,
yene yemei!”
15 Mela empo ri namo,
yemei ka yoplo mi kore.
Ka Jisas yane wu paiyi kore wone moka.
16 Nu uma mingklari nulu ompla namo ka nu wola numnum ka nu nereri noula empo God.
Nu nire nanrona,
“Profet wamo wongke yemei mone pu.”
Ka nu nire kore nanrona,
“God yolowi pu ese saimolo nu uma woneni.”
17 Mi empo ompla Jisas yangkeye namo yopli powpale mokoi empo distrik Judia ka mokoi plai empo naine mairanene.
Jisas yane Jon empo Baptais
(Matyu 11.2-19)
18 Nu disaipol empo Jon Baptaisb noploni wu ommo mingklari namo,
ka wu youw disaipol plainrane nro noloni wu.
19 Ka wu yawane wuyane painri Manawamoka naline wu nanrona,
“Yene mana empo God yire ese yolowi wee,
mu ese moru mana wongke kore?”
20 Mana plainrane painri Jisas,
ka wuyane nireni wu nanrona,
“Jon Baptais yawane kikane molomi maline yene nanrona,
‘Yene mana empo God yire ese yolowi wee,
mu ese moru mana wongke kore?’ ”
21 Wuyane noloni Jisas,
ka Jisas sa yemplekuruye nu pinuma mingklari empo nenrinine,
nama wowole ka nu uma empo opola fafaile fai nisnoline nu,
nemei uporo kore.
22 Nanrona fane wu yireni mana plainrane empo nuna mi nolonine namo nanrona,
“Yenyane paipi kore ka pireni Jon ommo empo yenyane pulupe ka pupupe.
Ommo yukaine:
Uma nama wowole nulu kore,
ka nu uma empo rew rili naraine kore,
ka nu uma empo lepro nemei uporo ka namkile nama empo God,c
ka nu uma ripuku fai nupu mi kore,
ka nu uma empo rili fai nemei kore,
ka nu uma yaimalwo nupu miuporo empo God.d
23 Mana fina empo yupu mi kinini,
ka bilip wunini fei firpalo,
sa wu ese aiyem wamo.”
24 Mana plainrane empo nuna mi empo Jon noloni namo painri se,
sa Jisas yoplongkle nu pinuma mingklari ommo empo Jon,
“Pone paipi koii empo uma fei nainene namo pone pire pulu fika?
Pone pire paipi ese pulu aklala wokera empo yeliye ka rapu yenyuye wee?
25 Sa onne,
pone paipi pire pulu fika?
Pone paipi fai pulu mana raile ommo papli uporo,
wee?
Onnele.
Nu uma fai naile ommo papli uporo,
nu fai nuꞌpune romaula wamfafai,
nu uma namo fai naine mow empo king.
26 Naimele pone paipi pire pulu fika?
Pone paipi fai pulu profet wongke,
wee?
Yei!
Ka ki kirepi pone mi alwone,
mana namo rikepone nu profet plai.
27 Buk empo God yire mi empo wu nanrona,
‘Ki ese kawane mana yuna mi empo ki paiyi risi yene,
ka wu ese saimolo rokoi yeneni se sa yene kepe.’e
28 Ki kirepi pone nanrona,
pinuma empo mokapi nuꞌpune namo,
nu fei rikepone Jon.
Mana fina empo waiye pitiri nu uma plai kingdom empo God,
mana namo ese yumalo Jon.”
29 Uma pinuma naine namo ka nu uma empo fai nuꞌpu romaula empo gapman,
nu nupu mi ka nire nanrona ompla empo God yire yangke nu sa uporo wamo.
Nu noplo nanrona,
empo fika Jon baptaisim nu.
30 Nu Farisi ka nu uma fai samo namalene lo kuma nane ommo empo God yire yangkeye none,
empo fika nu fei painri nem baptais empo Jon.
31 Ka Jisas fai yire kore nanrona,
“Nu uma empo ewelme,
ki ese kire rongkele sa ese kukule nale noneni?
Nu sanro yukaine fika?
32 Nu sa yukaine kongkom empo naine maket ka neikene ka nouwne none plai ka nirengkle nu nanrona,
‘Mu mine nenra ese pone pofule
ka pone fei pofule,
mu meile rai empo uma riline,
ka pone fei pili.’
33 Jon Baptais empo yolowi ka waiye punale ka wu fei wo ka yaikowo wain,
ka pone pire nanrona,
‘Jon Baptais namo,
wu sa opola fafaile fai konraloye wu.’
34 Auna empo Mana yolowi ka wu wo ka yaikowo wain ka pone pire nanrona,
‘Pulu mana namo,
wu mana fai yaikowo mingklari ka woraileye.
Wu sa foli empo nu uma empo fai nuꞌpu romaula empo gapman ka ringklene nu uma empo nangke nale fafaile.’
35 Ka nu uma empo fai nupenene wolpuna empo God sa yukaine kongkom woneni,
nu nukule mone nanrona wolpuna wunini sa won alwone.”
Pin empo fai yangke nale fafaile yina sanda Jisas
36 Farisi wongke yaline Jisas ese yolowi ka wo ommo mow woneni.
Nanrona fane Jisas paiyi pari mow empo Farisi namo ka yane nai no.
37 Pin wongke fai yangke nale fafaile waiye taun namo.
Wu yupu mi nanrona Jisas paiyi wo ommo mow empo Farisi namo.
Nanrona fane pin namo yem botol sanda uporo empo nu nangke roma ka wu yem ka yuna yolowi.
38 Wu paiyi yeli Jisas kumalpo eklene wu rewyen ka wiliye ka nama kulu wunini pepler panro yangke Jisas rew rekle.
Wu wiliye ka yuna ila para woneni yasiloye Jisas rew,
ka yofkeneye Jisas rew ka yaiku sanda paloye Jisas rew.
39 Farisi isi yaline Jisas yolowi mow woneni,
wu yulu ompla namo ka wu wola yeni wone nro,
“La mana namo profet sa wu ese namale fina empo mew raune wone ka wu sa pin rongkele.
Wu ese namale nanrona wu pin fai yangke nale fafaile.
Nanrona fane profet wongke ese fei yuluye nro empo pin nanrona yangke nale namo wu.”
40 Ka Jisas yireni wu kore nanrona,
“Saimon,
ki kire kirewi yene ompla wongke.”
Ka Saimon yire nanrona,
“Tikse,
yene yire ki.”
41 Ka Jisas yireni wu nanrona,
“Mana plainre empo kalnuꞌpu romaula empo mana wongke,
mana namo fai kalyali romaula uma fai nangke bisnis.
Mana wongke,
romaula wunini sa yukaine 50pla fotnait ka mana wongke romaula wunini sa yukaine 5pla fotnait.
42 Wuyane napu rokoi empo romaula raraine ese nane wu kore.
Rongka mana namo wolpalo ka fei yem romaula wuyaneni kore.
Nanrona fane fina empo wuyane ese wolyane wu wamo?”
43 Ka Saimon yireni wu nanrona,
“Wola kinini sa mana fina empo yuna romaula wamo.”
Ka Jisas yire nanrona,
“Mi empo yene yireye namo sa resuklu.”
44 Ka wu yensona paiyi pin ka yireni Saimon nanrona,
“Yene yulu pin mee?
Ki keri mow yeneni,
ka yene fei yake ki mii ese kaklele rew kinini,
ka pin mee yaklele rew kinini nama kulu woneni ka wu yuna ila para woneni ka yasiye rew kinini.
45 Yene fei yofkene ki,
pin mee empo ki keri mow yeneni yolowi plele mee,
wu wona yofkeneye rew kinini.
46 Yene fei yem wel ka yaiku ikaklo kinini,
pin mee nro empo yem sanda ka yaiku rew kinini.
47 Nanrona fane ki kirewi yene nanrona,
pin wolayapa ki wamo,
empo fika ki kuꞌpole nale fafaile mingklari wunini.
Ka mana fina empo ki kuꞌpole ommo pitiri,
wu ese wolyane ki pitiri nro.”
48 Ka Jisas yireni pin nanrona,
“Ki kuꞌpole nale fafaile yeneni pu.”
49 Nu uma plai empo nane wu naine nonene namo,
noplole none kore nanrona,
“Wu sa mana fina la kepe yuꞌpole nale fafaile empo nu uma fai nangkene?”
50 Ka Jisas yireni pin namo nanrona,
“Bilip yeneni nro yangke wola God yem yene kore;
naimele yene paiyi plau woluporo.”