Jisas yire nale empo fai nangke ommo empo kaire Sabat, sa nenrape
(Matyu 12.1-14; Mak 2.23–3.6)
6
Kaire wongke empo Sabat,
Jisas yakle nu disaipol woneni painri wit nengkle iplele.
Ka nu disaipol nangklu wit nale ka mew nenelene papli ka none wit nale.
2 Ka nu plai empo Farisi kepe nalile nu nanrona,
“Fikami ka pone ke pangke ompla namo lo empo mone yire mone ese fei mangke ompla kaire empo Sabat?”a
3 Ka Jisas yirengkle nu nanrona,
“Empo Devit yakle nu uma empo nane wone naine namo nem ponriline.
4 Devit paiyi pali mow empo God ka wu yuꞌpu bret empo nu nane God.
Nu pris nro fai none bret namo,
ka wu sa wo kei.
Ka wu yali bret plai nu uma empo nane wone naine namo no.
Mi namo pone pulu pu,
ka pone fei wolrufupe,
wee?”
5 Ka Jisas yirengkle nu nanrona,
“Auna empo Mana wu sa waiye yukaine Manawamo empo kaire Sabat.”
6 Kingke Sabat wongke,
wu paiyi pali mow koli empo nu Juda ka yoplo yukuleye mi nu pinuma.
Ka mana wongke empo waiye namo mewmenrulpo wunini empo isi ri.
7 Nu Farisi nakle nu uma empo namalene lo napu rokoi nire fai ese nangkom mi palo Jisas.
Nanrona fane nu samo nulune wu empo kaire Sabat,
fai wu ese yemplekuru nu uma empo nenrinine wee onne.
8 Ka Jisas sa namale pu ommo empo nu wolrufune,
fane wu yireni mana empo mew ri namo nanrona,
“Yene yemei yeli ka uma mingklari mee ese nulu yene.”
Nanrona fane mana namo yemei ka yeli.
9 Ka Jisas yirengkle nu nanrona,
“Ki kalile pone,
empo kaire Sabat lo moneni yire mone ese mangke ommo uporo wee ommo fafaile?
Ese mone mewmew nu uma naine laip wee mone ese muflo nu rili kaire Sabat?”
10 Wu yulun ronsane uma mingklari namo,
ka wu yireni mana namo nanrona,
“Sukayane mew yeneni.”
Ka mana sukayane mew woneni ka mew wunini uporo kore.
11 Ka nu wolpun neni wamo ka niflipanro napu mi nu ese nangke ompla fika Jisas.
Jisas yuꞌpu nu 12pla aposel
(Matyu 10.1-4; Mak 3.13-19)
12 Kaire wongke,
Jisas paiyi pari waiye moul alwola wongke,
ka ningki wu waiye ka yesapuye God paiyi la moulpeplere kei.
13 Ningkinama nole wu youw nu disaipol fai nupenene wone ka wu yuꞌpu nu 12pla nro ka yali nu noula aposel:b
14 Saimon,
wu sa Jisas youw wu noula wongke Pita,
ka ino woneni Andru,
ka Jems,
Jon,
Filip,
Bartolomyu,
15 Matyu,
Tomas ka Jems wongke,
wu sa Alfius auna,
ka Saimon sa mana wongke empo nu uma Selot,c
16 ka Judas,
wu sa Jems auna,
ka Judas Iskariot.
Judas Iskariot namo wu ese yina Jisas paiyi mew empo nu uma nangke fafaile wu.
Jisas yemplekuru nu pinuma mingklari
(Matyu 4.24-25; Mak 3.7-12)
17 Jisas yakle nu disaipol panro painri neli koii ru.
Disaipol mingklari empo wu nemnoku naine koii namo.
Nu pinuma mingklari empo mokoi mokoi empo nu Juda ka taun wamo Jerusalem ka nu uma fai naine mokoi mingklari empo fulmaipon empo taun Tair ka Saidon,d
nu re noloni.
18 Nu noloni ese nupu mi empo Jisas ka wu ese yemplekuru nu empo nenrinine.
Ka nu uma empo opola fafaile fai nisnoline nu,
wu yangke nu nemei uporo kore.
19 Ka uma mingklari namo nengkali nire mew nina paiyi nuna Jisas,
empo fika,
kelo empo wu paiyi nu uma mingklari empo nenrinine ka nemei uporo.
Jisas yire uma yaimalwo ese woluporo
(Matyu 5.1-12)
20 Wu yulu nu disaipol woneni ka wu yirengkle nu nanrona:
“Pone uma yaimalwo,
pone ese woluporo wamo.
Kingdom empo God sa poneni.
21 Pone uma empo pemponrilipe,
pone ese woluporo wamo,
kingke pone ese po ka rengki.
Pone uma empo pilipe,
pone ese woluporo wamo,
kingke pone ese pupo.
22 Pone pinuma nu uma fai wolpun fafailene pone
ka numplewane pone ka nire mi fafaile pone
ka neklinumane noula poneni ka nire pone uma fafaile wamo,
empo fika,
pone fai pupenepe Auna empo Mana,
pone ese aiyem wamo.
23 “La nu uma nangke nale namo pone,
pone fai wolpaulepe.
Empo fika nu alma flili nunini isi fai nangkene nale namo paiyi nu profet.
Nanrona fane pone aiyem ka pulpulpapli empo fika,
kingke God ese yape pone ommo upupu wamo empo heven.
24 Ka pone pinuma empo punalipe ommo mingklari namo,
pone poo,
pone empo puꞌpu ommo pu ese yangke wolpuna poneni uporo.
25 Pone uma empo fai pope ka rengki namo,
pone poo,
kingke pone ese pemponrili.
Ka pone uma fai pupope namo,
pone poo,
empo fika pone ese wolpaule ka pempili wamo.
26 La empo nu uma nereri noula poneni,
pone poo,
empo fika isi nu alma flili nunini nereri noula empo nu profet fai kalnirene mi.
Yene samo wolyale nu iimuma yeneni
(Matyu 5.39-42)
27 “Ka ki kirepi pone uma fai pupupe mi empo ki mee,
pone ese samo wolpale nu iimuma poneni ka pangke nale uporo nu uma fai wolpun fafailene pone.
28 Ka nu uma fopi fai nemneisene pone,
pone ese samo paline Manawamo ese yangke uporo nu.
Ka pone ese pesapu God ese yemplekuru nu uma fai nangke fafailene pone.
29 La mana wongke yufu euw yeneni,
yene yenmaire ka wu yufu repo plau.
La mana wongke yem amplapi yeneni,
yene yuluye nro empo wu yem siot yeneni plau.
30 Yene yali ommo nu uma yukaine empo nu naline yene.
La mana wongke yem ommo yeneni,
yene fai yire wu yawe yene kore.
31 Nale empo pone pire fai nu uma ese nangke pone,
nale namo sa pone ese pangke nu se.
32 “La pone samo wolpalepe nu uma fai wolnape pone nro,
sa God ese ke blesim pone rongkele?
Nu uma fai nangke nale fafaile nu re fai wolnale nu uma fai wolnale none.
33 La pone pangke uporo nu uma fai nangke uporone pone nro,
sa God ese ke blesim pone rongkele?
Nu uma fai nangke nale fafaile nu re fai nangke nanrona.
34 La pone kalpali ommo paiyi nu uma empo pone pire nu ese nape kore pone,
sa God ese ke blesim pone rongkele?
Nu uma empo fai nangke nale fafaile,
nu re fai nali nu oikenra empo none ka nire nanrona nu ese nuꞌpu ommo kore.
35 Ka pone samo wolpale nu iimuma poneni,
ka samo pangke uporo uma,
ka pali ommo uma reprikere ka pone fai wolapire nanrona nu ese nape pone ompla wongke kore.
Ka ommo uporo God ese yangke pone sa wamo,
ka pone ese paipe yukaine kongkom empo God Riri.
Empo fika wu fai yangke uporoye nu uma fei fai nire mi uporo wu ka nu uma fai nangke nale fafaile.
36 Pone samo wolpalo nu uma yukaine Aina poneni fai wolpaloye nu.
Pone ese fei weikelpulupe nu uma plai plau wolpuna neni
(Matyu 7.1-5)
37 “Pone fai weikelpulupe nu uma plai plau wolpuna neni ka pire nu sa uma fafaile,
sa God re ese weikelyulu pone plau wolpuna neni.
Pone ese fei kalmipolope nu uma plai nanrona nu nangke nale fafaile pu fane nu ese nem eni.
La pone fei pangke nanrona,
sa God re ese fei kalmiyolo pone.
Pone samo puplen ompla fafaile empo nu uma ka God re ese yuplen ompla fafaile empo pone.
38 Pone pali ommo nu uma plai sa God re ese yape pone ommo.
God ese samo yepi yape pone ommo uporo yukaine mana empo raile ommo imeli,
ka wu ese samo raile ka yumalo panro ka yenyuye,
ka fai raile kore,
paiyi la ommo okolpanro,
ka yape pone.
Ompla rongkele pone pane,
pone ese pem resuklu ompla namo.”
39 Ka wu yirengkle nu mi riri nanrona,
“Empo mana namwowo yuna wongke empo namwowo ka wuyane painri rokoi,
ese uporo wee?
Onne,
wuyane ese firanpanro plau pulale.
40 Mana empo namaleye ompla ese fei rikepone mana empo yukuneye wu,
ka nu uma empo namale pu ese nemei yukaine mana empo yukuleye none.
41 “Fikami ka yene kepe yulu ulu pitiri waiye nama empo yene ringke mana ka yene fei namale ilo rola wamo waiye nama yeneni?
42 Ka empo yene namale ilo rola waiye nama yeneni,
ese rongkele sa yene ese yireni yene ringke mana,
‘Mela,
yene yolowi ka ki kangkome ulu waiye nama yeneni.’
Yene mana fai kalyireye,
emen yene yangkome ilo rola waiye nama yeneni se sa yene ese samo yulu ka yangkome ulu waiye nama empo yene ringke mana.
Ilo ka nale wunini
(Matyu 7.16-20; 12.33-35)
43 “Ilo uporo fei fai napale nale fafaile,
yukaine empo ilo fafaile re fei fai napale nale uporo.
44 Nu uma fai namalene ilo wokwokera ka nale nunini.
Nu uma fei fai painrine kapa rin ka nangklu ilo fik nelale,
ka ilo aure fafaile empo rin plau fei fai napale wain nelale.
45 Mana uporo re yunali ommo uporo naine wolpuna woneni,
nanrona fane wu yangke nale uporo nro.
Ka mana fafaile fai yangke ommo fafaile nro imelwa wolpuna woneni.
Ommo empo imelwa wolpuna woneni fane nolo reꞌfa woneni.
Nale plainre fai neꞌre mow
(Matyu 7.24-27)
46 “Empo fikami ka pone pouw ki nanrona,
‘Manawamo,
Manawamo,’
ka pone fei pupene mi kinini?
47 La mana wongke yire yolowi ki,
ka yupu mi kinini ka yupene,
sa ki ese koplo pone mana namo wu sa rongkele.
48 “Mana namo yangke yukaine mana wongke isi yeꞌre mow.
Wu yompo pike palo ruwe ka yeꞌre mow yeli roma riri.
Empo nupi yopu wamo yekli mow ka mow fei falwaka,
empo fika mow empo wu samo yeꞌre.
49 Ka mana wongke empo yupu mi kinini ka fei yupene,
wu ese yukaine mana empo fei yokle ilo panro pike ruwe.
Wu yeꞌre mow raune waiye pike riri nro.
Kingke nupi yopu kelo ka yekli mow,
ka wampanenro mow namo pikalpalo ka pikpikare kei.”