Jisas yemplekuru mana empo mew ka rew rili yemei uporo kore
(Matyu 9.1-8; Luk 5.17-26)
2
Kaire plai paiyi pekimo se,
sema Jisas yolowi kore taun Kaperneam.
Ka wampane nro nu pinuma nupu mi nanrona wu yolowi kore waiye mow.
2 Uma pinuma mingklari noloni nemnoku naine mow monre namo ka mow imeli wamo pinuma namo.
Ka mow monre namo yolowi plele rama namo imeli wamo.
Ka Jisas won yoplo mi empo God paiyi nu.
3 Ka 4pla uma nongkole mana wongke rew wunini rili noloni.
4 Pinuma mingklari imeli waingkemulu kei,
fane koii rola wongke fei yeye fai nu ese nongkole wu paiyi plele Jisas.
Nanrona fane nu nongkole wu panri mow riplala riri ka kaki pulale riri empo mow namo.
Ka nu kapa nukalo ilokoli empo mana wiye namo ka risinane wu palo Jisas ungklamyen.
5 Ka Jisas yulu nanrona nu samo bilip wamo fane wu yireni mana empo rew rili namo nanrona,
“Auna,
ki kuꞌpole pu nale fafaile yeneni.”
6 Ka plai empo nu tikse empo lo nakle nu naine namo,
ke nupu mi namo ka naine wolrufune wolpuna noneni nanrona,
7 “Empo fikami ka mana namo ke yoplo mi nanrona?
Anro wu yire yem koii empo God ka ouwyire wu.
Mana wongke ese fei yuꞌpole nale fafaile empo nu uma fai nangkene!
Sa onne,
God wokera nro fai yangke ommo namo.”
8 Wampane nro Jisas namale ompla fika empo yeye wolpuna empo nu uma namo ka wu yaline nu nanrona,
“Empo fikami ka pone ke pem wolpuna nanrona?
9 Mi uporo rongkele sa ki ese kireni mana namo?
‘Ki kuꞌpole nale fafaile yeneni,’
wee ki ese kireni,
‘Yene yemei ka yongkole ilokoli yeneni ka waraiye’?
10 Ka ki sa wola kire pone ese namale nanrona Auna Empo Mana sa yuna noula ka kelo ese waiye pike mee ka wu ese yuꞌpole nale fafaile empo nu pinuma.”
Ka wu yireni mana rew rili namo nanrona,
11 “Ki kirewi yene,
yemei ka yongkole ilokoli yeneni ka yene paiyi mow yeneni.”
12 Uma mingklari nulu wu yeli ka wampane wu yina mew palo ka yem ilokoli woneni ka yemei palo moile.
Ka pinuma mingklari wolnipanri wamo ka nu nereri noula empo God ka nu nire nanrona,
“Isi mu fei mulu ompla wongke nanrona.
Samo onne!”
Jisas youw Livai
(Matyu 9.9-13; Luk 5.27-32)
13 Ka Jisas paiyi kore piyowa empo fun Galili.
Ka uma mingklari wamo noloni wu ka wu won yoplo yukuleye nu mi empo God.
14 Ka empo wu waraiye paiyiye,
wu yulu Livai,
Alfius auna,
fai waiye mow takis.a
Ka Jisas yireni wu nanrona,
“Yene yolowi yupene ki.”
Ka Livai yemei ka yupene wu.
15 Kingke,
sa Jisas yakle nu disaipol wonenibpainri no ommo mow empo Livai.
Ka empo kaire namo re,
nu uma mingklari fai nuꞌpune romaula ka nu uma fai nangkene nale fafaile,
nakle naine none ommo plau.
Empo fika,
mingklari empo uma nanrona fai nupenene Jisas.
16 Ka nu tikse plai empo lo sa uma Farisi,
nulu Jisas ke yakle nu uma fai nem romaula ka nu uma fai nangkene nale fafaile namo none ommo ka nu nalile nu disaipol wunini nanrona,
Fikami ka wu ke yakle nu uma fai nuꞌpune romaula ka nu uma fai nangkene nale fafaile namo none ommo?
17 Empo Jisas yupu mi nunini namo,
wu yirengkle nu nanrona,
“Nu uma fei nenrinine namo,
fei fai painri nulune dokta.
Ka nu uma fai nenrinine nro sa fai painri nulune dokta.
Pone ese namale nanrona,
ki fei koloki ese kouw nu uma uporo empo fai nupenene nale uporo.
Sa onne.
Ki koloki fai kouw nu uma fai nangkene nale fafaile.”
Jisas yire nale fai neinangklune ommo fai none
(Matyu 9.14-17; Luk 5.33-39)
18 Empo kaire wongke,
nu disaipol empo Jon ka nu Farisi re neinangklu ommo fai none.
Ka uma plai noloni plele Jisas ka naline wu nanrona,
“Fikami ka nu disaipol empo Jon nakle nu disaipol empo nu Farisi namo neinangklu ommo fai none,
ka nu disaipol yeneni namo,
fei fai neinangklu ommo?”
19 Ka Jisas yoplo mi riri wongke nu nanrona,
“Empo nu nangke kola wamo empo mana ese yem pin,
nu uma woneni ese neinangklu ommo fai none wee onne?
Sam onne!
Empo mana namo na yakle nu naine,
sa nu ese fei neinangklu ommo fai none.
20 Ka kaire ese yolowi sa nu uma plai ese nem mana namo sa wu ese yupole nu uma woneni ka paiyi.
Sa taim namo nu ese neinangklu ommo fai none.
21 “Mana fei fai yem amplapi plola keklepe wongke ka yalku plau amplapi plola oiya empo pepeli namo.
Sa onne!
La empo wu yangke nanrona,
sa amplapi plola keklepe namo ese yengke oiya,
ka ese yangke amplapi oiya namo ese pepeli wamo.
22 Mana ese fei yairili wain keklepe palo meme papli oiya.
Sa onne!
La empo wu yangke nanrona,
empo wain keklepe popoku,
meme papli oiya namo ese yopli.
Ka wain namo ringklene wain papli ese fafaile.
Nanrona fane,
mana ese yairili wain keklepe palo meme papli keklepe.”
Mi empo kaire Sabat
(Matyu 12.1-8; Luk 6.1-5)
23 Empo Sabat wongke,
Jisas yakle nu disaipol woneni naraine iplele wit nengkle.
Ka nu disaipol woneni nangklu wit nale ka nenelene papli fai nu ese no.
24 Ka nu Farisi nireni Jisas nanrona,
“Yene yulu,
lo empo mu sa yire nanrona nu uma ese fei nangke ommo kaire empo Sabat.
Fina yirengkle nu disaipol yeneni ke nangke nanrona?”
25 Ka wu yirengkle nu nanrona,
“Anro pone fei pulu buk empo Devit wee?
Empo wu ommo fai nonene sa onnele fane nu uma fai nupene wu namo re ponrili.
26 Empo taim namo Abiatar waiye hetpris empo tempol.
Devit pari monre mow empo God,
ka wu woye bret empo nu nangke ofa pari God ka nenru nainene.
Bret namo nu pris ro ese no,
ka uma nale siwole sa onne.
Ka Devit sa wo kei,
ka nu uma woneni re wu yepi plai yali nu.”