Jisas yumale disaipol plainrikera
(Matyu 4.18-22; Mak 1.16-20)
5
Kaire wongke,
Jisas yeli piyowa empo fun Genesaret,a
uma pinuma mingklari noloni nemnangkalo mamane wu fai ese nupu mi empo God wu yoploye.
2 Wu yulu bot plainrane empo nu uma fai napulene firela,
empo nuplen napalene nupi piyowa ka neli naklelene net noneni.
3 Jisas paiyi yulpari bot empo Saimon ka yaline Saimon ese yine bot as paiyi yapa rila.
Rongka Jisas waiye bot ka yukule mi nu pinuma.
4 Wu yali nu mi pekimo rongka wu yireni Saimon nanrona,
“Yine bot paiyi nupi rila ka pone pingkipanro net poneni ka puꞌpu firela.”
5 Saimon yireni wu kore nanrona,
“Manwamo,
mu amparpunu ningki paiyi la moulpeplere kei ka mu fei mem firela wongke.
Souw empo yene yire pu fane ki ese kingkipanro net kore.”
6 Nu ningkipanro net nupi,
ka nuꞌpu firela mingklari wamo imelwa net ka net sa peplerene.
7 Nanrona fane nu mew nangkome none plai empo nainene bot wongke ese noloni ka mewmew.
Nu noloni ka nakle nengke firela neri riri paiyi la bot plainrane nire eniralo.
8 Saimon Pita yulu ompla namo,
ka wu angklenpalo waiye wolale empo Jisas ka yireni wu nanrona,
“Manwamo,
yupone ki ka paiyi,
ki mana fai kangke ommo fafaile.”
9 Empo fika wu yakle wone plai wolnipanri wamo empo nu nulu firela none nuꞌpune.
10 Mela mana plainrane empo Sebedi,
Jems ka Jon,
wuyane re wolnipanri.
Jems yane Jon wuyane fai nane Saimon napulene firela.
Ka Jisas yireni Saimon nanrona,
“Yene fai yumye.
Naimele ka paiyi,
yene ese yengke nu uma.”
11 Rongka nu nengke bot plainrane panri naine pike riri,
ka nupole ommo mingklari empo none ka nupene Jisas.
Jisas yemplekuru mana empo lepro uporo kore
(Matyu 8.2-4; Mak 1.40-44)
12 Jisas paiyi waiye taun wongke ka mana wongke yolowi wu.
Mana namo,
nalpapli wunini lepro samo yaulere.
Wu yulu Jisas,
ka wu fuful yokle pike kulpalo ka yaline Jisas nanrona,
“Manwamo,
empo yene yire yemplekuru ki,
yene yuna kelo ese yangke nalpapli kinini namkileb kore.”
13 Jisas mew paiyi yaune mana namo ka yireni wu nanrona,
“Ki kire,
yene namkile.”
Rongka wampane nro lepro empo mana namo pekimo.
14 Ka Jisas yane wu mi kelo nanrona,
“Yene ese fei yoploni mana wongke mi empo ompla namo.
Yene paiyi pris empo tempol ka yireni wu yuluno nalpapli yeneni,
ka yene yangke ofa ommo empo isi Moses yirewi yene ese yangke empo yene yemei uporoye.
Yangke ompla namo sa nu uma ese nulu ommo isi nemei yene.”
15 Rongka mi empo Jisas samo yopli wamo powpai.
Ka nu pinuma mingklari noloni fai nupu mi wunini ka ringklene wu ese yemplekuru nalpapli empo nenrinine sa nu ese nemei uporo kore.
16 Empo kaire plai Jisas fai yupoleye nu ka paiyi koii empo uma fei nainene ka yesapuye.
Jisas yemplekuru mana empo merew rili yemei uporo kore
(Matyu 9.2-8; Mak 2.3-12)
17 Kaire wongke,
Jisas warai yaliye mi nu pinuma,
nu Farisi ka nu uma empo namalene lo nainene mokoi namo.
Nu Farisi ka nu uma empo namalene lo empo noloni mokoi mingklari empo Jerusalem,
distrik Galili ka distrik Judia.
Kelo empo Manwamo yeye Jisas fai wu ese yemplekuru nu uma empo nenrinine.
Jesus Heals a Paralytic (Luk 5:17-26)
18 Ka nu uma plai nongkole mana wongke wiye ilkoli,
merew wunini rili pu,
ka nu nire fai nongkole wu painri panri monre nina wiye eklene Jisas.
19 Nu noloni ka nulu nanrona uma mingklari wamo fane nu fei nongkole wu panri Jisas,
wola nu nongkole wu panri mow riplala riri ka kaki pulale ka nina wu samo palo iplele wolale empo Jisas yeliye.
20 Jisas yulu bilip nunini ka wu yireni mana namo nanrona,
“Konmana,
ki kupole nale fafaile yeneni.”
21 Nu Farisi ka nu uma empo namalene loc kepe wola nanrona,
“Mana namo wu sanro fina ka yire yem koii empo God fane yire mi namo?
Mana wongke ese fei yuꞌpole nale fafaile.
Onnele.
God wokera nro ese yangke ompla namo.”
22 Jisas namale wolpuna empo nu pu fane wu yalile nu nanrona,
“Empo fikami ka pone kepe wola nanrona yeye wolpuna poneni?
23 Mi fika alele sa ki ese kire?
Ki ese kireni wu nanrona,
‘Ki kupole nale fafaile yeneni,’
wee ki ese kireni wu nanrona,
‘Yene yemei ka paiyi’?
24 Ki ese kukule pone ka pone ese namale nanrona,
Auna empo Mana sa kelo pike mee fai yuꞌpole nale fafaile.”
Ka wu yensona yulu mana empo merew rili ka yireni wu nanrona,
“Ki kirewi yene,
yemei ka yongkole ilkoli yeneni ka paiyi mow yeneni.”
25 Ka wampane nro mana namo yemei wolale empo nu uma ka yongkole ilkoli empo wone wiyeye namo ka wu yereri noula empo God ka wu paiyi mow woneni.
26 Uma empo nainene namo wolnipanri ka nu nereri noula empo God.
Nu wola numnum ka noplole none kore nanrona,
“Naimele mone mulu ompla wongkeni!”
Jisas youw Livai
(Matyu 9.9-13; Mak 2.14-17)
27 Ommo namo pekimo rongka Jisas yolo moile ka wu yulu mana wongke fai yuꞌpuye romaula empo gapman noula wunini Livai,d
waiye mow empo fai nuꞌpune romaula.
Ka Jisas yireni wu nanrona,
“Yupene ki.”
28 Livai yemei ka yupole ommo mingklari ka yupene wu.
29 Rongka Livai yangke kola wamo empo Jisasni mow woneni.
Uma mingklari fai nuꞌpune romaula empo gapman ka nu uma plai re naine plau ka nakle no.
30 Se nu Farisie nakle none plai empo namale lo wolpuna kile ka nalile nu disaipol empo Jisas nanrona,
“Fikami ka pone kepe pakle nu uma fai nuꞌpune romaula empo gapman ka uma fai nangkene nale fafaile po ka paikolpope plau?”
31 Ka Jisas yirengkle nu nanrona,
“Nu pinuma empo fei nenrinine fei fa painrine dokta.
Nu empo nenrinine nro,
sa wonwore fai painrine dokta.
32 Ki seke koloki fai kumale nu pinuma uporo nama empo God.
Ki koloki fai kumale nu uma empo fai nangkene nale fafaile ese nensona wolpuna.”
Nu naline Jisas mi empo fai neinangklune ommo fai none
(Matyu 9.14-17; Mak 2.18-22)
33 Ka nu uma plai nireni Jisas nanrona,
“Nu uma empo fai nupenene Jon ka nu uma fai nupelene nu Farisi kaire plai nu fai neinangklune ommo empo fai none ka nesapune nro.
Ka nu uma empo fai nupenene yene sa ke none ka naikolnone.”
34 Rongka Jisas yirengkle nu kore nanrona,
“La pone ese pangke nu uma empo mana ewele yem pin namo ese kalnaine punale,
empo wu yakle nu naine plau wee onne?
35 Kingke se,
nu ese numane mana empo ewelyem pin paiyi yupole nu uma woneni,
sa wonwore,
nu ese kalnaine punale.”
36 Ka Jisas yirengkle nu mi riri wongke.
“Nu uma fei fa naule amplapi plola pitiri wongke empo amplapi keklepe ka nalku plau oya.
Empo nu nangke nanrona amplapi keklepe ese pepeli,
ka plola pitiri ese fei yukaine oya namo.
37 Ompla wongke re,
mana wongke ese fei yaiku wain keklepe palo meme papli oya empo nalku fai nairiline mii.
Empo wu yangke nanrona,
sa rofo empo wain keklepe ese yopu ka yuu meme papli oya ese yopli ka wain ese okolpanro ka meme papli ese fafaile.
38 Nanrona fane wain keklepe namo,
nu ese naiku palo meme papli keklepe.f
39 Ka nu uma empo naikolnone wain oya nu ese numplewa wain keklepe,
empo fika nu namale pu fane nu ese nire nanrona,
‘Wain oya sa uporo.’ ”