Opola yengkali Jisas
(Matyu 4.1-11; Mak 1.12-13)
4
Holi Spirit konralo Jisas,
ka wu yupone nupi Jodan,
rongka Holi Spirit yumane wu paiyi koii maipon aupenro empo uma fei nainene.
2 Ka wu waiye koii maipon aupenro 40pla ningki ka 40pla kaire,
ka Opola yengkali wu.
Empo kaire namo,
Jisas fei wo ompla wongke,
fane wu ponrini wamo.
3 Wola Opola yireni wu nanrona,
“La yene God Auna,
sa yene yireni roma namo yenmaire yukaine bret sa yene wo.”
4 Ka Jisas fai yireni wu kore nanrona,
“Mi wiye buk empo God yire nanrona,
‘Ompla empo fai nonene namo nro ese fei yane laip mana.’ ”a
5 Ka Opola yumane wu pali riri ka faflai yukune wu kingdom mingklari empo pike.
6 Ka wu yireni Jisas nanrona,
“Ki ese kawe yene kelo fai yuluye kingdom mingklari namo,
ka yene ese yem noula wamo.
God yake ki kingdom mingklari namo pu,
fane ki ese kane fina empo ki kire kane.
7 Ommo mingklari namo ese yene yuꞌpu,
empo yene yekli fufula ki ka yosiyane ki.”
8 Ka Jisas yireni wu kore nanrona,
“Mi wiye buk empo God yire nanrona,
‘Yene ese yosiyane Manawamo,
God yeneni,
ka yangke ommo wunini nro.’ ”b
9 Opola yumane Jisas yane painri Jerusalem ka yirane wu yeli tempol riplala riri,
ka yireni wu nanrona,
“La yene God Auna,
sa yene yulpalo ruwe.
10 Yukaine mi wiye buk empo God yire nanrona,
‘God ese yirengkle nu ensel woneni
ese nopane ka nulune yene.
11 Nu ensel ese neire yene riryen nuna painri,
ka roma wongke ese fei yoku yene rew.’ ”c
12 Ka Jisas yireni wu nanrona,
“Mi wiye buk empo God yire nanrona:
‘Yene fai yengkaliye Manawamo,
God yeneni.’ ”d
13 Opola yengkali Jisas ompla mingklari pu,
wola wu yupone Jisas ka paiyi waiye yoru taim wongke se.
Nu uma empo taun Nasaret numplewa Jisas
(Matyu 4.12-17; Mak 1.14-15)
14 Holi Spirit kelyane Jisas,
ka wu paiyi kore distrik woneni Galili.
Mi empo Jisas yopli powpale mokoi empo naine eklene Galili.
15 Wu fai yali mi nu pinuma empo naine mow koli empo nu Juda,
ka pinuma mingklari nereri noula wunini wamo.
16 Jisas paiyi kore taun Nasaret,
mokoi empo wone yemei wamoye.
Ka kaire empo Sabate yolowi ka wu paiyi mow kolif empo nu Juda yukaine nale wone fai yangkeye.
Ka wu yemei yeli fai ese yoplongkle mi wiye buk empo God.
17 Nu nane wu buk empo profet Aisaia.
Wu yonrome paiyi ka wu yapu mi plola yire nanrona:
18 “Spirit empo Manawamo waiye ki,
empo fika,
wu yem ki pu,
ese kuna miuporo empo God kaiki kali nu pinuma empo ommo onne.
Wu yawane ki,
ese koplongkle nu uma empo naine kalabus ese nolo moile,
ka nu uma empo nama wowole ese nulu kore.
Wu yawane ki ese kemplekuru nu uma empo nungkam eni wamo empo nu uma plai ese painri nale engkem.
19 Ka wu yawane ki ese koplongkle miuporo nu uma nanrona,
moul uporo empo yolowi pu ka Manawamo ese saimolo nu uma woneni.”g
20 Jisas yoplongkle mi wiye buk pekimo,
se wu yufona ka yane mana fai yunaye,
ka wu paiyi wai.h
Nu uma empo naine mow koli empo nu Juda namo,
nama empo nu sa kilnulune wu nro.
21 Ka wu yirengkle nu nanrona,
“Ewelme,
mi empo ki koploke wiye buk empo God pone pupupe namo sa yemei alwone.”
22 Nu uma mingklari nereri noula wunini ka nu wola nipanri miuporo empo wu yoplongkleye nu.
Ka nu nemnalile none nanrona,
“Mana namo,
wu sa Josep auna.
Empo fikami ka wu yoplo mi nanrona?”
23 Ka Jisas yirengkle nu nanrona,
“Ki namale pu,
pone ese pire ki mi mee,
‘Dokta,
yene as yemplekuru nalpapli yeneni se.
Naimele yene ese yangke ompla moile yeneni yukaine mi isi mu mupu yene yangkeye taun Kaperneam.’ ” i
24 Ka wu yire nanrona,
“Ki kire mi alwone pone,
nu uma fei fai nupu mi empo profet wongke empo wu waraiye yoploye mokoi woneni.
25 Ki kire mi alwone pone nanrona,
empo isi profet Elaija,
nu pinmana ploli mingklari naine Israel inpi rili pu.
Empo taim namo,
riple fei yilo paiyi resuklu 3pla kikla ka 6pla kali.
Empo taim namo ompla empo fai nonene re samo onne ka uma empo mokoi mingklari namo samo nemponrili.
26 God fei yawane profet Elaija paiyi nu pinmana ploli mingklari empo isi inpi rili nupole namo.
Wu kon yawane profet Elaija paiyi pin wongke empo fei Juda,
isi ini ri yupone wu waiye mokoi Sarefatj eklene biktaun Saidon.
27 Ka taim empo profet Elisa,
nu uma empo leprok mingklari naine Israel,
ka wu fei yemplekuru nu ka yangke nu nemei uporo.
Wu kon yemplekuru mana wokera nro empo kantri Siria noula wunini Naman fai yangke nale wunini namkile kore.”
28 Empo uma mingklari naine mow koli nupu mi namo ka nu wolpun neni wamo.
29 Nu nemei nuna Jisas ka nengke wu palo moile empo taun.
Taun empo nu sa waiye alwola riri,
nu nengke wu paiyi piyowa empo moul alwola ka nu nire ningkapalo wu palo koiiai.
30 Ka wu yaulyane paiyi iplele empo nu uma mingklari ka paiyi kei.
Jisas yuꞌpole opola fafaile
31 Kingke se wu paiyi palo taun Kaperneam empo distrik Galili,
ka empo kaire Sabat wu fai yali mi nu pinuma.
32 Ka nu wolnipanri empo fika,
mi empo wu yali nu namo sa kelo.
33 Mana wongke empo yakle nu naine mow koli empo nu Juda namo,
opola fafaile konraloye wu.
Wu yangklom mi kelo wamo ka yire nanrona,
34 “Ai!
Jisas empo taun Nasaret,
yene yire yangke ompla fika mu?
Yene yolowi yire yisyoli mu,
wee?
Ki namale yene,
yene sa Mana Holi empo God.”
35 Jisas miyufona opola fafaile namo ka yireni wu nanrona,
“Mirulu!
Ka yimane wu!”
Ka opola fafaile yurome mana namo firpowe iplele empo nu uma ka yupone wu ka nalpapli wunini fei fafaile.
36 Uma mingklari namo wolnipanri ka nemnire none kore nanrona,
“Mi mee sa rongkele?
Wu sanro yuna noula wamo ka kelo,
nanrona fane wu fai yirengkleye nu opola fafaile ka nu fai nupu mi wunini ka nupone mana ka painri.”
37 Ka mi empo ompla wu yangkeye namo yopli powpale mokoi mingklari empo naine taun namo.
Jisas yangke nu pinuma mingklari nemei uporo
(Matyu 8.14-15; Mak 1.29-31)
38 Jisas yemei yupone mow koli,
rongka wu paiyi mow empo Saimon.
Saimon puli moka sa yenriye ka nalwoli wamo.
Nanrona fane nu painri naline Jisas ese yemplekuru wu.
39 Wu yeli eklene ka yire mi kelo nalwoli empo pin namo,
ka nalwoli yupone wu.
Ka pin empo yenriye namo faflai uporo ka wu yemei yampole ommo ka yali nu no.
40 Empo kaire paloye,
nu pinuma mingklari nakle none uma plai empo nenrini wongkwongkeni,
numale nakle noloni Jisas.
Wu mew rauneli nu wokerwokera ka yemplekuru nu nemei uporo.
41 Ka opola fafaile nupole nu uma mingklari nangke mi ka nire nanrona,
“Yene God Auna.”
Ka wu yenrele nu opola fafaile ka miyaulere nu ese fei nire mi plai kore.
Empo fika nu opola fafaile namo namale wu pu,
wu sa Krais.
42 Ningkinama nole Jisas paiyi koii wongke empo uma fei nainene.
Uma mingklari painri napu wu ka empo nu nulu wu,
nu nire minaule wu ese fei paiyi ka yupole nu.
43 Ka wu yirengkle nu nanrona,
“Nomu empo God yawane ki koloki mee,
sa nanrona ki ese koplo miuporo empo kingdom empo God paiyi taun plai re.”
44 Ka wu paiyi waraiye yoploleye mi mow koli empo nenene mokoi mingklari empo nu Juda.