2-3 Empo wu yupone bot ka yuflalpari ka yeli pike riri,

wampane nro mana wongke empo opola fafaile fai rereye wu yolowi ka wane Jisas.

Mana namo fai waiye roma pulale nu fai niꞌline uma rili.

Ka wu sa mana kelo wamo fane sen ka nu uma re fei fai nukaneirene wu.

4 Ningki kaire nu fai nemne sen ka nukalo mew rew wunini.

Ka wu fai yeklire sen namo.

Ka nu uma re fei resuklu samo nuna wu empo fika,

wu sa mana kelo wamo.

5 Empo ningki ka kaire,

wu fai waiye roma pulale nu fai niꞌnane uma rili namo.

Ka wu fai yangke mi fafaile wamo ka yem roma ka yaule yekli nale papli woneni.

6 Koii wu waiyeye namo sa as amone.

Ka empo wu yulu Jisas,

wu yempliri yolowi plele Jisas ka angklenpalo ka yekli fufula ungklama empo Jisas.

7 Ka wu yangke mi faki wamo ka yireni Jisas nanrona,

“Jisas,

yene Auna empo God Waiye Riri Wamo.

Yene yire yefele ki?

Yene ese yire uporo ki noula empo God nanrona yene ese fei resuklu yane eni wamo ki!”

8 Wu yangke mi nanrona empo fika,

isi Jisas yireni wu nanrona,

“Yene opola fafaile.

Yene yimane mana namo.”

9 Ka Jisas yaline opola fafaile namo nanrona,

“Yene noula fina?”

Ka opola fafaile namo ke yimpone mi wunini kore nanrona,

“Noula kinini Ami.

Empo fika,

mu sa mingklari wamo.”

10 Ka opola fafaile namo yire plau wolyaule kelo fai Jisas ese fei yuꞌpole nu painri kei ka nupone pike plola namo.

11 Moule alwola wongke yeli eklene mokoi namo.

Sa poli mingkla fai neli ka none ommo repo empo moul alwola namo.

12 Ka nu opola fafaile namo nire plau wolnaule kelo Jisas ka nireni wu nanrona,

“Yene ese yawale mu minalmoimpe poli namo.”

13 Ka Jisas yawale nu painri.

Ka opola fafaile nupone mana namo ka painri ninapoinre poli.

Ka poli wampane nempliri painri panro koii wongke fafaile.

Ka nu firipanro repo empo moul alwola ka firipanro fun rila,

ka nu naikol mii ka rili.

Namba empo poli mingklari namo sa resuklu 2,000.

14 Empo nu uma fai nopane poli nulu ommo namo nemei,

nu nempliri poinpainri ka noplo mi empo ompla namo paiyi taun ka mokoi mingklari empo koii namo.

Ka nu pinuma mingklari noloni plele koii namo ese nulu ompla namo.

15 Empo nu noloni plele mokoi Jisas waiye,

nu nulu mana namo,

isi opola fafaile mingklari namo fai konralone wu.

Naimele ila wunini pepelyane ka yiperi amplapi ka waiye.

Ka nu pinuma nulu ommo namo ka nu num.

16 Nu uma fopi empo nulu ompla Jisas yangkeye namo noplongkle nu pinuma plai empo ommo mingklari Jisas isi yemplekuru mana namo opola fafaile fai rereye wu.

Ka nu noplongkle nu ompla fika empo nemeine poli.

17 Empo uma mingklari namo nem mi namo,

nu nire mi kelo ese nawane Jisas ese yupone pike nunini ka paiyi mokoi wongke.

18 Nanrona fane empo Jisas paiyi yulpari waiye bot,

mana namo isi opola fafaile fai konraloye wu namo,

yire plau wolyaule Jisas ka yireni wu nanrona,

“Yene ese resuklu yem ki kaiki plau yene?”

19 Ka Jisas mi yaule wu ka yireni wu nanrona,

“Yene ese paiyi mow yeneni ka oli oikenra yeneni ka yirengkle nu ommo mingklari Manawamo isi wolpalo yene wamo ka mewmew yene.”

20 Wola,

mana namo paiyi ka waraiye yoploye ommo mingklari Jisas isi yemplekuru wu.

Wu waraiye yoplo mi namo mokoi mingklari empo distrik Dekapolis.^a

Ka pinuma fopi nupu mi wunini namo wolnipanri wamo.

21 Ka Jisas yulpari kore bot ka nu nempliri painri kore repo empo fun wamo Galili.

Ka empo kaire namo,

pinuma mingklari wamo noloni ka nemnoku mamane wu.

22 Ka ilamana wongke empo mow koli namo noula wunini sa Jairus yolowi plele nu koii namo.

Wu yulu Jisas ka wu yolowi angklenpalo ka yekli fufula eklene rew empo Jisas.

23 Ka wu yire plau wolyaule kelo wamo Jisas ka yire nanrona,

“Mela pin kinini yire ri.

Ki wolkaule nanrona yene ese yolowi ka mew raune wu ka wu ese uporo kore ka waiye laip.”

24 Nanrona fane,

Jairus yane Jisas painri.

Pinuma mingklari re nakle nu painri.

Ka empo taim namo nu mingkla wamole ka nu nemnoku ka nemnangkalo naraine reprepo wunini ka painri.

25 Ka empo taim namo,

pin wongke fina fai yulu kali wunini yenyapaye namo re waiye.

Ka sik namo isi waiye wu resuklu 12pla kikla.

26 Kikla mingklari wamo wu isi paiyi ka yulu dokta mingklari wongkwongkeni ka nu fei nemplekuru wu ka nu nane rerei wamo wu.

Ka wu yale nu romaula wamfafai ka romaula wunini samo pekimo kei.

Ka sik namo fei yupone wu ka fei asa uporo,

onnele.

Sik namo nawaiyeye wu ka paiyi fafaile kei.

27 Empo wu yupu mi nanrona Jisas yolowi ka yemplekuruye nu uma empo nenrinine,

wu yolowi ka paiyi iplele nu pinuma ka waraiye eklene Jisas kumalpo.

Ka empo wu waraiye paiyiye namo,

wu wampane paiyi Jisas kumalpo ka wu mew raune amplapi wunini.

28 Empo fika wu empo wola yeye wone pu nanrona,

“La empo ki mew kaune amplapi wunini nro,

sa ki ese uporo.”

29 Empo wu mew raune amplapi empo Jisas pekimo,

empo taim namo nro,

wu namale nanrona oli empo fai yeye nale wunini namo pekimo ka wu uporo kei.

30 Empo taim namo nro,

Jisas re yemplekare nale nanrona kelo plai wunini nolpanro nupone wu.

Nanrona fane wu yenmaire ka yalile nanrona,

“Fina mew raune amplapi kinini?”

31 Ka nu disaipol woneni nireni wu kore nanrona,

“Yene yulu pinuma seke pisiraula nemnangkalo painrine yene.

Empo fikami ka yene ke yaline mu nanrona,

‘Fina mew raune ki?’ ”

32 Ka Jisas pouwpai yapu pin fina namo isi mew yuna amplapi wunini.

33 Ka pin namo namale nanrona wu empo mew yuna amplapi empo Jisas ka sik wunini namo yupone wu.

Nanrona fane wu yum ka folwo plau ka yolowi firpalo wiye rew empo Jisas ka yoplo mi alele ompla empo wu yangkeye.

34 Ka Jisas yireni wu nanrona,

“Mela pin,

yene paiyi plau wolraulo.

Bilip yeneni nro yemplekuru yene pu ka yenri namo ese fei yolowi kore.”

35 Empo Jisas yoploye mi,

uma plai nuna mi wongke noloni mow empo Jairus.

Ka nu nireni Jairus nanrona,

“Mela pin yeneni ri pu.

Nanrona fane yene faa yane eni tikse.”

36 Ripi empo Jisas yupu mi nunini ka wu yireni Jairus nanrona,

“Yene faa yum.

Yene bilip nro.”

37 Jisas mi yaule nu uma plai ese fei nupene wu.

Wu yem Pita ka Jems yane ino wunini,

Jon nane wu painri.

38 Nu noloni eklene mow empo Jairus ka Jisas yulu nu pinuma namo nempliri poinre nelene ka re wu yupu nu nili ka nangke uku wamo.

39 Ka wu pai pari mow monre ka yirengkle nu nanrona,

“Pone pili rikaiklope ka mi pelipe ompla fika?

Mela namo fei ri,

wu wiye nama fane.”

40 Ka nu pinuma namo samo nupo wu wamo.

Nanrona fane wu yirengkle nu panro moile ka wu yem moka nangka empo pin aula namo ka Pita yane Jems ka Jon ka nu panri monre koii empo pin aula ri ka nina wiye namo.

41 Wu yuna mew empo mela pin aula namo ka yireni wu Juda mi nanrona,

“Talita kum.”

Nomu empo mi namo sa nanrona,

“Pin aula,

ki kire yene yemei.”

42 Ka wampane nro mela pin aula namo yemei ka waraiye paiyi.

(Mela pin aula namo,

kikla wunini sa 12pla kikla.)

Ka empo nu nulu ompla namo,

nu wolnipanri wamo.

43 Wola Jisas yire mi kelo nu nanrona,

“Pone faa pireni mana wongke mi empo ompla empo yemeiye namo.”

Ka wu yirengkle nu ese nane ommo plai fai none paiyi pin aula namo ka wu ese wo.