Jisas paiyi waiye mow empo Farisi wongke
14
Sabat wongke,
Jisas paiyi wo ompla mow empo ilamana wongke empo nu Farisi.
Empo Jisas paiyi waiye woye ompla mow namo,
nu Farisi konsamo nulu ommo mingklari empo wu yangkeye mow namo.
2 Ka empo kaire namo re,
mana wongke merew wunini popongko empo yolowi waiye eklene Jisas.
3 Ka Jisas yalile nu Farisi ka nu uma empo namalene lo namo nanrona,
“Ese uporo mone ese memplekuru nu uma empo nenrinine kaire empo Sabat wee onne?”
4 Ka nu fei nireni wu mi wongke.
Nanrona fane Jisas mew raune mana empo merew popongko namo,
ka yemplekuru wu ka yawane wu paiyi.
5 Ka wu fai yalile nu nanrona,
“La empo pone wongke auna woneni wee,
bulmakau woneni firanpalo mii pulale empo kaire empo Sabat,
sa wu ese waiye yuluye nro wee wampane nro wu ese paiyi ka yengke wu yeri riri?”
6 Ka nu fei nireni wu mi plol wongke.
Jisas yire nanrona mana yire waiye yukaile nu kongkom aure sa wu ese yumalo wone se
7 Empo wu yulu nanrona nu uma noloni nire no ompla painri naine sia empo nu uma alma neli risi,
ka wu yirengkle nu mi riri namo:
8 “Empo mana wongke youw pone paipi kola wamo empo pin yane mana nemnuꞌpune,
pone fai paipi ka paipe sia empo neline risi.
Empo fika,
la ripile empo kola wamo youw nu uma empo nuna noula wamo rikepone noula poneni,
nu ese naine sia namo.
9 La nanrona,
mana isi youw yenyane namo ese yolowi ka yirewi yene nanrona,
‘Yene yane sia namo paiyi mana mee.’
Ka yene ese flemulu ka paiyi waiye sia empo yeli kumalpo.
10 Nanrona fane empo nu nouw yene paiyi kola namo,
yene paiyi waiye kumalpo,
sa kola ripile namo ese yolowi,
wu ese yirewi yene nanrona,
‘Konmana,
yene yolowi waiye koii rola uporo mee.’
Wu yangke nanrona sa yene ese yem noula wamo nama empo nu uma mingklari empo nainene kola namo.
11 Nu uma empo nereri noula noneni sa God ese yumalo noula nunini panro.
La nu uma empo fei nereri noula noneni sa God ese yereri noula nunini pari wamo.”
Mone ese mangke uporo nu uma ese fei name ommo kore mone
12 Ka Jisas yireni mana isi youw wu paiyi mow wunini namo nanrona,
“Empo yene yire yangke kola wamo wongke,
yene fai youw nu uma foli yeneni,
ka inomranimpi yeneni ka nu plai oli oikenra yeneni ka nu uma empo nunali romaula mingklari wamo empo nawe yene naine.
La yene yangke nanrona,
nu re ese nouw yene paiyi wo ompla mow nunini.
13 La empo yene yire yangke kola wamo,
yene ese youw nu uma empo ompla onne namo,
ka nu uma empo mew ka rew fafaile ka nu uma empo rew rili ka nu uma empo nama wowole namo.
14 Nu uma namo ese fei nangke ompla ka nawe yene kore.
Nanrona fane yene ese woluporo,
empo fika kingke God ese yawe yene ompla kore taim nu uma uporo isi rili ese nemei kore.”
Mi riri empo kola wamo
(Matyu 22.1-10)
15 Empo nu uma empo nane Jisas naine none namo wongke nunini yupu mi empo Jisas yireye namo,
ka wu yireni Jisas nanrona,
“Nu pinuma fopi naine ka none ompla empo kingdom empo God,
nu ese woluporo,
empo fika,
God empo saimoyali nu.”
16 Ka Jisas yireni wu nanrona,
“Mana wongke yire yangke kola wamo,
wu youw nu uma mingklari ese noloni ka no ommo namo.
17 Empo wu yire yangke kola wamo namo,
wu yawane mana fai yangke ommo wunini paiyi yirengkle nu uma empo wu wone isi yirengkle nu.
Ka mana fai yangke ommo wunini yirengkle nu nanrona,
‘Pone polopi,
po ommo mu mampole pu.’
18 “Ka uma mingklari empo wu youw nu namo,
nire wolnaule wu nanrona nu empo nangke ommo mingklari noneni yukalo nu merew fane nu ese fei painri kola namo.
Mana wongke sa yire nanrona,
‘Ki kem pike rola wongke empoleme fane la ki ese kaiki kulu se.
Nanrona fane ki ese fei koloki.’
19 “Mana wongke wu re yire nanrona,
‘Empoleme ki kem 10pla bulmakau ese nangke ompla fane ki ese kaiki sam kulu ompla empo nu nangkene.
Nanrona fane ki ese fei koloki.’
20 “Ka mana wongke wu re yire nanrona,
‘Empoleme kikane memmuꞌpume,
nanrona fane ki ese fei koloki.’
21 “Mana fai yangke ommo empo kola yolowi kore ka yireni kola ripile mi mee.
Kola ripile samo wolpuna neni wamo ka wu fai yawane mana empo fai yangke ommo woneni ka yireni wu nanrona,
‘Eseme yene paiyi,
rokoi pitpitiri ka rokoi wamfafai mingklari empo taun namo ka yumale nu uma empo ommo onne,
ka nu uma empo merew rerinro ka rew nunini rili ka nu uma empo nama wowole ka yene yumale nu noloni mow kinini.’
22 “Ka mana fai yangke ommo woneni yireni wu nanrona,
‘Manwamo,
ompla yene yireye namo,
ki kangke pu,
ka mow yeneni fei imeli onne.’
23 “Ka manawamo woneni yireni mana fai yangkeye ommo nanrona,
‘Yene yupone taun mee ka palo paiyi rokoi nole ka nengkle piyowa ka yemyoku nu pinuma,
yene ese yire mi kelo nu noloni sa mow kinini ese samo imeli sa nu ese no ompla wamo mee.
24 Empo fika ki kire mi alwone pone,
wongke empo nu uma isi ki kouw namo,
ese fei wo ompla plola empo kola wamo kinini.’ ”
Mana yire waiye yukaine disaipol wu ese yangke ommo naimele
(Matyu 10.37-38)
25 Nu uma pinuma mingklari wamo nane Jisas painri ka Jisas fai yenmaire ka wu yirengkle nu nanrona:
26 “Mana empo yolowi ki sa ese samo wolyapa ki nro ka ese fei wolyapa moka nangka woneni,
uma woneni yukaine pinkongkom woneni ka nu inomranimpi ka pinofe woneni ka empo laip woneni.
La onne,
sa wu ese fei waiye yukaine disaipol kinini.
27 La mana fei yongkole ilo kruse woneni ka yupene ki,
wu ese fei waiye disaipol kinini.a
28 “La empo pone wongke yire yeꞌre mow angklen wongke empo nu uma ese naine ka nopaline ommo woneni,
mana namo ese waiye ka wu ese namale romaula rongkele sa resuklu wu ese yeꞌre mow namo samo pekimo.
29 La wu ese yokle mow ilo nro ka wu ese fei yeꞌre mow namo pekimo,
uma mingkla ese nulu mow namo ka nu ese neklinuma wu.
30 Nu ese nokomi nire wu nanrona,
‘Mana namo yeꞌre mow,
ka wu fei yeꞌre mow pekimo.’
31 “La empo king wongke yem mi nanrona king wongke ese yane wuyane nopu,
wu ese waiye ka yapu rokoi rongkele wu ese yumale 10 tausen iimuma woneni ese painri nakle 20 tausen iimuma empo kingb wongke nopu.
32 La empo wu namale nanrona wu ese fei yopu,
sa wu ese yawale nu uma painri king wongke namo empo wu nayeye amone sa nu ese niflipanro noplo mi nu ese fei nopu.
33 Ka won ese nanrona nro,
la pone fei kuma pane ommo mingklari poneni,
sa pone ese fei paipe yukaine disaipol kinini.
Jisas yire mi riri empo sol yupone kile wunini
(Matyu 5.13; Mak 9.50)
34 “Sol wu sa ompla uporo,
la kile wunini pekini,
sa mone ese mangke kile wunini yolowi kore rongkele?
35 Solc nanrona sa mone ese fei menmaire plau bulmakau pon ka menru pike sa ompla ese neri,
nanrona fane mone ese mingkirpanro.
“Mana empo ripi plau sa samo yupu mi mee.”