9
Ka Jisas yirengkle nu kore nanrona,
“Ki kire mi alwone pone,
plai empo pone pelipe naimele pone ese paipe laip ka pone ese pulu kingdom empo God ese yolowi plau kelo wamo woneni se sema pone ese ripile.”
Nale empo Jisas yemei wongkeni
(Luk 9.28-36; Matyu 17.1-13)
2 6pla kaire paiyi pekimo se sema Jisas yumane Pita,
Jems ka Jon painri panri moul alwola ka painri naine none kerila.
Ka empo nu naine,
nu nulu nalpapli empo Jisas namo sa won yensona ka yemei wongkeni.
3 Ka amplapi wunini namo wouwyane kei ka rengkine yople nama nunini.
Mana wongke empo pike mee sa fei resuklu yaklele amplapi ese samo wouw nanrona,
onne.
4 Ka nu nulu Elaija yane Moses neli ka Jisas yane wuyane noplone.
5 Pita yulu namo ka wu yireni Jisas nanrona,
“Tikse,
uporo wamo empo mu plainrikera mawe yene molomi mee.
Mone ese meꞌre mouw sel plainrikera poneni.
Wongke yeneni,
ka wongke Mosesni ka wongke empo Elaija.”
6 Uma plainrikera empo nane Jisas painri namo ke num,
nanrona fane Pita sa wampane yingkapalomi namo.
7 Empo taim namo,
kupu wongke yemei ka samo mamane kei nu,
ka nu nupu mi wongke empo kupu namo yire nanrona,
“Mana namo,
sa Auna kinini!
Ka ki wolkane wu wamo.
Pone ese pupene mi wunini.”
8 Ka wampane nro,
Elaija yane Moses kalpeki painri ka uma plainrikera empo nane Jisas painri namo ke napu wuyane ka nu fei nulu wuyane.
Nu nulu Jisas nro sa yakle nu naine.
9 Empo nu won nolo kore moul alwola,
Jisas yali mi kelo nu ese fei noplo nanrona,
“Ompla pone pulu namo,
pone faa pireni mana wongke resuklu empo Auna empo Mana ese ri ka wu ese yemei kore.”
10 Nu nuna kelo mi wunini ka wola mingklari mi namo.
Ka nu won niflipanro noplomi iplele none kore ka won napu mi nomu namo “mana ese ri ka yemei kore” sa yire mi fika.
11 Ka nu naline Jisas nanrona,
“Fikami ka nu tikse empo lo fai nire nanrona Elaija ese yolowi se sema Krais ese yolowi?”
12 Ka Jisas yimpone mi nunini nanrona,
“Mi namo sa won alwone:
Elaija empo yolowi risi Krais wola naimele wona yemplekuruye kore ommo.
Ka fikami ka mi nile Buk empo God sa yire nanrona Auna empo Mana ese yungkam eni mingklari ka uma ese rofo nefu wu.”
13 Ka ki kire mi alwone pone nanrona,
“Elaijaa sa yolowi pu,
ka uma isi nangke fafaile wu wamo empo wola noneni,
sa yupene mi nile buk empo God.”
Jisas yuꞌpole opola fafaile empo yangkana mela mana wongke
(Matyu 16.14-19,22-23; Luk 9.37-45)
14 Empo Jisas yane Pita ka Jems ka Jon noloni plele nu disaipol plai namo,
nu nulu pinuma mingklari wamo ke mamane nu ka nu tikse empo lo namo won nopu mi nakle nu disaipol plai.
Jesus Heals a Boy with an Unclean Spirit (Mak 9:14-29)
15 Ka empo nu pinuma nulu Jisas namo,
nu samo ainem wamo ka nempliri painri nulu wu.
16 Ka Jisas yalile disaipol woneni namo nanrona,
“Pone ke pakle nu popu mi empo ompla fika?”
17 Mana wongke yeli iplele nu pinuma namo youw Jisas ka yireni wu nanrona,
“Tikse,
mela auna kinini,
opola fafaile fai waiye wu ka yakuru wu fei yoplo mi.
Nanrona fane ki kem wu yolowi yene.
18 Empo opola fafaile namo fai konraloye wu,
wu fai yingkapalo wone palo pike ka fai yangke wu yangkuru nela woneni ka rofo wouw fai ni nolone reꞌfa wunini ka papli wunini kempilkiklire ka kelo wamo.
Isi ki kali nu disaipol yeneni ese nuꞌpole opola fafaile namo,
ka nu fei resuklu nangke.”
19 Ka Jisas yirengkle nu nanrona,
“Pone uma empo pike naimele,
sa bilip onnele!
Kaire rongkele kore ese ki kaike plau pone?
Seke kaire mingkla ese ki kakle pone maime ka kungkam eni poneni.
Ommo mingklari ki kangke paiyi pone pu la ki ese kangke fika kore pone?
Pone puna mela aula namo polopi mee.”
20 Nanrona fane nu nuna mela efapu namo noloni wu.
Ka empo opola fafaile namo yulu Jisas,
wampane nro wu yinapouwe mela namo ka yurome wu firpalo pike ka folwo wamo rikaklaye wiye pike,
ka rofo wouw re imeli reꞌfa wunini.
21 Ka Jisas yaline aina empo auna namo nanrona,
“Ompla namo sa isi yem wu wee ewele mee nro?”
Ka aina empo mela namo yimpone nanrona,
“Ompla namo yemei wu empo wu wone aukom ka yolowi.
22 Ningki kaire mingklari,
opola fafaile fai yire yingkapalo wu palo niꞌpi ka yire yumalo wu palo mii ka ri.
La yene resuklu ese yangke ompla wongke,
yene ese samo wolyaule mu ka mewmew mu.”
23 Ka Jisas yimpone mi wunini nanrona,
“Fikami ka yene yire mi nanrona ‘La yene resuklu’?
Ommo mingklari resuklu nemei empo mana fina bilip.”
24 Aina empo mela aula namo wampane youw ka yireni Jisas nanrona,
“Ki kuna bilip,
ka fei samo wamo.
Yene ese mewmew ki ese yangke bilip kinini yemei wamo.”
25 Empo Jisas yulu uma mingklari wamo won nempliri noloni koii namo ka wu yenre opola fafaile namo ka yire mi kelo wu nanrona,
“Yene opola fai yangke nu uma ripi uku ka mireꞌfa kungku.
Naimele yene yolo moile wu ka paiyi kei ka fei yolowi wu kore.”
26 Ka opola fafaile namo yangke mela namo ke yangke mi kelo fafaile wamo,
ka wu yangke wu sukalo rinra wunini ka kingke wu yupone mela namo ka paiyi kei.
Ka mela namo yukaine wu ri pu.
Ka uma mingklari nulu wu ka nire nanrona,
“Mela mee sa ri pu.”
27 Ka Jisas yina mew palo ka yuna mew wunini ese yereri wu yeli ka mela aukom yemei ka yeli.
28 Kingke Jisas paiyi monre ka nu disaipol woneni nro sa nane wu naine ka nu naline wu nanrona,
“Fikami ka mu fei resuklu muꞌpole opola fafaile namo?”
29 Ka wu yimpone mi nunini nanrona,
“Yene ese yesapu se sa yene ese yuꞌpole opola fafaile yukaine nanrona.
La onne,
sa ese onne.”
Jisas yoplo mi wu ese ri ka yemei kore
30 Jisas yakle nu disaipol woneni nemei ka nupone mokoi namo ka painri distrik Galili.
Ka Jisas fei wola yire fai nu uma ese namale nu sa naine pei,
31 empo fika wu wona yoplo yukuleye nu disaipol woneni.
Wu yirengkle nu nanrona,
“Auna empo Mana namo,
nu ese nane wu paiyi mew empo nu uma ese nufu wu ri.
Ka empo nu nufu wu ri,
ka empo kaire plainrikera wu ese yemei kore.”
32 Ka nu fei samo namale mi nomu empo wu yireye namo fane nu ke num fei naline wu mi plai.
Fina ese waiye risi
(Matyu 18.1-5; Luk 9.46-48)
33 Jisas yakle nu disaipol woneni namo painri taun Kaperneam.
Nu painri monre ka naine mow wongke ka Jisas yalile nu disaipol woneni nanrona,
“Empo mone maraime molomi rokoi pone ke pire ompla fika?”
34 Nu samo flemulu fafaile wamo ka fei nire mi wongke kore wu.
Empo fika,
empo nu naraine nolonine rokoi namo,
nu nopu mi empo mi fina ese paiyi risi nu.
35 Nanrona fane Jisas waiye ka youw nu 12pla uma fai nupene wu noloni wu ka yirengkle nu nanrona,
“Mana empo wola yire ese waiye yukaine mana fai paiyi risi nu plai,
ese yumalo wone kore ka waiye yukaine mana empo yolowi wairu ka waiye yukaine wokboi empo uma mingklari.”
36 Ka wu yem mela aukom wongke ka yina wu yeli iplele empo nu.
Wu yuna mela namo ka wu yirengkle nu nanrona,
37 “La empo fina yupene ki sa yangke nale uporo nu kongkom aure yukaine mela aukom mee empo noula kinini,
mana namo yangke nale uporo namo ki kone.
Ka nale uporo wunini empo yangkeye ki namo,
wu fei yangke ki wokera nro,
wu yangke uporo fina empo isi yawane ki koloki.”
Fina fei fai yangke fafaile mone, wu sa uma moneni
38 Ka Jon yireni wu nanrona,
“Tikse,
mu mulu mana wongke fai youw noula yeneni fai yuꞌpole opola fafaile.
Ka mana namo seke wongke moneni nanrona fane mu mi maule wu ese fei yangke ompla namo kore.”
39 Ka Jisas yirengkle nu nanrona,
“Pone faa mi paule wu.
La empo mana wongke youw noula kinini ka yangke mirakol wongke,
wu ese fei resuklu wampane yire mi koroyane ki.
40 Nanrona fane la empo nu uma fei yukaine iim empo mone namo,
nu sa naine uma moneni.
41 Naimele ki kire mi alwone pone,
la mana wongke empo namale nanrona pone sa uma fai pungkam noula empo Krais ka wu yane mii kuklo pone,
ki kire mi alwone pone nanrona kingke God ese yane wu ompla uporo.”
Nale fafaile fai yisyoli bilip empo mana
(Matyu 18.6-9; Luk 17.1-2)
42 “Nu kongkom namo empo bilipim ki.
La empo mana wongke yengke wongke empo nu kongkom namo yangke nale fafaile nama empo God,
anro mana namo ese yem eni wamo.
Mone mire eni wamo la empo nu nukalo roma wamo wongke mongkoma wunini ka yingkapalo wu palo fulu ka ri.
Ka eni wu ese yem namo ese samo rikepone eni nunini empo roma nuka waingkemulu mongkoma wunini.
43-44 La empo mew yeneni yengke yene yangke nale fafaile,
sa yene ese yaule ka yupone mew namo.
Ese uporo wamo empo yene yuna mew wokera nro ka yene resuklu pari monre mokoi empo laip fai waiye nanrona nanrona namo.
Ka ese fafaile wamo la empo yene yuna mew plainrane,
ka God ese yingkapalo yene palo hel.
Ka hel sa mokoi fai niꞌpi waiye ali nanrona nro.
45-46 La empo rew yeneni yengke yene yangke nale fafaile,
sa yene ese yaule ka yupone rew namo.
Sa ese uporo wamo empo yene rew repo wokera nro ka yene resuklu waiye monre mokoi empo laip fai waiye nanrona nanrona namo.
Sa ese fafaile kei la empo yene yuna rew plainrane sa God ese yingkapalo yene palo hel.
47 La empo nama yeneni yengke yene yangke nale fafaile,
sa yene ese yingklame wongke.
Sa ese uporo empo yene nama wokera nro sa yene resuklu ese pari kingdom empo God.
Sa ese fafaile wamo empo yene nama plainrane sa God ese yingkapalo yene palo hel.
48 Empo koii namo,
malila aure fai none ka naulnekline ompla unu namo,
fai waiye nanrona yangke ommo namo.
Niꞌpi namo re fai yuꞌpo nu,
sa ali yeye nanrona nro.”
49 “Nu fai nina sol empo ofa mingklari fai yangke nu namkile nama empo God.b
Nanrona nro,
ommo yengkali ese yemei yukaine niꞌpi empo laip empo pinuma mingklari.”
50 “Sol sa ompla uporo wamo.
La empo kile wunini pekimo,
sa ese fei yem kore kile woneni.
Kile empo sol namo,
ese waiye wolpuna poneni ka yangke pone ese paipe wolwokerape wongkwongke.”