Nalfafaile fai yangke fafaileye bilip
(Matyu 18.6-7; 18.21-22; Mak 9.42)
17
Jisas yirengkle nu disaipol woneni nanrona,
“Ommo plai ese nemei fai nangke uma firipanro nale fafaile ka nangke ommo fafaile nama empo God.
La yene fina empo yangke ommo fai yangke uma firipanrone nale fafaile ka nangke eni nama empo God,
yene poo.
2 La mana wongke yukune mela aula wongke yangke ompla fafaile nama empo God,
sa ese uporo mana namo nu ese nufena roma wamo wongke waingkemulu wu mongkoma,
ka ningkapalo wu yaikowo fulu ka ri.
Ka ompla namo,
ese fei resuklu ompla fafaile empo wu isi yangkeye.
Eni empo God ese yane wu namo sa ese rikepone eni empo ompla namo.
3 Nanrona fane pone ese sam saimope pone.
“Empo yene wongke mana yangke nale fafaile,
sa yene ese yoploni wu yemplekuru nale yeneni.
La empo wu yenmaire wolpuna,
sa yene ese yupone nale fafaile wunini.
4 La empo wu yangke nale fafaile yene resuklu 7pla taim empo kaire wokera,
ka wu ese wi paiyi 7pla taim ka wu ese yirewi yene nanrona,
‘Ki kensona wolpuna empo nale fafaile isi ki kangkeke namo,’
sa yene ese yupone nale fafaile wunini.”
5 Nu aposel nireni Manawamo nanrona,
“Yene ese kelyame bilip munini kore.”
6 Ka Jisas yirengkle nu nanrona,
“La pone puna bilip pitiri nro yukaine ilo mastet nelale,a
sa pone ese pireni ilo wamo wongke nanrona,
‘Yene yingklam yeri yene plumele plau ka paiyi yeli fulu.’
Ka ilo namo ese yupene mi poneni.
7 “La wongke empo pone yuna mana fai yangke ompla woneni ka yireni wu paiyi peplangku nengkle wee paiyi yopale sipsip,
empo mana fai yangke ommo wunini yolowi kore monre,
wu ese yireni wu ‘Faflai yolowi ka wo’ wee onne?
8 Ese onne!
Wu ese yireni mana namo nanrona,
‘Yene paiyi rana ompla papli empo fai nampolene ommo ka yampo ompla ka yuma kinini yuna yolowi yake ki ko se,
sa yene kepe wo.’
9 Ka wu ese yire uporo mana fai yangke ommo namo empo yupene mi wunini wee onne?
Ese onne!
10 Ka pone re,
empo pangke ommo mingklari yukaine empo God yirepi pone,
pone ese pire nanrona,
‘Mu sa uma nale siwole nro fai mangkeme ompla wunini.
Ompla mee empo mu mangkeme,
sa ompla empo Manwamo munini yire mu ese mangke.’ ”
Uma 10pla empo lepro uporo kore
11 Jisas waraiye yupene rokoi yire paiyi Jerusalem.
Wu paiyi plele iplele empo pike plola empo distrik Samaria ka Galili.
12 Wu paiyi plele mokoi wongke ka uma 10pla empo lepro noloni nane wu.
Nu neli as amone.
13 Ka nu nouw mi faki ka nireni wu nanrona,
“Jisas,
Manwamo,
yene wolpalo mu.”
14 Empo wu yulu nu ka yirengkle nu nanrona,
“Pone paipi puku nalpapli poneni paiyi nu pris nulu se.”b
Empo nu painrine,
nalpapli empo nu namkile kore.
15 Wongke empo nu yulu nanrona nalpapli woneni uporo kore,
fane wu yolowi kore ka kaiwa mi wamo yereryane noula empo God.
16 Wu yolowi firpalo ka yenmaire ungklama palo pike eklene rew empo Jisas ka yire uporo Jisas.
Mana empo yolowi kore Jisas namo wu sa uma Samaria mana.
17 Ka Jisas yali nanrona,
“Anro,
mana wokera nro nalpapli namkile?
Ka 9pla sanro painri pei?
18 Uma plai sa fei noloni kore ka nerernane noula empo God.
Mana wokera nro empo mokoi wongke.”
19 Ka Jisas yireni Samaria mana nanrona,
“Yene yemei ka paiyi,
bilip yeneni yangke nalpapli yeneni uporo kore.”
Kingdom empo God ese yolowi
(Matyu 24.37-39)
20 Nu Farisi plai naline Jisas empo rongkele sa kingdom empo God ese yolowi,
ka Jisas yirengkle nu nanrona,
“Empo kingdom empo God yolowi,
ompla wongke ese fei yemei ka yukule pinuma ese nulu ka namale.
21 Ka nu ese fei nire nanrona,
‘Ompla yemei mee,’
wee ‘Ompla yemei nanri,’
empo fika kingdom empo God sa yukaine ompla empo yeye wolpuna poneni.”
22 Ka Jisas yirengkle nu disaipol woneni nanrona,
“Taim ese yolowi empo pone pire fai pulu kaire wongke empo Auna empo Mana.
Ka pone ese fei pulu.
23 Nu uma ese nirepi pone nanrona,
‘Pulu.
Wu yemei nanri!’
wee ‘Wu yemei mee!’
Pone ese fei paipi ka pupele nu.
24 Empo Auna empo Mana ese yolowi,
wu yemei alele yukaine nemi empo rariye ka alil paiyi mokoi mingkla sa pinuma mingklari ese nulu.
25 Ka pinuma empoleme ese samo kuma nane wu ka wu ese yungkam eni wamo se.
26 “Ommo isi nemeine taim empo Noa namo,
ese nemei yukaine taim Auna empo Mana yire yolowi.
27 Nu pinuma isi nonene ka naikolnone ka nemnuꞌpune,
pin paiyi yem mana ka mana paiyi yem pin paiyi plele empo Noa pariye sip.
Empo Noa pariye sip,
nupi yopu wamo yumalyekli pinuma rili pike nro kei.
28 “Ka yukaine empo isi taim empo Lot re.c
Nu none,
ka naikolnone,
ka nuꞌpune ommo empo pinuma,
ka nenrune ommo,
ka nuralene nengkle ka neꞌrelene mow.
29 Ka empo Lot yuponeye taun Sodom,
niꞌpi ka roma woli wamo nolo heven yukaine riple yumalo pinuma rili kei.
30 “Ese yukaine nanrona nro empo Auna empo Mana ese yemei alele sa pinuma mingklari ese nulu wu.
31 Empo kaire namo,
pinuma nainene mow ririd noneni ese fei panro ka panri mow monre ka nuꞌpu ommo.
Nanrona nro,
pinuma empo neli nengklele noneni ese fei painri kore monre ka nuꞌpu ommo noneni.
32 Pone ro wolrufupe mi empo Lot puli!e
33 La mana yuna keloye laip woneni,
laip wunini ese fafaile.
La mana yane laip woneni,
laip wunini ese fei fafaile.
34 “Ki kire mi alwone pone,
ningki Auna empo Mana yolowiye,
mana plainrane empo niye nama koii wokera,
nu ese mewnem wongke ka wongke ese wiyeye.
35-36 Pin plainrane empo naine nalirine wit,
nu ese mewnem wongke ka wongke ese waiye.”
37 Ka nu disaipol kepe naline Jisas nanrona,
“Manwamo,
ommo namo ese nemei koii pei?”
Ka Jisas yirengkle nu nanrona,
“Koii empo ompla puꞌlo ri waiyeye,
koii namo nro sa rora kumu ese noloni nukane.”f