Mi riri empo pin ini ri yupone wu namo yuna mi yangkuru mana fai yupuye kot ese saimolo wu
18
Ka Jisas yirengkle nu disaipol woneni mi riri wongke fai ese yuku nu nanrona nu ese nesapu ningki kaire nu fai num,
sa nenrape.
2 Wu yirengkle nu nanrona,
“Empo taun wongke,
mana wongke fai waiye ka yupuye kot wamo.
Mana namo fai yupuye kot ka fei fai yumye God ka wu fei fai wolpaloye nu pinuma.
3 Ka pin wongke,
empo ini ri yupone namo,
wu waiye taun namo,
ka wu fai paiyi yolowi yuna mi yangkuruye mana fai yupuye kot ka yireni wu nanrona,
‘Mana wongke fai yangke nale fafaile ki,
nanrona fane ki kire yene ese saimolo ki.’
4 “Isi wu yumplewa mi empo pin namo ini ri yupone wu.
Kingke se wu yoplo wone kore nanrona,
‘Ki fei fai kumke God,
ka ki fei fai wolake uma.
5 Ka pin empo ini ri yupone wu namo,
ningki kaire wu yuyali ki mi mingklari fai kulu wu.
Nanrona fane,
ese uporo la ki samo kupu kot wunini,
sa wu ese fei yolowi kore ki ka yoplo mi mingklari ki mi namo sa ese yangke ki kumplewa.’ ”
6 Ka Manawamo Jisas yirengkle nu nanrona,
“Mana namo fa yupuye kot,
wu mana fafaile ka pone as pupu mi empo wu yireye namo.
7 Ka God ese fei saimolo nu pinuma empo wone yaule woneni wee?
Nu fa nuꞌnaline wu mi mingkla ningki kaire ka niline,
ka wu ese pape wee?
8 Ki kire mi alwone pone,
God ese samo yulu nu ka ese wampane saimolo nu.
Ka,
Auna empo Mana ese yolowi,
wu ese samo yulu yopane nu uma naine pike mee bilipne wee onne?”
Mi riri empo Farisi wongke ka mana fai yuꞌpuye romaula empo gapman nesapune God
9 Jisas yirengkle nu mi riri namo samo paiyi nu uma fai wola nire nanrona none sa uporo nama empo God ka fai nire nu uma plai sa fei uporo.
10 Wu yirengkle nu nanrona,
“Mana plainre painri tempol ese nesapu.
Wongke sa Farisi ka wongke sa mana fai yuꞌpuye romaula empo gapman.a
11 Farisi namo yemei yeli ka yesapuye wone kore ka yire nanrona,
‘God,
ki kire uporo yene empo fika,
ki seke yukaine nu uma plai.
Ki seke fai kangke ommo fafaile,
peki kuꞌpu ommo ka kangke nale pamok uma pin.
Ka ki seke yukaine mana namo fai kuꞌpuke romaula empo gapman.
12 Kaire plainre empo wik wokwokera ki fai kaike punale ka ommo mingkla ki fa kuꞌpuke,
ki fai kepi ploli 10pla ka plola wongke ki fai kawe yene.’
13 “Ka mana fai yuꞌpuye romaula yeli as amone ka wu fei yinrapari heven,
onne!
Wu yeli ka mew yali wol pokub woneni ka yire nanrona,
‘God yene wolpalo ki.
Ki sa mana fai kangke nale fafaile.’
14 “Ki kire mi alwone pone nanrona,
mana fai yuꞌpuye romaula paiyi kore mow woneni ka God yulu wu nro sa yemei mana uporo wamo.
Ka Farisi namo,
sa onne.
Empo fika,
nu uma fai nereri noula noneni,
God ese yumalo nu,
ka nu uma fai numalo none,
God ese yereri nu.”
Jisas ka kongkom aure
(Matyu 19.13-15; Mak 10.13-16)
15 Nu uma neirele kongkom aure pitpitiri nakle noloni Jisas fai wu ese mew rauneli nu.
Empo nu disaipol nulu nu uma namo,
nu nenrele nu.c
16 Ka Jisas youw nu kongkom aure pitpitiri namo noloni wu ka wu yirengkle nu disaipol nanrona,
“Kongkom aure pitpitiri namo ese noloni ki ka pone fai mi paulepe nu.
Empo fika,
nu uma empo yukaine kongkom aure pitpitiri mee,
kingdom empo God sa nunini.
17 Ki kire mi alwone pone nanrona,
la mana wongke fei yem kingdom empo God yukaine kongkom aure mee,
sa wu ese fei pari monre,
ese onne.”
Mana empo yuna ommo mingklari yaline Jisas
(Matyu 19.16-29; Mak 10.17-30)
18 Wongke empo nu ilauma yaline Jisas nanrona,
“Tikse uporo,
ki ese kangke fika sa ki ese kem laip waiye uporo nanrona nanrona?”
19 Ka Jisas yireni wu nanrona,
“Empo fikami,
ka yene youw ki mana uporo?
Mana wongke sa fei uporo.
God wokera nro sa uporo.
20 Yene namale lo empo God:
‘Yene fai yangke nale pamok,
ka yene fai yufu mana ri,
yene fai peki yuꞌpu ommo,
ka yene fai kalyireye ka kalkotimye uma plai,
ka yene ese samo yupu mi empo mokanangka yeneni ka yupene wuyane.’ ”d
21 Ka mana namo yireni Jisas nanrona,
“Ommo mingklari namo ki kupeneke isi ki mela aukom yolowi plele naime.”
22 Empo Jisas yupu mi namo,
wu yireni mana namo nanrona,
“Ompla wongke nro yene fei yangke.
Yene paiyi ka yuꞌpu ommo yeneni ka yali nu uma nuꞌpu,
ka romaula namo yene ese yali nu uma empo ommo onne.
Yene yangke nanrona sa yene ese yuꞌpu ommo uporo yeneni naine heven.
Nanrona fane yene yolowi ka yupene ki.”
23 Empo mana namo yupu mi namo,
wu wolpuna yuꞌpyakare.
Empo fika wu yunali ommo mingklari.
24 Jisas yulu wu ka yire nanrona,
“Nu uma nunali ommo mingklari,
sa raraine ese fei panri kingdom empo God.
25 Kamele sa fei raraine,
wu ese pari nitel pulale,
ka mana empo yunali ommo mingklari sa raraine wamo,
ese fei pari kingdom empo God.”
26 Nu uma empo naine nupune mi namo naline nanrona,
“La nanrona,
sa fina ese waiye uporo plau God nanrona nanrona?”
27 Ka Jisas yirengkle nu nanrona,
“Ompla fika nu uma ese fei nangke,
God sa kelo ese yangke.”
28 Ka Pita yireni Jisas nanrona,
“Mu sa mupole ommo mingklari munini pu ka mupene yene.”
29 Ka Jisas yirengkle nu nanrona,
“Ki kire mi alwone pone nanrona,
nu uma empo wolane kingdom empo God ka nupone mokoi,
ka pulpi nonengkle,
ka inrani,
ka mokapnangkapi ka kongkom nonengkle,
30 empo nu naine pike mee,
God ese yali nu ommo mingkla rikepone ommo isi none nunaline.
Ka kali kikla ese yolowi,
nu ese naine uporo nanrona nanrona.”
Jisas yoplo mi yire wone ese ri ka yemei kore
(Matyu 20.17-19; Mak 10.32-34)
31 Jisas yumale 12pla aposel woneni ka wu yirengkle nu nanrona,
“Mone mampli Jerusalem ka mi empo ommo mingklari nu profet neꞌre wiye nire Auna empo Mana sa ese yemei alwone.
32 Nu ese nina wu paiyi mew empo nu uma empo fei Juda.f
Nu ese samo nupo wu,
ka minrinane wu ka nu ese rofo nefu wu.
33 Ka nu ese samo nufu wu wip ka nufu wu ri ka empo kaire plainrikera,
sa wu ese yemei kore.”
34 Ka nu disaipol fei samo namale mi empo wu yirengkleye nu.
Mi nomu namo sa pekiyeye,
nanrona fane nu fei namale mi empo wu yirengkleye nu.
Mana nama wowo fai yuyaliye ommo umangkle yulu kore
(Matyu 20.29-34; Mak 10.46-52)
35 Empo Jisas yolowi eklene taun Jeriko,
mana wongke nama wowo waiye piyowa empo rokoi yuyaliye uma romaula.
36 Empo mana nama wowo yupu mi empo nu pinuma nolonine ka wu yalile nu nanrona,
nu sa nangke fika.
37 Ka nu nireni wu nanrona,
“Jisas empo Nasaret yolowiye.”
38 Mana nama wowo namo yangke mi ka yire nanrona,
“Jisas,
yene anim empo King Devit,g
yene samo wolpalo ki.”
39 Nu uma painri risi nenre wu ka nireni wu nanrona,
“Yene misarulu.”
Ka wu yangke mi faki wamo ka yire nanrona,
“King Devit anim,
yene wolpalo ki.”
40 Jisas yeli ka yirengkle nu nuna mana namo noloni wu.
Empo mana namo yolowi eklene,
Jisas yaline wu nanrona,
41 “Yene yire ki ese kangke fika yene?”
Ka mana namo yireni wu nanrona,
“Manawamo,
ki kire kulu kore.”