Jisas yoplo mi empo nale empo mana yupone pin
(Matyu 19.1-12; Luk 16.18)
10
Jisas yemei ka yupone mokoi namo ka paiyi nu mokoi plai empo distrik Judia ka paiyi kei ka yaule nupi Jordan ka paiyi plele koii repo.
Pinuma mingklari wamo noloni ka nane wu nemnoku kore ka wu yukule nu mi empo God yukaine wu fai yangkeye empo kaire mingklari.
2 Ka Farisi plai noloni Jisas ka kaliflenali ka napu eni wunini empo mi rongkele wu ese yangke.
Ka nu naline wu nanrona,
“Lo moneni sa yire fika,
sa ese resuklu mana ese yumplewa pin woneni ka yupone wu wee onne?”
3 Ka Jisas re yimpone mi nunini nanrona,
“Isi Moses yali lo pone ka lo namo sa yire fika?”
4 Ka nu nimpone mi wunini nanrona,
“Moses yire yei mana ese yeꞌre piparola wongke fai wu ese yupone pin wunini.”
5 Ka Jisas yimpone mi nunini nanrona,
“Pone uma fai wewela,
nanrona fane Moses isi yeꞌre lo namo pone.
6 Pone pupu,
isi emen empo God yangke ommo mingklari namo,
wu yangke manale.
‘Wu yangke mana yane pin.’a
7 ‘Nanrona nro uma empo nemnuꞌpu,
nu fai nupone moka nangka noneni ka painri naine none kerila,
8 ka wuyane nemei yukaine nale wokera.’b
Wuyane ese fei ninan nai,
wuyane ese naine yukaine nale wokera nro.
9 Nanrona fane ompla God wone yuka namo,
mana wongke ese fei yekli.”
10 Se sema Jisas yakle nu disaipol woneni painri kore monre,
nu disaipol woneni naline wu mi namo.
11 Ka Jisas yirengkle nu nanrona,
“La empo mana wongke yupone puli woneni ka yem pin wongke,
mana namo yangke nale pamok.
Ka empo rokoi namo,
wu yangke nale fei uporo nama empo God empo wu yangke fafaile puli woneni.
12 La empo pin wongke re yupone ini woneni ka paiyi yem mana wongke kore,
sa pin namo yangke nale pamok.”
Jisas blesim kongkom
(Matyu 19.13-15; Luk 18.15-17)
13 Nu pinuma numale kongkom noloni Jisas ese mew rauneli nu.
Ka empo nu disaipol woneni nulu nu ka nu ke nenrele nu pinuma namo.
14 Jisas yulu nu disaipol woneni nangke ompla namo ka wu wolpuna neni nale fafaile empo nu nangkene namo.
Ka wu yirengkle nu disaipol woneni namo nanrona,
“Pimane kongkom noloni ki.
Pone faa mi paule nu empo noloni ki.
Empo fika,
kingdom empo God namo,
sa nu uma namongkle yukaine kongkom namo.
15 Ki kire mi alwone pone nanrona,
mana empo wola yire ese fai samo waiye monre kingdom empo God namo,
ese samo wolyane ka wolpuna wokera mi mingklari empo God yukaine kongkom fai wolnane ka wolpuna wokera mi mingklari empo none moka nangka.
La empo onne sa,
mana namo ese fei resuklu waiye monre kingdom empo God.
Ese samo onne!”
16 Ka wu yeirele kongkom namo ka mew rauneli nu ka yaline God ese blesim nu.
Mana efapu fina empo yuna ommo mingklari
(Matyu 19.16-30; Luk 18.18-30)
17 Jisas yemei fai waraiye kore ka mana wongke yempliri yolowi plele wu ka angklen palo yekli fufula ungklamayen wunini.
Ka wu yaline Jisas nanrona,
“Tikse uporo,
ki ese kefele sa ki ese kem laip namo fai waiye nanrona nanrona?”
18 Ka Jisas yimpone mi wunini nanrona,
“Empo fikami ka yene ke youw ki tikse uporo?
Mana wongke fei uporo.
God wokera nro sa uporo.
19 Yene empo namale lo:
‘Yene faa yufu mana ri,
ka yene faa yangke nale pamok,
ka yene faa peki yuꞌpu ommo,
ka yene faa kalyangkomi palo pinuma plai,
ka yene faa yanili ka yengke ommo uma plaingkle,
yene ese yangke nale uporo nangka ka moka yeneni ka yumaralo yene wone ese waiye ruwe ka yupene wuyane.’ ”c
20 Ka mana namo yireni Jisas nanrona,
“Tikse,
empo ki kone mela aula ka yolowi plele empoleme,
ki kupene lo mingklari namo.”
21 Jisas yulu wu ka wolayane wu wamo ka yireni wu kore nanrona,
“Ompla wongke nro sa yene onne.
Yene ese paiyi ka yenru ommo yene yunaye namo fai nu uma ese nuꞌpu ka romaula namo yene ese yali nu uma yaimali.
La empo yene yangke nanrona,
sa God ese yawe yene ommo uporo fai waiye yoru yene heven.
Ka yene yolowi ka yupene ki.”
22 Ka empo mana namo yupu mi empo Jisas yireye namo ka ungklama wunini fafaile ka samo wolpuna fafaile ka wu paiyi.
Empo fika,
wu yuna ommo mingklari.
23 Jisas nama ronsane nu disaipol woneni ka yirengkle nu nanrona,
“Nu uma nuna ommo mingklari namo,
sa ese raraine wamo empo nu panri monre kingdom empo God.”
24 Nu disaipol woneni nupu mi namo ka nu wolnipanri wamo.
Ka Jisas yirengkle nu kore nanrona,
“Kongkom kinini,
nu uma nire panri monre kingdom empo God namo sa ese raraine wamo empo wu.
25 La empo kamel wongke yire pari pulale empo nidel,
sa ese fei raraine wu.
La,
empo mana wongke yuna ommo mingklari yire pari monre kingdom empo God,
namo sa raraine wamo wu.”
26 Nanrona fane nu disaipol empo Jisas namo sa mi onnele kei ka nu naine noplo mi konaflo iplele none nro nanrona,
“La empo nanrona fina sa resuklu ese waiye nanrona nanrona yane God?”
27 Jisas samo yulu nu ka yirengkle nu nanrona,
“Empo mana,
sa ompla namo ese raraine ka wu ese fei yangke,
la empo God ompla namo sa pitiri ka ese fei raraine wu ese yangke ompla namo.”
28 Nanrona fane Pita yemei ka yireni Jisas nanrona,
“Yulu!
Mu mupone ommo mingklari munini ka mupene yene!”
29-30 Ka Jisas yirengkle nu kore nanrona,
“Ki kire mi alwone pone,
fina yire yupene ki ka miuporo,
ka yupone mow,
ka ommo mingklari woneni,
ka inomranimpi,
pinofe,
moka,
nangka,
kongkom,
ka ommo nengkle woneni,
empo wu waiyeye laip pike mee,
God ese yane 100pla ommo kore ese reryane wu,
rikepone ommo empo isi wu yunaye:
Ommo yukaine mow plai,
ka ommo mingklari noneni,
ka inomranimpi,
pinofe,
mokapi,
kongkom,
ka ommo nengkle woneni.
Ka empo kaire mee rona nu uma ese nangke fafaile ka ouwnire wu.
Ka kaire kingke yolowi wu ese waiye nanrona nanrona.
31 Ka uma mingklari nuna noula wamo empole mee,
kingke noula wamo noneni ese firipanro ka nu ese samo naine wairu.
Ka fopi empole mee noula onne namo,
ese nuna noula ka nu ese naine risi.”
Jisas yoplo mi kore fai wu ese ri ka yemei kore
(Matyu 20.17-19; Luk 18.31-34)
32 Jisas yakle 12pla disaipol woneni painri rokoi fai painri taunwamo Jerusalem ka Jisas paiyi risi nu.
Ka ompla namo ke yangke nu disaipol woneni wolnipanri,
ka nu pinuma plai empo nupele nu namo,
nu ke num.
Ka Jisas youw nu 12pla disaipol woneni noloni wu ka nu painri naine koii wongke nonkerila ka wu yoplongkleye ommo fika nu uma ese nangke wu.
33 Wu yirengkle nu nanrona,
“Pone pupu.
Ese mee mone maimpi plele taunwamo Jerusalem,
nu ese nane Auna empo Mana paiyi mew empo nu bikpris nakle nu tikse empo lo.
Nu ese kotim wu ka nuka mi fai wu ese ri.
Ka nu ese nina wu paiyi mew empo nu uma fei Juda.
34 Ka nu uma namo ese ouwnire wu ka rofo nefu wu ka ese nufu wu wip ka nufu wu ri.
Ka kaire plainrikera sa wu ese yemei kore ka waiye laip.”
Jems yane Jon nire naine wamo
(Matyu 20.20-28)
35 Ka Sebedi auna plainrane,
Jems yane Jon noloni Jisas ka nireni wu nanrona,
“Tikse,
kikane samo wola yene ese yangke ompla fika kikane maline yene ese yangke.”
36 Ka wu yaline wuyane nanrona,
“Yenyane wola ki ese samo kangke ompla fika yenyane?”
37 Ka wuyane nimpone mi wunini nanrona,
“Empo yene waiye sia king yeneni ka yene yopane kingdom empo God ka ommo mingklari namo,
kikane samo wola nanrona yene ese yane namba empo wongke kikane ese maime mew menrulpod yeneni ka wongke ese waiye mew aiyalpo yeneni.”
38 Ka Jisas yane mi riri wuyane nanrona,
“Yenyane fei namale mi fika empo yenyane palinepe ki namo.
Yenyane ese paikopo kap empo ki kaikokoke namo,
wee?
Ka yenyane sa resuklu ese nu baptaisim yenyane yukaine nu ese baptaisim ki namo wee?”
39 Ka wuyane nimpone mi kore wu nanrona,
“Yei,
kikane won resuklu.”
Ka Jisas yireni wuyane kore nanrona,
“Kap ki ese kaikoko namo sa yenyane re ese paikopo.
Ka baptais empo ki kire kem namo,
sa yenyane re ese pem.
40 Ka fina ese waiye mew menrulpo wee mew aiyalpo seke ommo kinini ese kane mana.
Samo onne!
Sia plainrane namo sa empo mana fina God wone yina pu.”
41 Empo 10pla disaipol plai nupu mi empo Jems yane Jon namo,
nu wolpun neni ka nemei nenre wuyane.
42 Ka Jisas yemyoku nu ka wu yirengkle nu nanrona,
“Pone namale nanrona nu uma nu fai nouwne nu nanrona nu ilauma empo nu uma fei Juda namo,
fai nereri none ka numalo nu plai.
Ka nu uma fai painri risi nu ilauma namo fai nire mi kelo nu pinuma ese nupu mi nunini.
43 Ka pone faa pupene nale empo nu.
Mana yire yemei manawamo poneni,
ese waiye nanrona wokboi poneni.
44 Ka mana empo wola yire ese paiyi risi pone namo,
ese waiye yukaine wokboi siwole empo uma mingklari.
45 Empo fika,
Auna Empo Mana wu re yolowi fai yangke nale nanrona ese yumaralo wu wone ka mewmew nu uma plai.
Wu seke yolowi fai nu uma ese mewmew wu empo ommo pitir pitiri.
Onne!
Mi empo God yire nanrona,
mana ese ri nale fafaile woneni.
Ka Auna empo Mana empo yolowi pu fai wu ese yane wone kore ese ri ka yem nale fafaile empo uma mingklari fai nangkene fai nu ese fei rili.
Wu seke yolowi fai nu uma ese mewmew wu.
Onne!
Wu yolowi ese mewmew pinuma mingklari empo pike mee.”
Jisas yemplekuru mana nama yufona
(Matyu 20.29-34; Luk 18.35-43)
46 Jisas yakle nu disaipol woneni painri plele taun Jeriko.
Ka Jisas yakle nu disaipol nupone taun Jeriko nire painri ka pinuma mingklari re nakle nu painri.
Ka mela auna empo Timeus,
noula wunini Bartimeus,
sa waiye piyowa empo rokoi namo.
Nama wunini yufona.
Ka wu fai waiye ka yalileye nu uma ese nane romaula wu.
47 Wu yupu nanrona Jisas empo taun Nasaret ese waraiye yolowi rokoi namo ka wu won yangke mi faki wamo ka yire nanrona,
“Jisas,
Auna empo Devit,
yene wolpalo ki!”
48 Uma mingklari nenre wu ka nire mi kelo wu nanrona,
“Misarulu!”
Ka wu yangke mi faki kore ka yire nanrona,
“Auna empo Devit,
yene wolpalo ki!”
49 Jisas yolowi yeli ka yirengkle nu nanrona,
“Pone pireni wu yolowi.”
Ka nu nireni mana nama yufona namo nanrona,
“Yene aiyem ka yemei yeli,
Jisas youw yene ese paiyi wu.”
50 Wu usu yingkapalo saket woneni ka wampane yemei ka yolowi Jisas.
51 Ka Jisas yaline wu nanrona,
“Yene yire ki ese kefele yene?”
Ka mana nama yufona namo yimpone mi wunini nanrona,
“Tikse,
ki kire kulu.”
52 Ka Jisas yireni wu kore nanrona,
“Yene paiyi.
Bilip yeneni yemplekuru yene pu.”
Ka wampane nro,
nama wunini uporo ka wu yulu.
Ka wu yupene Jisas painri rokoi.