Mi riri empo bosboi fafaile
16
Jisas yirengkle nu disaipol woneni nanrona,
“Bosboi wongke empo mana fai yunaliye romaula wamo nawaiyeye.
Nu uma plai nireni mana fai yunaliye romaula wamo nanrona bosboi wunini wu fai pekiyuꞌpuye ommo ka yupapakiye ommo mingklari wunini.
2 Nanrona fane mana fai yunaliye romaula wamo namo youw bosboi woneni yolowi ka wu yaline wu nanrona,
‘Empo fikami ka ki kupu mi yeneni?
Yene paiyi ka samo yeꞌre piparola yire ki mi empo romaula isi yene yuꞌpu ommo fika fika.
Empo fikami,
sa yene ese fei waiye yukaine bosboi empo romaula kinini kore.’
3 “Ka bosboi yire wone kore nanrona,
‘Ki ese kangke fika?
Manawamo kinini yire ki ese fei kaike bosboi wunini kore.
Ki sa fei kelo ese kangke ompla empo mana wongke ka kompo pike.
Ka ki fei fai kalileke uma ompla.
4 Souw naimele sa ki namale pu,
empo ommo fika ki ese kangke,
empo ki pekimo,
uma mingklari ese nouw ki kaiki mow nunini.’
5 “Nanrona fane wu yemyoku nu uma empo kalnuꞌpune ommo empo manawamo wunini.
Ka wu yaline mana empo yolowi risi nanrona,
‘Yene yuꞌpu ommo empo manawamo kinini mingklari wee plainre nro?’
6 Ka mana namo yireni wu nanrona,
‘Ki kalkem 800 galen oil empo oliv.’
Ka bosboi namo yireni wu nanrona,
‘Yene yem piparola mee empo nu neꞌre ommo isi yene kalyuꞌpuye namo,
naimele yene wai ka faflai yeꞌre 400 galen nro.’
7 “Ka bosboi yaline mana wongke kore,
‘Ommo empo yene kalyuꞌpuye namo sa rongkele?’
Ka mana namo yireni bosboi nanrona,
‘Ki kalkem 1000 bek wit.’
Ka bosboi yireni wu nanrona,
‘Yene yem piparola mee empo nu neꞌre ommo empo yene kalyuꞌpuye namo,
ka yene yeꞌre resuklu 800 nro.’a
8 “Ka manawamo empo bosboi fafaile fei woluporo,
wu kon yereri noula empo bosboi fafaile namo,
empo fika wu empo yangke ompla yukaine nu uma empo ila uporo.
Nu uma fai nupenene ommo empo pike mee samo namale rokoi pitipitiri fai nangkene ommo fai saimolone none,
ka empo rokoi namo nro nu rikepone nu uma fai nupenene rokoi empo ali.
9 Ki kire mi alwone pone,
pone puꞌpu ommo upupu yukaine romaula empo pike mee,
ka pangke nu pinuma ese nemei uma foli poneni.
Ka empo ommo upupu yukaine romaula empo pike mee pekimo,
nu ese nouw pone paipi paipe mow empo fai neli nanrona nanrona.
10 “Mana empo fai samo yuluye ommo pitipitiri umangkle namo,
mana namo ommo wamo re nu uma ese nane wu,
ka wu ese konsamo yuluye.
Ka mana empo fai yangke nale fafaile ommo pitipitiri,
mana namo,
ommo wamo re wu ese yangke nale fafaile.
11 Nanrona fane la empo pone fei samo popalipe ommo upupu empo pike mee,
sa fina ese yirepi pone ese popali ommo uporo wamo alwone?
12 La empo pone fei samo popali ommo empo nu uma plai,
sa fina ese yape pone ommo yukaine ommo poneni?
13 “Nu uma empo fai nangke ommo empo mana wongke,
wongke nunini ese fei yangke ommo empo manawamo plainrane,
onnele.
Mana ese wolyane wongke wamo ka wongke sa wu ese fei wolyane.
Wu ese yupu mi empo wongke,
ka wongke sa wu ese fei yupu.
Nanrona fane pone ese fei pangke ommo empo God ka ringklene romaula.”
14 Nu uma Farisi fai wolnapane romaula.
Nanrona fane nu nupu mi empo Jisas ka nu ungklam nelref angklenile.
15 Ka Jisas yirengkle nu nanrona,
“Pone pire puku pone fai nu pinuma mingklari ese nulu pone ka nu nire pone sa uporo.
Ka God sa namale ommo empo pekinenene wolpuna poneni.
Ommo empo mone uma mulu uporo,
ka God yulu sa fafaile wamo nama wunini.
Jisas yoplo mi empo lo ka kingdom empo God
16 “Mi empo lo ka mi empo nu profet,
nu won noplo yolowi plele empo Jon yolowiye.b
Ka empo Jon yolowi,
miuporo empo kingdom empo God nu nanoplone.
Ka pinuma mingklari nengkali nire panri kingdom namo.
17 Nemi ka pike mee sa ese pekimo,
ka mi rolpitiri empo lo empo God sa ese fei pekimo.
Onnele!
18 “Mana fina empo yupone puli woneni ka yem pin wongke kore,
mana namo sa yangke nale pamok.
Ka mana fina empo yem pin empo mana yupone wu waiyeye namo,
mana namo re yangke nale pamok.
Mi empo mana yuna romaula mingklari yane Lasarus
19 “Isi mana wongke fai yunaliye romaula mingklari,
ningki kaire wu fai raile siot upupu ka yiperiye amplapi kaka uporo.
Mana namo yunali ommo upupu mingklari.
Ka ningki kaire wu fai woye ommo upor uporo nro.
20-21 Nu uma nongkole mana wongke empo muꞌku yokolo namo noloni nina wiye eklene mow plerama empo mana fai yunaliye romaula mingklari.
Mana empo muꞌku yokolo namo noula wunini sa Lasarus.
Nalpapli wunini sa muꞌku wamfafai ka kulala fai kalyopulnolone,
ka pala fai noloni ka nongkola nepelnone.
Ka Lasarus wola yire yuꞌpu ommo roli empo mana fai yunaliye romaula mingklari fai woye ka firipanro naine koii angklomoile.
22 “Empo Lasarus ri,
nu ensel nolo ka nongkole wu panri nirane wu yane Abraham naine.c
Ka mana empo fai yunaliye romaula mingklari namo wu re ri ka nu uma niꞌna wu.
23 Wu paiyi waiye hel ka wu yungkam eni wamo.
Wu yinrapari riri ka wu yulu Lasarus yane Abraham nainene.
24 Se wu youw Abraham ka yireni wu nanrona,
‘Aina Abraham,
yene wolpalo ki ka yireni Lasarus paiyi mew yoku mii ka kuklo nro yolo ka raulo yu ki nongkola se,
empo fika ki kungkam eni wamo empo niꞌpi mee.’
25 “Ka Abraham yireni wu nanrona,
‘Mela!
Yene wolrufu isi yene waiye pike,
yene fai yunaliye ommo upupu mingklari.
Ka Lasarus sa fai yuꞌpu ommo fafaile nro.
Naimele wu waiye woluporo ka yene sa yungkam eni wamo.
26 Ka ompla wongke re,
sa yeye iplele empo pone ka mu,
God yina koii raraine wamo wongke yeye.
Nanrona fane,
nu uma empo naine riri nire panro pone,
nu ese fei panro.
La pone re pire peri mu,
pone ese fei peri riri.’
27 “Wu yireni Abraham nanrona,
‘La empo nanrona,
aina,
ki kaline yene ese yireni Lasarus ese paiyi kore mow empo aina kinini.
28 Ki inomranimpi 5pla sa ronainene.
Lasarus ese paiyi ka yirengkle nu mi mee sa nu re ese fei noloni koii mee.
Koii mee sa fafaile wamo ka eni wamo.’
29 “Ka Abraham yireni wu nanrona,
‘Nu inomranimpi yeneni nuna mi empo Moses ka empo nu profetd pu fane nu ese nupu mi namo.’
30 “Ka wu yireni Abraham nanrona,
‘Onnele!
Aina Abraham,
la mana wongke empo isi ri yemei paiyi ka yirengkle nu sa nu ese nensona wolpuna ka ese bilip.’
31 “Ka Abraham yireni wu nanrona,
‘La nu fei nupu mi empo Moses ka empo nu profet,
sa nu ese fei bilip.
Ka wongke empo mu uma isi rili yemei kore ka yirengkle nu,
namo re nu ese fei bilip.’ ”