Mi riri empo sipsip pekiniye
(Matyu 18.12-14)
15
Kaire wongke nu uma fai nuꞌpune romaula empo gapman ka nu uma fai nangke nale fafaile noloni nukanane Jisas nire nupu mi wunini.
2 Ka nu Farisi ka nu uma empo namale lo nopu mi ka nire nanrona,
“Mana namo fai wolyaliye nu uma fai nangke nale fafaile empo nolonine wu ka wu fai yakle nemnoku none.”
3 Ka Jisas yirengkle nu mi riri nanrona:
4 “La empo pone wongke yuna 100 sipsip,
la wongke empo nu 100 sipsip namo paiyi ka pekini.
Sa sipsip nangka namo,
ese yupole nu sipsip plai ese naine none ka wu ese paiyi yapu wongke namo paiyi la wu waꞌne wu,
se?
5 Ka empo wu waꞌne wu,
wu ese woluporo wamo ka wu ese yem sipsip namo raune wiye wone kaula riri ka yongkole wu yolowi kore moile.
6 Empo wu yolowi moile,
wu ese mi paiyi nu uma foli woneni ka nu uma empo mokoi woneni ese noloni nemnoku ka wu ese yirengkle nu nanrona,
‘Ki kape pone woluporo,
sipsip kinini empo pekini namo,
ki kapu wu kore pu.’
7 Ki kirepi pone mi alwone,
woluporo wamo namo fai yemeiye heven,
nu fai ainemne 99 empo fai sam nainene ka nu ese fei nensolo wolapuna kore.
Ka mana empo yangke nale fafaile yenmaire wolpuna ka yupole nale fafaile namo sa nu fai woluporo wamo.”
Mi riri empo romaula firpalo
8 Ka Jisas yirengkle nu kore nanrona,
“La empo pin wongke yuna romaula silva 10pla ka wongke empo nu firpalo.
Wu ese yesane lam ka wu ese yiyel yangklumo ommo mingklari ka wu ese yeplene ulawa ka wu ese samo yapu paiyi la wu waꞌne se.
9 Ka empo wu yem romaula empo firpalo namo,
wu ese yemyoku nu uma foli woneni ka nu uma mingklari empo mokoi woneni noloni nemnoku ka wu ese yirengkle nu nanrona,
‘Ki kape pone aimem se,
romaula kinini isi firpalo namo,
ki kem kore pu.’
10 Ki kirepi pone mi alwone,
nale namo nro,
God fai yakle nu ensel woneni fai woluporone mana wongke empo yangke nale fafaile ka fai yensona wolpuna ka yupone nale fafaile.”
Mi riri empo auna pekiniye
11 Ka Jisas fai yire kore nanrona,
“Mela mana plainrane empo mana wongke.
The Prodigal Son (Luk 15:11-32)
12 Ka auna pitiri yireni nangka nanrona,
‘Aina,
yene yepi ommo yeneni repo plainrane ka repo kinini sa yene wampane yake ki se.’
Nanrona fane nangka yepi ommo woneni paiyi auna plainre.
13 “Fei papeye auna pitiri yuꞌpu ommo mingklari woneni,
ka wu paiyi kantri wongke waiye amone.
Ka empo mokoi namo wu yangke nale fafaile wongkwongkeni yuflane romaula woneni ka ommo mingklari woneni samo pekimo kei.
14 Ka empo ommo mingklari wunini samo pekimo,
eni wamo yemei kantri namo ka ommo fai nonene re samo pekimo ka wu re ommo samo onne.
15 Nanrona fane wu paiyi yulu mana wongke empo mokoi namo ka yaline wu yire wu ese yemei yukaine mana fai yangke ompla wunini.
Ka mana namo yireni wu paiyi yopale poli wunini.
16 Wu samo ponrini wamo,
ka mana wongke fei yane ompla plola wongke wu wo.
Nanrona fane empo wu yulu ka poli none bin papli wola wu re yire wu ese yakle poli no bin papli.
17 “Wu waiye paiyi ka wu namale nanrona wu samo fafaile fane wu wolrufu kore nangka woneni ka wu yire nanrona,
‘Uma mingklari fai nangke ommo empo aina kinini,
nu sa fai none ommo mingklari ka ploli fai naine.
Ka ki kaike mokoi mee ommo empo fai none samo onne fane ki samo ponriki wamo kire kangke ri.
18 Ki ese kemei mele ka ki ese kaiki aina koneni kore,
ka ki ese kireni wu nanrona,
“Aina,
ki isi kangke nale fafaile wamo paiyi God ka yene.
19 Naimele ki sa fei uporo ese yene youw ki yukaine auna yeneni.
Yene yangke ki ese kaike yukaine wongke empo nu uma fai nangke ompla yeneni.” ’
20 Nanrona fane wu yemei ka paiyi kore nangka woneni.
“Ka empo wu nayeye amone,
nangka woneni yulu wu ka wolyaule wamo.
Ka wu yempliri paiyi yukaire auna ka yofkene wu.
21 “Ka auna yireni wu nanrona,
‘Aina,
ki isi kangke nale fafaile wamo paiyi God ka paiyi yene.
Ki fei uporo ese yene youw ki yukaine auna yeneni kore.’
22 “Ka nangka woneni yirengkle nu uma fai nangke ommo woneni nanrona,
‘Pone wampane pem ompla papli uporo wongke kinini puna polopi panani wu.
Pone puflana ring wongke mew mempi wunini ka panani sandel rew wunini.a
23 Pone paipi pem bulmakau aula wongke nale mopo puna polopi ka pone pufu ri.
Mone ese mo ka mane wu aimem.
24 Empo fika auna kinini ri pu,
ka naimele wu yemei kore.
Wu pekini pu,
ka naimele mone fai mem wu kore.’
Nanrona fane nu nangke kola wamo namo ka nu nane wu ainem.
25 “Empo nu naine none ka ainemne,
auna wamo sa yeye nengklele fane.
Ka empo wu yolowi eklene mow empo nangka woneni,
wu yupu nu nofulene ka neilene rai monre.
26 Nanrona fane wu youw wongke empo nu uma fai nangke ommo empo nangka woneni ka yaline wu nanrona nu sa nangke fika wee?
27 Ka mana fai yangke ommo empo nangka namo yireni wu nanrona,
‘Yene ino pitiri empo yolowi kore pu,
wola yene aina yufu bulmakau aula wongke nale mopo,
empo fika yene ino pitiri empo yolowi kore uporo.’
28 “Auna wamo yupu mi namo ka wu wolpun neni wamo,
fane wu fei pari monre.
Nanrona fane nangka woneni yolo moile ka samo yoploni wu ese yangke wu wolpuna raulo.
29 Ka wu yireni nangka woneni nanrona,
‘Yulu!
Kikla mingklari riaukoye,
ki kangke ommo wamfafai ka kaike yukaine mana fai kangke ompla yeneni ka ki fei kangko mi yukaine yene fai yireye ki.
Ka yene fei yake ki ompla nanrona meme pitiri wongke ki ese kakle nu uma foli kinini memmoku sa ki ese aikem.
30 Ka,
empo yene auna namo paiyi yuflane ommo mingklari yeneni paiyi nu pinmana empo fai narainene rokoi ka empo wu fai yolowi kore moile,
yene yufu bulmakau aula nale mopo ka yene aiyem wu.’
31 “Ka nangka woneni yireni wu nanrona,
‘Auna kinini,
yene fai waiye plau ki ningki kaire,
ka ommo mingklari kinini,
ommo namo sa yeneni.
32 Ka mee,
mone mangke ommo mee mone ese aimem ka wola moneni ese naine uporo,
empo fika yene ino pitiri isi ri pu,
ka naimele wu yemei kore.
Wu empo isi pekini ka naimele mone fai mem wu kore.’ ”