Jisas paiyi taunwamo Jerusalem yukaine king
(Matyu 21.1-11; Luk 19.28-40; Jon 12.12-19)
11
Jisas yakle disaipol woneni noloni pise eklenene taunwamo Jerusalem.
Nu noloni plele mokoi plainrane Betfage ka Betani.
Mokoi pitiri plainrane namo naine eklene moule alwola Oliv.
Ka Jisas yawale disaipol plainrane woneni risi painri.
2 Wu yireni wuyane nanrona,
“Yenyane samo paipi mokoi namo nro empo mone maimpime namo.
Empo yenyane paipi plele mokoi namo ka paipi papli,
sa yenyane ese pulu donki woꞌla wongke empo nu kapa nuka wu yeliye namo,
empo mana wongke fei isi yulpari waiye wu riri.
Sa yenyane ese peingklome kapa ka pumane wu pane polopi naimele.
3 La empo mana wongke yaline yenyane,
‘Fikami ka yenyane ke pangke nanrona,’
sa yenyane ese pireni wu nanrona,
‘Manawamo yire yangke ompla donki mee.
Ka empo ommo wunini pekimo,
wampane nro wu ese yawe yene kore.’ ”
4 Empo wu yoplo mi wunini pekimo rongka wuyane painri.
Ka empo wuyane painri plele koii namo,
wuyane nulu donki woꞌla yeli eklene plerama empo mow wongke yeli eklene rokoi nole.
Wuyane painri donki namo ka neingklome kapa empo nu nuka donki namo.
5 Ka nu uma plai empo neli eklene namo nulu wuyane ka naline wuyane nanrona,
“Yenyane ke peli peingklome kapa empo donki woꞌla namo fai pefele?”
6 Ka wuyane nirengkle nu yukaine mi isi Jisas yireni wuyane.
Ka nu uma mewnimane wuyane ka wuyane numane donki woꞌla namo painri.
7 Empo wuyane numane donki woꞌla namo noloni Jisas,
wuyane nuꞌpu ommo ampapli wonyaneni ka ningkla donki kuma riri wola Jisas yulpari ka waiye donki.
8 Uma mingklari ningklari ommo ampapli nonengkle risine rokoi ka plai sa naulere ommo ilo para ka nenrune rokoi plau.
9 Empo Jisas yupene rokoi paiyiye namo,
plai empo nu pinuma risi painrine ka plai sa nairu wu.
Mingklari nemnoku painri ka nangke mi kelo ka nire nanrona,
“Mu mereri noula yeneni,
God ese yem kore mu!
God ese samo yangke mana mee empo yolowi noula empo Manawamo.
10 God ese samo yangke kingdom ese kingke yemei namo.
Sa Kingdom namo empo God,
ese yereryane kingdom empo aina moneni,
Devit.
Wu ese yopane mone.
Mone mereri God waiye riri wamo!”
11 Empo Jisas paiyi pari taunwamo Jerusalem,
wu paiyi pari kei tempol ka wu samo yulu ommo mingklari.
Ka ekleneye yire kurela,
nanrona fane wu yakle nu 12pla aposel woneni painri kore Betani.
Jisas rofo yefu ilo fik ese fei napale nale
(Matyu 21.18-19)
12 Nu nile moulpeplere wola nu nupone Betani ka nire painri kore taunwamo Jerusalem,
ka Jisas ponrini.
13 Ka wu yulu ilo fik wongke asa yeli amone para keklepe wunini namo yufona kei.
Empo kaire namo,
fei kaire empo ilo fik napale nale.
Nanrona fane Jisas paiyi plele ilo fik namo,
wu namanama yapu ka fei yulu fik nelale keklepe fai wu ese wo.
Ka wu fei wane wongke,
wu yulu ilo fik para woi yufona kei ilo namo.a
14 Ka Jisas rofo yefu ilo fik namo ka yireni ilo nanrona,
“Yene ese yeli nanrona nro ka ese fei yapa nale kore.
Nu uma ese fei no kore nale yeneni.
Ese onne kei!”
Nu disaipol woneni nupu mi namo.
Jisas yemyangklupu nu uma empo nangke bisnis tempol monre
(Matyu 21.12-17; Luk 19.45-48; Jon 2.13-22)
15 Empo Jisas yakle disaipol woneni noloni plele taunwamo Jerusalem,
wu won samo paiyi pari kei tempol monre.
Ka empo wu yulu nu uma empo naine maketne tempol monre namo,
wu yemei ka yemyangklupu nu ka yenmaire tebol empo nu uma fai senisimne romaula ka sia empo nu uma fai nenrune rora ufu maket namo.
16 Ka wu yakuru nu uma mingklari ese fei nungkam ommo nonengkle fai maketne namo ese fei naule panri tempol monre.
17 Ka empo wu yukuleye nu namo,
wu yirengkle nu nanrona,
“Buk empo God yire nanrona,
‘Mow empo ki ese samo waiye yukaine mow fai nesapune empo nu pinuma empo mokoi mingklari.’
Ka anro pone wolpuma namo wee?
Ka pone ke pangke koii mee yemei yukaine koii empo nu uma fai peki nuꞌpu ommo nainene.”
18 Empo nu bikpris ka nu tikse empo lo nuꞌpu mi namo,
nu nemei ka napu rokoi wongkwongkeni fai nufu Jisas ri.
Nu num wu,
empo fika,
nu namale nanrona uma mingklari wolnipanri wamo mi empo Jisas yireye namo.
19 Empo kaire mingklari,
empo kurela yire yolowi,
Jisas yakle nu disaipol woneni namo,
fai nupone taunwamo Jerusalem namo ka painri kore koii fai nainene.
Ilo fik rouw
(Matyu 21.20-22)
20 Empo ningkinama nole kurelplau Jisas yakle nu disaipol woneni nemei ka painri kore taunwamo Jerusalem namo,
nu nulu ilo fik empo isi Jisas yefu mi wiin pari namo samo rouw palo plele kinrela woneni.
21 Ka Pita wolrufu ommo empo isi Jisas yangkeye namo ka wu yire nanrona,
“Tikse,
yulu ilo fik isi yene yefu mi wiin pari namo sa rouw pu.”
22 Ka Jisas fai yimpone mi empo nu disaipol woneni namo nanrona,
“Pone ese samo bilipim God.
23 Ki kire mi alwone pone,
la empo mana wongke yireni moule alwola namo nanrona,
‘Yene yemei ka paiyi yingkapalo yene fulu iplele.’
Ka mana namo fei wolpun plainrane ka wu samo bilipim ompla namo ese yemei yukaine mi empo wu yireye.
Ki kire mi alwone pone nanrona,
God ese yangke ompla namo ese yemei yukaine empo wone wolaye.
24 Nanrona nro,
ki kire mi alwone pone,
la pone puna kelo wolpuna ka pesapu fai puꞌpu ommo sa,
pone ese samo bilip kelo nanrona pone pem ompla namo pu empo pone fai pesapupe ka God ese yape pone.”
25-26 “Empo pone pesapu ka pone wolrufu ompla wongke fafaile empo mana wongke isi yangkeye pone,
sa pone ese samo puꞌpole ommo fafaile empo isi wu yangkeye pone namo.
Nanrona nro Aina empo waiye heven namo,
ese yuꞌpole ommo fafaile pone re isi pangkepe namo.”
Nu naline Jisas wu empo yem kelo namo pei
(Matyu 21.23-27; Luk 20.1-8)
27 Jisas yakle disaipol woneni namo noloni kore taun wamo Jerusalem.
Ka Jisas paiyi pari ka waraiye poupale tempol monre.
Ka nu bikpris ka nu tikse empo lo ka nu ila uma namo noloni plele wu.
28 Ka nu won nirenine wu nanrona,
“Yene yiremi mu,
fina yawe yene ila uporo ka kelo namo fai yene ese yangke ommo namo?
Ka kelo namo sa yolowi pei?”
29 Wola,
Jisas yimpone mi empo nu nanrona,
“Ki re kire kaline pone mi wongke se.
La pone samo pimpone mi empo ki kalike,
sa ki re ese koplo alele fina empo yake ki namba fai kangke ommo namo.
30 Pone pireki ki,
empo Jon baptaisimye nu uma mii namo,
God empo heven isi yane namba ka kelo wu wee nu uma isi nane wu?”
31 Nu niflipanro noplo mi none kore nanrona,
“Mone ese mire fika?
La empo mone mire nanrona kelo namo sa yolowi God,
wu ese yiremi mone nanrona,
‘Empo fikami ka pone fei bilipim mi empo Jon?’
32 La empo mone mire nanrona ‘Ommo namo sa nu umangkle,’
ka mi namo ese yenmaire yolowi kore mone.”
Nu nire nanrona empo fika,
nu num nu pinuma.
Pinuma mingklari fai nire nanrona Jon wu sa profet won alwone.
33 Nanrona fane nu nimpone mi wunini nanrona,
“Mu fei namale.”
Ka Jisas re yimpone mi empo nu nanrona,
“Ki re ese fei kire mi alwone pone fina empo isi yake ki namba mee ka ki kangke ompla namo.”