Mana fai yuꞌpuye romaula noula wunini Sakias
19
Jisas paiyi plele taun Jeriko ka yupene rokoi ese paiyi mokoi wongke.
Jesus and Zacchaeus (Luk 19:1-10)
2 Mana wongke empo waiye taun Jeriko noula wunini Sakias.
Sakias sa ilamana empo nu uma fai nuꞌpune romaula empo gapman,
ka wu sa yunali ommo mingklari wamo.
3 Wu wola yire fai ese yulu Jisas sa mana fina.
Ka wu sa polam fane wu fei yulu Jisas empo yolowiye rokoi,
empo fika pinuma mingklari naukiri wu pu.
4 Fane wu yempliri paiyi risi nu pinuma ka wu paiyi pari waiye ilo wongke noula Sikamo Fik,
fai yire ese yulu Jisas.
Empo fika,
Jisas ese yolowi rokoi empo ilo namo yeliye.
5 Empo Jisas yolowi plele koii namo,
wu yinra pari waꞌne Sakias ka yireni wu nanrona,
“Sakias,
faflai yolo.
Eseme ningki ki ese kaike mow yeneni.”
6 Wu woluporo wamo ka faflai yolo ka yumane Jisas yane painri mow woneni.
7 Uma pinuma mingklari nulu namo ka noko mi nire nanrona,
“Wu ke yane mana fai yangke nale fafaile yane painri naine mow wunini.”
8 Sakias yemei ka yireni Manwamo Jisas nanrona,
“Yulu,
Manwamo Jisas!
Eseme ki ese kepi ommo mingkla kinini ese paiyi plol plainre.
Plol wongke koneni ka plol wongke ki ese kali nu uma empo ommo onne.
La ki isi peki kuꞌpuke ommo empo nu uma,
sa plola plainrikera kore ki ese kaunpalo plau.”
9 Ka Jisas yireni Sakias nanrona,
“Ki koloki mow poneni,
ka naimele God yuꞌpu pone kore pu ese paipe uporo nanrona nanrona.
Empo fika,
mana namo wu re oikenra empo Abraham.a
10 Ki empo koloki mee,
empo fika,
Auna empo Mana wu yolowi fai yapu ka yuꞌpu kore nu uma empo fei nupenene rokoi uporo ese naine uporo nane God.”
Mi riri empo uma 10pla nuꞌpune romaula
(Matyu 25.14-30)
11 Empo pinuma mingklari naine nupune mi empo Jisas,
wu yoplo mi riri wongke paiyi nu.
Wu yirengkle nu mi riri namo,
empo fika,
wu wone empo yolowi eklene Jerusalem pu,
ka pinuma mingklari kepe nire nanrona kingdom empo God sa poplolaye ese yemei alele.
12 Wu yirengkle nu nanrona,
“Manawamo wongke yire pai kantri wongke empo yeye amone fai nu ese nina wu king sa wu ese yolowi kore ka yuluye kantri woneni.
13 Nanrona fane wu yumale 10pla uma fai nangke ommo woneni ka yali romaula resuklu 10pla fotnait.b
Ka wu yirengkle nu nanrona,
‘Pone pem romaula mee ka paipi pangke ompla paiyi plele empo ki koloki kore.’
14 “Ka pinuma empo mokoi woneni fa wolneni wu,
nanrona fane empo wu paiyiye,
nu mi paiyi mokoi empo wu paiyiye namo nirengkle nu nanrona,
‘Mu mumplewa manawamo namo sa ese fei yemei king munini.’
15 “Ka manawamo namo,
nu nina wu king pu fane wu yolowi kore mokoi woneni.
Ka wu mi paiyi nu uma 10pla,
isi wu yaliye romaula fai yire ese yulu romaula empo ommo nu nangkene ro wamo wee pitiri.
16 “Mana empo yolowi risi yireni wu nanrona,
‘Manwamo,
romaula empo yene yake ki resuklu 10pla fotnait namo,
ki kangke ompla ka ki kem romaula resuklu 100 fotnait kore.’
17 “Ka king yireni wu nanrona,
‘Yene mana uporo wamo,
yene yangke ompla uporo empo saimoye ompla pitiri mee.
Nanrona eseme,
ki kina yene ese waiye manawamo fai ese yuluye 10pla taun.’
18 “Mana empo yupeneye mana empo paiyi risi namo,
wi ka yireni king nanrona,
‘Manwamo,
romaula empo isi yene yake ki namo,
ki kangke ompla ka ki kem resuklu 50pla fotnait kore.’
19 “Ka king yireni wu nanrona,
‘Yene ese yuluye 5pla taun.’
20 “Ka wongke kepe wi yireni king nanrona,
‘Manwamo,
romaula empo isi yene yake ki namo,
ki kuna koloki kore.
Ki samo amplap plola kuka ka kina waiye.
21 Ki kum yene,
empo fika yene mana fai wolpun neniye uma fei samo nangke ommo resuklu wolpuna yeneni.
Yene fei yangke ompla wongke,
yene fai yuꞌpuye nro ka yene fai woye ommo empo uma plai noklene.’
22 “Ka king yireni wu nanrona,
‘Yene mana fafaile,
ki ese kangkom mi palo yene mi empo yene yireye namo.
Yene namale nanrona ki mana fai wolpun nenike ka fai kuꞌpuke ommo empo nu uma plai ka fai koke ommo empo uma plai noklene.
23 Empo fika ka yene fei yina romaula kinini waiye mow empo romaula,
empo ki koloki kore,
ki ese kem romaula plola kore plau?’
24 “Ka wu yirengkle nu uma empo neli eklene nanrona,
‘Pone pem romaula empo wu 10pla fotnait mee ka puna paipi pane mana empo yuna romaula resuklu 100 fotnait.’
25 “Ka nu nireni king nanrona,
‘Manwamo,
mana namo empo yuna romaula empo 100 fotnait pu.’
26 “Ka king yirengkle nu nanrona,
‘Ki kire mi alwone pone,
nu uma empo nunali ommo pu,
nu ese nuꞌpu plai kore,
ka nu fopi empo ommo onne,
ommo fika pitpitiri empo nu nunaline,
sa ki ese kuꞌpu kore.
27 Ka nu uma fopi empo iim kinini nire ki ese fei kaike yukaine king nuningkle,
uma namo pone ese pumale nu noloni mee ka puꞌflo nu rili namaplen empo ki.’ ”
Jisas pai taunwamo Jerusalem yukaine king
(Matyu 21.1-9; Mak 11.1-10; Jon 12.12-15)
28 Empo Jisas yoplo mi pekimo,
wu yemei yire fai ese paiyi pari Jerusalem.
Jesus Enters Jerusalem (Luk 19:28-44)
29 Empo wu pari plele moul alwola nu fai nouwne Oliv,
eklene mokoi Betfage ka Betani,
ka wu yawane disaipol plainre woneni risi painri.
Ka wu yireni wuyane nanrona,
30 “Yenyane paipi mokoi empo yeye nanri.
La yenyane paipi plele mokoi namo,
sa yenyane ese pulu donki wola wongke empo nu nuka yeliye.
Donki namo,
empo mana wongke fei waiye riri ka yuna waraiye onne.
Yenyane ese peingkome kapa ka pumane wu pane polopi mee.
31 La mana wongke yaline yenyane nanrona,
‘Yenyane peingkome donki namo fai pangke fika?’
Sa yenyane ese pireni wu nanrona,
‘Manwamoc yire ese yangke ommo plai wu.’ ”
32 Mana plainre painri,
nulu ka donki nayeliye yukaine mi empo Jisas yireniye wuyane.
33 Empo wuyane neingkome kapa empo donki namo,
nu uma ripile empo donki namo naline wuyane nanrona,
“Yenyane peingkome donki namo fai pangke fika?”
34 Ka wuyane nirengkle nu nanrona,
“Manwamo yire ese yangke ommo plai wu.”
35 Rongka wuyane numane donki nane noloni Jisas.
Nu ningkla amplapi noneni donki kuma riri namo ka mewmew Jisas yulpari waiye donki kuma riri.
36 Empo wu waiye donki riri paiyiye rokoi,
pinuma mingklari ningklari amplapi nonengkle rokoi nole.
37 Empo wu paiyi plele eklene rokoi fai panrone moul alwola empo Oliv,
nu uma mingklari fai nupene Jisas nu ainem ka nangke mi wamo ka nerernane noula empo God.
Nu nangke nanrona empo fika nu woluporo mirakol mingkla empo isi nu nulune.
38 Nu nangke mi kelo ka nire nanrona,
“God empo yangke uporo wamo king mee.
King mee empo yolowi noula empo Manwamo.”d
“Empo heven God wolpalo mone.
Mone mereri noula empo Manawamo,
waiye riri.”e
Jisas wiliye taun Jerusalem
39 Nu Farisi empo nakle nu pinuma neline namo nireni Jisas nanrona,
“Tikse,
yene mi yuforo nu uma empo nupenene yene namo sa nu ese fei nangke mi kore.”
40 Ka Jisas yirengkle nu nanrona,
“Ki kire mi alwone pone,
la nu misarulu,
sa nu roma ese mi nufu ka nereri noula empo Manwamo.”
41 Empo Jisas paiyi eklene Jerusalem wu yulu taun ka wili.
42 Ka yire nanrona,
“Jerusalem,
kaire mele ki wolyapa yene ese namale ommo fai ese yangke yene ese waiye woluporo.
Ka ommo empo pekinenene namo sa yene fei namale nu.
43 Kingke nu uma empo fai wolnenine yene,
nu ese pike nem pari mamane puꞌku wamo empo yene.
Ka nu ese naukiri reprepo empo yene.
44 Nu ese neklire yene ka nisnoli yene.
Nu ese nangke nanrona yene ka kongkom yeneni fopi empo naine monre yeneni.
Ka nu ese fei nimane roma wongke raune wiye wongke riri,
empo fika yene fei namale God empo yolowi fai mewmew yene.”
Jisas paiyi pari waiye tempol
(Matyu 21.12-16; Mak 11.15-18; Jon 2.13-16)
45 Ka Jisas paiyi pari monre empo tempol ka yemyangklupu uma empo nenrune ommo.
46 Ka wu yirengkle nu nanrona,
“Mi empo God yire nanrona,
‘Mow kinini ese waiye yukaine mow fai nesapune.’f
Ka pone kepe pangke wu yemei yukaine koii empo nu uma fai pekinuꞌpune ommo ka painri pekinainene.”g
47 Kaire kaire wu fai paiyi yoplo yukuleye nu uma empo tempol.
Ka nu bikprish ka nu uma empo namalene lo ka nu uma fai painri risine nu pinuma napu rokoi nire fai ese nufu Jisas ri.
48 Ka nu fei napu rokoi wongke uporo fai nu ese nufu wu ri,
empo fika pinuma mingklari wolpeni wamo fai nupu mi empo wu.